| | ᠪᠤᠭᠤᠷᠴᠤ ᠠᠷᠤᠯᠤᠨ ᠤᠪᠤᠭᠲᠤ ᠨᠠᠬᠤ ᠪᠠᠶᠠᠨ ᠤ ᠬᠦᠪᠡᠭᠦᠨ᠂ ᠴᠢᠩᠭᠢᠰ ᠬᠠᠭᠠᠨ ᠤ ᠳᠦᠷᠪᠡᠨ | ᠬᠦᠯᠦᠭ ᠤᠨ ᠨᠢᠭᠡ᠃ | 1177 ᠤᠨ ᠳᠤ ᠪᠤᠭᠤᠷᠴᠤ ᠠᠳᠤᠭᠤ ᠬᠠᠷᠠᠵᠤ ᠪᠠᠶᠢᠬᠤ ᠳᠠᠭᠠᠨ᠂ ᠨᠠᠢᠮᠠᠨ ᠰᠢᠷᠭᠠ ᠪᠠᠨ ᠳᠡᠭᠡᠷᠡᠮ ᠳᠤ | ᠬᠤᠯᠠᠭᠠᠶᠢᠯᠠᠭᠳᠠᠭᠠᠳ ᠨᠡᠬᠡᠵᠦ ᠶᠠᠪᠤᠵᠤ ᠪᠠᠶᠢᠭᠰᠠᠨ ᠲᠡᠮᠦᠵᠢᠨ ᠲᠠᠢ ᠠᠩᠬᠠ ᠠᠭᠤᠯᠵᠠᠭᠰᠠᠨ ᠪᠠᠶᠢᠵᠠᠢ᠃ ᠲᠤᠬᠠᠢ ᠶᠢᠨ | ᠦᠶᠡ ᠳᠤ ᠲᠡᠷᠡ ᠰᠠᠶ᠋ᠢ ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ ᠪᠠᠶᠢᠪᠠ᠃ ᠡᠭᠦᠨ ᠢᠶᠠᠷ ᠦᠵᠡᠬᠦᠯᠡᠷ ᠲᠡᠷᠡ 1165 ᠤᠨ ᠳᠤ | ᠲᠦᠷᠦᠭᠰᠡᠨ ᠬᠦᠮᠦᠨ ᠪᠤᠯᠤᠯᠲᠠᠢ᠃ ᠲᠡᠮᠦᠵᠢᠨ ᠡᠨᠡ ᠬᠦ ᠭᠠᠪᠰᠢᠭᠠᠢ ᠰᠡᠷᠭᠦᠯᠡᠩ ᠬᠦᠪᠡᠭᠦᠨ ᠲᠠᠢ ᠨᠦᠬᠦᠷᠯᠡᠵᠡᠢ᠃ | ᠪᠤᠭᠤᠷᠴᠤ ᠲᠡᠮᠦᠵᠢᠨ ᠢ ᠬᠠᠪᠰᠤᠷᠴᠤ ᠪᠠᠶᠢᠭᠠᠳ ᠨᠠᠢᠮᠠᠨ ᠰᠢᠷᠭᠠ ᠶᠢ ᠨᠢ ᠳᠡᠭᠡᠷᠡᠮᠴᠢᠳ ᠠᠴᠠ ᠪᠤᠯᠢᠶᠠᠨ ᠠᠪᠴᠤ | ᠦᠭᠪᠡ᠃ | 1178 ᠤᠨ ᠳᠤ ᠲᠡᠮᠦᠵᠢᠨ ᠦᠪᠡᠷ ᠤᠨ ᠳᠡᠭᠦᠦ ᠪᠡᠯᠭᠦᠳᠡᠢ ᠶᠢ ᠢᠯᠡᠭᠡᠵᠦ ᠪᠤᠭᠤᠷᠴᠤ ᠶᠢ ᠤᠷᠢᠵᠠᠢ᠃ | ᠪᠤᠭᠤᠷᠴᠤ ᠦᠴᠦᠬᠡᠨ ᠴᠦ ᠲᠠᠲᠠᠭᠠᠯᠵᠠᠭᠰᠠᠨ ᠦᠭᠡᠢ ᠪᠠᠷ ᠲᠡᠮᠦᠵᠢᠨ ᠤ ᠳᠡᠷᠭᠡᠳᠡ ᠢᠷᠡᠭᠰᠡᠨ ᠪᠠᠶᠢᠵᠠᠢ᠃ | ᠲᠡᠨᠳᠡ ᠠᠴᠠ ᠬᠤᠶᠢᠰᠢ ᠪᠤᠭᠤᠷᠴᠤ ᠲᠡᠮᠦᠵᠢᠨ ᠢ ᠰᠠᠯᠤᠯ ᠦᠭᠡᠢ ᠳᠠᠭᠠᠵᠤ᠂ ᠮᠤᠩᠭᠤᠯ ᠤᠨ ᠦᠨᠳᠦᠷᠯᠢᠭ ᠲᠠᠬᠢ | ᠤᠯᠠᠨ ᠠᠶᠢᠮᠠᠭ ᠤᠪᠤᠭᠲᠠᠨ ᠢ ᠨᠢᠭᠡᠳᠬᠡᠬᠦ ᠦᠢᠯᠡᠰ ᠲᠤ ᠦᠪᠡᠷ ᠤᠨ ᠬᠤᠪᠢ ᠨᠡᠮᠡᠷᠢ ᠪᠠᠨ ᠦᠵᠡᠭᠦᠯᠦᠭᠰᠡᠨ ᠪᠢᠯᠡ᠃ | 1189 ᠤᠨ ᠳᠤ ᠲᠡᠮᠦᠵᠢᠨ ᠬᠠᠮᠤᠭ ᠮᠤᠩᠭᠤᠯ ᠤᠨ ᠬᠠᠭᠠᠨ ᠢᠶᠠᠷ ᠡᠷᠭᠦᠮᠵᠢᠯᠡᠭᠳᠡᠵᠦ᠂ ᠪᠤᠭᠤᠷᠴᠤ ᠶᠢ | ᠬᠠᠮᠤᠭ ᠤᠨ ᠠᠬᠠᠯᠠᠬᠤ ᠨᠡᠶᠢᠲᠡ ᠶᠢᠨ ᠵᠠᠬᠢᠷᠤᠭᠴᠢ ᠪᠤᠯᠭᠠᠵᠠᠢ᠃ | 1190 ᠤᠨ ᠳᠤ ᠲᠡᠮᠦᠵᠢᠨ ᠵᠠᠮᠤᠬᠠ ᠲᠠᠢ ᠳᠠᠶᠢᠳᠤᠭᠰᠠᠨ ︽ᠠᠷᠪᠠᠨ ᠭᠤᠷᠪᠠᠨ ᠬᠦᠷᠢᠶᠡᠨ ᠤ | ᠪᠠᠶᠢᠯᠳᠤᠭᠠᠨ︾ ᠡᠭᠦᠰᠪᠡ᠃ ᠡᠨᠡ ᠤᠳᠠᠭᠠ ᠶᠢᠨ ᠪᠠᠶᠢᠯᠳᠤᠭᠠᠨ ᠳᠤ ᠲᠡᠮᠦᠵᠢᠨ ᠦᠪᠡᠷ ᠤᠨ ᠠᠷᠪᠠᠨ ᠭᠤᠷᠪᠠᠨ | ᠬᠦᠷᠢᠶᠡᠨ ᠠᠴᠠ ᠪᠠᠨ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠳᠠᠶᠢᠴᠢᠯᠠᠨ᠂ ᠵᠠᠮᠤᠬᠠ ᠶᠢ ᠡᠰᠡᠷᠭᠦᠴᠡᠨ ᠪᠠᠶᠢᠯᠳᠤᠵᠠᠢ᠃ | ᠪᠠᠶᠢᠯᠳᠤᠭᠠᠨ ᠳᠤ ᠤᠷᠤᠯᠴᠠᠭᠰᠠᠨ ᠬᠤᠶᠠᠳᠤᠭᠠᠷ ᠬᠦᠷᠢᠶᠡ ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ ᠦᠪᠡᠷ ᠤᠨ ᠪᠡᠶᠡ ᠪᠤᠯᠤᠨ | ᠬᠠᠭᠠᠨ ᠤ ᠬᠦᠪᠡᠭᠦᠳ᠂ ᠠᠨᠳᠠ ᠨᠦᠬᠦᠳ᠂ ᠨᠤᠶᠠᠳ ᠨᠠᠷ ᠤᠨ ᠳᠠᠭᠠᠭᠰᠠᠳ᠂ ᠢᠵᠠᠭᠤᠷᠲᠠᠨ ᠵᠢᠴᠢ ᠤᠶᠢᠷᠠ ᠪᠤᠯᠬᠤ | ᠬᠡᠰᠢᠭᠲᠡᠨ ᠨᠠᠷ ᠢᠶᠠᠷ ᠪᠦᠷᠢᠯᠳᠦᠵᠡᠢ᠃ ᠡᠭᠦᠨ ᠠᠴᠠ ᠪᠤᠭᠤᠷᠴᠤ ᠬᠤᠶᠠᠳᠤᠭᠠᠷ ᠬᠦᠷᠢᠶᠡᠨ ᠤ ᠴᠡᠷᠢᠭ ᠠᠩᠭᠢ ᠳᠤ | ᠤᠷᠤᠯᠴᠠᠭᠠᠳ᠂ ᠵᠠᠮᠤᠬᠠ ᠲᠠᠢ ᠳᠠᠶᠢᠳᠤᠭᠰᠠᠨ ᠢ ᠮᠡᠳᠡᠵᠦ ᠪᠤᠯᠤᠨᠠ᠃ | 1190 ᠤᠨ ᠳᠤ ᠬᠡᠷᠡᠶᠢᠳ ᠤᠨ ᠸᠠᠩ ᠬᠠᠨ ᠲᠤᠭᠤᠷᠢᠯ ᠨᠠᠢᠮᠠᠨ ᠠᠶᠢᠮᠠᠭ ᠲᠠᠢ ᠪᠠᠶᠢᠯᠳᠤᠵᠤ ᠶᠡᠬᠡᠲᠡ | ᠳᠡᠶᠢᠯᠦᠭᠳᠡᠭᠡᠳ᠂ ᠲᠡᠮᠦᠵᠢᠨ ᠠᠴᠠ ᠲᠤᠰᠠᠯᠠᠮᠵᠢ ᠭᠤᠶᠤᠪᠠ᠃ ᠴᠢᠩᠭᠢᠰ ᠬᠠᠭᠠᠨ ᠡᠨᠡ ᠴᠢᠮᠡᠭᠡ ᠶᠢ ᠤᠯᠵᠤ | ᠠᠪᠤᠮᠠᠭᠴᠠ ᠴᠡᠷᠢᠭ ᠵᠠᠰᠠᠨ ᠪᠤᠭᠤᠷᠴᠤ᠂ ᠮᠤᠬᠤᠯᠠᠢ ᠵᠡᠷᠭᠡ ᠦᠷᠯᠦᠭ ᠲᠡᠭᠡᠨ ᠴᠡᠷᠢᠭ ᠦᠭᠴᠦ ᠲᠤᠰᠠᠯᠠᠭᠤᠯᠬᠤ ᠪᠠᠷ | ᠶᠠᠪᠤᠭᠤᠯᠪᠠ᠃ ᠪᠤᠭᠤᠷᠴᠤ᠂ ᠮᠤᠬᠤᠯᠠᠢ ᠨᠠᠷ ᠨᠠᠢᠮᠠᠨ ᠤ ᠴᠡᠷᠢᠭ ᠢ ᠳᠡᠶᠢᠯᠵᠤ᠂ ᠸᠠᠩ ᠬᠠᠨ ᠲᠤᠭᠤᠷᠢᠯ ᠤᠨ ᠬᠦᠪᠡᠭᠦᠨ | ᠪᠠ ᠡᠮᠡᠰ ᠬᠡᠦᠬᠡᠳ ᠵᠢᠴᠢ ᠡᠷᠦᠬᠡ ᠢᠷᠭᠡᠳ ᠪᠦᠭᠦᠳᠡ ᠶᠢ ᠨᠢ ᠠᠪᠤᠷᠠᠨ ᠭᠠᠷᠭᠠᠪᠠ᠃ | 1203 ᠤᠨ ᠳᠤ ᠴᠢᠩᠭᠢᠰ ᠬᠠᠭᠠᠨ ︽ᠮᠠᠭᠤ ᠦᠨᠳᠦᠷ ᠤᠨ ᠪᠠᠶᠢᠯᠳᠤᠭᠠᠨ︾ ᠳᠤ ᠬᠡᠷᠡᠶᠢᠳ ᠤᠨ ᠸᠠᠩ | ᠬᠠᠨ ᠲᠤᠭᠤᠷᠢᠯ ᠲᠠᠢ ᠰᠢᠷᠦᠭᠦᠨ ᠪᠠᠶᠢᠯᠳᠤᠵᠤ᠂ ᠬᠦᠨᠳᠦ ᠬᠤᠬᠢᠷᠠᠯ ᠠᠮᠰᠠᠭᠰᠠᠨ ᠪᠢᠯᠡ᠃ ᠡᠨᠡ ᠤᠳᠠᠭᠠ ᠶᠢᠨ | ᠪᠠᠶᠢᠯᠳᠤᠭᠠᠨ ᠳᠤ ᠪᠤᠭᠤᠷᠴᠤ ᠮᠤᠷᠢ ᠪᠠᠨ ᠠᠯᠠᠭᠤᠯᠵᠤ᠂ ᠳᠠᠶᠢᠰᠤᠨ ᠤ ᠬᠦᠭᠯᠡᠭᠰᠡᠨ ᠮᠤᠷᠢ ᠶᠢ ᠪᠠᠷᠢᠵᠤ ᠤᠨᠤᠭᠠᠳ ᠠᠮᠢ | ᠭᠠᠷᠴᠠᠢ᠃ ᠬᠠᠶᠢᠷᠠᠲᠤ ᠬᠦᠯᠦᠭ ᠪᠤᠭᠤᠷᠴᠤ ᠶᠢᠨ ᠢᠶᠠᠨ ᠡᠷᠡᠭᠦᠯ ᠮᠡᠨᠳᠦ ᠪᠠᠷ ᠲᠤᠲᠠᠭᠠᠨ ᠭᠠᠷᠴᠤ ᠢᠷᠡᠭᠰᠡᠨ ᠢ | ᠬᠠᠷᠠᠭᠠᠳ᠂ ᠴᠢᠩᠭᠢᠰ ᠬᠠᠭᠠᠨ ᠡᠪᠴᠢᠭᠦᠦ ᠪᠠᠨ ᠳᠡᠯᠡᠳᠴᠦ ᠮᠦᠩᠬᠡ ᠲᠡᠭᠷᠢ ᠦᠭᠡᠳᠡ ᠬᠠᠨᠳᠤᠵᠤ ᠤᠭᠢᠯᠠᠭᠰᠠᠨ ᠭᠡᠨᠡ | ᠃ ᠲᠤᠰ ᠵᠢᠯ ᠤᠨ ᠨᠠᠮᠤᠷ ᠪᠤᠭᠤᠷᠴᠤ ᠴᠢᠩᠭᠢᠰ ᠬᠠᠭᠠᠨ ᠢ ᠳᠠᠭᠠᠯᠳᠤᠨ᠂ ︽ᠵᠡᠵᠡᠭᠡᠷ ᠦᠨᠳᠦᠷ ᠤᠨ ᠪᠠᠶᠢᠯᠳᠤᠭᠠᠨ︾ | ᠳᠤ ᠬᠡᠷᠡᠶᠢᠳ ᠠᠶᠢᠮᠠᠭ ᠢ ᠲᠤᠶᠢᠯᠪᠤᠷᠢᠲᠠᠢ ᠮᠦᠬᠦᠭᠡᠵᠡᠢ᠃ | 1204 ᠤᠨ ᠳᠤ ᠪᠤᠭᠤᠷᠴᠤ ᠴᠢᠩᠭᠢᠰ ᠬᠠᠭᠠᠨ ᠢ ᠳᠠᠭᠠᠵᠤ ︽ᠨᠠᠬᠤ ᠬᠤᠨ ᠤ ᠬᠠᠳᠬᠤᠯᠳᠤᠭᠠᠨ︾ ᠳᠤ | ᠤᠷᠤᠯᠴᠠᠭᠠᠳ ᠬᠦᠴᠦᠷᠬᠡᠭ ᠨᠠᠢᠮᠠᠨ ᠠᠶᠢᠮᠠᠭ ᠢ ᠲᠦᠪᠰᠢᠳᠬᠡᠪᠡ᠃ | 1206 ᠤᠨ ᠳᠤ ᠴᠢᠩᠭᠢᠰ ᠬᠠᠭᠠᠨ ᠮᠤᠩᠭᠤᠯ ᠤᠨ ᠦᠨᠳᠦᠷᠯᠢᠭ ᠲᠠᠬᠢ ᠤᠯᠠᠨ ᠠᠶᠢᠮᠠᠭ ᠤᠭᠰᠠᠭᠠ ᠶᠢ | ᠨᠢᠭᠡᠳᠬᠡᠭᠰᠡᠨ ᠰᠠᠭᠤᠷᠢ ᠳᠡᠭᠡᠷᠡ᠂ ᠶᠡᠭᠡ ᠮᠤᠩᠭᠤᠯ ᠤᠯᠤᠰ ᠤᠨ ᠬᠠᠭᠠᠨᠲᠤ ᠲᠦᠷᠦ ᠶᠢ ᠲᠤᠩᠬᠠᠭᠯᠠᠬᠤ ᠠᠩᠬᠠᠳᠠᠭᠴᠢ | ᠶᠡᠭᠡ ᠬᠤᠷᠠᠯᠳᠠᠢ ᠶᠢ ᠤᠨᠤᠨ ᠮᠦᠷᠡᠨ ᠤ ᠲᠡᠷᠢᠭᠦᠨᠡ ᠳᠡᠯᠢᠭᠦᠨ ᠪᠤᠯᠳᠠᠭ ᠲᠠᠬᠢ ᠴᠢᠩᠭᠢᠰ ᠬᠠᠭᠠᠨ ᠤ ᠤᠷᠳᠤᠨ ᠳᠤ | ᠬᠤᠷᠠᠯᠳᠤᠭᠤᠯᠵᠠᠢ᠃ ᠭᠠᠪᠢᠶᠠᠲᠠᠨ ᠢ ᠱᠠᠩᠨᠠᠵᠤ᠂ ᠲᠤᠰᠢᠶᠠᠯᠲᠠᠨ ᠢ ᠲᠤᠮᠢᠯᠠᠬᠤ ᠳᠠᠭᠠᠨ ᠪᠤᠭᠤᠷᠴᠤ ᠶᠢᠨ ᠭᠠᠪᠢᠶᠠ | ᠵᠢᠳᠬᠦᠯ ᠢ ᠲᠤᠭᠠᠴᠢᠵᠤ ᠮᠠᠭᠲᠠᠭᠰᠠᠨ ᠨᠢ᠄ | ︽ᠨᠠᠮᠠ ᠶᠢ ᠵᠠᠯᠠᠭᠤ ᠪᠠᠶᠢᠬᠤ ᠴᠠᠭ ᠲᠤ | ᠨᠠᠢᠮᠠᠨ ᠰᠢᠷᠭᠠ ᠡᠷᠢᠬᠦ ᠦᠶᠡ ᠳᠤ | ᠨᠠᠷᠠᠨ ᠤᠷᠭᠤᠬᠤ ᠬᠢᠷᠢ ᠳᠤ | ᠨᠠᠳᠠ ᠲᠠᠢ ᠠᠭᠤᠯᠵᠠᠭᠰᠠᠨ ᠠᠴᠠ ᠬᠤᠶᠢᠰᠢ | ᠨᠠᠰᠤᠲᠠ ᠦᠨᠡᠨ ᠢᠶᠠᠷ ᠵᠢᠳᠬᠦᠭᠰᠡᠨ | ᠨᠠᠬᠤ ᠪᠠᠶᠠᠨ ᠤ ᠬᠦᠪᠡᠭᠦᠨ | ᠨᠠᠶᠢᠷᠲᠤ ᠬᠦᠯᠦᠭ ᠪᠤᠭᠤᠷᠴᠤ ᠮᠢᠨᠢ︕ | ᠠᠶᠢᠯ ᠵᠠᠭᠤᠷᠠ ᠶᠠᠪᠤᠬᠤ ᠳᠤ | ᠠᠯᠠᠭ ᠪᠢᠷᠠᠭᠤ ᠮᠡᠲᠦ ᠨᠤᠮᠤᠬᠠᠨ ᠪᠠᠶᠢᠪᠠᠴᠤ | ᠠᠯᠠᠯᠴᠠᠬᠤ ᠳᠠᠶᠢᠰᠤᠨ ᠲᠠᠢ ᠠᠭᠤᠯᠵᠠᠬᠤ ᠳᠤ | ᠠᠷᠰᠯᠠᠨ ᠪᠠᠷᠰ ᠮᠡᠲᠦ ᠲᠤᠭᠰᠢᠷᠠᠵᠤ | ᠠᠶᠤᠯᠲᠤ ᠳᠠᠶᠢᠰᠤᠨ ᠢ ᠳᠠᠷᠤᠬᠤ ᠶᠢᠨ ᠲᠦᠯᠦᠭᠡ | ᠠᠮᠢ ᠪᠡᠶᠡ ᠪᠠᠨ ᠦᠯᠦ ᠬᠠᠶᠢᠷᠠᠯᠠᠭᠴᠢ | ᠠᠴᠢᠲᠤ ᠬᠦᠯᠦᠭ ᠪᠤᠭᠤᠷᠴᠤ ᠮᠢᠨᠢ︕ | ᠬᠠᠨᠢᠯᠠᠵᠤ ᠶᠠᠪᠤᠬᠤ ᠴᠠᠭ ᠲᠤ | ᠬᠠᠷᠠ ᠪᠢᠷᠠᠭᠤ ᠮᠡᠲᠦ ᠨᠤᠮᠤᠬᠠᠨ ᠪᠠᠶᠢᠪᠠᠴᠤ | ᠬᠤᠳᠬᠤᠯᠳᠤᠬᠤ ᠳᠠᠶᠢᠰᠤᠨ ᠲᠠᠢ ᠲᠤᠯᠬᠤ ᠴᠠᠭ ᠲᠤ | ᠬᠠᠷᠴᠠᠭᠠᠢ ᠱᠤᠩᠬᠤᠷ ᠮᠡᠲᠦ ᠲᠤᠭᠰᠢᠷᠠᠵᠤ | ᠬᠠᠷᠢ ᠶᠢᠨ ᠳᠠᠶᠢᠰᠤᠨ ᠢ ᠳᠠᠷᠤᠬᠤ ᠶᠢᠨ ᠲᠦᠯᠦᠭᠡ | ᠬᠠᠯᠠᠭᠤᠨ ᠠᠮᠢ ᠪᠠᠨ ᠦᠯᠦ ᠪᠤᠳᠤᠭᠴᠢ | ᠬᠠᠶᠢᠷᠠᠲᠤ ᠬᠦᠯᠦᠭ ᠪᠤᠭᠤᠷᠴᠤ ᠮᠢᠨᠢ︕ | ᠨᠠᠭᠠᠳᠤᠨ ᠶᠠᠪᠤᠬᠤ ᠴᠠᠭ ᠲᠤ | ᠨᠠᠮᠤᠷ ᠤᠨ ᠤᠨᠤᠭᠠ ᠮᠡᠲᠦ ᠡᠶᠡᠯᠳᠡᠭ ᠪᠤᠯᠪᠠᠴᠤ | ᠨᠠᠨᠴᠢᠯᠳᠤᠬᠤ ᠳᠠᠶᠢᠰᠤᠨ ᠲᠠᠢ ᠤᠴᠠᠷᠠᠬᠤ ᠳᠤ | ᠨᠠᠴᠢᠨ ᠱᠤᠩᠬᠤᠷ ᠮᠡᠲᠦ ᠳᠤᠪᠲᠤᠯᠵᠤ | ᠨᠠᠰᠤᠨ ᠢᠮᠠᠭᠲᠠ ᠵᠢᠳᠬᠦᠭᠰᠡᠨ | ᠨᠠᠶᠢᠵᠠ ᠬᠦᠯᠦᠭ ᠪᠤᠭᠤᠷᠴᠤ ᠮᠢᠨᠢ︕︾ | ᠪᠤᠭᠤᠷᠴᠤ ᠶᠢ ᠬᠤᠶᠠᠳᠤᠭᠠᠷ ᠭᠠᠪᠢᠶᠠᠲᠠᠨ ᠢᠶᠠᠷ ᠱᠠᠩᠨᠠᠵᠤ᠂ ᠪᠠᠷᠠᠭᠤᠨ ᠭᠠᠷ ᠤᠨ ᠠᠯᠲᠠᠢ ᠲᠡᠷᠡᠯᠡᠬᠦᠨ ᠤ | ᠲᠦᠮᠡᠨ ᠤ ᠨᠤᠶᠠᠨ ᠪᠤᠯᠭᠠᠭᠰᠠᠨ ᠪᠦᠭᠡᠳ ᠪᠠᠷᠠᠭᠤᠨ ᠭᠠᠷ ᠤᠨ ᠭᠤᠷᠪᠠᠨ ᠲᠦᠮᠡ ᠨᠠᠢᠮᠠᠨ ᠮᠢᠩᠭᠠᠨ ᠴᠡᠷᠢᠭ ᠤᠨ | ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠪᠤᠯᠭᠠᠪᠠ᠃ | 1209 ᠤᠨ ᠠᠴᠠ 1218 ᠤᠨ ᠬᠦᠷᠲᠡᠯᠡ ᠴᠢᠩᠭᠢᠰ ᠬᠠᠭᠠᠨ ᠲᠠᠩᠭᠤᠳ ᠢ ᠪᠠᠶᠢᠯᠳᠤᠨ | ᠲᠦᠪᠰᠢᠳᠬᠡᠵᠦ᠂ ᠠᠯᠲᠠᠨ ᠤᠯᠤᠰ ᠢ ᠪᠠᠶᠢᠯᠳᠤᠨ ᠨᠤᠮᠤᠬᠠᠳᠬᠠᠵᠤ᠂ ᠬᠢᠳᠠᠨ ᠤᠯᠤᠰ ᠢ ᠮᠦᠬᠦᠭᠡᠭᠡᠳ᠂ ᠰᠠᠷᠲᠠᠭᠤᠯ ︵ | ᠬᠤᠷᠽᠠᠮ︶ ᠤᠯᠤᠰ ᠢ ᠳᠠᠶᠢᠯᠠᠬᠤ ᠪᠡᠯᠡᠳᠬᠡᠯ ᠢᠶᠠᠨ ᠱᠠᠯᠠᠪᠳᠠᠨ ᠬᠢᠵᠦ ᠪᠠᠶᠢᠪᠠ᠃ ᠡᠨᠡ ᠦᠶᠡ ᠳᠤ ᠲᠡᠭᠦᠨ ᠤ | ᠬᠠᠶᠢᠷᠠᠲᠤ ᠬᠠᠲᠤᠨ ᠶᠢᠰᠦᠢ ᠠᠴᠠ ᠬᠠᠭᠠᠨ ᠤᠷᠤ ᠶᠢᠨ ᠵᠠᠯᠭᠠᠮᠵᠢᠯᠠᠭᠴᠢ ᠪᠠᠨ ᠲᠤᠭᠲᠠᠭᠠᠬᠤ ᠲᠤᠬᠠᠢ ᠰᠠᠨᠠᠭᠤᠯᠭᠠ | ᠳᠤᠷᠠᠳᠴᠠᠢ᠃ ᠴᠢᠩᠭᠢᠰ ᠬᠠᠭᠠᠨ ᠶᠢᠰᠦᠢ ᠬᠠᠲᠤᠨ ᠤ ᠰᠠᠨᠠᠭᠤᠯᠭᠠ ᠶᠢ ᠵᠦᠪᠰᠢᠶᠡᠷᠡᠵᠦ᠂ ᠳᠦᠷᠪᠡᠨ ᠬᠦᠪᠡᠭᠦᠨ ᠪᠠ | ᠰᠢᠲᠠᠷ ᠦᠷᠯᠦᠭ ᠨᠠᠷ ᠲᠠᠢ ᠪᠠᠨ ᠵᠦᠪᠳᠡᠭᠰᠡᠨ ᠪᠠᠶᠢᠵᠠᠢ᠃ ᠡᠭᠦᠨ ᠳᠤ ᠵᠦᠴᠢ᠂ ᠴᠠᠭᠠᠳᠠᠢ ᠬᠤᠶᠠᠭᠤᠯᠠ ᠬᠡᠷᠡᠭᠦᠯ | ᠪᠤᠯᠤᠭᠰᠠᠨ ᠳᠤ ᠪᠤᠭᠤᠷᠴᠤ ᠵᠦᠴᠢ ᠶᠢᠨ ᠭᠠᠷ ᠠᠴᠠ ᠲᠠᠲᠠᠵᠤ᠂ ᠴᠠᠭᠠᠳᠠᠢ ᠶᠢᠨ ᠭᠠᠷ ᠠᠴᠠ ᠮᠤᠬᠤᠯᠠᠢ ᠲᠠᠲᠠᠵᠤ᠂ | ᠬᠡᠷᠡᠭᠦᠯ ᠢ ᠨᠢ ᠰᠠᠯᠭᠠᠵᠤ᠂ ᠵᠤᠳᠤᠯᠳᠤᠬᠤ ᠶᠢ ᠨᠢ ᠵᠤᠭᠰᠤᠭᠠᠭᠰᠠᠨ ᠪᠢᠯᠡ᠃ | 1219 ᠤᠨ ᠠᠴᠠ 1225 ᠤᠨ ᠬᠦᠷᠲᠡᠯᠡ᠂ ᠪᠤᠭᠤᠷᠴᠤ ᠴᠢᠩᠭᠢᠰ ᠬᠠᠭᠠᠨ ᠢ ᠳᠠᠭᠠᠯᠳᠤᠨ ᠰᠠᠷᠲᠠᠭᠤᠯ | ᠤᠯᠤᠰ ᠤᠨ ᠪᠤᠬᠠᠷ᠂ ᠰᠠᠮᠠᠷᠺᠠᠨᠳ᠋ ᠵᠡᠷᠭᠡ ᠭᠠᠵᠠᠷ ᠢᠶᠠᠷ ᠪᠠᠶᠢᠯᠳᠤᠵᠤ ᠶᠠᠪᠤᠪᠠ᠃ | 1221 ᠤᠨ ᠳᠤ ᠵᠦᠴᠢ᠂ ᠴᠠᠭᠠᠳᠠᠢ᠂ ᠦᠭᠡᠳᠡᠢ ᠭᠤᠷᠪᠠ ᠬᠠᠭᠠᠨ ᠡᠴᠢᠭᠡ ᠶᠢᠨ ᠵᠠᠷᠯᠢᠭ ᠢᠶᠠᠷ ᠲᠠᠪᠤᠨ | ᠲᠦᠮᠡᠨ ᠴᠡᠷᠢᠭ ᠳᠠᠶᠢᠴᠢᠯᠠᠨ᠂ ᠰᠠᠷᠲᠠᠭᠤᠯ ᠤᠯᠤᠰ ᠤᠨ ᠡᠷᠲᠡᠨ ᠤ ᠨᠡᠶᠢᠰᠯᠡᠯ ᠦᠷᠭᠡᠨ᠋ᠴᠢ ᠬᠤᠲᠠ ᠶᠢ ᠪᠦᠰᠡᠯᠡᠨ | ᠪᠠᠶᠢᠯᠳᠤᠪᠠ᠃ ᠬᠡᠳᠦᠨ ᠰᠠᠷᠠ ᠪᠠᠶᠢᠯᠳᠤᠭᠠᠳ ᠬᠤᠲᠠ ᠶᠢ ᠡᠵᠡᠯᠡᠨ ᠡᠰᠡ ᠴᠢᠳᠠᠪᠠ᠃ ᠤᠴᠢᠷ ᠨᠢ ᠬᠤᠲᠠᠨ ᠤ ᠴᠡᠷᠢᠭ | ᠠᠷᠠᠳ ᠪᠠᠭᠠᠲᠤᠷᠯᠢᠭ ᠢᠶᠠᠷ ᠡᠰᠡᠷᠭᠦᠴᠡᠨ ᠪᠠᠶᠢᠯᠳᠤᠭᠰᠠᠨ ᠨᠢ ᠭᠤᠤᠯ ᠰᠢᠯᠲᠠᠭᠠᠨ ᠪᠤᠯᠪᠠᠴᠤ ᠵᠦᠴᠢ᠂ ᠴᠠᠭᠠᠳᠠᠢ | ᠬᠤᠶᠠᠷ ᠲᠤᠰ ᠬᠤᠲᠠ ᠶᠢ ᠲᠤᠰ ᠲᠤᠰ ᠤᠨ ᠡᠵᠡᠮᠰᠢᠯ ᠨᠤᠲᠤᠭ ᠲᠤ ᠪᠠᠭᠲᠠᠭᠳᠠᠨᠠ ᠭᠡᠵᠦ ᠪᠤᠯᠢᠶᠠᠯᠳᠤᠵᠤ᠂ | ᠬᠤᠲᠠ ᠶᠢ ᠪᠠᠶᠢᠯᠳᠤᠬᠤ ᠲᠠᠯᠠ ᠪᠠᠷ ᠨᠠᠵᠠᠭᠠᠶᠢᠷᠠᠭᠰᠠᠨ ᠨᠢ ᠪᠠᠰᠠ ᠨᠢᠭᠡᠨ ᠴᠢᠬᠤᠯᠠ ᠰᠢᠯᠲᠠᠭᠠᠨ ᠪᠤᠯᠬᠤ ᠶᠤᠮ᠃ ᠡᠨᠡ | ᠪᠠᠶᠢᠳᠠᠯ ᠢ ᠪᠤᠭᠤᠷᠴᠤ ᠤᠯᠵᠤ ᠰᠤᠨᠤᠰᠤᠮᠠᠭᠴᠠ ᠦᠳᠳᠡᠷ ᠲᠦᠷᠭᠡᠨ ᠴᠢᠩᠭᠢᠰ ᠬᠠᠭᠠᠨ ᠳᠤ ᠮᠡᠳᠡᠭᠦᠯᠦᠭᠰᠡᠨ ᠪᠠᠶᠢᠵᠠᠢ᠃ | ᠴᠢᠩᠭᠢᠰ ᠬᠠᠭᠠᠨ ᠬᠤᠶᠠᠷ ᠡᠯᠴᠢ ᠲᠤᠮᠢᠯᠠᠨ ᠶᠠᠪᠤᠭᠤᠯᠵᠤ᠂ ᠦᠭᠡᠳᠡᠢ ᠪᠠᠷ ᠪᠦᠬᠦ ᠴᠡᠷᠢᠭ ᠢ ᠶᠡᠷᠦᠩᠬᠡᠶᠢᠯᠡᠨ | ᠵᠠᠬᠢᠷᠤᠭᠤᠯᠤᠮᠠᠨᠵᠢᠨ ᠰᠠᠶ᠋ᠢ ᠦᠷᠭᠡᠨ᠋ᠴᠢ ᠬᠤᠲᠠ ᠶᠢ ᠪᠠᠶᠢᠯᠳᠤᠨ ᠡᠵᠡᠯᠡᠭᠡᠳ᠂ ᠪᠠᠶᠢᠯᠳᠤᠭᠠᠨ ᠤ ᠤᠯᠵᠠ ᠪᠠᠨ ᠬᠤᠪᠢ | ᠬᠤᠪᠢᠨ ᠳᠠᠭᠠᠨ ᠠᠪᠤᠭᠠᠳ᠂ ᠬᠠᠭᠠᠨ ᠡᠴᠢᠭᠡ ᠳᠡᠭᠡᠨ ᠬᠤᠪᠢᠳᠠᠵᠤ ᠦᠭᠭᠦᠭᠰᠡᠨ ᠦᠭᠡᠢ ᠠᠵᠢ᠃ ᠡᠭᠦᠨ ᠳᠤ ᠴᠢᠩᠭᠢᠰ | ᠬᠠᠭᠠᠨ ᠶᠡᠬᠡᠲᠡ ᠬᠢᠯᠢᠩᠨᠡᠭᠡᠳ᠂ ᠭᠤᠷᠪᠠᠨ ᠬᠦᠪᠡᠭᠦᠨ ᠲᠠᠢ ᠪᠠᠨ ᠭᠤᠷᠪᠠᠨ ᠡᠳᠦᠷ ᠠᠭᠤᠯᠵᠠᠭᠰᠠᠨ ᠦᠭᠡᠢ ᠪᠢᠯᠡ᠃ | ᠦᠨᠡᠨᠴᠢ ᠰᠢᠳᠤᠷᠭᠤ ᠪᠤᠭᠤᠷᠴᠤ ᠡᠨᠡ ᠪᠠᠶᠢᠳᠠᠯ ᠢ ᠬᠠᠷᠠᠭᠠᠳ᠂ ᠴᠢᠩᠭᠢᠰ ᠬᠠᠭᠠᠨ ᠳᠤ ᠢᠳᠬᠠᠨ ᠬᠡᠯᠡᠭᠰᠡᠨ | ᠨᠢ᠄ ︽ᠰᠠᠷᠲᠠᠭᠤᠯ ᠢ ᠪᠠᠶᠢᠯᠳᠤᠨ ᠡᠵᠡᠯᠡᠭᠡᠳ ᠡᠷᠬᠡᠰᠢᠶᠡᠯ ᠳᠡᠭᠡᠨ ᠤᠷᠤᠭᠤᠯᠵᠠᠢ᠃ ᠠᠳᠡᠬᠢ ᠬᠤᠲᠠ ᠪᠠ | ᠬᠡᠦᠬᠡᠳ ᠤᠨ ᠴᠢᠨᠢ ᠬᠤᠪᠢᠨ ᠳᠠᠭᠠᠨ ᠠᠪᠤᠭᠰᠠᠨ ᠡᠳ᠋ ᠬᠦᠷᠦᠩᠭᠡ ᠴᠦ ᠴᠦᠮ ᠬᠠᠭᠠᠨ ᠤ ᠮᠦᠨ ᠪᠢᠯᠡ ᠁︾ | ᠭᠡᠵᠡᠢ᠃ ᠴᠢᠩᠭᠢᠰ ᠬᠠᠭᠠᠨ ᠪᠤᠭᠤᠷᠴᠤ ᠶᠢᠨ ᠢᠳᠬᠠᠯ ᠢ ᠵᠦᠪᠰᠢᠶᠡᠷᠡᠭᠡᠳ᠂ ᠭᠤᠷᠪᠠᠨ ᠬᠦᠪᠡᠭᠦᠨ ᠲᠠᠢ ᠪᠠᠨ | ᠠᠭᠤᠯᠵᠠᠭᠰᠠᠨ ᠪᠠᠶᠢᠨᠠ᠃ | 1226 ᠤᠨ ᠳᠤ ᠪᠤᠭᠤᠷᠴᠤ ᠴᠢᠩᠭᠢᠰ ᠬᠠᠭᠠᠨ ᠢ ᠳᠠᠭᠠᠵᠤ᠂ ᠲᠠᠩᠭᠤᠳ ᠤᠯᠤᠰ ᠢ ᠳᠠᠶᠢᠯᠠᠷᠠ | ᠮᠤᠷᠳᠠᠭᠠᠳ᠂ ᠲᠡᠨᠳᠡ ᠨᠠᠰᠤ ᠪᠠᠷᠠᠪᠠ᠃ | |