ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠵᠠᠰᠠᠭ ᠤᠨ ᠢᠯᠡᠳᠭᠡᠯ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠣᠶᠣᠯ ᠡᠷᠳᠡᠨᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠬᠦᠯᠦᠭ ᠪᠠᠭᠠᠲᠤᠷ ᠤᠯᠤᠰ ᠤᠨ ᠸᠠᠩ ᠮᠤᠬᠤᠯᠠᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2018-04-23
[ ᠮᠤᠩᠭᠤᠯ ] ᠪ᠊᠂ ᠦᠯᠵᠡᠶᠢᠰᠦ᠋ᠷᠦᠩ         ᠬᠦᠮᠦᠨ ᠤ ᠨᠠᠰᠤ ᠪᠤᠭᠤᠨᠢ        ᠬᠦᠨᠳᠦᠲᠡᠢ ᠨᠡᠷ᠎ᠡ ᠤᠷᠲᠤ        ᠤᠷᠲᠤ ᠨᠡᠷ᠎ᠡ ᠶᠢ ᠤᠯᠪᠠᠰᠤ        ᠤᠯᠠᠮ ᠤᠯᠠᠮ ᠰᠤᠨᠤᠨ᠎ᠠ        ᠡᠷᠲᠡ ᠤᠷᠢᠳᠤ ᠶᠢᠨ ᠴᠠᠭ ᠲᠤ ᠮᠤᠬᠤᠯᠠᠢ ᠨᠡᠷᠡᠲᠦ ᠬᠦᠪᠡᠭᠦᠨ ᠤᠨᠤᠨ ᠮᠦᠷᠡᠨ ᠤ ᠰᠠᠪᠠ ᠭᠠᠵᠠᠷ ᠮᠡᠨᠳᠦᠯᠡᠵᠦ ᠬᠡᠷᠦᠯᠦᠨ ᠮᠦᠷᠡᠨ ᠤ ᠲᠤᠬᠤᠢ ᠬᠦᠳᠡᠭᠡ ᠠᠷᠠᠯ ᠳᠤ ᠪᠤᠶᠢᠵᠢᠬᠤ ᠳᠠᠭᠠᠨ ᠭᠠᠷ ᠭᠠᠨᠵᠤᠭᠠᠨ ᠳᠤ᠂ ᠬᠦᠯ ᠳᠦᠷᠦᠭᠡᠨ ᠳᠤ ᠬᠦᠷᠬᠦ ᠠᠷᠪᠠᠨ ᠬᠡᠳᠦᠬᠡᠨ ᠨᠠᠰᠤᠨ ᠠᠴᠠ ᠪᠠᠨ ᠵᠠᠯᠠᠶᠢᠷ᠂ ᠵᠦᠷᠬᠢᠨ ᠠᠶᠢᠮᠠᠭ ᠢᠶᠠᠷ ᠳᠠᠮᠵᠢᠨ ᠳᠠᠶᠢᠨ ᠤ ᠲᠤᠭᠤᠰᠤᠨ ᠳᠤ ᠤᠷᠤᠵᠤ ᠢᠷᠲᠦ ᠮᠡᠰᠡᠨ ᠤ ᠬᠠᠩᠭᠢᠨᠠᠬᠤ ᠡᠷ᠎ᠡ ᠴᠡᠷᠢᠭ ᠤᠨ ᠤᠤᠬᠠᠶᠢᠯᠠᠨ ᠬᠠᠰᠬᠢᠷᠤᠯᠳᠤᠬᠤ ᠳᠠᠭᠤᠨ ᠳᠤᠮᠳᠠ ᠢᠳᠡ ᠬᠠᠪᠤ ᠶᠢ ᠤᠯᠵᠤ᠂ ᠡᠷ᠎ᠡ ᠪᠡᠶ᠎ᠡ ᠶᠢᠨ ᠡᠷᠴᠢ ᠴᠢᠩᠭᠠᠷᠠᠭᠰᠠᠨ ᠬᠤᠷᠢᠨ ᠳᠤᠯᠤᠭᠠᠨ ᠨᠠᠰᠤᠨ ᠳᠠᠭᠠᠨ ᠬᠠᠮᠤᠭ ᠮᠤᠩᠭᠤᠯ ᠤᠨ ᠬᠠᠭᠠᠨ ᠴᠢᠩᠭᠢᠰ ᠤᠨ ᠴᠡᠷᠢᠭ ᠤᠨ ᠵᠢᠭᠰᠠᠭᠠᠯ ᠳᠤ ᠤᠷᠤᠵᠠᠢ᠃        ᠶᠡᠭᠡ ᠡᠵᠡᠨ ᠴᠢᠩᠭᠢᠰ ᠤᠨ ᠨᠢᠭᠡᠲᠦᠭᠰᠡᠨ ᠶᠡᠭᠡ ᠮᠤᠩᠭᠤᠯ ᠤᠯᠤᠰ ᠪᠠᠶᠢᠭᠤᠯᠬᠤ ᠶᠢᠨ ᠲᠦᠯᠦᠭᠡ ᠰᠢᠭᠤᠳᠡᠢ ᠳᠤ ᠬᠢᠭᠰᠡᠨ ᠡᠪᠡᠷ ᠰᠢᠭ ᠡᠰᠡ ᠡᠪᠯᠡᠷᠡᠨ ᠳᠡᠷᠰᠯᠡᠳᠡᠭᠰᠡᠨ ᠤᠯᠠᠨ ᠤᠪᠤᠭ ᠠᠶᠢᠮᠠᠭ ᠤᠨ ᠲᠦᠷᠦᠭᠦᠴᠦᠳ ᠤᠨ ᠡᠰᠡᠷᠭᠦ ᠬᠢᠭᠰᠡᠨ ᠤᠯᠠᠨ ᠤᠳᠠᠭᠠᠨ ᠤ ᠶᠡᠭᠡ ᠳᠠᠶᠢᠨ ᠳᠤ ᠤᠷᠤᠶᠢᠯᠠᠨ᠂ ᠤᠯᠠᠨ ᠪᠠᠭᠠᠲᠤᠷ ᠤᠳ ᠤᠨ ᠳᠤᠮᠳᠠ ᠠᠴᠠ ᠤᠨᠴᠠᠭᠠᠶᠢᠷᠠᠨ ᠲᠤᠲᠤᠷᠠᠵᠤ ᠬᠦᠯᠦᠭ ᠪᠠᠭᠠᠲᠤᠷ ᠠᠯᠳᠠᠷ ᠠᠭᠤᠯᠵᠠᠢ᠃        ᠳᠤᠷᠤᠨ᠎ᠠ ᠳ᠋ᠠᠬᠢᠨ ᠤ ᠬᠤᠸᠠᠩᠯᠢ ᠶᠢᠨ ᠭᠤᠷᠪᠠᠳᠤᠭᠠᠷ ᠵᠢᠷᠠᠨ ᠤ ᠰᠡᠭᠦᠯᠴᠢ ᠶᠢᠨ ᠤᠨ᠄ ︽ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠨ ᠡᠩᠬᠡ ᠰᠢᠳᠤᠷᠭᠤ ᠪᠤᠯᠵᠤ ᠪᠠᠷᠰ ᠵᠢᠯ ︵1206 ᠤᠨ︶ ᠤᠨᠤᠨ ᠮᠦᠷᠡᠨ ᠤ ᠡᠬᠢᠨ ᠳᠤ ᠬᠤᠷᠠᠯᠳᠤᠵᠤ᠂ ᠶᠢᠰᠦᠨ ᠬᠦᠯᠲᠦ ᠴᠠᠭᠠᠨ ᠲᠤᠭ ᠢᠶᠠᠨ ᠮᠠᠨᠳᠤᠭᠤᠯᠤᠨ ᠲᠡᠮᠦᠵᠢᠨ ᠳᠤ ᠴᠢᠩᠭᠢᠰ ︵ᠳᠠᠯᠠᠢ ᠬᠠᠭᠠᠨ︶ ᠴᠤᠯᠠ ᠶᠢ ᠦᠭᠪᠡ᠃ ᠮᠤᠬᠤᠯᠠᠢ ᠳᠤ ᠭᠦᠸᠧ ᠸᠠᠩ ︵ᠤᠯᠤᠰ ᠤᠨ ᠸᠠᠩ︶ ᠴᠤᠯᠠ ᠶᠢ ᠳᠡᠨᠳᠡ ᠦᠭᠪᠡ︾ ︵︽ᠮᠤᠩᠭᠤᠯ ᠤᠨ ᠨᠢᠭᠤᠴᠠ ᠲᠤᠪᠴᠢᠶᠠᠨ︾᠂ 1947 ᠤᠨ 196 ᠳᠠᠬᠢ ᠲᠠᠯ᠎ᠠ︶ ᠭᠡᠮᠡᠭᠰᠡᠨ ᠠᠴᠠ ᠦᠵᠡᠪᠡᠯ ᠮᠤᠬᠤᠯᠠᠢ ᠲᠦᠷᠦ ᠶᠢᠨ ᠲᠤᠮᠦ ᠵᠢᠳᠬᠦᠯᠲᠡᠨ᠂ ᠲᠡᠦᠬᠡᠨ ᠶᠡᠭᠡ ᠬᠦᠮᠦᠨ ᠶᠤᠮ᠃        ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠨ ᠮᠤᠩᠭᠤᠯ ᠤᠯᠤᠰ ᠪᠠᠶᠢᠭᠤᠯᠤᠭᠳᠠᠭᠰᠠᠨ ᠠᠴᠠ ᠡᠷᠲᠡᠨ ᠤ ᠳᠠᠶᠢᠰᠤᠩᠨᠠᠭᠰᠠᠨ ᠭᠦᠷᠦᠨ ᠠᠯᠲᠠᠨ ᠤᠯᠤᠰ ᠤᠨ ᠡᠰᠡᠷᠭᠦ ᠳᠦᠷᠪᠡᠳᠦᠭᠡᠷ ᠵᠢᠷᠠᠨ ᠤ ᠴᠠᠭᠠᠨ ᠬᠤᠨᠢᠨ ᠵᠢᠯ ︵1211 ᠤᠨ︶ ᠴᠢᠩᠭᠢᠰ ᠬᠠᠭᠠᠨ ᠠᠶᠠᠨ ᠳᠠᠶᠢᠨ ᠳᠤ ᠮᠤᠷᠳᠠᠬᠤ ᠳᠤ ᠮᠤᠬᠤᠯᠠᠢ ᠵᠠᠩᠵᠤᠨ ᠳᠤ ᠪᠦᠬᠦ ᠴᠡᠷᠢᠭ ᠤᠨ ᠶᠡᠷᠦᠩᠬᠡᠢ ᠵᠠᠬᠢᠷᠬᠤ ᠲᠤᠰᠢᠶᠠᠯ ᠤᠯᠭᠤᠵᠤ ᠳᠠᠶᠢᠨ ᠳᠤ ᠤᠷᠤᠭᠤᠯᠤᠭᠰᠠᠨ ᠪᠦᠯᠦᠭᠡ᠃ ᠡᠨᠡ ᠴᠠᠭ ᠮᠦᠴᠡ ᠠᠴᠠ ᠳᠠᠷᠠᠭᠠᠬᠢ ᠶᠢᠨ ᠬᠠᠷᠠᠭᠴᠢᠨ ᠬᠤᠨᠢᠨ ᠵᠢᠯ ᠤᠨ ᠵᠤᠨ ᠤ ᠡᠬᠢᠨ ᠰᠠᠷ᠎ᠠ ᠬᠦᠷᠲᠡᠯ᠎ᠡ ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠲᠡᠨᠳᠡ ᠲᠠᠰᠤᠷᠠᠯᠲᠠ ᠦᠭᠡᠢ ᠳᠠᠶᠢᠨ ᠬᠢᠵᠦ᠂ ᠰᠡᠭᠦᠯ ᠤᠨ ᠲᠠᠪᠤᠨ ᠵᠢᠯ ᠭᠠᠷᠤᠢ ᠳᠠᠶᠢᠨ ᠢ ᠮᠤᠬᠤᠯᠠᠢ ᠵᠠᠩᠵᠤᠨ ᠤᠳᠤᠷᠢᠳᠴᠤ ᠶᠠᠪᠤᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃        ᠴᠢᠩᠭᠢᠰ ᠬᠠᠭᠠᠨ ᠦᠪᠡᠷ ᠢᠶᠠᠨ ᠠᠯᠲᠠᠨ ᠤᠯᠤᠰ ᠲᠤ ᠬᠤᠶᠠᠷ ᠤᠳᠠᠭ᠎ᠠ ᠪᠠᠶᠢᠯᠳᠤᠬᠤ ᠳᠠᠭᠠᠨ ᠡᠵᠡᠯᠡᠭᠰᠡᠨ ᠬᠤᠲᠠ ᠪᠠᠯᠭᠠᠰᠤ᠂ ᠰᠢᠶᠠᠨ ᠢ 862 ︵ᠵᠸᠦ ᠶᠢᠦ ᠲᠢᠩ᠂ ᠴᠢᠩᠭᠢᠰ ᠬᠠᠭᠠᠨ ᠤ ᠲᠡᠦᠬᠡ ᠱᠠᠰᠲᠢᠷ᠂ ᠤᠯᠠᠭᠠᠨᠪᠠᠭᠠᠲᠤᠷ᠂ 1999 ᠤᠨ︶ ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠪᠤᠯ ᠮᠤᠬᠤᠯᠠᠢ ᠨᠠᠰᠤ ᠪᠠᠷᠠᠬᠤ ᠠᠴᠠ ᠵᠢᠯ ᠬᠠᠭᠠᠰ ᠤᠨ ᠡᠮᠦᠨ᠎ᠡ ᠴᠢᠩᠭᠢᠰ ᠬᠠᠭᠠᠨ ᠳᠤ ᠢᠯᠡᠭᠡᠭᠰᠡᠨ ᠠᠶᠢᠯᠠᠳᠬᠠᠯ ᠳᠠᠭᠠᠨ ︽ᠪᠢ 70 ᠭᠠᠷᠤᠢ ᠬᠤᠲᠠ ᠪᠠᠯᠭᠠᠰᠤ᠂ ᠰᠢᠶᠠᠨ ᠢ ᠠᠪᠤᠯ᠎ᠠ︾ ᠭᠡᠵᠦ ᠳᠤᠷᠠᠳᠤᠭᠰᠠᠨ᠃ ᠡᠭᠦᠨ ᠠᠴᠠ ᠬᠤᠶᠢᠰᠢᠬᠢ ᠨᠡᠮᠡᠭᠳᠡᠭᠰᠡᠨ ᠢ ᠲᠤᠭᠠᠴᠠᠪᠠᠯ ᠮᠢᠩᠭ᠎ᠠ ᠬᠦᠷᠴᠦ ᠴᠦ ᠪᠤᠯᠬᠤ ᠶᠤᠮ᠃        ᠡᠶᠢᠨ ᠬᠦ ᠠᠯᠲᠠᠨ ᠤᠯᠤᠰ ᠢ ᠬᠠᠵᠠᠭᠠᠷᠯᠠᠨ ᠪᠠᠷᠢᠵᠤ᠂ ᠤᠯᠠᠮ ᠢᠶᠠᠷ ᠡᠳᠦᠷ ᠬᠤᠨᠤᠭ ᠪᠦᠷᠢ ᠤᠷᠤᠭᠰᠢ ᠳᠠᠪᠰᠢᠨ ᠭᠠᠵᠠᠷ ᠠᠬᠢᠵᠤ᠂ ᠬᠦᠴᠦᠯ ᠴᠢᠳᠠᠯ ᠢ ᠨᠢ ᠳᠤᠷᠤᠶᠢᠲᠠᠭᠤᠯᠵᠤ᠂ ᠮᠦᠬᠦᠬᠦ ᠵᠠᠮ ᠳᠤ ᠤᠶᠢᠷᠠᠲᠤᠭᠤᠯᠵᠤ ᠪᠠᠶᠢᠵᠠᠢ᠃ ᠭᠡᠪᠡᠴᠦ ᠬᠦᠨᠳᠦ ᠡᠪᠡᠳᠴᠢᠨ ᠤ ᠤᠯᠠᠮ ᠠᠴᠠ ᠱᠠᠨᠰᠢ ᠮᠤᠵᠢ ᠳᠤ ᠲᠠᠪᠢᠨ ᠳᠦᠷᠪᠡᠬᠡᠨ ᠨᠠᠰᠤᠨ ᠳᠠᠭᠠᠨ ᠦᠭᠡᠳᠡ ᠪᠤᠯᠵᠠᠢ᠃        ᠮᠤᠬᠤᠯᠠᠢ᠂ ᠡᠵᠡᠨ ᠬᠠᠭᠠᠨ ᠠᠴᠠ ᠠᠷᠪᠠᠨ ᠵᠠᠮ ᠤᠨ ᠭᠤᠴᠢ ᠭᠠᠷᠤᠢ ᠮᠢᠩᠭᠠᠨ ᠴᠡᠷᠢᠭ ᠲᠠᠢ ᠦᠯᠡᠳᠡᠭᠰᠡᠨ᠂ ᠲᠡᠭᠦᠨ ᠤ ᠳᠤᠯᠤᠭᠠᠨ ᠵᠠᠮ ᠤᠨ ᠬᠢᠨᠢ ᠮᠤᠩᠭᠤᠯ ᠬᠤᠷᠢᠨ ᠲᠠᠪᠤᠨ ᠮᠢᠩᠭ᠎ᠠ ᠤᠷᠴᠢᠮ ᠴᠡᠷᠢᠭ ᠪᠠᠶᠢᠭᠰᠠᠨ ᠪᠤᠯᠤᠯᠲᠠᠢ᠃ ᠭᠤᠷᠪᠠᠨ ᠵᠠᠮ ᠤᠨ ᠴᠡᠷᠢᠭ ᠨᠢ ᠡᠮᠦᠨᠡᠲᠦ ᠭᠠᠵᠠᠷ ᠤᠨ ᠦᠪᠡᠷ ᠤᠨ ᠬᠢᠨᠢ ᠪᠠᠶᠢᠵᠠᠢ᠃ ᠡᠶᠢᠮᠦ ᠴᠦᠭᠡᠨ ᠲᠤᠭᠠᠨ ᠤ ᠴᠡᠷᠢᠭ ᠢᠶᠠᠷ ᠲᠦᠮᠡ ᠪᠠᠶᠢᠲᠤᠭᠠᠢ ᠪᠤᠮ ᠪᠤᠮ ᠢᠶᠠᠷ ᠢᠷᠡᠶᠢᠬᠤ ᠶᠡᠭᠡ ᠴᠡᠷᠢᠭ ᠲᠠᠢ ᠬᠦᠴᠦᠷᠬᠡᠭ ᠭᠦᠷᠦᠨ ᠢ ᠲᠤᠭᠲᠠᠭᠠᠨ ᠪᠠᠷᠢᠵᠤ ᠪᠠᠶᠢᠭᠰᠠᠨ ᠲᠡᠳᠦᠢ ᠦᠭᠡᠢ ᠪᠦᠷ ᠳᠠᠶᠢᠯᠠᠵᠤ ᠪᠠᠶᠢᠭᠰᠠᠨ ᠨᠢ ᠲᠡᠭᠦᠨ ᠤ ᠪᠠᠶᠢᠯᠳᠤᠭᠠᠨ ᠤ ᠤᠷ᠎ᠠ ᠴᠢᠳᠠᠪᠤᠷᠢ᠂ ᠠᠷᠭ᠎ᠠ ᠤᠬᠠᠭᠠᠨ᠂ ᠬᠦᠮᠦᠡᠯᠢᠭ ᠴᠢᠨᠠᠷ ᠪᠤᠶᠤ᠃ ︽ᠮᠤᠬᠤᠯᠠᠢ ᠴᠡᠷᠢᠭ ᠲᠡᠭᠡᠨ ᠲᠠᠬᠢᠨ ᠲᠠᠬᠢᠨ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠤᠯᠠᠨ ᠵᠠᠮ ᠤᠨ ᠵᠠᠩᠵᠤᠨ ᠰᠠᠶᠢᠳ ᠠᠴᠠ ᠴᠡᠷᠢᠭ ᠤᠨ ᠠᠷᠠᠳ ᠬᠦᠷᠲᠡᠯ᠎ᠡ ᠠᠷᠠᠳ ᠲᠦᠮᠡᠨ ᠤ ᠡᠳ᠋ ᠠᠰᠢᠭ ᠢ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠵᠦ᠂ ᠲᠦᠢᠪᠡᠭᠡᠨ ᠵᠤᠪᠠᠭᠠᠵᠤ ᠪᠤᠯᠬᠤ ᠦᠭᠡᠢ ᠭᠡᠵᠡᠢ᠃ ᠮᠤᠬᠤᠯᠠᠢ ᠶᠢᠨ ᠡᠨᠡ ᠬᠦ ᠠᠷᠠᠳ ᠢ ᠠᠮᠤᠷᠵᠢᠭᠤᠯᠬᠤ ᠲᠦᠷᠦ ᠶᠢᠨ ᠪᠤᠳᠤᠯᠭ᠎ᠠ ᠨᠢ ᠲᠡᠭᠦᠨ ᠤ ᠴᠡᠷᠢᠭ ᠤᠨ ᠤᠷᠤᠭᠰᠢᠯᠠᠬᠤ ᠳᠤ ᠲᠤᠶᠢᠯ ᠤᠨ ᠶᠡᠭᠡ ᠲᠤᠰᠠᠯᠠᠮᠵᠢ ᠪᠤᠯᠵᠤ᠂ ᠠᠯᠲᠠᠨ ᠤᠯᠤᠰ ᠤᠨ ᠤᠯᠠᠨ ᠹᠦ᠋ ᠵᠸᠦ ᠬᠤᠲᠠ ᠪᠠᠯᠭᠠᠰᠤᠨ ᠤ ᠰᠠᠬᠢᠭᠴᠢ ᠵᠠᠩᠵᠤᠨ ᠨᠠᠷ ᠰᠠᠯᠬᠢᠨ ᠤ ᠠᠶᠠᠰ ᠢᠶᠠᠷ ᠳᠠᠭᠠᠵᠤ ᠪᠠᠶᠢᠯ᠎ᠠ᠃︾ ︵︽ᠴᠢᠩᠭᠢᠰ ᠬᠠᠭᠠᠨ ᠤ ᠬᠦᠯᠦᠭ ᠤᠳ︾᠂ ᠦᠪᠦᠷ ᠮᠤᠩᠭᠤᠯ ᠤᠨ ᠬᠡᠪᠯᠡᠯ᠂ 1982 ᠤᠨ᠂ 41 ᠳᠠᠬᠢ ᠲᠠᠯ᠎ᠠ︶ ᠭᠡᠮᠡᠨ ᠲᠡᠮᠳᠡᠭᠯᠡᠵᠡᠢ᠃        ᠮᠤᠬᠤᠯᠠᠢ ᠶᠢᠨ ᠳᠤᠤᠷ᠎ᠠ ᠲᠤᠲᠤᠷ᠎ᠠ ᠭᠠᠵᠠᠷ ᠤᠨ ᠤᠯᠠᠨ ᠠᠷᠪᠢᠨ ᠨᠡᠷ᠎ᠡ ᠠᠯᠳᠠᠷᠲᠤ ᠵᠠᠩᠵᠤᠨ᠂ ᠵᠠᠬᠢᠷᠤᠭᠴᠢ ᠂ ᠴᠡᠷᠢᠭ ᠤᠨ ᠵᠢᠳᠬᠦᠯᠲᠡᠨ ᠨᠦᠭᠦᠳ ᠦᠨᠡᠨᠴᠢ ᠪᠠᠷ ᠵᠢᠳᠬᠦᠵᠦ᠂ ᠴᠡᠷᠢᠭ ᠨᠢ ᠤᠯᠠᠨ ᠲᠦᠮᠡ ᠳᠤ ᠬᠦᠷᠴᠦ ᠮᠤᠩᠭᠤᠯ ᠴᠡᠷᠢᠭ ᠤᠨ ᠲᠤᠭᠠᠨ ᠠᠴᠠ ᠬᠡᠲᠦ ᠲᠠᠬᠢᠨ ᠳᠠᠪᠠᠵᠤ ᠴᠦ ᠪᠠᠶᠢᠵᠤ ᠪᠤᠯᠵᠤᠰᠢ ᠦᠭᠡᠢ᠃ ᠲᠡᠭᠦᠨ ᠤ ᠳᠡᠭᠡᠷ᠎ᠡ ᠮᠢᠩᠭ᠎ᠠ ᠪᠠᠷ ᠬᠡᠯᠡᠵᠦ ᠪᠤᠯᠬᠤ ᠬᠤᠲᠠ᠂ ᠪᠠᠯᠭᠠᠰᠤ᠂ ᠰᠢᠶᠠᠨ ᠵᠠᠬᠢᠷᠤᠭᠴᠢ ᠡᠷᠬᠡ ᠪᠠᠷᠢᠭᠴᠢᠳ ᠪᠠᠶᠢᠨ᠎ᠠ᠃ ᠡᠨᠡ ᠪᠦᠬᠦᠨ ᠠᠴᠠ ᠦᠵᠡᠪᠡᠯ ᠮᠤᠬᠤᠯᠠᠢ ᠪᠠᠷ ᠦᠪᠡᠷᠰᠡᠳ ᠢ ᠨᠢ ᠦᠪᠡᠷᠰᠡᠳ ᠲᠠᠢ ᠨᠢ ᠪᠠᠶᠢᠯᠳᠤᠭᠤᠯᠵᠤ᠂ ᠵᠠᠬᠢᠷᠤᠭᠤᠯᠵᠤ ᠪᠠᠶᠢᠵᠠᠢ ᠭᠡᠵᠦ ᠪᠤᠯᠤᠮᠠᠷ᠃        ᠴᠢᠩᠭᠢᠰ ᠬᠠᠭᠠᠨ ᠤᠯᠤᠰ ᠤᠨ ᠸᠠᠩ ᠦᠷᠯᠦᠭ ᠵᠠᠩᠵᠤᠨ ᠢ ᠬᠤᠷᠽᠧᠮ ᠳᠤ ᠪᠠᠶᠢᠯᠳᠤᠵᠤ ᠠᠭᠰᠠᠨ ᠬᠦᠦ ᠪᠤᠷᠤ ᠪᠠᠷ ᠵᠠᠯᠭᠠᠮᠵᠢᠯᠠᠭᠤᠯᠵᠤ ᠪᠦᠬᠦ ᠴᠤᠯᠠ᠂ ᠡᠷᠬᠡ ᠲᠤᠰᠢᠶᠠᠯ ᠢ ᠨᠢ ᠤᠯᠭᠤᠵᠠᠢ᠃ ᠲᠡᠷᠡ ᠪᠠᠷ ᠡᠴᠢᠭᠡ ᠶᠢᠨ ᠠᠳᠠᠯᠢ ᠠᠮᠵᠢᠯᠲᠠ ᠲᠠᠢ ᠪᠠᠶᠢᠯᠳᠤᠵᠤ ᠡᠮᠦᠨ᠎ᠡ ᠵᠦᠭ ᠳᠠᠪᠰᠢᠨ ᠶᠡᠭᠡ ᠭᠠᠵᠠᠷ ᠡᠵᠡᠯᠡᠭᠰᠡᠨ ᠴᠦ ᠡᠪᠡᠳᠴᠢᠨ ᠤ ᠤᠴᠢᠷ 1229 ᠤᠨ ᠳᠤ ᠨᠠᠰᠤ ᠪᠠᠷᠠᠵᠤ᠂ ᠠᠬᠠᠮᠠᠳ ᠬᠦᠪᠡᠭᠦᠨ ᠳᠡᠰᠳᠤᠭᠤᠰ ︵1229 ~1239 ᠤᠨ︶ ᠵᠠᠯᠭᠠᠮᠵᠢᠯᠠᠨ᠂ ᠲᠡᠭᠦᠨ ᠢ ᠬᠤᠶᠠᠳᠤᠭᠠᠷ ᠬᠦᠪᠡᠭᠦᠨ ᠪᠠᠭᠠᠲᠤᠷ ︵1239 ~1261 ᠤᠨ︶ ᠵᠠᠯᠭᠠᠮᠵᠢᠯᠠᠨ ᠡᠪᠦᠭᠡ ᠡᠴᠢᠭᠡ ᠶᠢᠨ ᠠᠯᠳᠠᠷ ᠰᠤᠤ ᠶᠢ ᠡᠷᠭᠦᠨ ᠮᠠᠨᠳᠤᠭᠤᠯᠵᠤ ᠶᠠᠪᠤᠭᠰᠠᠨ ᠭᠡᠮᠡᠵᠦᠬᠦᠢ᠃        ᠡᠨᠡ ᠬᠦ ᠭᠤᠷᠪᠠᠨ ᠦᠶ᠎ᠡ ᠠᠴᠠ ᠪᠦᠷ ᠬᠤᠶᠢᠰᠢ ᠮᠤᠬᠤᠯᠠᠢ ᠶᠢᠨ ᠳᠤᠯᠤᠳᠠᠬᠢ ᠦᠶ᠎ᠡ ᠶᠢᠨ ᠠᠴᠢ ᠬᠤᠶᠢᠴᠢ ᠪᠠᠶᠢᠵᠤ ᠭᠡᠮᠡᠭᠴᠢ ᠪᠠᠷ ᠤᠯᠤᠰ ᠤᠨ ᠴᠢᠩᠰᠠᠩ ᠪᠤᠯᠵᠤ᠂ ᠶᠤᠸᠠᠨ ᠤᠯᠤᠰ ᠤᠨ ᠨᠢᠩᠽᠦ᠋ᠩ ᠬᠠᠭᠠᠨ ᠰᠤᠳᠪᠠᠯ ︵ᠭᠡᠭᠡᠨ ᠬᠠᠭᠠᠨ᠂ 1321 ~1323 ᠤᠨ︶ ᠢᠶᠠᠷ ᠮᠤᠬᠤᠯᠠᠢ ᠶᠢ ᠰᠢᠳᠤᠷᠭᠤ ᠪᠠᠭᠠᠲᠤᠷ ᠯᠦ ᠭᠦᠸᠧ ᠸᠠᠩ ᠭᠡᠵᠦ ᠨᠡᠬᠡᠮᠵᠢᠯᠡᠨ ᠡᠷᠭᠦᠮᠵᠢᠯᠡᠭᠰᠡᠨ ᠭᠡᠮᠡᠨᠡᠮ᠃        ᠤᠯᠤᠰ ᠤᠨ ᠸᠠᠩ᠂ ᠦᠷᠯᠦᠭ ᠵᠠᠩᠵᠤᠨ᠂ ᠰᠠᠶᠢᠳ᠂ ᠬᠦᠯᠦᠭ ᠪᠠᠭᠠᠲᠤᠷ ᠮᠤᠬᠤᠯᠠᠢ ᠶᠢᠨ ᠤᠳᠤᠮ ᠡᠨᠡ ᠳᠤᠯᠤᠭᠠᠨ ᠦᠶ᠎ᠡ ᠪᠠᠷ ᠳᠠᠮᠵᠢᠭᠠᠳ ᠦᠨᠦ ᠭᠤᠴᠢᠨ ᠲᠠᠪᠤ ᠠᠴᠠ ᠭᠤᠴᠢᠨ ᠵᠢᠷᠭᠤᠭᠠᠳᠠᠬᠢ ᠦᠶ᠎ᠡ ᠶᠢᠨ ᠬᠢᠨ ᠦᠪᠦᠷ ᠮᠤᠩᠭᠤᠯ ᠤᠨ ᠠᠶᠢᠮᠠᠭ ᠬᠤᠰᠢᠭᠤᠳ ᠲᠤ ᠠᠵᠤ ᠲᠦᠷᠦᠨ ᠠᠮᠢᠳᠤᠷᠠᠨ ᠰᠠᠭᠤᠭ᠎ᠠ ᠶᠢᠨ ᠲᠤᠲᠤᠷ᠎ᠠ ᠨᠡᠷ᠎ᠡ ᠠᠯᠳᠠᠷᠲᠠᠨ ᠤᠯᠠᠨ ᠠᠵᠤᠭᠤ᠃ ᠡᠨᠡ ᠲᠤᠬᠠᠢ ᠪ᠊᠂ ᠳᠠᠸᠠᠵᠠᠮᠴᠠ᠂ ᠵ᠊᠂ ᠭᠡᠷᠡᠯᠴᠤᠭᠲᠤ ᠨᠠᠷ ᠤᠨ ︽ᠮᠤᠬᠤᠯᠠᠢ ᠶᠢᠨ ᠤᠩᠭᠤᠨ ᠰᠦᠯᠳᠡ︾ ︵ᠦᠪᠦᠷ ᠮᠤᠩᠭᠤᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ᠂ 2001 ᠤᠨ︶ ᠨᠤᠮ ᠠᠴᠠ ᠲᠤᠯᠢᠯᠠᠮᠦ ᠃
 
ᠢᠷᠡᠯᠲᠡ᠄ ︽ᠬᠦᠯᠦᠭ ᠪᠠᠭᠠᠲᠤᠷ ᠤᠯᠤᠰ ᠤᠨ ᠸᠠᠩ ᠮᠤᠬᠤᠯᠠᠢ︾ ᠨᠤᠮ ᠤᠨ ᠭᠤᠴᠢᠨ ᠳᠠᠪᠤᠳᠤᠭᠠᠷ ᠪᠦᠯᠦᠭ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠯᠤᠰ ᠭᠠᠵᠠᠷ ᠰᠤᠷᠬᠤ ᠪᠠᠷ ᠶᠠᠪᠤᠭᠴᠢ
ᠶᠠᠪᠤᠬᠤᠯᠠᠩ ᠤᠨ ᠬᠠᠶᠢᠷ᠎ᠠ ᠶᠢᠨ ᠰᠢᠯᠥᠭ
ᠪᠢ — ᠡᠬᠡ ᠤᠷᠤᠨ ᠤ ᠪᠠᠨ ᠬᠡᠯᠡ ᠲᠠᠢ ᠰᠢᠪᠠᠭᠤ
ᠮᠤᠩᠭᠤᠯ ᠬᠡᠯᠡ ᠮᠢᠨᠢ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05002246号