| ᠪᠤ᠂ ᠬᠠᠪᠤᠷ | | | | | ᠵᠡᠯᠡᠯᠡᠨ ᠵᠡᠯᠡᠯᠡᠭᠰᠡᠭᠡᠷ ᠨᠠᠭᠠᠰᠢᠯᠠᠬᠤ ᠭᠠᠯᠠᠭᠤᠳ ᠤᠨ ᠭᠠᠩᠭᠠᠨᠠᠭᠠᠨ ᠢᠶᠠᠷ | ᠵᠡᠭᠦᠷᠮᠡᠭ ᠨᠠᠷᠠ ᠬᠦᠭᠡᠷᠬᠦ ᠳᠡᠭᠡᠨ ᠴᠢᠷᠠᠢ ᠪᠠᠨ ᠨᠢᠯᠴᠢᠭᠢᠨᠡᠭᠦᠯᠦᠨ ᠮᠢᠨᠴᠢᠢᠪᠡ | ᠵᠦᠭ ᠤᠨ ᠠᠯᠤᠰ ᠠᠴᠠ ᠬᠠᠪᠤᠷ ᠤᠨ ᠤᠷᠢᠨ ᠢᠷᠡᠵᠦ ᠪᠤᠢ | ᠵᠢᠷᠦᠬᠡᠨ ᠳᠡᠭᠡᠷᠡ ᠮᠢᠨᠢ ᠬᠠᠶᠢᠷᠠ ᠶᠢᠨ ᠰᠢᠪᠠᠭᠤ ᠵᠢᠷᠭᠢᠵᠦ ᠪᠤᠢ | ᠬᠠᠶᠠ ᠦᠪᠡᠷ ᠢ ᠪᠠᠨ ᠬᠠᠴᠢᠨ ᠬᠠᠷᠠᠮᠴᠢ ᠪᠤᠯᠤᠭᠰᠠᠨ ᠢᠶᠠᠨ ᠭᠠᠶᠢᠬᠠᠬᠤ ᠶᠤᠮ | ᠬᠠᠷᠠᠩᠭᠤᠢ ᠳᠤ ᠰᠡᠳᠬᠢᠯ ᠢ ᠴᠢᠨᠢ ᠲᠡᠮᠲᠡᠷᠢᠭᠡᠳ ᠲᠡᠮᠲᠡᠷᠢᠭᠡᠳ ᠤᠯᠤᠭᠠ ᠦᠭᠡᠢ ᠭᠡᠵᠦ | ᠬᠠᠷᠠ ᠳᠠᠷᠤᠭᠠᠳ ᠬᠠᠰᠬᠢᠷᠤᠨ ᠰᠡᠷᠢᠬᠦ ᠳᠡᠭᠡᠨ ᠤᠭᠢᠯᠠᠬᠤ ᠴᠦ ᠮᠠᠭᠠᠳ | ᠬᠠᠯᠠᠭᠤᠬᠠᠨ ᠡᠩᠭᠡᠷ ᠠᠴᠠ ᠴᠢᠨᠢ ᠪᠤᠰᠤᠳ ᠶᠠᠭᠤ ᠶᠢ ᠴᠦ ᠬᠦᠰᠡᠬᠦ ᠦᠭᠡᠢ | ᠬᠠᠪᠤᠷ ᠪᠠᠶᠢᠬᠤ ᠰᠠᠨ᠂ ᠬᠠᠪᠤᠷ ᠤᠨ ᠤᠷᠢᠬᠠᠨ ᠦᠩᠭᠡ ᠪᠠᠷ ᠴᠢᠮᠠ ᠪᠠᠨ ᠬᠠᠶᠢᠷᠠᠯᠠᠶᠠ | | | | ᠨᠠᠮ ᠨᠠᠮᠤᠭᠤᠬᠠᠨ ᠤᠷᠤᠢ ᠶᠢᠨ ᠰᠡᠯᠡᠭᠦᠨ ᠳᠤ | ᠬᠤᠶᠠᠷ ᠡᠷᠪᠡᠬᠡᠢ ᠡᠷᠭᠢᠯᠳᠦᠭᠰᠡᠭᠡᠷ ᠲᠠᠭᠤᠴᠠᠯᠳᠤᠭᠰᠠᠭᠠᠷ ᠳᠡᠷᠪᠡᠵᠦ ᠤᠳᠤᠨᠠ | ᠬᠤᠯᠠ ᠶᠢᠨ ᠰᠠᠷᠠᠨ ᠤ ᠦᠨᠦᠷ ᠬᠦᠭᠡᠷᠦᠬᠦᠨ ᠳᠠᠯᠠᠪᠴᠢ ᠠᠴᠠ ᠨᠢ ᠠᠩᠭᠢᠯᠤᠨᠠ | ᠵᠢᠷᠤᠭ ᠰᠢᠭ᠋ ᠠᠬᠤᠢ ᠠᠴᠠ ᠰᠢᠯᠦᠭ ᠤᠨ ᠰᠠᠨᠠᠭᠠ ᠤᠷᠭᠤᠨᠠ | ᠵᠠᠭᠤᠨ ᠴᠡᠴᠡᠭ ᠤᠨ ᠦᠵᠡᠰᠬᠦᠯᠡᠩ ᠢᠶᠠᠷ ᠬᠤᠷᠮᠤᠢ ᠪᠠᠨ ᠡᠮᠵᠢᠭᠰᠡᠭᠡᠷ | ᠵᠢᠭᠠᠬᠠᠨ ᠬᠦᠯ ᠢᠶᠠᠷ ᠢᠶᠠᠨ ᠰᠢᠭᠦᠳᠡᠷᠢ ᠪᠤᠲᠠᠷᠠᠭᠠᠨ ᠴᠢᠮᠠ ᠤᠷᠤᠭᠤ ᠪᠠᠨ ᠯᠡ ᠲᠡᠮᠡᠦᠯᠡᠨᠡ | ᠵᠦᠭᠡᠯᠡᠬᠡᠨ ᠨᠠᠮᠢᠷᠠᠬᠤ ᠭᠢᠯ ᠬᠠᠷᠠ ᠦᠰᠦᠨ ᠤ ᠮᠢᠨᠢ ᠠᠩᠭᠢᠯᠤᠮᠠ ᠳᠤ ᠨᠢᠯᠬᠠᠷᠠᠵᠤ | ᠵᠢᠷᠭᠠᠯ ᠤᠨ ᠮᠦᠰᠢᠶᠡᠳᠦ ᠲᠠᠢ ᠵᠡᠭᠦᠳᠦ ᠶᠢ ᠮᠢᠨᠢ ᠦᠨᠦᠰᠦᠨ ᠦᠨᠦᠰᠦᠨ ᠡᠷᠬᠡᠯᠡᠭᠡᠴᠢ | ᠵᠤᠨ ᠪᠠᠶᠢᠬᠤ ᠰᠠᠨ᠂ ᠵᠤᠨ ᠤ ᠠᠮᠢᠯᠠᠯ ᠤᠨ ᠦᠩᠭᠡ ᠪᠠᠷ ᠴᠢᠮᠠ ᠪᠠᠨ ᠬᠠᠶᠢᠷᠠᠯᠠᠶᠠ | | | | ᠠᠭᠤᠯᠠᠰ ᠤᠨ ᠰᠡᠭᠦᠳᠡᠷ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠤᠷᠲᠤᠰᠤᠨ | ᠤᠶᠠᠷᠠᠮᠠᠷ ᠬᠤᠩᠭᠤᠷ ᠰᠠᠯᠬᠢᠨ ᠳᠤ ᠨᠢ ᠡᠳᠦᠷ ᠬᠤᠨᠤᠭ ᠤᠳ ᠬᠡᠶᠢᠰᠦᠨᠡ | ᠤᠭᠤᠷᠠᠭ ᠨᠠᠷᠠᠨ ᠠᠴᠠ ᠠᠯᠳᠠᠷᠠᠭᠰᠠᠨ ᠭᠡᠮᠡᠷᠬᠡᠨ ᠬᠤᠪᠠᠨ ᠰᠢᠷᠭᠠᠯ ᠨᠠᠪᠴᠢᠰ | ᠤᠨᠠᠬᠤ ᠨᠢ ᠤᠨᠠᠵᠤ ᠨᠢᠰᠬᠦ ᠨᠢ ᠨᠢᠰᠬᠦ ᠳᠤ ᠰᠡᠳᠬᠢᠯ ᠳᠠᠩᠴᠢ ᠤᠶᠢᠮᠤᠷᠠᠨᠠ | ᠨᠢᠴᠦᠭᠦᠷᠡᠬᠦ ᠮᠤᠳᠤᠳ ᠢ ᠬᠠᠷᠠᠬᠤ ᠠᠴᠠ ᠳᠠᠩ ᠴᠠᠮᠴᠠ ᠲᠠᠢ ᠰᠢᠭ᠋ ᠴᠡᠴᠡᠷᠡᠰᠬᠢᠭᠡᠳ | ᠨᠠᠮᠠᠭᠠ ᠰᠠᠯᠠᠭᠠ ᠪᠦᠬᠦᠨ ᠳᠤ ᠨᠢ ᠨᠠᠪᠴᠢ ᠠᠮᠢᠯᠠᠭᠤᠯᠤᠮᠠᠷ ᠪᠤᠳᠤᠭᠳᠠᠭᠠᠳ | ᠨᠤᠶᠢᠲᠠᠨ ᠰᠤᠷᠮᠤᠤᠰᠤ ᠲᠠᠢ ᠴᠢᠮᠠ ᠳᠡᠭᠡᠷᠡ ᠪᠠᠨ ᠰᠡᠮ ᠰᠡᠮᠬᠡᠨ ᠬᠦᠷᠬᠦ ᠳᠡᠭᠡᠨ | ᠨᠠᠷᠠᠯᠠᠭ ᠬᠤᠷᠸᠠ ᠶᠢᠨ ᠵᠠᠢ ᠳᠤ ᠮᠦᠷᠦ ᠶᠢ ᠴᠢᠨᠢ ᠲᠦᠰᠢᠶᠡ ᠶᠢ ᠯᠡ ᠭᠡᠵᠦ ᠬᠦᠰᠡᠭᠰᠡᠨ ᠡ | ᠨᠠᠮᠤᠷ ᠪᠠᠶᠢᠬᠤ ᠰᠠᠨ᠂ ᠨᠠᠮᠤᠷ ᠤᠨ ᠠᠩᠭᠢᠷᠬᠠᠨ ᠦᠩᠭᠡ ᠪᠠᠷ ᠴᠢᠮᠠ ᠪᠠᠨ ᠬᠠᠶᠢᠷᠠᠯᠠᠶᠠ | | | | ᠲᠡᠭᠷᠢ ᠭᠠᠵᠠᠷ ᠢ ᠦᠯᠵᠡᠶᠢᠲᠡᠢ ᠬᠤᠯᠪᠤᠨ | ᠲᠠᠭᠠᠨᠠ ᠶᠢᠨ ᠴᠡᠴᠡᠭ ᠰᠢᠭ ᠴᠠᠰᠤᠨ ᠪᠤᠲᠠᠷᠠᠨᠠ | ᠲᠤᠪ ᠲᠤᠩᠭᠠᠯᠠᠭ᠂ ᠴᠡᠪ ᠴᠡᠩᠬᠡᠷ ᠴᠠᠰᠤᠨ ᠤ ᠭᠡᠭᠡ ᠳᠤᠮᠳᠠᠭᠤᠷ | ᠲᠤᠩ ᠠᠷᠢᠭᠤᠨ᠂ ᠲᠤᠩ ᠭᠠᠶᠢᠬᠠᠮᠰᠢᠭ ᠢ ᠵᠢᠷᠦᠬᠡ ᠪᠠᠷ ᠢᠶᠠᠨ ᠮᠡᠳᠡᠷᠡᠨ ᠭᠤᠩᠬᠤᠨᠠ | ᠠᠰᠬᠠᠷᠠᠭᠰᠠᠨ ᠬᠠᠷᠠ ᠭᠡᠵᠢᠭᠡᠨ ᠳᠡᠭᠡᠷᠡ ᠪᠠᠨ ᠴᠠᠰᠤᠨ ᠤ ᠰᠢᠷᠬᠡᠭ ᠴᠡᠮᠴᠡᠶᠢᠯᠭᠡᠭᠰᠡᠭᠡᠷ | ᠠᠮᠠᠷᠠᠭ ᠴᠠᠰᠤᠨ ᠤ ᠠᠨᠢᠷ ᠴᠢᠩᠨᠠᠵᠤ ᠴᠢᠮᠠ ᠪᠠᠨ ᠰᠠᠨᠠᠬᠤ ᠰᠠᠶᠢᠬᠠᠨ | ᠠᠶᠠᠰ ᠠᠶᠠᠰᠬᠠᠨ ᠬᠠᠷᠠᠴᠠ ᠪᠠᠷ ᠢᠶᠠᠨ ᠴᠢᠮᠠ ᠪᠠᠨ ᠦᠬᠦᠭᠡᠷᠳᠡᠨ ᠵᠢᠷᠭᠠᠭᠠᠵᠤ | ᠠᠯᠳᠠᠬᠠᠨ ᠪᠡᠶᠡ ᠡᠨᠡᠬᠡᠨ ᠨᠠᠰᠤ ᠶᠢ ᠪᠠᠨ ᠠᠯᠠᠭᠠᠨ ᠳᠡᠭᠡᠷᠡ ᠴᠢᠨᠢ ᠡᠯᠡᠭᠡᠮᠡᠷ ᠯᠡ ᠪᠠᠶᠢᠨᠠ | ᠡᠪᠦᠯ ᠪᠠᠶᠢᠬᠤ ᠰᠠᠨ᠂ ᠡᠪᠦᠯ ᠤᠨ ᠮᠦᠩᠭᠦᠨ ᠦᠩᠭᠡ ᠪᠠᠷ ᠴᠢᠮᠠ ᠪᠠᠨ ᠬᠠᠶᠢᠷᠠᠯᠠᠶᠠ |