| | ᠳ᠋᠊᠂ ᠬᠤᠪᠢᠰᠬᠠᠯᠲᠤ | | ᠲᠠᠪᠤᠨ ᠲᠢᠪ ᠢᠶᠠᠨ ᠠᠷᠭᠠᠳᠠᠵᠤ ᠳᠤᠳᠤᠮᠳᠠᠭᠰᠠᠨ ᠪᠦᠮᠪᠦᠷᠴᠡᠭ ᠡᠵᠢ ᠲᠠᠢ ᠪᠢ | ᠲᠠᠩᠰᠤᠭ ᠪᠠᠶᠢᠭᠠᠯᠢ ᠶᠢᠨ ᠬᠡᠰᠢᠭ ᠬᠦᠷᠲᠡᠭᠰᠡᠨ ᠡᠬᠡ ᠤᠷᠤᠨ ᠡᠵᠢ ᠲᠠᠢ ᠪᠢ | ᠳᠡᠯᠡᠬᠡᠢ ᠲᠠᠮᠠᠭᠠᠯᠠᠭᠰᠠᠨ ᠮᠤᠩᠭᠤᠯ ᠭᠡᠷ ᠤᠨ ᠪᠠᠶᠠᠨ ᠪᠠᠭᠤᠴᠠ ᠲᠠᠢ ᠪᠢ | ᠳᠡᠮᠪᠡᠷᠢᠯ ᠢᠷᠦᠭᠡᠭᠰᠡᠨ ᠬᠦᠬᠡᠮᠳᠦᠭ ᠭᠤᠪᠢ ᠶᠢᠨ ᠪᠤᠷᠬᠠᠨ ᠡᠵᠢ ᠲᠠᠢ ᠪᠢ | ᠪᠢ — ᠡᠬᠡ ᠤᠷᠤᠨ ᠤ ᠪᠠᠨ ᠬᠡᠯᠡ ᠲᠠᠢ ᠰᠢᠪᠠᠭᠤ | ᠪᠢᠳᠡ — ᠡᠬᠡ ᠬᠡᠯᠡ ᠪᠠᠷ ᠢᠶᠠᠨ ᠭᠠᠩᠭᠠᠷᠠᠭᠰᠠᠨ ᠰᠢᠪᠠᠭᠤᠳ ᠡ | ᠨᠠᠷᠠᠬᠠᠨ ᠭᠤᠪᠢ ᠶᠢᠨ ᠢᠶᠠᠨ ᠵᠡᠷᠭᠡᠯᠭᠡᠨ ᠨᠢ ᠪᠤᠯᠵᠤ | ᠰᠤᠯᠤᠩᠭᠠᠷᠠᠭᠰᠠᠨ ᠪᠤᠯᠬᠤᠷ ᠵᠢᠪᠬᠤᠭᠠᠯᠢᠭ | ᠨᠠᠮᠢᠷᠠᠭᠠ ᠴᠡᠩᠬᠡᠷ ᠬᠤᠷᠠ ᠪᠠᠷ ᠨᠢ | ᠲᠠᠭᠠᠯᠠᠭᠤᠯᠤᠭᠰᠠᠨ ᠪᠤᠯᠬᠤᠷ ᠶᠠᠰᠤᠯᠢᠭ | ᠰᠠᠷᠠᠨ ᠭᠤᠸᠠ ᠤᠳᠤᠳ ᠨᠢ ᠪᠤᠯᠵᠤ | ᠲᠦᠷᠦᠭᠰᠡᠨ ᠪᠤᠯᠬᠤᠷ ᠴᠢᠷᠠᠶᠢᠯᠢᠭ | ᠽᠠᠮᠪᠦᠯᠢᠩ ᠤᠨ ᠵᠦᠭᠡᠯᠡᠨ ᠰᠢᠷᠦᠢ ᠨᠢ | ᠦᠯᠦᠭᠡᠶᠢᠳᠡᠭᠰᠡᠨ ᠪᠤᠯᠬᠤᠷ ᠬᠡᠶᠢᠮᠤᠷᠯᠢᠭ | ᠲᠡᠷᠳᠡᠭᠡ ᠮᠢᠩᠭᠠᠨᠠ ᠢᠯᠪᠢᠭᠰᠡᠨ | ᠮᠤᠩᠭᠤᠯ ᠤᠨ ᠦᠨᠦᠷ ᠲᠠᠢ ᠰᠠᠯᠬᠢ ᠪᠠᠷ ᠨᠢ | ᠲᠠᠯᠠ ᠪᠠᠨ ᠴᠢᠮᠡᠭᠰᠡᠨ ᠪᠤᠯᠬᠤᠷ | ᠲᠡᠨᠢᠭᠡᠷᠬᠡᠨ ᠬᠦᠳᠡᠭᠡ ᠮᠢᠨᠢ ᠴᠡᠯᠮᠡᠭ | ᠲᠡᠮᠦᠵᠢᠨ ᠡᠪᠦᠭᠡ ᠠᠴᠠ ᠦᠪᠯᠡᠭᠰᠡᠨ | ᠮᠦᠩᠬᠡ ᠶᠢᠨ ᠪᠤᠰᠤᠭᠠ ᠦᠰᠦᠭ ᠢᠶᠠᠷ ᠨᠢ | ᠬᠡᠯᠡ ᠪᠠᠨ ᠪᠢᠯᠡᠭᠦᠳᠡᠭᠰᠡᠨ ᠪᠤᠯᠬᠤᠷ | ᠴᠡᠭᠡᠯᠬᠡᠨ ᠬᠤᠭᠤᠯᠠᠢ ᠨᠢ ᠲᠤᠩᠭᠠᠯᠠᠭ | ᠬᠤᠨ ᠤᠰᠤᠨ ᠤ | ᠮᠦᠩᠬᠡ ᠶᠢᠨ ᠰᠢᠳᠢ ᠶᠢ ᠠᠮᠰᠠᠵᠤ ᠡᠷᠬᠡᠯᠡᠭᠰᠡᠨ ᠪᠤᠯᠬᠤᠷ | ᠰᠡᠳᠬᠢᠯ ᠨᠢ ᠳᠠᠩᠳᠠ ᠦᠭᠡᠳᠡᠷᠬᠡᠭ | ᠬᠠᠳᠤᠨ ᠵᠠᠶᠠᠭᠠᠨ ᠤ ᠡᠩᠬᠡ ᠶᠢᠨ ᠲᠤᠤᠯᠢ ᠶᠢ ᠬᠠᠶᠢᠯᠠᠵᠤ ᠲᠤᠷᠨᠢᠭᠰᠠᠨ ᠪᠤᠯᠬᠤᠷ | ᠢᠲᠡᠭᠡᠯ ᠨᠢ ᠳᠠᠩᠳᠠ ᠦᠩᠰᠢᠭ | ᠪᠢ ᠡᠬᠡ ᠤᠷᠤᠨ ᠤ ᠪᠠᠨ ᠬᠡᠯᠡ ᠲᠠᠢ ᠰᠢᠪᠠᠭᠤ | ᠪᠢᠳᠡ ᠡᠬᠡ ᠬᠡᠯᠡ ᠪᠠᠷ ᠢᠶᠠᠨ ᠭᠠᠩᠭᠠᠷᠠᠭᠰᠠᠨ ᠰᠢᠪᠠᠭᠤᠳ ᠡ | ᠨᠢᠭᠡ ᠭᠤᠤᠯ ᠢ | ᠦᠭᠰᠦᠨ ᠤᠷᠤᠭᠤᠳᠠᠨ ᠱᠤᠯᠤᠭᠤᠨᠠᠳᠠᠭ ᠪᠤᠯᠬᠤᠷ | ᠵᠤᠨ ᠵᠤᠨ ᠳᠤ ᠪᠠᠨ ᠡᠭᠡᠰᠢᠭᠯᠡᠩ | ᠨᠡᠬᠡᠢ ᠲᠤᠷᠭᠠ | ᠠᠯᠢᠨ ᠢ ᠨᠢ ᠴᠦ ᠬᠡᠲᠦᠷᠦᠨ ᠭᠤᠶᠤᠯᠠᠳᠠᠭ ᠪᠤᠯᠬᠤᠷ | ᠵᠠᠭᠤᠨ ᠵᠠᠭᠤᠨ ᠳᠤ ᠪᠠᠨ ᠰᠤᠨᠤᠰᠬᠤᠯᠠᠩ | ᠨᠠᠢᠮᠠᠨ ᠰᠢᠷᠭᠠ ᠶᠢᠨ ᠬᠤᠷ ᠳᠡᠯ ᠳᠡᠭᠡᠭᠦᠷ | ᠮᠠᠬᠢᠷ ᠰᠡᠯᠡᠮᠡ ᠲᠠᠢ ᠪᠠᠨ ᠱᠤᠤᠭᠢᠭᠤᠯᠤᠭᠰᠠᠨ ᠪᠤᠯᠬᠤᠷ | ᠪᠢ — ᠬᠡᠨ ᠠᠴᠠ ᠴᠦ ᠤᠮᠤᠭᠯᠠᠩ | ᠶᠢᠰᠦᠨ ᠬᠦᠬᠦᠯᠲᠦ ᠴᠠᠭᠠᠨ ᠰᠦᠯᠲᠡ ᠶᠢᠨ | ᠢᠷᠦᠭᠡᠯ ᠤᠨ ᠪᠡᠯᠭᠡ ᠤᠷᠤᠰᠢᠭᠰᠠᠨ ᠪᠤᠯᠬᠤᠷ | ᠪᠢᠳᠡ — ᠬᠡᠵᠢᠶᠡᠳᠡ ᠠᠮᠤᠭᠤᠯᠠᠩ | ᠪᠤᠭᠤᠷᠤᠯ ᠬᠤᠷᠸᠠ ᠳᠤ | ᠬᠦᠬᠡ ᠲᠤᠯᠪᠤᠲᠠᠨ ᠪᠤᠯᠵᠤ ᠵᠠᠶᠠᠭᠠᠭᠰᠠᠨ ᠪᠤᠯᠬᠤᠷ | ᠪᠢ — ᠮᠤᠩᠭᠤᠯ ᠤᠨ ᠬᠢ | ᠪᠤᠰᠤᠭᠠ ᠳᠦᠷᠦᠭᠡ ᠪᠤᠭᠤᠨᠢ ᠵᠢᠯᠤᠭᠤ ᠪᠠᠷ | ᠪᠦᠮᠪᠦᠷᠴᠡᠭ ᠢ ᠬᠤᠷᠤᠶᠢᠯᠠᠨ ᠳᠠᠭᠤᠳᠠᠭᠰᠠᠨ ᠪᠤᠯᠬᠤᠷ | ᠪᠢᠳᠡ — ᠳᠡᠯᠡᠬᠡᠢ ᠶᠢᠨ ᠬᠢ | ᠪᠢ — ᠡᠬᠡ ᠤᠷᠤᠨ ᠤ ᠪᠠᠨ ᠬᠡᠯᠡ ᠲᠠᠢ ᠰᠢᠪᠠᠭᠤ | ᠪᠢᠳᠡ — ᠡᠬᠡ ᠬᠡᠯᠡ ᠪᠠᠷ ᠢᠶᠠᠨ ᠭᠠᠩᠭᠠᠷᠠᠭᠰᠠᠨ ᠰᠢᠪᠠᠭᠤᠳ ᠡ | |