ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠵᠠᠰᠠᠭ ᠤᠨ ᠢᠯᠡᠳᠭᠡᠯ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠣᠶᠣᠯ ᠡᠷᠳᠡᠨᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠡᠰᠡᠨ ᠲᠠᠶᠢᠱᠢ ︵ᠨᠢᠭᠡ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019/12/10
       ᠡᠰᠡᠨ ᠪᠤᠯ ᠤᠶᠢᠷᠠᠳ ᠤᠨ ᠵᠠᠬ᠎ᠠ ᠮᠢᠩᠭᠠᠨ ᠤ ᠬᠦᠮᠤᠨ ᠪᠤᠯᠤᠨ᠎ᠠ᠃ 1407 ᠤᠨ ᠳᠤ ᠲᠦᠷᠤᠪᠡ᠃ ᠳᠡᠭᠦᠨ ᠤ ᠡᠴᠢᠭᠡ ᠨᠢ ᠳᠤᠭᠤᠭᠠᠨ ᠳᠠᠶᠢᠱᠢ ᠭᠡᠳᠡᠭ ᠶᠤᠮ᠃ 1439 ᠤᠨ ᠳᠤ᠂ ᠡᠰᠡᠨ ᠡᠴᠢᠭᠡ ᠳᠤᠭᠤᠭᠠᠨ ᠳᠠᠶᠢᠱᠢ ᠶᠢᠨ ᠢᠶᠠᠨ ᠵᠡᠷᠭᠡ ᠭᠡᠷᠭᠡᠮ ᠢ ᠵᠠᠯᠭᠠᠮᠵᠢᠯᠠᠵᠤ ᠳᠠᠶᠢᠱᠢ ᠡᠷᠭᠦᠮᠵᠢᠯᠡᠭᠳᠡᠪᠡ᠃ 1444 ᠤᠨ ᠳᠤ᠂ ᠳᠤᠳᠠᠪᠤᠬ᠎ᠠ ︵ᠳᠠᠶᠢᠰᠦ᠋ᠡᠭ︶ ᠬᠠᠭᠠᠨ ᠤ ᠨᠡᠷ᠎ᠡ ᠪᠠᠷ ᠡᠰᠡᠨ ᠱᠠ ᠵᠧᠤ ᠸᠧᠢ ︵ᠬᠠᠷᠠᠭᠤᠯ︶ ᠳᠤ ᠡᠯᠴᠢ ᠳᠤᠮᠢᠯᠠᠨ ᠤᠴᠢᠭᠤᠯᠵᠤ ᠳᠡᠨᠳᠡᠬᠢ ᠡᠵᠡᠨ ᠨᠠᠠ ᠭᠧ ᠶᠢ ᠫᠢᠡᠭᠵᠠᠩ ᠨᠤᠶᠠᠨ ᠡᠷᠭᠦᠮᠵᠢᠯᠡᠨ ᠡᠷᠭᠡ ᠰᠦᠷ ᠲᠡᠭᠡᠨ ᠤᠷᠤᠭᠤᠯᠵᠤ ᠠᠪᠤᠪᠠ᠃ ᠲᠤᠰ ᠵᠢᠯ ᠳᠤ ᠡᠰᠡᠨ ᠪᠠᠰᠠ ᠴᠢᠭᠡᠨ ᠮᠤᠩᠭᠤᠯ ᠤᠨ ᠡᠵᠡᠨ ᠠᠰᠤ ᠯᠤᠭ᠎ᠠ ᠬᠤᠳᠠ ᠤᠷᠤᠭ ᠪᠤᠯᠤᠯᠴᠠᠨ᠂ ᠳᠠᠮᠠᠭ᠎ᠠ ᠲᠠᠢ ᠪᠢᠴᠢᠭ ᠬᠦᠷᠳᠡᠭᠡᠵᠦ᠂ ᠡᠵᠡᠨ ᠰᠠᠶᠢᠳ ᠤᠨ ᠭᠡᠯᠬᠢᠶ᠎ᠡ ᠶᠢ ᠪᠠᠶᠢᠭᠤᠯᠪᠠ᠃ 1446 ᠤᠨ ᠳᠤ᠂ ᠡᠰᠡᠨ ᠮᠦᠨ ᠬᠠᠨᠳᠤᠤ ᠶᠢᠨ ᠸᠧᠢ ᠶᠢᠨ ᠡᠵᠡᠨ ᠪᠠᠨᠮᠠᠰᠠᠵᠠᠢ ᠳᠤ ᠡᠯᠴᠢ ᠳᠤᠮᠢᠯᠠᠨ ᠢᠯᠡᠭᠡᠵᠦ ᠤᠷᠤᠭ ᠪᠤᠯᠤᠯᠴᠠᠭᠠᠳ ᠬᠦᠨ ᠵᠤᠵᠠᠭᠠᠨ ᠨᠦᠭᠦᠷᠯᠡᠪᠡ᠃ ᠡᠰᠡᠨ ᠡᠨᠡ ᠮᠡᠳᠤᠴᠢᠯᠠᠨ ᠵᠡᠭᠦᠨ ᠪᠠ ᠪᠠᠷᠠᠭᠤᠨ ᠵᠦᠭ ᠤᠯᠠᠨ ᠭᠠᠵᠠᠷ ᠢ ᠡᠷᠭᠡ ᠮᠡᠳᠡᠯ ᠳᠡᠭᠡᠨ ᠤᠷᠤᠭᠤᠯᠵᠤ᠂ ᠰᠦᠷ ᠬᠦᠴᠤᠨ ᠢᠶᠠᠨ ᠶᠡᠬᠡᠪᠡᠷ ᠨᠡᠮᠡᠭᠳᠡᠭᠦᠯᠦᠭᠰᠡᠨ ᠲᠤᠯᠠ ᠶᠡᠭᠡ ᠭᠤᠪᠢ ᠶᠢᠨ ᠠᠷᠤ ᠳᠤ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠲᠦᠮᠡᠨ ᠭᠠᠵᠠᠷ ᠤᠨ ᠳᠤᠳᠤᠷ᠎ᠠ ᠳᠡᠭᠦᠨ ᠲᠠᠢ ᠠᠶᠤᠮᠰᠢᠭ ᠦᠭᠡᠢ ᠡᠰᠡᠷᠭᠦᠴᠡᠯᠳᠤᠬᠦ ᠡᠳᠡᠭᠡᠳ ᠦᠭᠡᠢ ᠪᠤᠯᠵᠠᠢ᠃        1449 ᠤᠨ ᠳᠤ᠂ ᠡᠰᠡᠨ ᠳᠠᠶᠢᠱᠢ ᠶᠢᠨ ᠤᠷᠳᠤᠨ ᠳᠤ ᠰᠠᠭᠤᠵᠤ ᠪᠠᠶᠢᠭᠰᠠᠨ ᠮᠢᠩ ᠤᠯᠤᠰ ᠤᠨ ᠡᠯᠴᠢ ᠨᠢ ᠦᠪᠡᠷ ᠤᠨ ᠤᠯᠤᠰ ᠤᠨ ᠬᠦᠡᠭᠵᠤ ︵ᠳᠠᠬᠢᠨᠢ︶ ᠪᠠᠨ ᠡᠰᠡᠨ ᠤ ᠬᠦᠪᠡᠭᠦᠨ ᠳᠤ ᠦᠭᠭᠦᠶ᠎ᠡ ᠭᠡᠮᠡᠨ ᠠᠮᠠ ᠠᠯᠳᠠᠭᠰᠠᠨ ᠪᠤᠯᠬᠤᠷ ᠡᠰᠡᠨ ᠳᠠᠶᠢᠱᠢ ᠦᠪᠡᠷ ᠢᠶᠠᠨ ᠡᠯᠴᠢ ᠳᠤ ᠶᠡᠭᠡ ᠭᠡᠮᠵᠢᠶᠡᠨ ᠤ ᠪᠡᠯᠡᠭ ᠳᠡᠯᠡᠭ ᠪᠠᠷᠢᠭᠤᠯᠤᠨ ᠮᠢᠩ ᠤᠯᠤᠰ ᠲᠤ ᠢᠯᠡᠭᠡᠵᠦ᠂ ᠤᠷᠤᠭ ᠤᠨ ᠤᠴᠢᠷ ᠢ ᠳᠤᠳᠤᠯᠠᠨ ᠭᠡᠯᠡᠯᠴᠡᠭᠦᠯᠪᠡ᠃ ᠲᠡᠷᠡ ᠲᠤᠬᠠᠢ ᠮᠢᠩ ᠤᠯᠤᠰ ᠤᠨ ᠳᠠᠯ᠎ᠠ ᠠᠴᠠ ︽ᠡᠶᠢᠮᠤ ᠶᠠᠪᠤᠳᠠᠯ ᠦᠭᠡᠢ︾ ᠭᠡᠮᠡᠭᠰᠡᠨ ᠪᠤᠯᠬᠤᠷ ᠡᠰᠡᠨ ᠶᠡᠬᠡᠳᠡ ᠠᠭᠤᠷᠯᠠᠨ ᠤᠯᠠᠨ ᠠᠶᠢᠮᠠᠭ ᠤᠨ ᠴᠡᠷᠢᠭ ᠢ ᠳᠠᠶᠢᠴᠢᠯᠠᠵᠤ ᠮᠢᠩ ᠤᠯᠤᠰ ᠢ ᠳᠠᠶᠢᠯᠠᠬᠤ ᠪᠠᠷ ᠮᠤᠷᠳᠠᠪᠠ᠃ ᠡᠭᠦᠨ ᠳᠤ ᠡᠰᠡᠨ ᠳᠠᠶᠢᠱᠢ ᠶᠢᠨ ᠤᠳᠤᠷᠢᠳᠤᠭᠰᠠᠨ ᠶᠡᠭᠡ ᠴᠡᠷᠢᠭ ᠳ᠋ᠠ ᠲᠦᠡᠭ ᠢ ᠴᠢᠭᠯᠡᠪᠡ︔ ᠳᠠᠶᠢᠰᠦ᠋ᠡᠭ ᠬᠠᠭᠠᠨ ᠤ ᠤᠳᠤᠷᠢᠳᠤᠭᠰᠠᠨ ᠤᠷᠢᠶᠠᠩᠬᠠᠢ ᠶᠢᠨ ᠭᠤᠷᠪᠠᠨ ᠸᠧᠢ ᠶᠢᠨ ᠴᠡᠷᠢᠭ ᠯᠢᠶᠤᠤ ᠳ᠋ᠦᠡᠭ ᠢ ᠪᠤᠯᠢᠶᠠᠨ ᠤᠤᠯᠭᠠᠯᠠᠪᠠ︔ ᠠᠯᠠᠭ ᠳᠡᠮᠤᠷ ᠴᠧᠡᠭᠰᠢᠶᠠᠩ ᠤᠨ ᠳᠠᠶᠢᠴᠢᠯᠠᠭᠰᠠᠨ ᠶᠡᠭᠡ ᠴᠡᠷᠢᠭ ᠰᠢᠤᠸᠠᠨ ᠹᠦ᠋ ᠶᠢ ᠴᠤᠬᠢᠪᠠ᠃ ᠠᠯᠴᠤ ᠶᠢᠨ ᠳᠠᠭᠠᠭᠤᠯᠤᠭᠰᠠᠨ ᠨᠢᠭᠡᠨ ᠵᠠᠮ ᠤᠨ ᠴᠡᠷᠢᠭ ᠱᠠᠨᠰᠢ ᠶᠢ ᠳᠤᠪᠳᠤᠯᠪᠠ᠃ ᠡᠰᠡᠨ ᠳᠠᠶᠢᠱᠢ ᠶᠢᠨ ᠳᠠᠶᠢᠴᠢᠯᠠᠭᠰᠠᠨ ᠶᠡᠭᠡ ᠴᠡᠷᠢᠭ ᠳ᠋ᠠ ᠲᠦᠡᠭ ᠤᠨ ᠳᠡᠷᠭᠡᠳᠡ ᠬᠦᠷᠤᠭᠡᠳ᠂ ᠮᠢᠩ ᠤᠯᠤᠰ ᠤᠨ ᠵᠦᠪᠯᠡᠭᠴᠢ ᠵᠠᠩᠵᠤᠨ ᠡᠤ ᠬᠤᠤ ᠯᠤᠭ᠎ᠠ ᠮᠢᠭᠤᠢ ᠶᠢᠨ ᠲᠤᠰᠬᠤᠨ ᠳᠤ ᠰᠢᠷᠤᠭᠦᠨ ᠢᠶᠠᠷ ᠲᠤᠯᠤᠯᠳᠤᠪᠠ᠃ ᠮᠤᠩᠭᠤᠯ ᠤᠨ ᠴᠡᠷᠢᠭ ᠡᠷᠡᠯᠭᠡᠭ ᠮᠦᠷᠳᠡᠭᠡᠨ ᠵᠠᠷ ᠵᠡᠪᠰᠡᠭ ᠴᠤ ᠬᠤᠷᠴᠠ ᠲᠤᠯᠠ ᠮᠢᠩ ᠤᠯᠤᠰ ᠤᠨ ᠴᠡᠷᠢᠭ ᠢ ᠶᠡᠬᠡᠳᠡ ᠳᠠᠶᠢᠯᠵᠤ᠂ ᠵᠦᠪᠯᠡᠭᠴᠢ ᠵᠠᠩᠵᠤᠨ ᠡᠤ ᠬᠤᠤ ᠶᠢ ᠠᠯᠠᠭᠠᠳ᠂ ᠪᠤᠭᠤᠮᠳᠠ ᠶᠢᠨ ᠭᠠᠳᠠᠨᠠᠬᠢ ᠬᠤᠳᠠ ᠪᠠᠯᠭᠠᠰᠤ ᠶᠢ ᠴᠦᠮ ᠪᠠᠶᠢᠯᠳᠤᠨ ᠡᠵᠡᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠮᠢᠩ ᠤᠯᠤᠰ ᠲᠡᠷᠡ ᠳᠠᠷᠤᠢ ᠬᠠᠭᠠᠨ ᠤ ᠬᠦᠷᠭᠡᠨ ᠵᠢᠩ ᠶᠤᠸᠠᠨ ᠵᠡᠷᠭᠡ ᠳᠦᠷᠪᠡᠨ ᠶᠡᠭᠡ ᠵᠠᠩᠵᠤᠨ ᠳᠤ ᠲᠤᠰᠪᠤᠷᠢ ᠲᠦᠮᠡᠨ ᠴᠡᠷᠢᠭ ᠦᠭᠭᠦᠭᠡᠳ ᠪᠠᠶᠢᠯᠳᠤᠬᠤ ᠪᠠᠷ ᠢᠯᠡᠭᠡᠭᠰᠡᠨ ᠳᠤ᠂ ᠡᠰᠡᠨ ᠳᠠᠶᠢᠱᠢ ᠪᠠᠰᠠ ᠪᠦᠭᠦᠨ ᠢ ᠰᠦᠨᠤᠭᠡᠪᠡ᠃ ᠡᠨᠡ ᠦᠶ᠎ᠡ ᠳᠤ᠂ ᠳ᠋ᠠ ᠲᠦᠡᠭ ᠤᠨ ᠴᠡᠷᠢᠭ ᠤᠨ ᠶᠡᠷᠤᠩᠭᠡᠢ ᠵᠠᠬᠢᠷᠤᠭᠴᠢ ᠰᠦᠡᠭ ᠢᠡᠭ᠂ ᠪᠦᠬᠦᠳᠡ ᠶᠢ ᠵᠠᠬᠢᠷᠤᠭᠴᠢ ᠵᠤ᠋ ᠮᠢᠶᠠᠨ᠂ ᠪᠦᠬᠦᠳᠡ ᠶᠢ ᠬᠢᠨᠠᠭᠴᠢ ᠱᠢ ᠾᠧᠡᠭ ᠨᠠᠷ ᠲᠠᠶᠢᠭᠠᠨ ᠬᠦᠸᠧ ᠵᠢᠩ ᠤᠨ ᠬᠢᠨᠠᠯᠳᠠ ᠳᠤᠤᠷ᠎ᠠ ᠡᠰᠡᠨ ᠳᠠᠶᠢᠱᠢ ᠶᠢᠨ ᠴᠡᠷᠢᠭ ᠲᠠᠢ ᠶᠠᠩ ᠾᠧ ︵ᠤᠳᠤᠬᠢ ᠱᠠᠨ ᠰᠢ ᠮᠤᠵᠢ ᠶᠢᠨ ᠶᠠᠩ ᠭᠤᠤ︶ ᠳᠤ ᠰᠢᠷᠤᠭᠦᠨ ᠪᠠᠶᠢᠯᠳᠤᠭᠠᠳ ᠶᠡᠭᠡᠳᠡ ᠳᠡᠶᠢᠯᠦᠭᠳᠡᠵᠦ᠂ ᠰᠦᠡᠭ ᠢᠡᠭ᠂ ᠵᠤ᠋ ᠮᠢᠶᠠᠨ ᠬᠤᠶᠠᠷ ᠠᠯᠠᠭᠳᠠᠭᠠᠳ᠂ ᠱᠢ ᠾᠧᠡᠭ ᠭᠠᠭᠴᠠ ᠪᠡᠶ᠎ᠡ ᠪᠠᠷ ᠢᠶᠠᠨ ᠳ᠋ᠠ ᠲᠦᠡᠭ ᠳᠤ ᠵᠤᠯᠤᠨ ᠤᠷᠤᠵᠤ᠂ ᠲᠠᠶᠢᠭᠠᠨ ᠬᠦᠸᠧ ᠵᠢᠩ ᠴᠤ ᠦᠪᠡᠷ ᠢᠶᠠᠨ ᠦᠯᠦᠩ ᠡᠪᠡᠰᠤᠨ ᠤ ᠳᠤᠳᠤᠷ᠎ᠠ ᠨᠢᠭᠤᠭᠳᠠᠭᠰᠠᠨ ᠤ ᠠᠴᠢ ᠪᠠᠷ ᠲᠦᠡᠭᠭᠡᠵᠢ ᠠᠮᠢ ᠲᠠᠢ ᠭᠠᠷᠴᠠᠢ᠃ ᠠᠯᠠᠭ ᠳᠡᠮᠤᠷ ᠴᠧᠡᠭᠰᠢᠶᠠᠩ ᠤᠨ ᠳᠠᠶᠢᠴᠢᠯᠠᠭᠰᠠᠨ ᠮᠤᠩᠭᠤᠯ ᠤᠨ ᠤᠯᠠᠨ ᠠᠶᠢᠮᠠᠭ ᠤᠨ ᠴᠡᠷᠢᠭ ᠰᠢᠭᠤᠳ ᠰᠢᠤᠸᠠᠨ ᠹᠦ᠋ ︵ᠤᠳᠤᠬᠢ ᠾᠧᠪᠧᠢ ᠮᠤᠵᠢ ᠶᠢᠨ ᠰᠢᠤᠸᠠᠨ ᠬᠤᠸᠠ︶ ᠳᠤ ᠬᠦᠷᠴᠤ᠂ ᠮᠠ ᠢᠡᠭ ︵ᠤᠳᠤᠬᠢ ᠾᠧᠪᠧᠢ ᠮᠤᠵᠢ ᠶᠢᠨ ᡂᠢ ᠴᠧᠡᠭ ᠰᠢᠶᠠᠨ ᠤ ᠠᠷᠤ ᠳᠤ ᠪᠤᠢ︶ ᠢ ᠪᠦᠰᠡᠯᠡᠨ ᠮᠢᠩ ᠤᠯᠤᠰ ᠤᠨ ᠴᠡᠷᠢᠭ ᠤᠨ ᠤᠰᠤᠨ ᠤ ᠢᠷᠡᠯᠳᠡ ᠶᠢ ᠳᠠᠰᠤᠯᠪᠠ᠃ ᠡᠨᠡ ᠦᠶ᠎ᠡ ᠳᠤ᠂ ᠰᠢᠤᠸᠠᠨ ᠹᠦ᠋ ᠶᠢᠨ ᠪᠦᠬᠦᠳᠡ ᠶᠢ ᠵᠠᠬᠢᠷᠤᠭᠴᠢ ᠶᠠᠩ ᠾᠦᠡᠭ ᠪᠠᠯᠠᠭ ᠠᠯᠳᠠᠨ ᠦᠭᠦᠭᠦ ᠪᠠᠨ ᠬᠦᠯᠢᠶᠡᠵᠦ ᠰᠠᠭᠤᠭᠰᠠᠨ ᠪᠦᠭᠡᠳ ᠮᠠ ᠢᠡᠭ ᠢ ᠰᠠᠬᠢᠨ ᠬᠠᠮᠠᠭᠠᠯᠠᠵᠤ ᠪᠠᠶᠢᠭᠰᠠᠨ ᠵᠠᠩ ᠵᠢᠶᠦ᠋ᠨ ᠪᠠᠶᠢᠯᠳᠤᠬᠤ ᠵᠤᠷᠢᠭ ᠦᠭᠡᠢ ᠪᠤᠯᠤᠭᠠᠳ ᠬᠤᠳᠠ ᠪᠠᠨ ᠤᠷᠬᠢᠨ ᠪᠤᠷᠤᠭᠤᠯᠤᠨ ᠵᠤᠯᠵᠤ ᠳᠤᠳᠠᠭᠠᠭᠰᠠᠨ ᠪᠠᠶᠢᠨ᠎ᠠ᠃ ᠡᠭᠦᠨ ᠤ ᠤᠯᠠᠮ ᠠᠴᠠ ᠠᠯᠠᠭ ᠳᠡᠮᠤᠷ ᠴᠧᠡᠭᠰᠢᠶᠠᠩ ᠤᠨ ᠵᠠᠬᠢᠷᠤᠭᠰᠠᠨ ᠶᠡᠭᠡ ᠴᠡᠷᠢᠭ ᠡᠰᠡᠷᠭᠦᠴᠡᠯᠡᠰᠢ ᠦᠭᠡᠢ ᠰᠦᠷ ᠬᠦᠴᠤᠨ ᠢᠶᠠᠷ ᠡᠮᠤᠨᠡᠰᠢ ᠳᠠᠭᠠᠷᠢᠵᠤ᠂ ᠰᠢᠭᠤᠳ ᠴᠠᠪᠴᠢᠶᠠᠯ ᠪᠤᠭᠤᠮᠳᠠ ᠳᠤ ᠬᠦᠷᠴᠤ ᠤᠴᠢᠪᠠ᠃ ᠠᠯᠴᠤ ᠨᠤᠶᠠᠨ ᠤ ᠳᠠᠶᠢᠴᠢᠯᠠᠭᠰᠠᠨ ᠮᠤᠩᠭᠤᠯ ᠮᠤᠷᠢᠳᠤ ᠴᠡᠷᠢᠭ ᠨᠢ ᠱᠠᠨᠰᠢ ᠮᠤᠵᠢ ᠶᠢᠨ ᠪᠦᠬᠦᠳᠡ ᠶᠢ ᠵᠠᠬᠢᠷᠤᠭᠴᠢ ᠿᠧᠨ ᠯᠢ᠂ ᠲᠠᠶᠢᠭᠠᠨ ᠯᠢᠤ ᠶᠦᠡᠭ ᠨᠠᠷ ᠤᠨ ᠳᠤᠮᠢᠯᠠᠭᠰᠠᠨ ᠴᠡᠷᠢᠭ ᠲᠠᠢ ᠯᠢᠨ ᠱᠦᠢ ᠪᠤᠤ ᠶᠢᠨ ᠪᠠᠷᠠᠭᠤᠨ ᠳᠤ ᠶᠡᠬᠡᠪᠡᠷ ᠪᠠᠶᠢᠯᠳᠤᠪᠠ᠃ ᠡᠨᠡ ᠤᠳᠠᠭ᠎ᠠ ᠶᠢᠨ ᠪᠠᠶᠢᠯᠳᠤᠭᠠᠨ ᠳᠤ᠂ ᠮᠢᠩ ᠤᠯᠤᠰ ᠤᠨ ᠴᠡᠷᠢᠭ ᠶᠡᠭᠡᠳᠡ ᠳᠡᠶᠢᠯᠦᠭᠳᠡᠵᠦ᠂ ᠰᠦᠵᠧᠤ ᠸᠧᠢ ᠶᠢ ᠰᠠᠬᠢᠵᠤ ᠪᠠᠶᠢᠭᠰᠠᠨ ᠳᠤᠬᠢᠬᠴᠢ ᠲᠦᠰᠢᠮᠡᠯ ᠬᠤ᠋ ᠯᠠᠨ᠂ ᠶᠠᠨ ᠵᠧᠨ ᠠᠯᠠᠭᠳᠠᠭᠰᠠᠨ ᠪᠦᠭᠡᠳ ᠪᠠᠷᠠᠭᠤᠨ ᠭᠠᠷ ᠤᠨ ᠳᠡᠰᠯᠡᠭᠰᠡᠨ ᠵᠠᠬᠢᠷᠤᠭᠴᠢ ᠯᠢᠤ ᠵᠧᠨ ᠲᠤᠮᠤ ᠰᠢᠷᠤᠢ ᠶᠢᠨ ᠤᠪᠤᠭᠠᠨ ᠤ ᠠᠷᠤ ᠳᠤ ᠨᠢᠭᠤᠭᠳᠠᠭᠰᠠᠨ ᠤ ᠠᠴᠢ ᠪᠠᠷ ᠠᠮᠢᠳᠤ ᠭᠠᠷᠤᠭᠰᠠᠨ ᠪᠠᠶᠢᠪᠠ᠃ ᠳᠠᠶᠢᠰᠦ᠋ᠡᠭ ᠬᠠᠭᠠᠨ ᠤ ᠳᠠᠭᠠᠭᠤᠯᠤᠭᠰᠠᠨ ᠤᠷᠢᠶᠠᠩᠬᠠᠢ ᠶᠢᠨ ᠭᠤᠷᠪᠠᠨ ᠸᠧᠢ ᠶᠢᠨ ᠴᠡᠷᠢᠭ ᠯᠢᠶᠤᠤ ᠳ᠋ᠦᠡᠭ ᠢ ᠳᠠᠭᠠᠷᠢᠨ ᠬᠢᠯᠢ ᠶᠢᠨ ᠭᠡᠷᠡᠮ ᠢ ᠳᠠᠪᠠᠵᠤ ᠤᠷᠤᠭᠠᠳ᠂ ᠰᠦᠨᠢ ᠲᠦᠯᠢ ᠪᠠᠷ ᠮᠢᠩ ᠤᠯᠤᠰ ᠤᠨ ᠴᠡᠷᠢᠭ ᠤᠨ ᠰᠡᠷᠭᠡᠶᠢᠯᠡᠯᠳᠡ ᠰᠤᠯᠠ ᠪᠠᠶᠢᠭᠰᠠᠨ ᠳᠤᠬᠢᠶᠠᠯ ᠢ ᠠᠰᠢᠭᠯᠠᠨ ᠭᠤᠸᠠᠩᠨᠢᠩ ᠬᠤᠳᠠ ᠶᠢ ᠪᠦᠰᠡᠯᠡᠨ ᠠᠪᠤᠪᠠ᠃ ᠲᠤᠰ ᠬᠤᠳᠠ ᠶᠢᠨ ᠭᠠᠳᠠᠭᠤᠷ ᠰᠡᠷᠭᠡᠶᠢᠯᠡᠨ ᠰᠠᠬᠢᠵᠤ ᠪᠠᠶᠢᠭᠰᠠᠨ ᠮᠢᠩ ᠤᠯᠤᠰ ᠤᠨ ᠴᠡᠷᠢᠭ ᠴᠦᠮ ᠠᠷᠤ ᠠᠷᠤ ᠠᠴᠠ ᠪᠠᠨ ᠬᠤᠳᠠᠨ ᠳᠤ ᠵᠤᠯᠤᠨ ᠤᠷᠤᠭᠠᠳ ᠳᠠᠬᠢᠨ ᠭᠠᠷᠴᠤ ᠢᠷᠡᠬᠦ ᠦᠭᠡᠢ ᠪᠤᠯᠤᠭᠰᠠᠨ ᠲᠤᠯᠠ ᠳᠠᠶᠢᠰᠦ᠋ᠡᠭ ᠬᠠᠭᠠᠨ ᠤ ᠴᠡᠷᠢᠭ ᠬᠢᠯᠢ ᠶᠢᠨ ᠭᠡᠷᠡᠮ ᠢ ᠲᠦᠴᠢ ᠭᠠᠷᠤᠢ ᠭᠠᠵᠠᠷ ᠦᠷᠭᠡᠨ ᠢᠶᠠᠷ ᠰᠡᠳᠡᠯᠤᠨ ᠡᠪᠳᠡᠭᠡᠳ ᠳᠤᠳᠤᠭᠰᠢ ᠰᠢᠷᠭᠤᠯᠤᠨ ᠡᠬᠢᠯᠡᠭᠰᠡᠨ ᠪᠠᠶᠢᠪᠠ᠃ ᠡᠰᠡᠨ ᠳᠠᠶᠢᠱᠢ ᠶᠢᠨ ᠳᠦᠷᠪᠡᠨ ᠵᠠᠮ ᠤᠨ ᠶᠡᠭᠡ ᠴᠡᠷᠢᠭ ᠮᠢᠩ ᠤᠯᠤᠰ ᠤᠨ ᠬᠢᠯᠢ ᠶᠢ ᠰᠢᠷᠤᠭᠦᠨ ᠢᠶᠠᠷ ᠳᠠᠭᠠᠷᠢᠨ ᠳᠤᠪᠳᠤᠯᠤᠭᠰᠠᠨ ᠮᠡᠳᠡᠭᠡ ᠪᠡᠭᠡᠵᠢᠩ ᠳᠤ ᠤᠯᠠᠮᠵᠢᠯᠠᠭᠳᠠᠨ ᠬᠦᠷᠦᠭᠰᠡᠨ ᠤ ᠳᠠᠷᠠᠭ᠎ᠠ᠂ ᠮᠢᠩ ᠤᠯᠤᠰ ᠤᠨ ᠲᠠᠶᠢᠭᠠᠨ ᠲᠦᠰᠢᠮᠡᠯ ᠸᠠᠩ ᠵᠧᠨ ᠢᠡᠭᠽᠦ᠋ᠡᠭ ᠬᠠᠭᠠᠨ ᠢ ᠪᠡᠶ᠎ᠡ ᠪᠠᠷ ᠢᠶᠠᠨ ᠳᠠᠶᠢᠯᠠᠬᠤ ᠪᠠᠷ ᠮᠤᠷᠳᠠᠬᠤ ᠪᠤᠯᠪᠠᠤ ᠭᠡᠮᠡᠨ ᠠᠶᠢᠯᠠᠳᠬᠠᠭᠰᠠᠨ ᠪᠠᠶᠢᠨ᠎ᠠ᠃ ᠡᠭᠦᠨ ᠳᠤ ᠢᠡᠭᠽᠦ᠋ᠡᠭ ᠬᠠᠭᠠᠨ ᠲᠡᠷᠡ ᠳᠠᠷᠤᠢ ᠰᠡᠩᠳᠡ ᠮᠡᠩᠳᠡ ᠪᠡᠶ᠎ᠡ ᠪᠠᠷ ᠢᠶᠠᠨ ᠳᠠᠶᠢᠯᠠᠬᠤ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ᠃ ᠲᠡᠷᠡ ᠦᠶ᠎ᠡ ᠳᠤ᠂ ᠨᠢᠭᠡᠨ ᠪᠦᠯᠦᠭ ᠮᠡᠷᠭᠡᠨ ᠰᠠᠶᠢᠳ ᠤᠷᠳᠤᠨ ᠤ ᠡᠮᠤᠨ᠎ᠡ ᠰᠦᠭᠦᠳᠴᠤ ᠡᠵᠡᠨ ᠬᠠᠭᠠᠨ ᠤ ᠪᠡᠶ᠎ᠡ ᠪᠠᠷ ᠢᠶᠠᠨ ᠳᠠᠶᠢᠯᠠᠬᠤ ᠵᠠᠷᠯᠢᠭ ᠢᠶᠠᠨ ᠪᠤᠴᠠᠭᠠᠬᠤ ᠶᠢ ᠭᠤᠶᠤᠴᠢᠯᠠᠪᠠ᠃ ᠭᠡᠳᠡᠯ᠎ᠡ ᠢᠡᠭᠽᠦ᠋ᠡᠭ ᠬᠠᠭᠠᠨ ᠤᠯᠤᠰ ᠤᠨ ᠲᠠᠶᠢᠭᠠᠨ ᠲᠦᠰᠢᠮᠡᠯ ᠸᠠᠩ ᠵᠧᠨ ᠤ ᠦᠳᠤᠭᠡᠯᠭᠡ ᠶᠢᠨ ᠳᠤᠤᠷ᠎ᠠ᠂ ᠲᠦᠰᠢᠮᠡᠳ ᠤᠨ ᠢᠳᠬᠠᠯ ᠬᠤᠷᠢᠭᠯᠠᠯ ᠢ ᠡᠰᠡ ᠰᠤᠨᠤᠰᠤᠨ᠂ ᠳᠠᠪᠢᠨ ᠲᠦᠮᠡᠨ ᠶᠡᠭᠡ ᠴᠡᠷᠢᠭ ᠠᠪᠴᠤ ᠪᠡᠭᠡᠵᠢᠩ ᠠᠴᠠ ᠮᠤᠷᠳᠠᠪᠠ᠃ ᠮᠢᠩ ᠤᠯᠤᠰ ᠤᠨ ᠶᠡᠭᠡ ᠴᠡᠷᠢᠭ ᠳ᠋ᠠ ᠲᠦᠡᠭ ᠬᠤᠳᠠ ᠬᠦᠷᠴᠤ ᠢᠷᠡᠬᠦ ᠦᠶ᠎ᠡ ᠳᠤ᠂ ᠮᠤᠩᠭᠤᠯ ᠤᠨ ᠴᠡᠷᠢᠭ ᠬᠠᠭᠤᠷᠮᠠᠭ ᠢᠶᠠᠷ ᠪᠤᠷᠤᠭᠤᠯᠤᠨ ᠵᠤᠯᠵᠤ ᠮᠢᠩ ᠤᠯᠤᠰ ᠤᠨ ᠴᠡᠷᠢᠭ ᠢ ᠳᠤᠳᠤᠭᠰᠢ ᠳᠠᠳᠠᠨ ᠤᠷᠤᠭᠤᠯᠪᠠ᠃ ᠴᠡᠷᠢᠭ ᠤᠨ ᠡᠷᠬᠢᠨ ᠰᠠᠶᠢᠳ ᠭᠤᠸᠠᠩ ᠶᠧ ᠠᠶᠢᠯᠠᠳᠬᠠᠯ ᠪᠢᠴᠢᠵᠤ ᠴᠡᠷᠢᠭ ᠪᠤᠴᠠᠬᠤ ᠶᠢ ᠭᠤᠶᠤᠴᠢᠯᠠᠭᠰᠠᠨ ᠳᠤ᠂ ᠸᠠᠩ ᠵᠧᠨ ᠳᠡᠭᠦᠨ ᠢ ᠴᠡᠷᠢᠭ ᠤᠨ ᠦᠢᠯᠡ ᠶᠢ ᠦᠯᠦ ᠮᠡᠳᠡᠭᠴᠢ ᠳᠤᠷᠤᠢ ᠪᠢᠴᠢᠭ ᠤᠨ ᠬᠦᠮᠤᠨ ᠭᠡᠵᠦ ᠬᠢᠯᠢᠩᠨᠡᠨ ᠪᠤᠷᠤᠭᠤᠰᠢᠶᠠᠵᠤ ᠦᠷᠭᠦᠯᠵᠢᠯᠡᠨ ᠬᠤᠶᠢᠳᠤ ᠵᠦᠭ ᠤᠷᠤᠭᠰᠢᠯᠠᠪᠠ᠃ ᠡᠨᠡ ᠦᠶ᠎ᠡ ᠳᠤ᠂ ᠳ᠋ᠠ ᠲᠦᠡᠭ ᠬᠤᠳᠠ ᠶᠢ ᠰᠠᠬᠢᠭᠰᠠᠨ ᠵᠠᠩᠵᠤᠨ ᠬᠦᠸᠧ ᠵᠢᠩ ᠸᠠᠩ ᠵᠧᠨ ᠳᠤ ᠮᠤᠩᠭᠤᠯ ᠤᠨ ᠴᠡᠷᠢᠭ ᠪᠦᠭᠦᠭᠰᠡᠨ ᠪᠠᠶᠢᠬᠤ ᠶᠢ ᠮᠡᠳᠡᠭᠦᠯᠦᠭᠰᠡᠨ ᠳᠤ᠂ ᠸᠡᠩ ᠵᠧᠨ ᠪᠠᠶᠢᠳᠠᠯ ᠮᠠᠭᠤ ᠪᠤᠯᠤᠭᠰᠠᠨ ᠢ ᠮᠡᠳᠡᠭᠡᠳ ᠠᠷᠭ᠎ᠠ ᠪᠤᠰᠤ ᠶᠡᠭᠡ ᠴᠡᠷᠢᠭ ᠢᠶᠠᠨ ᠬᠤᠶᠢᠰᠢ ᠳᠠᠳᠠᠪᠠ᠃ ᠶᠡᠭᠡ ᠴᠡᠷᠢᠭ ᠰᠢᠤᠸᠠᠨ ᠹᠦ᠋ ᠳᠤ ᠲᠦᠡᠭᠭᠡᠵᠢ ᠴᠤᠬᠤᠷᠢᠨ ᠤᠷᠤᠳᠠᠯ᠎ᠠ ᠡᠰᠡᠨ ᠤ ᠴᠡᠷᠢᠭ ᠨᠡᠭᠡᠮᠵᠢᠯᠡᠨ ᠢᠷᠡᠭᠡᠳ ᠮᠢᠩ ᠤᠯᠤᠰ ᠤᠨ ᠴᠡᠷᠢᠭ ᠢ ᠶᠡᠭᠡᠯ᠎ᠡ ᠳᠡᠶᠢᠯᠵᠡᠢ᠃ ᠢᠡᠭᠽᠦ᠋ᠡᠭ ᠬᠠᠭᠠᠨ ᠦᠯᠡᠳᠡᠭᠰᠡᠨ ᠴᠡᠷᠢᠭ ᠢᠶᠠᠨ ᠳᠠᠭᠠᠭᠤᠯᠤᠨ ᠲᠦᠮᠤᠪᠤᠤ ᠳᠤ ᠴᠤᠬᠤᠷᠢᠨ ᠢᠷᠡᠪᠡ᠃ ᠲᠦᠮᠤᠪᠤᠤ ᠪᠤᠯ ᠯᠠᠩ ᠱᠠᠨ ᠠᠭᠤᠯᠠᠨ ᠤ ᠪᠠᠷᠠᠭᠤᠨ ᠪᠡᠯ ᠳᠤ ᠪᠠᠶᠢᠳᠠᠭ ᠶᠤᠮ᠃ ᠵᠢᠤᠢ ᠶᠦᠡᠭ ᠭᠤᠸᠠᠨ ᠪᠤᠭᠤᠮᠳᠠ ᠠᠴᠠ ᠰᠢᠤᠸᠠᠨ ᠹᠦ᠋᠂ ᠳ᠋ᠠ ᠲᠦᠡᠭ ᠵᠡᠷᠭᠡ ᠭᠠᠵᠠᠷ ᠲᠤ ᠨᠡᠪᠳᠡᠷᠡᠭᠦ ᠴᠢᠬᠤᠯᠠ ᠵᠠᠮ ᠤᠨ ᠨᠢᠭᠡᠨ ᠦᠷᠳᠡᠭᠡ ᠪᠤᠯᠬᠤ ᠪᠦᠭᠡᠳ ᠡᠷᠬᠢᠨ ᠳᠤᠭᠤᠷᠢᠨ ᠠᠰᠬ᠎ᠠ ᠬᠠᠳᠠ᠂ ᠦᠨᠳᠤᠷ ᠠᠭᠤᠯᠠᠰ ᠢᠶᠠᠷ ᠬᠦᠷᠢᠶᠡᠯᠡᠭᠰᠡᠨ᠂ ᠭᠠᠵᠠᠷ ᠤᠨ ᠪᠠᠶᠢᠴᠠ ᠪᠠᠷ ᠮᠠᠰᠢ ᠪᠡᠷᠭᠡ ᠪᠠᠷᠳᠠᠭ᠎ᠠ ᠲᠠᠢ ᠤᠯᠠᠨ ᠵᠠᠮ ᠤᠨ ᠠᠭᠤᠯᠵᠠᠷ ᠪᠤᠯᠳᠠᠭ ᠶᠤᠮᠰᠠᠨ᠃ ᠡᠨᠡ ᠮᠡᠳᠤ ᠪᠡᠷᠭᠡ ᠪᠠᠷᠳᠠᠭ᠎ᠠ ᠲᠠᠢ ᠭᠠᠵᠠᠷ ᠲᠤ ᠴᠡᠷᠢᠭ ᠪᠠᠭᠤᠳᠠᠯᠯᠠᠬᠤ ᠶᠢ ᠴᠡᠭᠡᠷᠯᠡᠪᠡᠯ ᠵᠤᠬᠢᠬᠤ ᠠᠳᠠᠯ᠎ᠠ ᠢᠡᠭᠽᠦ᠋ᠡᠭ ᠬᠠᠭᠠᠨ ᠬᠠᠷᠢᠨ ᠦᠴᠤᠭᠡᠨ ᠴᠤ ᠠᠩᠬᠠᠷᠤᠭᠰᠠᠨ ᠦᠭᠡᠢ ᠪᠠᠶᠢᠵᠠᠢ᠃ ᠢᠡᠭᠽᠦ᠋ᠡᠭ ᠬᠠᠭᠠᠨ ᠤ ᠡᠨᠡᠬᠦ ᠤᠰᠤᠯ ᠪᠤᠷᠤᠭᠤ ᠶᠢ ᠡᠰᠡᠨ ᠳᠠᠶᠢᠱᠢ ᠳᠡᠷᠡ ᠳᠠᠷᠤᠢ ᠳᠤᠨᠢ ᠠᠰᠢᠭᠯᠠᠨ᠂ ᠦᠪᠡᠷ ᠤᠨ ᠴᠡᠷᠢᠭ ᠢᠶᠠᠨ ᠦᠳᠳᠡᠷ ᠳᠦᠷᠭᠡᠨ ᠬᠤᠷᠠᠮᠳᠤᠭᠤᠯᠤᠨ ᠴᠤᠭᠯᠠᠭᠤᠯᠤᠭᠠᠳ᠂ ᠲᠦᠮᠤᠪᠤᠤ ᠶᠢ ᠪᠦᠰᠡᠯᠡᠨ ᠠᠪᠴᠤ᠂ ᠪᠠᠰᠠ ᠲᠦᠮᠤᠪᠤᠤ ᠶᠢᠨ ᠤᠶᠢᠷᠠᠯᠴᠠᠭ᠎ᠠ ᠪᠠᠶᠢᠭᠰᠠᠨ ᠤᠰᠤᠨ ᠤ ᠰᠤᠷᠪᠤᠯᠵᠢ ᠶᠢ ᠡᠵᠡᠯᠡᠨ ᠠᠮᠵᠢᠵᠠᠢ᠃ ᠲᠡᠶᠢᠨ ᠬᠦ ᠬᠤᠶᠠᠷ ᠡᠳᠤᠷ ᠦᠡᠭᠭᠡᠷᠡᠭᠡ ᠦᠭᠡᠢ ᠪᠠᠷ ᠮᠢᠩ ᠤᠯᠤᠰ ᠤᠨ ᠴᠡᠷᠢᠭ ᠮᠤᠷᠢ ᠤᠤᠭᠤᠬᠤ ᠤᠰᠤ ᠦᠭᠡᠢ ᠪᠤᠯᠤᠭᠰᠠᠨ ᠠᠴᠠ ᠳᠡᠨᠳᠡ ᠪᠠᠨ ᠬᠤᠳᠳᠤᠭ ᠮᠠᠯᠳᠠᠵᠤ ᠬᠤᠶᠠᠷ ᠬᠤᠤᠰ ᠠᠯᠳᠠ ᠬᠦᠨ ᠪᠤᠯᠤᠭᠰᠠᠨ ᠴᠤ ᠤᠰᠤ ᠡᠰᠡ ᠭᠠᠷᠪᠠ᠃ ᠡᠶᠢᠮᠤᠷᠬᠦ ᠪᠠᠶᠢᠳᠠᠯ ᠤᠨ ᠳᠤᠤᠷ᠎ᠠ᠂ ᠮᠢᠩ ᠤᠯᠤᠰ ᠤᠨ ᠵᠠᠩᠵᠤᠨ ᠴᠡᠷᠢᠭ ᠳᠡᠭᠡᠷ᠎ᠡ ᠳᠤᠤᠷ᠎ᠠ ᠢᠯᠭᠠᠯ ᠦᠭᠡᠢ ᠶᠡᠭᠡᠳᠡ ᠰᠠᠮᠠᠭᠤᠷᠠᠭᠰᠠᠨ ᠳᠤ᠂ ᠡᠰᠡᠨ ᠳᠠᠶᠢᠱᠢ ᠲᠦᠮᠤᠪᠤᠤ ᠶᠢᠨ ᠤᠷᠴᠢᠨ ᠳᠠᠬᠢ ᠮᠠ ᠬᠦ᠋ ᠺᠧᠤ ᠭᠡᠳᠡᠭ ᠭᠠᠵᠠᠷ ᠠᠴᠠ ᠰᠢᠯᠢᠳᠡᠭ ᠴᠡᠷᠢᠭ ᠳᠤᠮᠢᠯᠠᠨ ᠭᠠᠷᠭᠠᠵᠤ᠂ ᠮᠢᠩ ᠤᠯᠤᠰ ᠤᠨ ᠴᠡᠷᠢᠭ ᠲᠠᠢ ᠪᠠᠶᠢᠯᠳᠤᠭᠤᠯᠤᠭᠰᠠᠨ ᠳᠤ᠂ ᠮᠤᠩᠭᠤᠯ ᠤᠨ ᠴᠡᠷᠢᠭ ᠶᠡᠭᠡᠳᠡ ᠳᠠᠶᠢᠯᠵᠠᠢ᠃ ᠢᠡᠭᠽᠦ᠋ᠡᠭ ᠬᠠᠭᠠᠨ ᠭᠠᠷᠬᠤ ᠵᠠᠮ ᠦᠭᠡᠢ ᠰᠠᠨᠳᠤᠷᠤᠨ ᠪᠠᠴᠢᠮᠳᠠᠵᠤ ᠪᠠᠶᠢᠳᠠᠯ᠎ᠠ᠂ ᠡᠰᠡᠨ ᠡᠯᠴᠢ ᠳᠤᠮᠢᠯᠠᠨ ᠢᠷᠡᠭᠦᠯᠵᠦ᠂ ᠤᠷᠤᠵᠤ ᠦᠭᠭᠦᠭᠳᠤᠨ ᠭᠡᠵᠦ ᠲᠤᠯᠭᠠᠨ ᠱᠠᠭᠠᠷᠳᠠᠪᠠ᠃ ᠴᠢᠪ ᠭᠡᠮᠡᠨ ᠡᠨᠡ ᠦᠶ᠎ᠡ ᠳᠤ ᠂ ᠸᠠᠩ ᠵᠧᠨ ᠶᠡᠭᠡ ᠴᠡᠷᠢᠭ ᠲᠡᠭᠡᠨ ᠡᠮᠤᠨᠡᠰᠢ ᠵᠤᠯᠤᠨ ᠪᠤᠷᠤᠭᠤᠯᠠᠬᠤ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠲᠤᠯᠠ ᠮᠢᠩ ᠤᠯᠤᠰ ᠤᠨ ᠴᠡᠷᠢᠭ ᠤᠳ ᠦᠪᠡᠷ ᠦᠪᠡᠷ ᠢᠶᠠᠨ ᠠᠮᠢ ᠪᠠᠨ ᠬᠠᠮᠠᠭᠠᠯᠠᠬᠤ ᠶᠢᠨ ᠲᠦᠯᠦᠭᠡ ᠵᠤᠯᠤᠨ ᠳᠤᠳᠠᠭᠠᠵᠠᠭᠠᠵᠤ ᠶᠡᠭᠡᠳᠡ ᠰᠠᠮᠠᠭᠤᠷᠠᠨ ᠡᠬᠢᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠡᠰᠡᠨ ᠳᠠᠶᠢᠱᠢ ᠮᠢᠩ ᠤᠯᠤᠰ ᠤᠨ ᠴᠡᠷᠢᠭ ᠤᠨ ᠡᠮᠤᠨᠡᠰᠢ ᠵᠤᠯᠬᠤ ᠭᠡᠰᠡᠨ ᠤᠪ ᠮᠡᠭᠡ ᠶᠢ ᠮᠡᠳᠡᠭᠡᠳ᠂ ᠳᠦᠷᠪᠡᠨ ᠵᠦᠭ ᠨᠠᠢᠮᠠᠨ ᠵᠤᠪᠬᠢᠰ ᠠᠴᠠ ᠨᠢ ᠪᠦᠰᠡᠯᠡᠨ ᠪᠠᠶᠢᠯᠳᠤᠭᠰᠠᠨ ᠳᠤ᠂ ᠮᠢᠩ ᠤᠯᠤᠰ ᠤᠨ ᠪᠦᠬᠦ ᠴᠡᠷᠢᠭ ᠪᠤᠳᠠ ᠨᠢᠷᠭᠡᠭᠳᠡᠵᠡᠢ᠃ ᠡᠨᠡ ᠦᠶ᠎ᠡ ᠳᠤ᠂ ᠢᠡᠭᠽᠦ᠋ᠡᠭ ᠬᠠᠭᠠᠨ ᠰᠢᠳᠠᠷ ᠲᠦᠰᠢᠮᠡᠳ ᠤᠨ ᠢᠶᠠᠨ ᠬᠠᠮᠠᠭᠠᠯᠠᠯᠳᠠ ᠳᠤᠤᠷ᠎ᠠ ᠡᠮᠤᠨᠡᠰᠢ ᠵᠤᠯᠤᠨ ᠭᠠᠷᠤᠶ᠎ᠠ ᠭᠡᠮᠡᠨ ᠪᠤᠳᠤᠭᠰᠠᠨ ᠪᠤᠯᠪᠠᠴᠤ ᠡᠰᠡ ᠴᠢᠳᠠᠭᠰᠠᠨ ᠤ ᠤᠯᠠᠮ ᠠᠴᠠ ᠨᠢᠭᠡᠮᠤᠰᠤᠨ ᠮᠤᠷᠢᠨ ᠠᠴᠠ ᠪᠠᠨ ᠪᠠᠭᠤᠨ ᠡᠮᠤᠨᠡᠰᠢ ᠬᠠᠨᠳᠤᠭᠠᠳ ᠵᠠᠪᠢᠯᠠᠨ ᠰᠠᠭᠤᠵᠤ ᠡᠰᠡᠨ ᠳᠠᠶᠢᠱᠢ ᠶᠢᠨ ᠴᠡᠷᠢᠭ ᠲᠤ ᠠᠮᠢᠳᠤ ᠪᠠᠷ ᠪᠠᠷᠢᠪᠴᠢᠯᠠᠭᠳᠠᠪᠠ᠃ ᠢᠡᠭᠽᠦ᠋ᠡᠭ ᠬᠠᠭᠠᠨ ᠪᠠᠷᠢᠭᠳᠠᠭᠰᠠᠨ ᠳᠠᠷᠤᠢ ᠡᠰᠡᠨ ᠳᠠᠶᠢᠱᠢ ᠶᠢᠨ ᠮᠠᠶᠢᠬᠠᠨ ᠳᠤ ᠬᠦᠷᠭᠡᠭᠳᠡᠨ ᠢᠷᠡᠯ᠎ᠡ᠃ ᠡᠰᠡᠨ ᠳᠠᠶᠢᠱᠢ ᠢᠡᠭᠽᠦ᠋ᠡᠭ ᠬᠠᠭᠠᠨ ᠢ ᠳᠠᠨᠢᠬᠤ ᠦᠭᠡᠢ ᠲᠤᠯᠠ ᠤᠷᠢᠳᠠᠪᠠᠷ ᠳᠡᠭᠦᠨ ᠢ ᠦᠵᠡᠵᠦ ᠦᠡᠭᠭᠡᠷᠡᠭᠰᠡᠨ ᠬᠤᠶᠠᠷ ᠬᠦᠮᠤᠨ ᠢ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ ᠮᠦᠨ ᠡᠰᠡᠬᠦ ᠶᠢ ᠳᠤᠳᠤᠯᠠᠭᠤᠯᠪᠠ᠃ ᠦᠨᠡᠭᠡᠷ ᠢᠡᠭᠽᠦ᠋ᠡᠭ ᠬᠠᠭᠠᠨ ᠮᠦᠨ ᠪᠤᠯᠬᠤ ᠶᠢ ᠮᠡᠳᠡᠮᠡᠭᠴᠡ ᠡᠰᠡᠨ ᠳᠠᠶᠢᠱᠢ ᠶᠡᠬᠡᠳᠡ ᠪᠠᠶᠠᠷᠯᠠᠨ ᠤᠯᠠᠨ ᠰᠠᠶᠢᠳ ᠲᠦᠰᠢᠮᠡᠳ ᠢᠶᠠᠨ ᠴᠤᠭᠯᠠᠭᠤᠯᠵᠤ᠄ ︽ᠪᠢ ᠳᠡᠭᠷᠢ ᠶᠢᠨ ᠳᠤᠤᠷᠠᠬᠢ ᠶᠢ ᠨᠢᠭᠡᠳᠭᠡᠨ ᠶᠡᠭᠡ ᠮᠤᠩᠭᠤᠯ ᠤᠯᠤᠰ ᠢ ᠳᠠᠬᠢᠨ ᠮᠠᠨᠳᠤᠭᠤᠯᠤᠶ᠎ᠠ ᠭᠡᠮᠡᠨ ᠦᠷᠭᠦᠯᠵᠢ ᠳᠡᠭᠷᠢ ᠳᠤ ᠵᠠᠯᠪᠠᠷᠢᠳᠠᠭ ᠪᠢᠯᠡ᠃ ᠡᠨᠡ ᠡᠳᠤᠷ ᠤᠨ ᠮᠡᠳᠤ ᠳᠡᠶᠢᠯᠬᠦ ᠶᠢ ᠦᠵᠡᠪᠡᠰᠤ ᠮᠠᠭᠠᠳ ᠪᠡᠶᠡᠯᠡᠭᠳᠡᠬᠦ ᠠᠵᠢ︾ ᠭᠡᠳ ᠢᠡᠭᠽᠦ᠋ᠡᠭ ᠬᠠᠭᠠᠨ ᠢ ᠶᠠᠭᠠᠬᠢᠵᠤ ᠰᠢᠢᠳᠪᠤᠷᠢᠯᠡᠬᠦ ᠲᠤᠬᠠᠢ ᠤᠯᠠᠨ ᠠᠴᠠ ᠠᠰᠠᠭᠤᠨ ᠵᠦᠪᠯᠡᠪᠡ᠃ ᠲᠡᠷᠡ ᠲᠤᠬᠠᠢ ᠤᠯᠠᠩᠬᠢ ᠬᠦᠮᠦᠰ ᠠᠯᠠᠬᠤ ᠶᠢ ᠵᠤᠷᠢᠵᠤ ᠪᠠᠶᠢᠪᠠ᠃ ᠭᠠᠭᠴᠠᠬᠦ ᠡᠰᠡᠨ ᠳᠠᠶᠢᠱᠢ ᠶᠢᠨ ᠳᠡᠭᠦᠦ ᠪᠠᠶᠠᠨᠳᠡᠮᠤᠷ ᠡᠰᠡ ᠵᠦᠪᠰᠢᠶᠡᠷᠡᠨ᠄ ︽ᠮᠢᠩ ᠤᠯᠤᠰ ᠤᠨ ᠬᠠᠭᠠᠨ ᠦᠨᠤᠳᠤᠷ ᠳᠡᠭᠷᠢ ᠠᠴᠠ ᠪᠠᠭᠤᠵᠤ ᠢᠷᠡᠭᠰᠡᠨ ᠮᠡᠳᠤ ᠪᠠᠷ ᠪᠢᠳᠡᠨ ᠤ ᠭᠠᠷ ᠲᠤ ᠤᠷᠤᠪᠠ᠃ ᠴᠡᠷᠢᠭ ᠳᠠᠶᠢᠨ ᠤ ᠳᠤᠮᠳᠠ ᠵᠢᠳᠠ ᠰᠡᠯᠡᠮ᠎ᠡ ᠳᠤ ᠡ᠊ᠨᠳᠡᠭᠰᠡᠨ ᠦᠭᠡᠢ ᠪᠠᠶᠢᠳᠠᠯ᠎ᠠ ᠪᠢᠳᠡ ᠳᠡᠭᠦᠨ ᠢ ᠬᠤᠤᠷᠯᠠᠵᠤ ᠶᠠᠭᠠᠬᠢᠵᠤ ᠪᠤᠯᠬᠤ ᠪᠤᠢ︖ ᠬᠠᠷᠢᠨ ᠮᠢᠩ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠲᠤ ᠡᠯᠴᠢ ᠳᠤᠮᠢᠯᠠᠨ ︿ᠢᠡᠭᠽᠦ᠋ᠡᠭ ᠬᠠᠭᠠᠨ ᠢᠶᠠᠨ ᠠᠪᠠᠴᠢᠭᠠᠷᠠᠢ ᠁﹀ ᠭᠡᠵᠦ ᠮᠡᠳᠡᠭᠦᠯᠪᠡᠯ ᠵᠤᠬᠢᠨ᠎ᠠ᠃ ᠳᠡᠳᠡᠨ ᠵᠦᠪᠰᠢᠶᠡᠷᠡᠬᠦ ᠳᠤ ᠬᠦᠷᠪᠡᠯ᠂ ᠪᠢᠳᠡ ᠢᠡᠭᠽᠦ᠋ᠡᠭ ᠬᠠᠭᠠᠨ ᠢ ᠪᠡᠭᠡᠵᠢᠩ ᠳᠤ ᠬᠦᠷᠭᠡᠭᠡᠳ ᠬᠤᠶᠠᠷ ᠡᠳᠡᠭᠡᠳ ᠢᠶᠠᠷ ᠢᠶᠠᠨ ᠡᠪᠰᠡᠵᠦ᠂ ᠳᠠᠯᠡᠭᠡᠢ ᠳ᠋ᠠᠬᠢᠨ ᠢ ᠠᠮᠤᠷ ᠲᠦᠪᠰᠢᠨ ᠪᠤᠯᠭᠠᠵᠤ ᠪᠤᠯᠤᠨ᠎ᠠ︾ ᠭᠡᠪᠡ᠃ ᠡᠨᠡᠬᠦ ᠰᠠᠨᠠᠯ ᠢ ᠡᠰᠡᠨ ᠳᠠᠶᠢᠱᠢ ᠵᠦᠪᠰᠢᠶᠡᠷᠡᠵᠦ᠂ ᠲᠡᠷᠡ ᠳᠠᠷᠤᠢ ᠢᠡᠭᠽᠦ᠋ᠡᠭ ᠬᠠᠭᠠᠨ ᠢ ᠪᠠᠶᠠᠨᠳᠡᠮᠤᠷ ᠲᠤ ᠳᠤᠰᠢᠶᠠᠨ ᠦᠭᠴᠤ ᠰᠠᠶᠢᠳᠤᠷ ᠠᠰᠠᠷᠠᠨ ᠬᠠᠷᠠᠭᠠᠯᠵᠠᠳᠤᠭᠠᠢ ᠭᠡᠵᠡᠢ᠃ ᠪᠠᠶᠠᠨᠳᠡᠮᠤᠷ ᠦᠪᠡᠷ ᠤᠨ ᠴᠡᠷᠢᠭ ᠤᠨ ᠬᠤᠷᠢᠶ᠎ᠠ ᠳᠠᠭᠠᠨ ᠰᠢᠨ᠎ᠡ ᠢᠰᠡᠭᠡᠢ ᠭᠡᠷ ᠢ ᠪᠠᠷᠢᠵᠤ᠂ ᠢᠡᠭᠽᠦ᠋ᠡᠭ ᠬᠠᠭᠠᠨ ᠪᠤᠯᠤᠨ ᠳᠡᠭᠦᠨ ᠤ ᠳᠠᠭᠠᠭᠰᠠᠳ ᠢ ᠰᠠᠭᠤᠯᠭᠠᠭᠰᠠᠨ ᠪᠦᠭᠡᠳ ᠳᠡᠳᠡᠨᠠᠷ ᠲᠤ ᠪᠠᠰᠠ ᠡᠳᠤᠷ ᠳᠤᠳᠤᠮ ᠤᠨ ᠬᠡᠷᠡᠭᠯᠡᠬᠦ ᠦᠭᠡᠷ ᠳᠡᠷᠭᠡ᠂ ᠮᠤᠷᠢ ᠤᠨᠤᠭ᠎ᠠ᠂ ᠮᠢᠬ᠎ᠠ ᠳᠤᠰᠤ᠂ ᠴᠠᠭᠠᠨ ᠢᠳᠡᠭᠡ ᠵᠡᠷᠭᠡ ᠶᠢ ᠬᠦᠷᠭᠡᠵᠦ ᠦᠭᠭᠦᠭᠰᠡᠨ ᠪᠠᠶᠢᠨ᠎ᠠ᠃ ᠳᠡᠭᠦᠨᠴᠢᠯᠡᠨ ᠡᠰᠡᠨ ᠳᠠᠶᠢᠱᠢ ᠪᠠᠷᠢᠴᠠ ᠶᠢᠨ ᠬᠦᠮᠤᠨ ᠢᠶᠠᠷ ᠦᠯᠡᠳᠡᠭᠡᠵᠦ ᠠᠪᠤᠭᠠᠳ ᠬᠤᠷᠢᠶᠠᠵᠤ ᠪᠠᠶᠢᠭᠰᠠᠨ ᠮᠢᠩ ᠤᠯᠤᠰ ᠤᠨ ᠡᠯᠴᠢ ᠬᠠᠠ ᠮᠢᠩ᠂ ᠵᠢᠢ ᠰᠢᠨ ᠨᠠᠷ ᠢ ᠴᠤ ᠰᠤᠯᠠᠯᠠᠨ᠂ ᠢᠡᠭᠽᠦ᠋ᠡᠭ ᠬᠠᠭᠠᠨ ᠳᠤ ᠳᠤᠰᠢᠶᠠᠨ ᠦᠭᠭᠦᠭᠡᠳ ᠪᠡᠶ᠎ᠡ ᠶᠢ ᠨᠢ ᠰᠤᠪᠢᠯᠠᠭᠤᠯᠪᠠ᠃ ᠪᠠᠶᠠᠨᠳᠡᠮᠤᠷ ᠪᠤᠯᠤᠨ ᠢᠡᠭᠽᠦ᠋ᠡᠭ ᠬᠠᠭᠠᠨ ᠤ ᠦᠷᠤᠭᠡ ᠨᠢ ᠡᠰᠡᠨ ᠳᠠᠶᠢᠱᠢ ᠶᠢᠨ ᠪᠠᠶᠢᠭᠰᠠᠨ ᠭᠠᠵᠠᠷ ᠠᠴᠠ ᠠᠷᠪᠠᠭᠠᠳ ᠭᠠᠵᠠᠷ ᠯᠠ ᠵᠠᠶᠢᠳᠠᠢ ᠪᠠᠶᠢᠵᠠᠢ᠃        1449 ᠤᠨ ᠳᠤ᠂ ᠢᠡᠭᠽᠦ᠋ᠡᠭ ᠬᠠᠭᠠᠨ ᠤ ᠳᠡᠭᠦᠦ ᠴᠧᠡᠭ ᠸᠠᠩ ᠵᠤ᠋ ᠴᠢ ᠢᠤᠢ ᠶᠡᠭᠡ ᠰᠠᠭᠤᠷᠢᠨ ᠢ ᠵᠠᠯᠭᠠᠮᠵᠢᠯᠠᠵᠤ᠂ ᠦᠪᠡᠷ ᠤᠨ ᠪᠡᠶ᠎ᠠ ᠪᠠᠨ ᠵᠢᠩᠳᠠᠢ ᠬᠠᠭᠠᠨ ᠭᠡᠮᠡᠨ ᠡᠷᠭᠦᠮᠵᠢᠯᠡᠭᠰᠡᠨ ᠪᠦᠭᠡᠳ ᠤᠨ ᠤ ᠴᠤᠯᠠ ᠪᠠᠨ ᠵᠢᠩ ᠲᠠᠢ ᠶᠢᠨ ᠳᠡᠷᠢᠭᠦᠨ ᠤᠨ ︵1450 ᠤᠨ︶ ᠭᠡᠵᠦ ᠦᠭᠡᠷᠡᠴᠢᠯᠡᠪᠡ᠃ ᠡᠨᠡᠬᠦ ᠴᠢᠮᠡᠭᠡ ᠶᠢ ᠢᠡᠭᠽᠦ᠋ᠡᠭ ᠬᠠᠭᠠᠨ ᠤᠯᠵᠤ ᠰᠤᠨᠤᠰᠤᠭᠠᠳ᠂ ᠤᠯᠤᠰ ᠲᠠᠭᠠᠨ ᠪᠤᠴᠠᠵᠤ ᠳᠠᠬᠢᠨ ᠶᠡᠭᠡ ᠤᠷᠤ ᠪᠠᠨ ᠡᠵᠡᠯᠡᠶ᠎ᠡ ᠭᠡᠵᠦ ᠪᠠᠴᠢᠮᠳᠠᠨ᠂ ᠡᠰᠡᠨ ᠳᠠᠶᠢᠱᠢ ᠯᠤᠭ᠎ᠠ ᠵᠦᠪᠳᠡᠵᠦ᠂ ᠲᠠᠶᠢᠭᠠᠨ ᠰᠢ ᠨᠢᠩ ᠢ ᠮᠤᠩᠭᠤᠯ ᠤᠨ ᠡᠯᠴᠢ ᠲᠠᠢ ᠬᠠᠮᠳᠤ ᠪᠠᠷ ᠪᠡᠭᠡᠵᠢᠩ ᠳᠤ ᠳᠤᠮᠢᠯᠠᠨ ᠵᠠᠷᠯᠢᠭ ᠢᠶᠠᠨ ᠤᠯᠠᠮᠵᠢᠯᠠᠭᠤᠯᠵᠤ᠂ ᠪᠤᠴᠠᠵᠤ ᠬᠠᠷᠢᠬᠤ ᠤᠴᠢᠷ ᠢᠶᠠᠨ ᠬᠠᠷᠢᠯᠴᠠᠭᠤᠯᠤᠶ᠎ᠠ ᠭᠡᠵᠦ ᠳᠤᠭᠳᠠᠵᠠᠢ᠃ ᠰᠢ ᠨᠢᠩ ᠪᠤᠯ ᠮᠢᠩ ᠤᠯᠤᠰ ᠤᠨ ᠬᠠᠭᠠᠨ ᠤ ᠤᠷᠳᠤᠨ ᠳᠤ ᠲᠠᠶᠢᠭᠠᠨ ᠪᠠᠶᠢᠭᠰᠠᠨ ᠪᠦᠭᠡᠳ ᠲᠦᠮᠤᠪᠤᠤ ᠶᠢᠨ ᠪᠠᠶᠢᠯᠳᠤᠭᠠᠨ ᠤ ᠳᠤᠮᠳᠠ ᠡᠰᠡᠨ ᠳᠠᠶᠢᠱᠢ ᠳᠤ ᠤᠷᠤᠵᠤ ᠦᠭᠭᠦᠭᠰᠡᠨ ᠮᠤᠩᠭᠤᠯ ᠬᠦᠮᠤᠨ ᠪᠤᠯᠬᠤ ᠶᠤᠮ᠃ ᠲᠡᠷᠡ ᠤᠭ ᠠᠴᠠ ᠮᠢᠩ ᠤᠯᠤᠰ ᠤᠨ ᠤᠷᠳᠤᠨ ᠤ ᠳᠤᠳᠤᠷᠠᠬᠢ ᠪᠠᠶᠢᠳᠠᠯ ᠢ ᠳᠤᠳᠤᠷᠬᠠᠢ ᠮᠡᠳᠡᠳᠡᠭ ᠪᠤᠯᠬᠤᠷ ᠡᠰᠡᠨ ᠳᠠᠶᠢᠱᠢ ᠪᠤᠯᠤᠨ ᠢᠡᠭᠽᠦ᠋ᠡᠭ ᠬᠠᠭᠠᠨ ᠳᠡᠭᠦᠨ ᠢ ᠰᠤᠩᠭᠤᠵᠤ ᠮᠤᠩᠭᠤᠯ ᠤᠨ ᠡᠯᠴᠢ ᠲᠠᠢ ᠬᠠᠮᠳᠤ ᠪᠠᠷ ᠪᠡᠭᠡᠵᠢᠩ ᠳᠤ ᠶᠠᠪᠤᠭᠤᠯᠬᠤ ᠪᠠᠷ ᠪᠤᠯᠤᠭᠰᠠᠨ ᠪᠠᠶᠢᠪᠠ᠃ ᠰᠢ ᠨᠢᠩ ᠢ ᠮᠤᠷᠳᠠᠬᠤ ᠦᠶ᠎ᠡ ᠳᠤ᠂ ᠢᠡᠭᠽᠦ᠋ᠡᠭ ᠬᠠᠭᠠᠨ ᠪᠠᠰᠠ ᠦᠪᠡᠷ ᠤᠨ ᠭᠠᠷ ᠢᠶᠠᠷ ᠨᠢᠭᠡᠨ ᠬᠠᠭᠤᠳᠠᠰᠤ ᠵᠠᠬᠢᠳᠠᠯ ᠪᠢᠴᠢᠵᠤ᠂ ᠡᠰᠡᠨ ᠳᠠᠶᠢᠱᠢ ᠦᠨᠡᠭᠡᠷ ᠳᠡᠭᠦᠨ ᠢ ᠪᠡᠭᠡᠵᠢᠩ ᠳᠤ ᠬᠦᠷᠭᠡᠬᠦ ᠦᠨᠡᠨᠴᠢ ᠰᠠᠨᠠᠭ᠎ᠠ ᠲᠠᠢ ᠪᠠᠶᠢᠨ᠎ᠠ ᠭᠡᠳᠡᠭ ᠢ ᠮᠡᠳᠡᠭᠦᠯᠵᠡᠢ᠃ ᠡᠯᠴᠢ ᠨᠠᠷ ᠢ ᠮᠤᠷᠳᠠᠨ ᠭᠠᠷᠤᠮᠠᠭᠴᠠ᠂ ᠡᠰᠡᠨ ᠳᠠᠶᠢᠱᠢ ᠪᠤᠯᠤᠨ ᠳᠠᠶᠢᠰᠦ᠋ᠡᠭ ᠬᠠᠭᠠᠨ ᠮᠤᠩᠭᠤᠯ ᠤᠨ ᠤᠯᠠᠨ ᠠᠶᠢᠮᠠᠭ ᠤᠨ ᠨᠤᠶᠠᠳ ᠲᠦᠰᠢᠮᠡᠳ ᠢᠶᠠᠨ ᠴᠤᠭᠯᠠᠭᠤᠯᠤᠨ ᠦᠪᠡᠳᠡᠭᠰᠢ ᠶᠡᠭᠡ ᠴᠤᠭᠯᠠᠭᠠᠨ ᠬᠢᠵᠤ᠂ ᠮᠤᠩᠭᠤᠯᠴᠤᠳ ᠤᠨ ᠬᠠᠮᠤᠭ ᠶᠡᠭᠡ ᠶᠤᠰᠤᠯᠠᠯ ᠢᠶᠠᠷ ᠮᠤᠷᠢ ᠠᠯᠠᠵᠤ ᠳᠠᠶᠢᠯᠠᠯᠭ᠎ᠠ ᠳᠠᠯᠪᠢᠭᠠᠳ᠂ ᠢᠡᠭᠽᠦ᠋ᠡᠭ ᠬᠠᠭᠠᠨ ᠢ ᠶᠡᠭᠡ ᠴᠡᠷᠢᠭ ᠢᠶᠠᠷ ᠬᠠᠮᠠᠭᠠᠯᠠᠭᠤᠯᠵᠤ ᠪᠡᠭᠡᠵᠢᠩ ᠳᠤ ᠬᠦᠷᠭᠡᠭᠡᠳ᠂ ᠬᠠᠭᠠᠨ ᠰᠠᠭᠤᠷᠢᠨ ᠳᠤᠨᠢ ᠳᠠᠬᠢᠨ ᠰᠠᠭᠤᠯᠭᠠᠨ᠎ᠠ ᠭᠡᠵᠦ ᠰᠦᠷ ᠵᠢᠪᠬᠤᠯᠠᠩ ᠲᠠᠢ ᠪᠠᠷ ᠨᠡᠶᠢᠳᠡᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠢᠡᠭᠽᠦ᠋ᠡᠭ ᠬᠠᠭᠠᠨ ᠢ ᠬᠦᠷᠭᠡᠬᠦ ᠰᠦᠷ ᠵᠢᠪᠬᠤᠭ᠎ᠠ ᠲᠠᠢ ᠴᠡᠷᠢᠭ ᠠᠩᠬᠢ ᠬᠦᠳᠡᠯᠤᠨ ᠭᠠᠷᠤᠭᠠᠳ ᠳ᠋ᠠ ᠲᠦᠡᠭ ᠬᠤᠳᠠ ᠳᠤ ᠬᠦᠷᠦᠭᠰᠡᠨ ᠳᠤ᠂ ᠲᠤᠰ ᠬᠤᠳᠠ ᠶᠢ ᠰᠠᠬᠢᠭᠰᠠᠨ ᠵᠠᠩᠵᠤᠨ ᠬᠦᠸᠧ ᠵᠢᠩ ᠬᠠᠭᠠᠯᠭ᠎ᠠ ︵ᠡᠭᠦᠳᠡ︶ ᠪᠠᠨ ᠳᠠᠷᠤᠵᠤ᠂ ᠡᠵᠡᠨ ᠢᠶᠠᠨ ᠤᠷᠤᠭᠤᠯᠤᠨ ᠠᠪᠤᠭᠰᠠᠨ ᠦᠭᠡᠢ ᠪᠤᠯᠬᠤᠷ ᠡᠰᠡᠨ ᠳᠠᠶᠢᠱᠢ ᠦᠷᠭᠦᠯᠵᠢᠯᠡᠨ ᠤᠷᠤᠭᠰᠢ ᠳᠠᠪᠰᠢᠭᠠᠳ᠂ ᠶᠠᠩ ᠾᠧ ᠬᠤᠳᠠ ᠶᠢ ᠳᠠᠮᠵᠢᠨ᠂ ᠭᠤᠸᠠᠩ ᠴᠧᠡᠭ ︵ᠤᠳᠤᠬᠢ ᠾᠧᠪᠧᠢ ᠮᠤᠵᠢ ᠶᠢᠨ ᠯᠠᠢ ᠶᠤᠸᠠᠨ ᠰᠢᠶᠠᠨ ᠳᠤ ᠪᠤᠢ︶ ᠳᠤ ᠬᠦᠷᠦᠭᠰᠡᠨ ᠪᠠᠶᠢᠨ᠎ᠠ᠃ ᠳᠡᠨᠳᠡᠴᠡ ᠡᠰᠡᠨ ᠳᠠᠶᠢᠱᠢ ᠶᠡᠭᠡ ᠴᠡᠷᠢᠭ ᠢᠶᠠᠨ ᠬᠤᠶᠠᠷ ᠵᠠᠮ ᠳᠤ ᠬᠤᠪᠢᠶᠠᠵᠤ᠂ ᠨᠢᠭᠡᠨ ᠵᠠᠮ ᠤᠨ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ ᠦᠪᠡᠷ ᠢᠶᠠᠨ ᠪᠠᠶᠠᠨᠳᠡᠮᠤᠷ ᠨᠤᠶᠠᠨ ᠯᠤᠭ᠎ᠠ ᠵᠠᠬᠢᠷᠴᠤ ᠽᠢ ᠵᠢᠩ ᠭᠤᠸᠠᠨ ᠪᠤᠭᠤᠮᠳᠠ ᠪᠠᠷ ᠳᠠᠮᠵᠢᠨ᠂ ᠢᠡᠭᠽᠦ᠋ᠡᠭ ᠬᠠᠭᠠᠨ ᠢ ᠬᠠᠮᠠᠭᠠᠯᠠᠨ ᠬᠦᠷᠭᠡᠵᠦ ᠪᠡᠭᠡᠵᠢᠩ ᠳᠤ ᠤᠷᠤᠬᠤ ᠪᠠᠷ ᠪᠤᠯᠪᠠ︔ ᠨᠦᠭᠦᠭᠡ ᠨᠢᠭᠡᠨ ᠵᠠᠮ ᠤᠨ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ ᠳᠠᠶᠢᠰᠦ᠋ᠡᠭ ᠬᠠᠭᠠᠨ ᠤᠳᠤᠷᠢᠳᠴᠤ ᠴᠠᠪᠴᠢᠶᠠᠯ ᠪᠤᠭᠤᠮᠳᠠ ᠶᠢᠨ ᠭᠠᠳᠠᠨ᠎ᠠ ᠰᠡᠷᠭᠡᠶᠢᠯᠡᠨ ᠰᠠᠭᠤᠬᠤ ᠪᠠᠷ ᠪᠤᠯᠪᠠ᠃ ᠢᠡᠭᠽᠦ᠋ᠡᠭ ᠬᠠᠭᠠᠨ ᠢ ᠬᠠᠮᠠᠭᠠᠯᠠᠨ ᠬᠦᠷᠭᠡᠵᠦ ᠶᠠᠪᠤᠭ᠎ᠠ ᠡᠰᠡᠨ ᠳᠠᠶᠢᠱᠢ ᠨᠠᠷ ᠤᠨ ᠴᠡᠷᠢᠭ ᠪᠡᠷᠭᠡ ᠪᠠᠷᠳᠠᠭᠠᠳᠤ ᠠᠭᠤᠯᠠᠨ ᠵᠠᠪᠠ ᠪᠠᠷ ᠦᠡᠭᠭᠡᠷᠡᠵᠦ ᠽᠢ ᠵᠢᠩ ᠭᠤᠸᠠᠨ ᠪᠤᠭᠤᠮᠳᠠ ᠳᠤ ᠬᠦᠷᠬᠦ ᠦᠶᠡᠰ᠂ ᠨᠢᠭᠡᠨᠳᠡ ᠰᠦᠨᠢ ᠳᠤᠮᠳᠠ ᠪᠤᠯᠤᠭᠰᠠᠨ ᠪᠤᠯᠬᠤᠷ ᠠᠭᠤᠯᠠᠨ ᠬᠠᠪᠴᠢᠯ ᠳᠤ ᠬᠤᠨᠤᠭᠰᠠᠨ ᠪᠠᠶᠢᠵᠠᠢ᠃ ᠮᠠᠷᠭᠠᠰᠢ ᠦᠷᠯᠦᠭᠡ ᠨᠢ ᠡᠰᠡᠨ ᠳᠠᠶᠢᠱᠢ ᠬᠦᠮᠤᠨ ᠶᠠᠪᠤᠭᠤᠯᠵᠤ ᠪᠤᠭᠤᠮᠳᠠ ᠶᠢᠨ ᠳᠤᠤᠷ᠎ᠠ ᠤᠴᠢᠭᠤᠯᠤᠭᠠᠳ ᠭᠡᠯᠡᠯᠴᠡᠭᠦᠯᠦᠭᠰᠡᠨ ᠳᠤ᠂ ᠪᠤᠭᠤᠮᠳᠠ ᠰᠠᠬᠢᠭᠰᠠᠨ ᠲᠦᠰᠢᠮᠡᠯ ᠰᠦᠨ ᠰᠢᠶᠠᠩ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠦᠭᠡᠢ ᠲᠤᠯᠠ ᠡᠰᠡᠨ ᠳᠠᠶᠢᠱᠢ ᠪᠦᠬᠦ ᠴᠡᠷᠢᠭ ᠲᠡᠭᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠬᠦᠴᠤᠯᠡᠨ ᠪᠠᠶᠢᠯᠳᠤᠭᠤᠯᠪᠠ᠃ ᠬᠤᠶᠠᠷ ᠡᠳᠡᠭᠡᠳ ᠢᠶᠠᠷ ᠢᠶᠠᠨ ᠰᠢᠷᠤᠭᠦᠨ ᠳᠤᠯᠤᠯᠳᠤᠵᠤ᠂ ᠮᠢᠩ ᠤᠯᠤᠰ ᠤᠨ ᠴᠡᠷᠢᠭ ᠡᠰᠡᠷᠭᠦᠴᠡᠯᠳᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠤᠯᠤᠭᠰᠠᠨ ᠲᠤᠯᠠ ᠰᠦᠨ ᠰᠢᠶᠠᠩ ᠪᠤᠭᠤᠮᠳᠠ ᠪᠠᠨ ᠬᠠᠶᠠᠵᠤ ᠵᠤᠯᠤᠭᠰᠠᠨ ᠪᠦᠭᠡᠳ ᠡᠰᠡᠨ ᠳᠠᠶᠢᠱᠢ ᠶᠡᠭᠡ ᠴᠡᠷᠢᠭ ᠢᠶᠠᠨ ᠳᠠᠶᠢᠴᠢᠯᠠᠵᠤ ᠢᠡᠭᠽᠦ᠋ᠡᠭ ᠬᠠᠭᠠᠨ ᠤ ᠳᠡᠷᠭᠡ ᠮᠤᠷᠢ ᠶᠢ ᠬᠠᠮᠠᠭᠠᠯᠠᠨ ᠪᠤᠭᠤᠮᠳᠠ ᠶᠢᠨ ᠳᠤᠳᠤᠷ᠎ᠠ ᠤᠷᠤᠪᠠ ᠃ ᠡᠨᠡ ᠴᠢᠮᠡᠭᠡ ᠪᠡᠭᠡᠵᠢᠩ ᠬᠤᠳᠠ ᠳᠤ ᠤᠯᠠᠮᠵᠢᠯᠠᠭᠳᠠᠨ ᠬᠦᠷᠦᠭᠰᠡᠨ ᠳᠤ᠂ ᠮᠢᠩ ᠤᠯᠤᠰ ᠤᠨ ᠵᠢᠩᠳᠠᠢ ᠬᠠᠭᠠᠨ ᠲᠡᠷᠡ ᠳᠠᠷᠤᠢ ᠳᠤᠨᠢ ᠠᠷᠭ᠎ᠠ ᠭᠡᠮᠵᠢᠶ᠎ᠡ ᠠᠪᠴᠤ᠂ ᠬᠤᠳᠠ ᠶᠢᠨ ᠶᠢᠰᠤᠨ ᠬᠠᠭᠠᠯᠭ᠎ᠠ ︵ᠡᠭᠦᠳᠡ︶ ᠶᠢ ᠪᠠᠬᠢᠯᠡᠨ ᠰᠠᠬᠢᠭᠤᠯᠤᠭᠠᠳ᠂ ᠡᠯ᠎ᠡ ᠵᠠᠮ ᠤᠨ ᠴᠡᠷᠢᠭ ᠮᠤᠷᠢ ᠶᠢ ᠰᠢ ᠾᠧᠡᠭ ᠢᠶᠠᠷ ᠶᠡᠷᠤᠩᠭᠡᠶᠢᠯᠡᠨ ᠵᠠᠬᠢᠷᠤᠭᠤᠯᠵᠤ᠂ ᠪᠠᠰᠠ ᠯᠢᠶᠤᠤ ᠳ᠋ᠦᠡᠭ᠂ ᠰᠢᠤᠸᠠᠨ ᠹᠦ᠋ ᠵᠡᠷᠭᠡ ᠭᠠᠵᠠᠷ ᠠᠴᠠ ᠳᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠰᠢᠯᠵᠢᠭᠦᠯᠤᠨ ᠠᠪᠴᠢᠷᠠᠭᠤᠯᠵᠤ ᠲᠤᠰᠠᠯᠠᠭᠤᠯᠪᠠ᠃ ᠡᠰᠡᠨ ᠳᠠᠶᠢᠱᠢ ᠶᠢᠨ ᠶᠡᠭᠡ ᠴᠡᠷᠢᠭ ᠢᠵᠧᠤ ︵ᠤᠳᠤᠬᠢ ᠾᠧᠪᠧᠢ ᠮᠤᠵᠢ ᠶᠢᠨ ᠢ ᠰᠢᠶᠠᠨ︶ ᠳᠤ ᠬᠦᠷᠴᠤ ᠢᠷᠡᠭᠡᠳ ᠪᠠᠭᠤᠳᠠᠯᠯᠠᠵᠤ ᠪᠠᠶᠢᠳᠠᠯ᠎ᠠ᠂ ᠤᠷᠢᠳᠤ ᠮᠢᠩ ᠤᠯᠤᠰ ᠲᠤ ᠳᠤᠮᠢᠯᠠᠨ ᠶᠠᠪᠤᠭᠤᠯᠤᠭᠰᠠᠨ ᠡᠯᠴᠢ ᠰᠢ ᠨᠢᠩ᠂ ᠵᠢᠢ ᠳ᠋ᠦᠸᠧ ᠨᠠᠷ ᠪᠠᠰᠠ ᠪᠡᠭᠡᠵᠢᠩ ᠠᠴᠠ ᠠᠳᠡ ᠬᠦᠷᠴᠤ ᠢᠷᠡᠭᠡᠳ ᠠᠭᠤᠯᠵᠠᠭᠰᠠᠨ ᠪᠠᠶᠢᠨ᠎ᠠ᠃ ᠡᠰᠡᠨ ᠳᠠᠶᠢᠱᠢ ᠶᠠᠭᠠᠷᠠᠪᠴᠢᠯᠠᠨ ᠳᠡᠳᠡᠨᠠᠷ ᠢ ᠳᠠᠭᠤᠳᠠᠨ ᠢᠷᠡᠭᠦᠯᠵᠦ ᠪᠠᠶᠢᠳᠠᠯ ᠢ ᠠᠰᠠᠭᠤᠭᠰᠠᠨ ᠳᠤ᠂ ᠮᠢᠩ ᠤᠯᠤᠰ ᠤᠨ ᠡᠯᠴᠢ ᠶᠦᠸᠧ ᠴᠢᠶᠠᠨ ᠵᠢᠩᠳᠠᠢ ᠬᠠᠭᠠᠨ ᠤ ᠦᠪᠡᠷ ᠤᠨ ᠭᠠᠷ ᠢᠶᠠᠷ ᠢᠶᠠᠨ ᠪᠢᠴᠢᠭᠰᠡᠨ ᠵᠠᠬᠢᠳᠠᠯ ᠢ ᠡᠷᠭᠦᠨ ᠪᠠᠷᠢᠪᠠ᠂ ᠲᠡᠷᠡ ᠵᠠᠬᠢᠳᠠᠯ ᠤᠨ ᠦᠭᠡ᠄ ︽ᠮᠡᠭᠦᠰ ᠮᠢᠨᠤ ᠪᠡᠶ᠎ᠡ ᠨᠢᠭᠡᠨᠳᠡ ᠶᠡᠭᠡ ᠰᠠᠭᠤᠷᠢᠨ ᠳᠤ ᠰᠠᠭᠤᠭᠰᠠᠨ ᠲᠤᠯᠠ ᠠᠬ᠎ᠠ ︵ᠢᠡᠭᠽᠦ᠋ᠡᠭ︶ ᠪᠡᠭᠡᠵᠢᠩ ᠳᠤ ᠪᠤᠴᠠᠵᠤ ᠢᠷᠡᠭᠡᠳ ᠳᠠᠬᠢᠨ ᠬᠠᠭᠠᠨ ᠰᠠᠭᠤᠬᠤ ᠠᠴᠠ ᠨᠢᠭᠡᠨᠳᠡ ᠦᠡᠭᠭᠡᠷᠡᠭᠰᠡᠨ ᠪᠠᠶᠢᠨ᠎ᠠ᠃ ᠳᠠᠶᠢᠱᠢ ᠲᠠ ᠠᠬ᠎ᠠ ᠶᠢ ᠮᠢᠨᠢ ᠪᠡᠭᠡᠵᠢᠩ ᠵᠦᠭ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠴᠢᠨᠢ ᠶᠠᠷᠢᠶᠠᠨ ᠦᠭᠡᠢ ᠶᠡᠭᠡ ᠰᠠᠶᠢᠨ ᠭᠡᠷᠡᠭ ᠪᠤᠯᠤᠨ᠎ᠠ᠂ ᠭᠡᠳᠡᠯ᠎ᠡ ᠤᠯᠠᠨ ᠴᠡᠷᠢᠭ ᠮᠤᠷᠢ ᠪᠠᠷ ᠬᠦᠷᠭᠡᠬᠦ ᠬᠡᠷᠡᠭ ᠦᠭᠡᠢ᠂ ᠵᠦᠪᠬᠡᠨ ᠠᠷᠪᠠ ᠭᠠᠷᠤᠢ ᠬᠦᠮᠤᠨ ᠢᠶᠠᠷ ᠬᠦᠷᠭᠡᠭᠦᠯᠪᠡᠯ ᠪᠤᠯᠴᠢᠨ᠎ᠠ︾ ᠭᠡᠵᠡᠢ᠃ ᠡᠰᠡᠨ ᠳᠠᠶᠢᠱᠢ ᠵᠠᠬᠢᠳᠠᠯ ᠢ ᠦᠵᠡᠭᠰᠡᠨ ᠤ ᠰᠡᠭᠦᠯᠡᠷ᠂ ᠵᠢᠩᠳᠠᠢ ᠬᠠᠭᠠᠨ ᠦᠡᠭᠭᠡᠨ ᠳᠡᠭᠡᠷ᠎ᠡ ᠪᠠᠨ ᠢᠡᠭᠽᠦ᠋ᠡᠭ ᠬᠠᠭᠠᠨ ᠢ ᠪᠡᠭᠡᠵᠢᠩ ᠳᠤ ᠬᠦᠷᠭᠡᠵᠦ ᠢᠷᠡᠬᠦ ᠳᠤ ᠪᠠᠶᠠᠷᠯᠠᠵᠤ ᠤᠭᠳᠤᠨ ᠪᠠᠶᠢᠭ᠎ᠠ ᠪᠤᠯᠪᠠᠴᠤ᠂ ᠦᠨᠡᠨ ᠳᠡᠭᠡᠨ ᠳᠦᠢᠯ ᠢᠶᠠᠷ ᠳᠤᠷ᠎ᠠ ᠦᠭᠡᠶᠢᠴᠡᠵᠦ ᠪᠠᠶᠢᠭ᠎ᠠ ᠶᠢ ᠤᠯᠵᠤ ᠮᠡᠳᠡᠭᠡᠳ ᠳᠤᠩ ᠬᠢᠯᠢᠩᠨᠡᠵᠦ᠂ ᠴᠡᠷᠢᠭ ᠮᠤᠷᠢ ᠪᠠᠨ ᠰᠢᠬᠠᠮᠳᠠᠭᠤᠯᠤᠨ ᠳᠦᠷᠭᠡᠯᠡᠵᠦ ᠵᠠᠮᠨᠠᠭᠠᠳ ᠨᠡᠶᠢᠰᠯᠡᠯ ᠬᠤᠳᠠ ᠪᠡᠭᠡᠵᠢᠩ ᠤᠨ ᠳ᠋ᠧ ᠱᠧᠡᠭ ᠮᠧᠨ ᠬᠠᠭᠠᠯᠭ᠎ᠠ ︵ᠡᠭᠦᠳᠡ︶ ᠶᠢᠨ ᠳᠡᠷᠭᠡᠳᠡ ᠬᠦᠷᠴᠤ ᠴᠡᠷᠢᠭ ᠤᠨ ᠬᠦᠷᠢᠶ᠎ᠡ ᠳᠤ ᠪᠠᠭᠤᠪᠠ᠃ ᠳᠡᠭᠡᠭᠡᠳ ᠮᠢᠩ ᠤᠯᠤᠰ ᠢ ᠶᠡᠭᠡ ᠰᠠᠶᠢᠳ ᠲᠦᠰᠢᠮᠡᠳ ᠢᠶᠠᠨ ᠳᠤᠮᠢᠯᠠᠨ ᠬᠤᠳᠠ ᠶᠢᠨ ᠭᠠᠳᠠᠨ᠎ᠠ ᠢᠷᠡᠭᠦᠯᠵᠦ᠂ ᠬᠠᠭᠠᠨ ᠢᠡᠭᠽᠦ᠋ᠡᠭ ᠢᠶᠠᠨ ᠤᠭᠳᠤᠨ ᠠᠪᠠᠴᠢᠳᠤᠭᠠᠢ ᠭᠡᠪᠡ᠃ ᠡᠭᠦᠨ ᠢ ᠵᠢᠩᠳᠠᠢ ᠬᠠᠭᠠᠨ ᠡᠰᠡ ᠵᠦᠪᠰᠢᠶᠡᠷᠡᠵᠦ᠂ ᠵᠦᠪᠬᠡᠨ ᠡᠩ ᠤᠨ ᠲᠦᠰᠢᠮᠡᠯ ᠢᠶᠠᠨ ᠳᠤᠮᠢᠯᠠᠨ ᠬᠤᠳᠠ ᠶᠢᠨ ᠭᠠᠳᠠᠨ᠎ᠠ ᠢᠷᠡᠭᠦᠯᠵᠦ ᠢᠡᠭᠽᠦ᠋ᠡᠭ ᠬᠠᠭᠠᠨ ᠯᠤᠭ᠎ᠠ ᠠᠭᠤᠯᠵᠠᠭᠰᠠᠨ ᠪᠠᠶᠢᠨ᠎ᠠ᠃ ᠡᠭᠦᠨ ᠳᠤ ᠢᠡᠭᠽᠦ᠋ᠡᠭ ᠬᠠᠭᠠᠨ ᠶᠡᠭᠡᠳᠡ ᠳᠤᠷ᠎ᠠ ᠦᠭᠡᠶᠢᠴᠡᠵᠦ᠂ ᠳᠡᠷᠡ ᠳᠠᠷᠤᠢ ᠢᠤᠢ ᠴᠢᠶᠠᠨ ᠵᠡᠷᠭᠡ ᠶᠡᠭᠡᠰ ᠲᠦᠰᠢᠮᠡᠳ ᠤᠨ ᠨᠡᠷ᠎ᠡ ᠶᠢ ᠰᠢᠭᠤᠳ ᠳᠤᠷᠠᠳᠤᠨ᠂ ᠬᠤᠳᠠ ᠶᠢᠨ ᠭᠠᠳᠠᠨ᠎ᠠ ᠢᠷᠡᠵᠦ ᠤᠭᠳᠤᠰᠤᠭᠠᠢ ᠭᠡᠪᠡ᠃ ᠭᠡᠳᠡᠯ᠎ᠡ ᠵᠢᠩᠳᠠᠢ ᠬᠠᠭᠠᠨ ᠪᠠᠰᠠ ᠵᠦᠪᠰᠢᠶᠡᠷᠡᠭᠰᠡᠨ ᠦᠭᠡᠢ ᠪᠠᠶᠢᠯ᠎ᠠ᠂ ᠵᠢᠩᠳᠠᠢ ᠬᠠᠭᠠᠨ ︽ᠶᠡᠭᠡ ᠠᠬ᠎ᠠ︾ ᠳᠠᠭᠠᠨ ᠡᠨᠡ ᠮᠡᠳᠤ ᠶᠤᠰᠤ ᠦᠭᠡᠢ ᠬᠦᠡᠭᠭᠡᠪᠴᠢᠯᠡᠨ ᠠᠭᠠᠰᠢᠯᠠᠬᠤ ᠶᠢ ᠦᠵᠡᠭᠡᠳ ᠡᠰᠡᠨ ᠳᠠᠶᠢᠱᠢ ᠶᠡᠭᠡᠳᠡ ᠠᠭᠤᠷᠯᠠᠵᠤ᠄ ︽ᠨᠤᠬᠠᠢ ᠪᠠᠶᠢᠳᠠᠯ᠎ᠠ ᠡᠵᠡᠨ ᠢᠶᠠᠨ ᠳᠠᠨᠢᠳᠠᠭ ᠶᠤᠮ᠃ ᠡᠳᠤᠭᠡ ᠪᠢ ᠪᠡᠶ᠎ᠡ ᠪᠠᠷ ᠢᠶᠠᠨ ᠬᠠᠭᠠᠨ ᠢ ᠴᠢᠨᠢ ᠬᠦᠷᠭᠡᠵᠦ ᠬᠤᠳᠠᠨ ᠤ ᠬᠠᠭᠠᠯᠭ᠎ᠠ ︵ᠡᠭᠦᠳᠡ︶ ᠶᠢᠨ ᠳᠡᠷᠭᠡᠳᠡ ᠢᠷᠡᠭᠰᠡᠨ ᠪᠠᠶᠢᠳᠠᠯ᠎ᠠ ᠲᠤᠰᠴᠤ ᠠᠪᠠᠴᠢᠬᠤ ᠬᠦᠮᠤᠨ ᠦᠭᠡᠢ ᠨᠢ ᠦᠨᠡᠭᠡᠷ ᠬᠠᠷᠠᠰᠠᠯᠳᠠᠢ︾ ᠭᠡᠵᠦ ᠭᠡᠯᠡᠭᠡᠳ ᠢᠡᠭᠽᠦ᠋ᠡᠭ ᠬᠠᠭᠠᠨ ᠢ ᠠᠪᠤᠨ ᠬᠤᠶᠢᠰᠢ ᠪᠤᠴᠠᠪᠠ᠃ ᠡᠰᠡᠨ ᠳᠠᠶᠢᠱᠢ ᠶᠢᠨ ᠶᠡᠭᠡ ᠴᠡᠷᠢᠭ ᠬᠤᠶᠢᠳᠤ ᠵᠦᠭ ᠠᠶᠠᠯᠠᠭᠰᠠᠭᠠᠷ 1449 ᠤᠨ ᠤ 11 ᠰᠠᠷ᠎ᠠ ᠶᠢᠨ 11 ᠤ ᠡᠳᠤᠷ᠂ ᠪᠠᠭ᠎ᠠ ᠰᠢᠷ᠎ᠠ ᠮᠦᠷᠡᠨ ︵ᠤᠳᠤᠬᠢ ᠦᠪᠤᠷ ᠮᠤᠩᠭᠤᠯ ᠤᠨ ᠳᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠤᠰᠢᠭᠤᠨ ᠳᠤ ᠪᠤᠢ︶ ᠤ ᠵᠡᠭᠦᠨ ᠬᠦᠪᠡᠭᠡ ᠳᠤ ᠴᠡᠷᠢᠭ ᠤᠨ ᠬᠦᠷᠢᠶ᠎ᠡ ᠪᠠᠭᠤᠪᠠ᠃ ᠡᠨᠡ ᠡᠳᠤᠷ ᠪᠤᠯ ᠢᠡᠭᠽᠦ᠋ᠡᠭ ᠬᠠᠭᠠᠨ ᠤ ᠲᠦᠷᠦᠭᠰᠡᠨ ᠡᠳᠤᠷ ᠪᠤᠯᠬᠤᠷ ᠡᠰᠡᠨ ᠳᠠᠶᠢᠱᠢ ᠦᠪᠡᠷ ᠤᠨ ᠪᠡᠶ᠎ᠡ ᠪᠠᠷ ᠪᠠᠶᠠᠷ ᠬᠦᠷᠭᠡᠵᠦ᠂ ᠰᠢᠷ᠎ᠠ ᠦᠡᠭᠭᠡ ᠶᠢᠨ ᠯᠤᠤᠳᠤ ᠪᠤᠯᠭᠠᠨ ᠠᠷᠠᠰᠤ ᠶᠢᠨ ᠬᠦᠷᠮ᠎ᠡ ᠪᠡᠯᠡᠭᠯᠡᠨ ᠦᠭᠴᠤ᠂ ᠮᠤᠷᠢ ᠠᠯᠠᠨ ᠨᠠᠶᠢᠷ ᠬᠢᠵᠤ᠂ ᠨᠠᠰᠤᠨ ᠦᠯᠵᠡᠢ ᠪᠠᠳᠤᠳᠬᠤ ᠶᠢ ᠨᠢ ᠵᠦᠡᠭᠨᠡᠨ ᠢᠷᠤᠭᠡᠵᠡᠢ᠃ ᠲᠤᠰ ᠵᠢᠯ ᠤᠨ ᠪᠢᠳᠡᠭᠦᠨ ᠤ ᠦᠳᠡᠰᠢ᠂ ᠮᠢᠩ ᠤᠯᠤᠰ ᠤᠨ ᠢᠡᠭᠽᠦ᠋ᠡᠭ ᠬᠠᠭᠠᠨ ᠦᠪᠡᠷ ᠤᠨ ᠰᠠᠭᠤᠭ᠎ᠠ ᠮᠤᠩᠭᠤᠯ ᠭᠡᠷ ᠤᠨ ᠢᠶᠠᠨ ᠭᠠᠳᠠᠨ᠎ᠠ᠂ ᠡᠪᠦᠭᠡ ᠳᠡᠭᠡᠳᠤᠰ ᠲᠡᠭᠡᠨ ᠳᠤᠶᠠᠩ ᠲᠦᠯᠡᠰᠢ ᠰᠢᠳᠠᠭᠠᠨ ᠦᠭᠴᠤ ᠪᠠᠶᠢᠳᠠᠯ᠎ᠠ᠂ ᠡᠰᠡᠨ ᠳᠠᠶᠢᠱᠢ ᠬᠦᠮᠤᠨ ᠳᠤᠮᠢᠯᠠᠨ ᠢᠷᠡᠭᠦᠯᠵᠦ᠂ ᠢᠡᠭᠽᠦ᠋ᠡᠭ ᠬᠠᠭᠠᠨ ᠢ ᠤᠷᠳᠤᠨ ᠳᠠᠭᠠᠨ ᠵᠠᠯᠠᠨ ᠠᠪᠠᠴᠢᠭᠠᠳ ᠬᠠᠮᠳᠤ ᠪᠠᠷ ᠪᠢᠳᠡᠭᠦᠨ ᠤ ᠰᠦᠨᠢ ᠶᠢ ᠨᠠᠶᠢᠷᠯᠠᠨ ᠦᠡᠭᠭᠡᠷᠡᠭᠦᠯᠬᠦ ᠭᠡᠪᠡ᠃ ᠢᠡᠭᠽᠦ᠋ᠡᠭ ᠬᠠᠭᠠᠨ ᠳᠤᠷᠠᠳᠠᠶᠢᠶ᠎ᠠ ᠤᠷᠢᠯᠭ᠎ᠠ ᠶᠢ ᠬᠦᠯᠢᠶᠡᠨ ᠠᠪᠤᠭᠠᠳ᠂ ᠮᠤᠷᠢ ᠤᠨᠤᠵᠤ ᠳᠠᠰᠤᠷᠬᠠᠢ ᠠᠭᠤᠯᠠ ᠶᠢᠨ ᠳᠡᠷᠭᠡᠳᠡ ᠬᠦᠷᠦᠭᠰᠡᠨ ᠳᠤ᠂ ᠡᠰᠡᠨ ᠳᠠᠶᠢᠱᠢ ᠭᠡᠷᠭᠡᠢ ᠭᠡᠦᠭᠡᠳ ᠲᠠᠢ ᠪᠠᠨ ᠬᠤᠯᠠ ᠠᠴᠠ ᠤᠭᠳᠤᠵᠤ ᠠᠪᠤᠭᠠᠳ ᠦᠪᠡᠷ ᠤᠨ ᠦᠷᠤᠭᠡ ᠳᠡᠭᠡᠨ ᠤᠷᠤᠭᠤᠯᠪᠠ᠃ ᠲᠡᠷᠡ ᠰᠦᠨᠢ ᠡᠰᠡᠨ ᠳᠠᠶᠢᠱᠢ ᠬᠤᠪᠢᠰ ᠬᠦᠭᠵᠢᠮᠳᠡᠵᠦ ᠮᠤᠩᠭᠤᠯ ᠡᠮᠡᠭᠳᠠᠶᠢᠴᠤᠳ ᠤᠨ ᠳᠠᠭᠤᠤ ᠬᠦᠭᠵᠢᠮ ᠳᠤ ᠬᠠᠪᠰᠤᠷᠭᠠᠭᠰᠠᠨ ᠪᠦᠭᠡᠳ ᠦᠪᠡᠷ ᠤᠨ ᠪᠡᠶ᠎ᠡ ᠪᠠᠷ ᠢᠶᠠᠨ ᠢᠡᠭᠽᠦ᠋ᠡᠭ ᠬᠠᠭᠠᠨ ᠳᠤ ︽ᠰᠤᠷ ᠬᠦᠶᠦᠯᠭᠡᠬᠦ︾ ᠮᠤᠩᠭᠤᠯ ᠤᠨ ᠤᠳᠤᠮᠰᠢᠯᠳᠤ ᠳᠤᠭᠯᠠᠭᠠᠮ ᠢ ᠵᠢᠭᠠᠵᠤ ᠦᠭᠴᠠᠢ᠃ ᠢᠡᠭᠬᠢᠭᠡᠳ ᠪᠢᠳᠡᠭᠦᠨ ᠤ ᠨᠢᠭᠡ ᠰᠦᠨᠢ ᠶᠢ ᠳᠡᠳᠡ ᠬᠦᠷ ᠬᠦᠭᠵᠢᠶᠡᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠲᠠᠢ ᠪᠠᠷ ᠦᠡᠭᠭᠡᠷᠡᠭᠦᠯᠵᠦ ᠪᠢᠯᠡ᠃ ᠡᠰᠡᠨ ᠳᠠᠶᠢᠱᠢ ᠶᠡᠭᠡ ᠴᠡᠷᠢᠭ ᠢᠶᠠᠨ ᠠᠪᠴᠤ ᠬᠤᠶᠢᠰᠢ ᠪᠤᠴᠠᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠮᠢᠩ ᠤᠯᠤᠰ ᠤᠨ ᠶᠡᠭᠡ ᠲᠦᠰᠢᠮᠡᠯ ᠢᠤᠢ ᠴᠢᠶᠠᠨ ᠢᠡᠭᠽᠦ᠋ᠡᠭ ᠬᠠᠭᠠᠨ ᠪᠤᠯᠤᠨ ᠵᠢᠩᠳᠠᠢ ᠬᠠᠭᠠᠨ ᠬᠤᠶᠠᠭᠤᠯᠠ ᠳᠤ ᠴᠦᠮ ᠰᠠᠶᠢᠨ ᠬᠦᠮᠤᠨ ᠪᠤᠯᠬᠤ ᠶᠢᠨ ᠲᠦᠯᠦᠭᠡ᠂ ︽ᠳᠡᠭᠷᠢ ᠶᠢᠨ ᠤᠷᠤ ᠨᠢᠭᠡᠨᠳᠡ ᠳᠤᠭᠳᠠᠵᠤ᠂ ᠦᠭᠡᠷ᠎ᠡ ᠬᠦᠮᠤᠨ ᠳᠠᠬᠢᠨ ᠡᠵᠡᠯᠡᠬᠦ ᠦᠭᠡᠢ ᠪᠤᠯᠤᠭᠰᠠᠨ ᠲᠤᠯᠠ ᠢᠡᠭᠽᠦ᠋ᠡᠭ ᠢ ᠡᠷᠳᠡᠭᠡᠨ ᠤᠭᠳᠤᠵᠤ ᠠᠪᠴᠢᠷᠠᠪᠠᠯ ᠵᠤᠬᠢᠨ᠎ᠠ︾ ᠭᠡᠵᠦ ᠵᠢᠩᠳᠠᠢ ᠬᠠᠭᠠᠨ ᠳᠤ ᠠᠶᠢᠯᠠᠳᠬᠠᠪᠠ᠃ ᠵᠢᠩᠳᠠᠢ ᠬᠠᠭᠠᠨ ᠴᠢᠨᠠᠳᠤ ᠰᠠᠨᠠᠭ᠎ᠠ ᠶᠢ ᠮᠡᠳᠡᠭᠰᠡᠨ ᠪᠤᠯᠬᠤᠷ ᠳᠡᠷᠡ ᠳᠠᠷᠤᠢ᠄ ︽ᠴᠢᠨᠤ ᠦᠭᠡ ᠵᠦᠢᠳᠠᠢ︾ ᠭᠡᠵᠦ ᠵᠦᠪᠰᠢᠶᠡᠷᠡᠭᠡᠳ᠂ ᠳ᠋ᠦ᠋ ᠢᠤᠢ ᠱᠢ ᠲᠦᠰᠢᠮᠡᠯ ᠶᠠᠩ ᠱᠠᠨ ᠢ ᠮᠤᠩᠭᠤᠯ ᠳᠤ ᠡᠯᠴᠢ ᠪᠠᠷ ᠢᠯᠡᠭᠡᠵᠦ᠂ ᠢᠡᠭᠽᠦ᠋ᠡᠭ ᠬᠠᠭᠠᠨ ᠢ ᠤᠭᠳᠤᠵᠤ ᠠᠪᠴᠢᠷᠠᠬᠤ ᠪᠠᠷ ᠪᠤᠯᠪᠠ᠃
 
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠲᠡᠤᠬᠡᠨ ᠦᠯᠢᠬᠡᠷ ︵ᠠᠷᠪᠠᠨ ᠭᠤᠷᠪᠠ︶ — ᠲᠡᠮᠦᠵᠢᠨ ᠪᠦᠷᠳᠠ ᠦᠵᠢᠨ ᠲᠠᠢ ᠪᠠᠨ ᠁
ᠮᠤᠩᠭᠤᠯ ᠦᠨᠳᠤᠰᠤᠳᠠᠨ ᠤ ᠲᠡᠤᠬᠡᠨ ᠦᠯᠢᠬᠡᠷ ︵ᠠᠷᠪᠠᠨ ᠲᠦᠷᠪᠡ︶ — ᠪᠦᠷᠢ ᠪᠦᠬᠡ ᠠᠮᠢ ᠪᠠᠨ ᠠᠯᠳᠠᠭᠰᠠᠨ
ᠡᠰᠡᠨ ᠲᠠᠶᠢᠱᠢ ︵ᠬᠤᠶᠠᠷ︶
ᠴᠦᠢᠵᠢᠡᠤᠤᠠᠰᠠᠷ
ᠵᠡᠪᠡ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05002246号