ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠵᠠᠰᠠᠭ ᠤᠨ ᠢᠯᠡᠳᠭᠡᠯ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠣᠶᠣᠯ ᠡᠷᠳᠡᠨᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠬᠡᠰᠢᠭᠳᠡᠨ ᠪᠦᠬᠡ ᠳ᠋ᠠᠸ᠎ᠠ ᠶᠢᠨ ᠲᠤᠮᠤᠭ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2018-03-15
       ᠲᠤᠮᠤᠭᠳᠦ ᠪᠦᠬᠡ ᠳ᠋ᠠᠸ᠎ᠠ ᠪᠤᠯ ᠬᠡᠰᠢᠭᠳᠡᠨ ᠮᠤᠩᠭᠤᠯᠴᠤᠳ ᠤᠨ ᠲᠤᠮᠳᠠ ᠡᠷᠳᠡ ᠤᠵᠤᠭᠤᠷ ᠠᠴᠠ ᠠᠪᠤᠭᠠᠳ ᠬᠠᠭᠤᠴᠢᠯᠠᠵᠦ ᠢᠷᠡᠭᠰᠡᠨ᠂ ᠦᠯᠢᠭᠡᠷ ᠲᠤᠮᠤᠭ ᠮᠡᠳᠦ ᠶᠠᠷᠢᠭᠳᠠᠳᠠᠭ ᠲᠤᠮᠤᠭᠳᠦ ᠪᠦᠬᠡᠴᠢᠨ ᠤ ᠨᠢᠭᠡ ᠮᠥᠨ ᠃ ᠡᠷᠳᠡ ᠤᠷᠢᠳᠦ ᠶᠢᠨ ᠦᠶ᠎ᠡ ᠳᠤ ᠳ᠋ᠠᠸ᠎ᠠ ᠬᠡᠳᠡᠭ ᠬᠦᠮᠦᠨ ︵1700 ᠭᠠᠷᠤᠢ ᠤᠨ ᠤ ᠪᠠᠷᠤᠭ︶ ᠰᠢᠷᠠᠮᠦ᠋ᠷᠡᠨ ᠤ ᠬᠦᠪᠡᠭᠡᠨ ᠳᠤ ᠨᠤᠳᠤᠭᠰᠢᠨ ᠰᠠᠭᠤᠵᠦ᠂ ᠪᠤᠭᠤᠷᠤᠯ ᠡᠵᠢ ᠲᠠᠢ ᠪᠠᠨ ᠬᠤᠶᠠᠭᠤᠯᠠ ᠭᠠᠩ ᠬᠡᠬᠦ ᠨᠤᠬᠠᠢ ᠦᠭᠡᠢ᠂ ᠭᠠᠵᠠᠷ ᠬᠢᠰᠬᠢᠬᠦ ᠮᠠᠯ ᠦᠭᠡᠢ᠂ ᠲᠤᠩ ᠶᠠᠳᠠᠭᠤ ᠠᠮᠢᠳᠤᠷᠠᠯ ᠲᠠᠢ ᠪᠠᠶᠢᠵᠠᠢ᠃ ᠲᠡᠭᠡᠭᠡᠳ ᠲᠡᠷᠡ ᠠᠷᠦ ᠭᠠᠵᠠᠷ ᠭᠠᠷᠴᠦ ᠠᠳᠤᠭᠤ ᠮᠠᠯ ᠤᠯᠵᠦ ᠬᠠᠷᠢᠭᠤᠯᠤᠨ ᠪᠤᠭᠤᠷᠤᠯ ᠡᠵᠢ ᠪᠠᠨ ᠠᠰᠠᠷᠠᠬᠤ ᠶᠢᠨ ᠲᠦᠯᠦᠭᠡ ᠮᠠᠶᠢᠵᠢᠬᠢ ᠭᠡᠷ ᠢᠶᠠᠨ ᠪᠠᠭᠤᠯᠭᠠᠵᠦ᠂ ᠪᠤᠭᠤᠷᠤᠯ ᠡᠵᠢ ᠪᠠᠨ ᠵᠦᠷᠢᠭᠦᠯᠵᠦ ᠲᠠᠯᠪᠢᠭᠰᠠᠨ ᠲᠤᠭᠤᠨᠤ ᠲᠤᠳᠤᠷ᠎ᠠ ᠪᠠᠨ ᠰᠠᠭᠤᠯᠭᠠᠵᠦ᠂ ᠬᠤᠶᠠᠷ ᠬᠠᠪᠴᠢᠭ ᠰᠠᠭᠤᠯᠠᠭ᠎ᠠ ᠤᠰᠦ ᠶᠢ ᠲᠤᠭᠤᠨᠤ ᠶᠢᠨ ᠬᠤᠶᠠᠷ ᠲᠠᠯ᠎ᠠ ᠠᠴᠠ ᠲᠡᠭᠦᠵᠢᠯᠡᠵᠦ ᠠᠷᠦ ᠨᠢᠷᠤᠭᠤᠨ ᠳᠠᠭᠠᠨ ᠡᠭᠦᠷᠦᠨ ᠤᠰᠦ ᠪᠡᠯᠴᠢᠭᠡᠷ ᠰᠢᠮᠡᠯᠢᠭ ᠠᠭᠤᠳᠠᠮ ᠰᠠᠷᠠᠭᠤᠯ ᠬᠡᠰᠢᠭᠳᠡᠨ ᠨᠤᠳᠤᠭ ᠢ ᠵᠤᠷᠢᠵᠦ ᠢᠷᠡᠵᠡᠢ᠃ ᠲᠡᠷᠡ ᠬᠡᠰᠢᠭᠳᠡᠨ ᠤ ᠲᠠᠯ᠎ᠠ ᠳᠤ ᠪᠤᠷᠤ ᠬᠡᠷ ᠢᠶᠠᠨ ᠪᠤᠰᠬᠠᠵᠦ᠂ ᠠᠳᠤᠭᠤ ᠮᠠᠯ ᠬᠠᠷᠢᠭᠤᠯᠤᠨ ᠡᠵᠢ ᠪᠠᠨ ᠠᠰᠠᠷᠠᠵᠦ ᠰᠢᠯᠢ ᠶᠢᠨ ᠰᠠᠶᠢᠨ ᠡᠷ᠎ᠡ ᠶᠢᠨ ᠠᠮᠢᠳᠤᠷᠠᠯ ᠬᠢᠵᠦ ᠡᠬᠢᠯᠡᠭᠰᠡᠨ ᠬᠡᠨ᠎ᠡ᠃ ᠳ᠋ᠠᠸ᠎ᠠ ᠮᠤᠨᠳᠠᠭ ᠲᠤᠮᠤ ᠪᠡᠶ᠎ᠡ ᠪᠢᠯᠳᠠᠷ ᠲᠠᠢ᠂ ᠪᠡᠶ᠎ᠡ ᠶᠢᠨ ᠦᠨᠳᠦᠷ ᠨᠢ ᠪᠠᠷᠤᠭ ᠨᠢᠭᠡ ᠠᠯᠳᠠ ᠢᠯᠡᠭᠦᠦ᠂ ᠴᠡᠭᠡᠵᠢᠨ ᠪᠡᠶ᠎ᠡ ᠶᠢᠨ ᠦᠷᠭᠡᠨ ᠨᠢ ᠲᠠᠪᠤᠨ ᠲᠦᠬᠡ ᠢᠯᠡᠭᠦᠦ᠂ ᠲᠤᠮᠤ ᠨᠢᠳᠦ ᠲᠠᠢ᠂ ᠬᠤᠶᠠᠷ ᠭᠠᠷ ᠤᠨ ᠲᠤᠬᠤᠢ ᠨᠢ ᠲᠤᠷᠠᠩᠬᠠᠢ ᠬᠦᠮᠦᠨ ᠤ ᠪᠦᠳᠦᠭᠦᠨ ᠭᠤᠶ᠎ᠠ ᠠᠳᠠᠯᠢ᠂ ᠭᠠᠷ ᠤᠨ ᠡᠷᠡᠭᠡᠢ ᠬᠤᠷᠤᠭᠤ ᠨᠢ ᠬᠦᠷᠵᠡ ᠶᠢᠨ ᠡᠰᠢ ᠮᠡᠳᠦ ᠪᠦᠳᠦᠭᠦᠨ ᠠᠶᠢᠬᠤᠪᠳᠤᠷ ᠠᠪᠤᠷᠭᠤ ᠬᠦᠮᠦᠨ ᠪᠠᠶᠢᠪᠠ ᠬᠡᠨ᠎ᠡ᠃ ᠳ᠋ᠠᠸ᠎ᠠ ᠬᠠᠷᠠᠬᠠᠨ ᠪᠠᠭ᠎ᠠ ᠠᠴᠠ ᠪᠠᠨ ᠪᠠᠷᠢᠯᠳᠤᠨ ᠨᠤᠴᠤᠯᠳᠤᠵᠦ᠂ ᠨᠤᠳᠤᠭ ᠤᠰᠤᠨ ᠤ ᠪᠠᠨ ᠬᠠᠶᠢᠷᠬᠠᠨ ᠤᠪᠤᠭᠠᠨ ᠲᠠᠬᠢᠯᠭ᠎ᠠ ᠶᠢᠨ ᠨᠠᠶᠢᠷ᠂ ᠬᠤᠰᠢᠭᠤ ᠵᠠᠰᠠᠭ ᠨᠤᠶᠠᠨ ᠤ ᠨᠠᠶᠢᠷ ᠤᠨ ᠪᠦᠬᠡ ᠪᠠᠷᠢᠯᠳᠤᠭᠠᠨ ᠳᠤ ᠬᠤᠯᠠ ᠤᠶᠢᠷ᠎ᠠ ᠶᠢᠨ ᠨᠡᠷᠡᠳᠦ ᠪᠦᠬᠡᠴᠢᠨ ᠤ ᠲᠤᠳᠤᠷ᠎ᠠ ᠲᠡᠭᠦᠨ ᠤ ᠭᠠᠷ ᠲᠡᠩᠴᠡᠭᠰᠡᠨ ᠬᠦᠮᠦᠨ ᠪᠠᠷᠤᠭ ᠭᠠᠷᠤᠭᠰᠠᠨ ᠦᠭᠡᠢ᠃        ᠠᠷᠦ ᠲᠠᠪᠢᠨ ᠲᠤᠯᠤᠭ᠎ᠠ᠂ ᠦᠪᠦᠷ ᠲᠦᠴᠢ ᠶᠢᠰᠦᠨ ᠬᠤᠰᠢᠭᠤᠨ ᠤ ᠠᠷᠦ ᠪᠤᠭᠳᠠ ᠶᠢᠨ ᠠᠮᠤᠭᠤᠯᠠᠩ ᠨᠠᠭᠠᠳᠤᠮ ᠦᠷᠭᠡᠨ ᠬᠡᠪᠴᠢᠶ᠎ᠡ ᠪᠠᠷ ᠬᠢᠬᠦ ᠪᠠᠶᠠᠷ ᠤᠨ ᠴᠢᠮᠡᠭᠡ ᠬᠡᠰᠢᠭᠳᠡᠨ ᠬᠤᠰᠢᠭᠤᠨ ᠳᠤ ᠤᠯᠠᠮᠵᠢᠯᠠᠭᠳᠠᠨ ᠢᠷᠡᠭᠦ ᠳᠤ ᠪᠦᠬᠡᠴᠢᠨ ᠳ᠋ᠠᠸ᠎ᠠ ᠠᠯᠠᠰᠬᠢᠨ ᠪᠠᠶᠠᠷᠯᠠᠵᠦ᠂ ᠪᠤᠭᠤᠷᠤᠯ ᠡᠵᠢ ᠠᠴᠠ ᠪᠠᠨ ᠴᠢᠯᠦᠬᠡ ᠤᠯᠵᠦ ᠶᠡᠭᠡ ᠨᠠᠶᠢᠷ ᠲᠤ ᠶᠠᠪᠤᠬᠤ ᠪᠠᠷ ᠪᠤᠯᠪᠠ᠃ ᠲᠡᠭᠡᠭᠡᠳ ᠲᠡᠷᠡ ᠪᠤᠭᠤᠷᠤᠯ ᠡᠵᠢ ᠪᠠᠨ ᠰᠠᠨᠠᠭ᠎ᠠ ᠰᠠᠶᠢᠳᠠᠢ ᠰᠠᠭᠠᠬᠠᠯᠳᠠ ᠶᠢᠨ ᠬᠢᠨ ᠳᠠᠭᠠᠨ ᠭᠤᠶᠤᠵᠦ᠂ ᠬᠠᠯᠠᠮᠵᠢᠯᠠᠨ ᠬᠠᠷᠠᠭᠠᠯᠵᠠᠬᠤ ᠶᠢ ᠵᠠᠬᠢᠭᠠᠳ ᠪᠦᠳᠦᠭᠦᠨ ᠦᠭᠡᠷ ᠤᠨ ᠠᠷᠠᠰᠦ ᠶᠢ ᠡᠯᠳᠡᠵᠦ ᠪᠤᠯᠪᠠᠰᠤᠷᠠᠭᠤᠯᠤᠭᠰᠠᠨ 20 ᠭᠠᠷᠤᠢ ᠵᠢᠩ ᠤᠨ ᠬᠦᠨᠳᠦ ᠵᠤᠳᠤᠭ ᠢᠶᠠᠨ ᠴᠤᠯᠪᠤᠭᠤᠷ ᠢᠶᠠᠷ ᠪᠤᠭᠤᠵᠦ᠂ ᠳ᠋ᠠ ᠬᠦᠷᠢᠶ᠎ᠡ ︵ᠤᠯᠠᠭᠠᠨᠪᠠᠭᠠᠳᠤᠷ︶ ᠳᠤ ᠠᠶᠠᠨ ᠤ ᠲᠡᠷᠭᠡ ᠶᠢ ᠲᠠᠭᠠᠵᠦ ᠶᠠᠪᠤᠵᠠᠢ᠃ ᠲᠡᠷᠡ ᠠᠶᠠᠨ ᠤ ᠦᠭᠡᠷ ᠢ ᠬᠠᠷᠢᠭᠤᠯᠵᠦ᠂ ᠬᠠᠶᠠ ᠬᠦᠯ ᠠᠮᠠᠷᠠᠵᠦ ᠬᠠᠩᠭᠠᠢ ᠲᠡᠷᠭᠡ ᠳᠤᠨᠢ ᠰᠠᠭᠤᠪᠠᠯ ᠲᠡᠭᠡᠭᠡᠰᠢ ᠨᠢ ᠬᠦᠨᠳᠦᠷᠡᠵᠦ ᠭᠠᠯ ᠤᠨ ᠠᠬ᠎ᠠ ᠨᠢ ᠲᠤᠷ᠎ᠠ ᠦᠭᠡᠶᠢᠴᠡᠳᠡᠭ ᠬᠡᠨ᠎ᠡ᠃ ᠢᠩᠭᠢᠭᠡᠳ ᠲᠡᠷᠡ ᠠᠷᠭ᠎ᠠ ᠪᠤᠰᠦ ᠠᠶᠠᠨ ᠤ ᠲᠡᠷᠭᠡ ᠶᠢ ᠲᠠᠭᠠᠵᠦ ᠦᠭᠡᠷ ᠢ ᠨᠢ ᠬᠠᠷᠢᠭᠤᠯᠤᠨ ᠬᠤᠳᠤᠭᠤᠳᠦ ᠪᠠᠨ ᠲᠦᠭᠦᠷᠭᠡᠵᠦ ᠶᠠᠪᠠᠭᠠᠨ ᠢᠶᠠᠷ ᠶᠠᠪᠤᠵᠦ ᠳ᠋ᠠ ᠬᠦᠷᠢᠶᠡᠨ ᠳᠤ ᠬᠦᠷᠦᠭᠰᠡᠨ ᠪᠠᠶᠢᠵᠠᠢ᠃ ᠳ᠋ᠠ ᠬᠦᠷᠢᠶ᠎ᠡ ᠠᠴᠠ ᠤᠶᠢᠷᠠᠯᠴᠠᠭ᠎ᠠ ᠬᠢ ᠲᠡᠨᠢᠭᠡᠷ ᠠᠭᠤᠳᠠᠮ ᠲᠠᠯ᠎ᠠ ᠳᠤ ᠮᠤᠩᠭᠤᠯ ᠭᠡᠷ ᠬᠡᠳᠦᠨ ᠵᠠᠭᠤ ᠪᠠᠷ ᠵᠢᠭᠳᠡᠷᠡᠵᠦ᠂ ᠲᠦᠷᠪᠡᠨ ᠲᠤᠯᠭᠠᠭᠤᠷᠢ ᠲᠠᠢ ᠬᠡ ᠤᠭᠠᠯᠵᠠ ᠤᠷᠢᠶᠠᠭᠰᠠᠨ ᠰᠧ ᠮᠠᠶᠢᠬᠠᠨ ᠳᠤ ᠴᠠᠭᠠᠨ ᠢᠰᠡᠭᠡᠢ᠂ ᠬᠡᠪᠢᠰ ᠲᠦᠭᠦᠷᠡᠩ ᠲᠡᠪᠢᠰᠴᠦ᠂ ᠭᠤᠤᠯ ᠰᠠᠭᠤᠳᠠᠯ ᠳᠤᠨᠢ ᠠᠷᠦ ᠪᠤᠭᠳᠠ ᠬᠠᠭᠠᠨ ᠮᠤᠷᠢᠯᠠᠨ ᠰᠠᠭᠠᠳᠠᠵᠦ᠂ ᠲᠦᠰᠢᠮᠡᠯ ᠰᠠᠶᠢᠳ ᠬᠤᠶᠠᠷ ᠭᠠᠷᠯᠠᠨ ᠰᠠᠭᠤᠵᠦ᠂ ᠬᠠᠷᠢ ᠬᠦᠨᠳᠡᠯᠡᠨ ᠤ ᠵᠤᠴᠢᠳ ᠲᠡᠭᠡᠳᠦ ᠰᠠᠭᠤᠳᠠᠯ ᠳᠤ ᠰᠠᠭᠠᠳᠠᠵᠦ᠂ ᠬᠤᠨᠢᠨ ᠰᠢᠭᠦᠰᠦ ᠬᠤᠷᠠᠵᠠ ᠠᠷᠢᠬᠢ᠂ ᠠᠶᠢᠷᠠᠭ ᠴᠡᠭᠡ ᠰᠦᠩᠨᠡᠨ᠂ ᠨᠠᠶᠢᠷ ᠤᠨ ᠲᠠᠭᠤᠤ ᠠᠶᠠᠯᠤᠭᠤᠯᠵᠦ᠂ ᠨᠠᠶᠢᠷ ᠨᠠᠭᠠᠳᠤᠮ ᠦᠪᠡᠳᠡᠭᠰᠢ ᠶᠡᠭᠡᠪᠠᠷ ᠡᠬᠢᠯᠡᠪᠡ᠃ ᠨᠠᠶᠢᠷ ᠤᠨ ᠲᠠᠭᠠᠭᠠᠮᠠᠯ ᠲᠦᠰᠢᠮᠡᠯ ᠨᠠᠶᠢᠷ ᠡᠬᠢᠯᠡᠬᠦ ᠶᠢ ᠵᠠᠷᠯᠠᠵᠦ᠂ ᠪᠦᠬᠡ ᠶᠢᠨ ᠤᠷᠢᠶ᠎ᠠ ᠭᠤᠷᠪᠠᠨᠳᠠ ᠲᠠᠭᠤᠯᠠᠵᠦ᠂ ᠠᠪᠤᠷᠭᠤ ᠲᠤᠮᠤ ᠪᠦᠬᠡᠴᠢᠳ ᠬᠤᠶᠢᠨ᠎ᠠ ᠬᠤᠶᠢᠨ᠎ᠠ ᠠᠴᠠ ᠪᠠᠨ ᠭᠠᠷᠴᠦ ᠪᠦᠬᠡ ᠶᠢᠨ ᠪᠠᠷᠢᠯᠳᠤᠭᠠᠨ ᠢᠳᠡ ᠬᠦᠴᠦ ᠲᠠᠢ ᠶᠠᠪᠤᠭᠳᠠᠵᠠᠢ᠃        ᠠᠷᠦ ᠦᠪᠦᠷ ᠮᠤᠩᠭᠤᠯ ᠤᠨ ᠪᠦᠬᠡᠴᠢᠳ ᠪᠠ ᠬᠠᠷᠢ ᠬᠦᠷᠦᠨ ᠤ 1024 ᠪᠦᠬᠡ ᠭᠤᠷᠪᠠᠨ ᠡᠳᠦᠷ ᠤᠨ ᠰᠢᠷᠦᠭᠦᠨ ᠪᠠᠷᠢᠯᠳᠤᠭᠠᠨ ᠶᠠᠪᠤᠭᠤᠯᠵᠦ᠂ ᠳ᠋ᠠᠸ᠎ᠠ ᠨᠠᠢᠮᠠ ᠶᠢᠨ ᠲᠠᠪᠠᠭ᠎ᠠ ᠶᠢ ᠰᠠᠭᠠᠳ ᠦᠭᠡᠢ ᠲᠠᠪᠠᠵᠦ᠂ ᠠᠪᠤᠷᠭᠤ ᠪᠦᠬᠡ ᠂ ᠠᠷᠰᠯᠠᠨ ᠪᠦᠬᠡ᠂ ᠵᠠᠭᠠᠨ ᠪᠦᠬᠡ ᠶᠢ ᠠᠷᠦ ᠠᠷᠦ ᠠᠴᠠ ᠨᠢ ᠬᠠᠶᠠᠵᠦ᠂ ᠤᠮᠤᠭ ᠵᠢᠪᠬᠤᠭ᠎ᠠ ᠲᠠᠢ ᠮᠠᠭᠰᠢᠵᠦ ᠭᠠᠷᠴᠠᠢ ᠃ ᠳ᠋ᠠᠸ᠎ᠠ ᠪᠦᠬᠦᠯᠢ ᠬᠤᠷᠠᠭ᠎ᠠ ᠶᠢᠨ ᠰᠢᠭᠦᠰᠦ ᠪᠠᠷ ᠨᠢᠭᠡ ᠴᠠᠭ ᠤᠨ ᠬᠤᠭᠤᠯᠠ ᠪᠤᠯᠭᠠᠵᠦ᠂ ᠴᠢᠳᠠᠯ ᠮᠡᠷᠭᠡᠵᠢᠯ ᠢᠶᠠᠨ ᠰᠢᠯᠭᠠᠬᠤ ᠪᠠᠷ ᠬᠤᠨᠤᠭ ᠡᠳᠦᠷ ᠢ ᠬᠦᠯᠢᠶᠡᠵᠦ ᠪᠠᠶᠢᠪᠠ᠃ ᠲᠡᠷᠡ ᠬᠠᠯᠬ᠎ᠠ ᠶᠢᠨ ᠬᠡᠬᠡᠷ᠎ᠡ ᠲᠠᠯ᠎ᠠ ᠪᠠᠷ ᠠᠯᠬᠤᠯᠠᠨ ᠶᠠᠪᠤᠬᠤ ᠳᠠᠭᠠᠨ ᠴᠦ ᠲᠦᠷᠦᠭᠰᠡᠨ ᠨᠤᠳᠤᠭ ᠤᠨ ᠢᠶᠠᠨ ᠬᠠᠶᠢᠷᠬᠠᠨ ᠤᠪᠤᠭᠠᠨ ᠳᠠᠭᠠᠨ ᠵᠠᠯᠪᠠᠷᠢᠨ ᠰᠦᠰᠦᠭᠯᠡᠵᠦ ᠪᠠᠶᠢᠪᠠ ᠃        ᠠᠷᠦ ᠪᠤᠭᠳᠠ ᠬᠠᠭᠠᠨ ᠤ ᠠᠷᠰᠯᠠᠨ ᠴᠤᠯᠠ ᠲᠠᠢ ᠪᠦᠬᠡᠴᠢᠨ ᠴᠦ ᠲᠡᠭᠦᠨ ᠠᠴᠠ ᠵᠢᠷᠦᠬᠡᠰᠢᠶᠡᠨ᠂ ᠬᠡᠨ ᠨᠢ ᠴᠦ ᠬᠡᠳ ᠳ᠋ᠠᠸ᠎ᠠ ᠲᠠᠢ ᠤᠨᠤᠭ᠎ᠠ ᠬᠠᠷᠭᠤᠬᠤ ᠠᠴᠠ ᠪᠠᠨ ᠲᠠᠳᠠᠭᠠᠯᠵᠠᠨ᠎ᠠ᠃ ᠬᠡᠳᠡᠯ᠎ᠡ ᠲᠡᠷᠡ ᠶᠠᠭ ᠰᠠᠶᠢᠬᠠᠨ ᠪᠤᠭᠳᠠ ᠶᠢᠨ ᠠᠷᠰᠯᠠᠨ ᠪᠦᠬᠡ ᠲᠠᠢ ᠲᠡᠭᠡᠳᠦ ᠲᠦᠷᠪᠡ ᠶᠢᠨ ᠤᠨᠤᠭ᠎ᠠ ᠤᠴᠠᠷᠠᠵᠦ᠂ ᠬᠡᠷᠦᠵᠦ ᠵᠤᠭᠰᠤᠭᠠᠳ ᠪᠠᠷᠢᠴᠠ ᠪᠤᠯᠢᠶᠠᠯᠳᠤᠬᠤ ᠨᠢ ᠶᠠᠭ ᠯᠡ ᠬᠤᠶᠠᠷ ᠠᠷᠰᠯᠠᠨ ᠬᠤᠭᠤᠷᠤᠨᠳᠦ ᠪᠠᠨ ᠨᠤᠴᠤᠯᠳᠤᠵᠦ ᠪᠠᠶᠢᠭ᠎ᠠ ᠰᠢᠭ᠋ ᠰᠦᠷᠯᠢᠭ ᠬᠠᠷᠠᠭᠳᠠᠨ᠎ᠠ᠃ ᠳ᠋ᠠᠸ᠎ᠠ᠂ ᠪᠤᠭᠳᠠ ᠶᠢᠨ ᠠᠷᠰᠯᠠᠨ ᠪᠦᠬᠡ ᠶᠢᠨ ᠵᠤᠳᠤᠭ ᠠᠴᠠ ᠨᠢ ᠦᠪᠡᠷ ᠤᠨ ᠪᠠᠷᠢᠴᠠ ᠪᠠᠷ ᠢᠶᠠᠨ ᠠᠳᠬᠤᠨ ᠠᠪᠤᠮᠠᠭᠴᠠ ᠲᠠᠯᠪᠢᠭᠰᠠᠨ ᠦᠭᠡᠢ᠂ ᠨᠢᠭᠡ ᠠᠴᠠ ᠪᠠᠷᠢᠭᠰᠠᠨ ᠴᠡᠭ ᠢᠶᠠᠷ ᠢᠶᠠᠨ ᠬᠠᠭᠠᠰ ᠡᠳᠦᠷ ᠰᠢᠬᠠᠮ ᠪᠠᠷᠢᠯᠳᠤᠵᠦ ᠪᠠᠶᠢᠭᠠᠳ ᠲᠡᠭᠦᠨ ᠤ ᠢᠳᠡ ᠬᠦᠴᠦ ᠶᠢ ᠪᠠᠷᠠᠭᠳᠠᠭᠤᠯᠤᠨ ᠲᠠᠳᠠᠵᠦ ᠠᠪᠤᠭᠠᠳ ᠰᠡᠬᠦᠵᠦ ᠲᠦᠯᠬᠢᠨ ᠬᠢᠰᠬᠢᠬᠡ ᠮᠡᠭᠡ ᠬᠢᠵᠦ ᠬᠠᠶᠠᠪᠠ᠃ ᠲᠡᠷᠢᠭᠦᠨ ᠲᠡᠳ᠋ ᠲᠤ ᠪᠤᠭᠳᠠ ᠶᠢᠨ ᠪᠤᠰᠤᠭ᠎ᠠ ᠪᠦᠬᠡ ᠲᠠᠢ ᠤᠨᠤᠭ᠎ᠠ ᠳᠤ ᠲᠠᠭᠠᠷᠠᠪᠠ ᠃ ᠪᠤᠭᠳᠠ ᠶᠢᠨ ᠠᠷᠰᠯᠠᠨ ᠪᠦᠬᠡ ᠬᠠᠭᠠᠰ ᠡᠳᠦᠷ ᠵᠢᠭᠤᠷᠠᠵᠦ ᠲᠡᠩᠭᠡᠭᠡ ᠴᠢᠳᠠᠯ ᠨᠢ ᠪᠠᠭ᠋ᠠᠨ ᠪᠠᠭᠤᠷᠠᠭᠰᠠᠨ ᠪᠠᠶᠢᠳᠠᠯ᠎ᠠ ᠪᠤᠯᠪᠠᠰᠤᠷᠠᠯ ᠳᠤ ᠴᠠᠭᠠᠷᠠᠭᠰᠠᠨ ᠳ᠋ᠠᠸ᠎ᠠ ᠶᠢᠨ ᠰᠦᠰᠦ ᠵᠤᠷᠢᠭ᠂ ᠴᠢᠳᠠᠯ ᠬᠦᠴᠦᠨ ᠲᠡᠷᠡ ᠬᠡᠪ ᠢᠶᠠᠷ ᠢᠶᠠᠨ ᠪᠠᠶᠢᠪᠠ᠃ ᠪᠤᠰᠤᠭ᠎ᠠ ᠠᠷᠰᠯᠠᠨ ᠪᠦᠬᠡ ᠰᠢᠷᠦᠭᠦᠨ ᠱᠠᠯᠠᠮᠠᠭᠠᠢ ᠬᠦᠳᠡᠯᠦᠨ ᠪᠠᠷᠢᠴᠠ ᠤᠯᠵᠦ ᠬᠠᠶᠠᠬᠤ ᠰᠠᠨᠠᠭ᠎ᠠ ᠲᠠᠢ ᠰᠢᠷᠦᠭᠦᠯᠡᠬᠦ ᠳᠤ ᠳ᠋ᠠᠸ᠎ᠠ ᠠᠷᠰᠯᠠᠨ ᠪᠦᠬᠡ ᠶᠢ ᠪᠡᠶ᠎ᠡ ᠳᠡᠭᠡᠨ ᠤᠶᠢᠷᠠᠳᠤᠭᠤᠯᠬᠤ ᠦᠭᠡᠢ ᠪᠠᠶᠢᠵᠦ᠂ ᠲᠡᠭᠦᠨ ᠤ ᠶᠠᠮᠠᠷ ᠨᠢᠭᠡᠨ ᠪᠠᠭᠤᠷᠠᠢ ᠲᠠᠯ᠎ᠠ ᠶᠢ ᠠᠵᠢᠭᠯᠠᠨ ᠪᠠᠷᠢᠴᠠ ᠪᠤᠯᠢᠶᠠᠯᠳᠤᠨ᠎ᠠ᠃ ᠨᠠᠶᠢᠷ ᠤᠨ ᠭᠤᠤᠯ ᠰᠧ ᠮᠠᠶᠢᠬᠠᠨ ᠤ ᠡᠮᠦᠨ᠎ᠡ ᠬᠦᠷᠦᠮᠡᠭᠴᠡ ᠪᠤᠰᠤᠭ᠎ᠠ ᠠᠷᠰᠯᠠᠨ ᠤ ᠢᠳᠡ ᠬᠦᠴᠦᠨ ᠢ ᠨᠢ ᠠᠰᠢᠭᠯᠠᠨ᠂ ᠳ᠋ᠠᠸ᠎ᠠ ᠬᠦᠯ ᠤᠨ ᠠᠯᠬᠤᠯᠳᠠ ᠪᠠᠨ ᠲᠠᠭᠠᠷᠠᠭᠤᠯᠵᠦ᠂ ᠬᠠᠵᠠᠭᠤ ᠲᠡᠰᠢ ᠮᠤᠰᠬᠢᠨ ᠲᠠᠳᠠᠭ᠎ᠠ ᠮᠡᠭᠡ ᠬᠢᠵᠦ ᠪᠤᠰᠢᠭᠤ ᠱᠠᠯᠠᠮᠠᠭᠠᠢ ᠪᠡᠶ᠎ᠡ ᠪᠠᠨ ᠵᠠᠶᠢᠯᠠᠭᠤᠯᠤᠨ ᠨᠢᠭᠡᠯᠡ ᠬᠦᠨᠳᠦᠷᠢᠵᠦ ᠬᠠᠶᠠᠪᠠ᠃ ᠨᠠᠶᠢᠷ ᠤᠨ ᠬᠡᠳᠦᠨ ᠮᠢᠩᠭᠠᠨ ᠨᠠᠭᠠᠳᠤᠮᠴᠢᠳ ᠠᠭᠤᠯᠠ ᠨᠤᠷᠠᠵᠦ᠂ ᠤᠰᠦ ᠪᠠᠭᠤᠭᠰᠠᠨ ᠮᠡᠳᠦ ᠱᠤᠤᠬᠢᠯᠳᠤᠵᠦ ᠠᠯᠠᠭ᠎ᠠ ᠲᠠᠰᠢᠨ ᠪᠠᠶᠠᠷ ᠬᠦᠷᠭᠡᠵᠦ ︽ᠶᠤᠰᠤᠳᠠᠢ ᠲᠠᠶᠠᠩ ᠠᠪᠤᠷᠭᠤ ᠪᠠᠶᠢᠨ᠎ᠠ︾ ᠭᠡᠵᠦ ᠠᠮᠠ ᠠᠮᠠᠨ ᠳᠠᠭᠠᠨ ᠰᠢᠪᠡᠨᠡᠯᠳᠤᠵᠠᠢ᠃        ᠪᠦᠬᠡᠴᠢᠨ ᠳ᠋ᠠᠸ᠎ᠠ ᠪᠤᠯ ᠰᠦᠰᠦ ᠵᠤᠷᠢᠭ ᠶᠡᠭᠡ᠂ ᠢᠯᠳᠠᠷ ᠬᠠᠶᠠᠬᠤ ᠶᠢ ᠮᠡᠳᠡᠳᠡᠭ ᠦᠭᠡᠢ ᠮᠤᠵᠢᠭᠤᠳᠠ ᠵᠠᠩ ᠲᠠᠢ᠂ ᠤᠬᠠᠭᠠᠨ ᠪᠢᠯᠢᠭ ᠬᠤᠷᠴᠠᠯᠢᠭ ᠰᠠᠶᠢᠨ ᠡᠷ᠎ᠡ ᠮᠦᠷᠳᠡᠭᠡᠨ ᠰᠦᠰᠦᠭ ᠪᠢᠰᠢᠷᠠᠯ ᠲᠠᠢ ᠬᠦᠮᠦᠨ ᠪᠢᠯᠡ᠃ ᠲᠡᠷᠡ ᠳ᠋ᠠ ᠬᠦᠷᠢᠶ᠎ᠡ ᠳᠤ ᠶᠠᠪᠤᠬᠤ ᠠᠴᠠ ᠡᠮᠦᠨ᠎ᠡ ᠬᠡᠰᠢᠭᠳᠡᠨ ᠲᠠᠪᠤᠨ ᠬᠠᠶᠢᠷᠬᠠᠨ ᠳᠠᠭᠠᠨ ᠰᠦᠰᠦᠭᠯᠡᠨ ᠵᠠᠯᠪᠠᠷᠢᠵᠦ᠂ ᠰᠠᠭᠠᠯᠢ ᠶᠢᠨ ᠲᠡᠭᠡᠵᠢ ᠪᠠᠨ ᠡᠷᠭᠦᠵᠦ᠂ ᠬᠤᠯᠠ ᠶᠠᠪᠤᠬᠤ ᠭᠡᠵᠦ ᠪᠠᠶᠢᠭ᠎ᠠ ᠨᠤᠳᠤᠭ ᠤᠨ ᠬᠦᠦ ᠪᠠᠨ ᠦᠷᠦᠰᠢᠶᠡᠭᠡᠴᠢ ᠭᠡᠵᠦ ᠲᠠᠭᠠᠳᠬᠠᠭᠠᠳ ᠠᠯᠤᠰ ᠤᠨ ᠠᠶᠠᠨ ᠢᠶᠠᠨ ᠡᠯᠭᠦᠭᠰᠡᠨ ᠪᠠᠶᠢᠵᠠᠢ᠃ ᠡᠷ᠎ᠡ ᠴᠢᠳᠠᠯ ᠤᠨ ᠰᠠᠶᠢᠨ ᠶᠤᠮ ᠤᠤ︖ ᠡᠬᠡ ᠨᠤᠳᠤᠭ ᠤᠨ ᠬᠢᠨᠢ ᠲᠠᠪᠤᠨ ᠬᠠᠶᠢᠷᠬᠠᠨ ᠢᠪᠡᠭᠡᠨ ᠲᠡᠳᠭᠦᠭᠰᠡᠨ ᠤ ᠠᠴᠢ ᠶᠤᠮ ᠤᠤ ᠪᠤᠤ ᠮᠡᠳᠡ᠂ ᠲᠡᠷᠡ ᠠᠷᠦ ᠪᠤᠭᠳᠠ ᠶᠢᠨ ᠪᠦᠬᠡ ᠪᠠ ᠦᠪᠦᠷ ᠲᠦᠴᠢ ᠶᠢᠰᠦᠨ ᠬᠤᠰᠢᠭᠤᠨ ᠤ ᠠᠯᠳᠠᠷᠳᠦ ᠪᠦᠭᠡᠴᠢᠳ ᠢ ᠠᠷᠦ ᠠᠷᠦ ᠠᠴᠠ ᠨᠢ ᠬᠠᠶᠠᠵᠦ᠂ ︽ᠲᠠᠶᠠᠩ ᠠᠪᠤᠷᠭᠤ︾ ᠭᠡᠰᠡᠨ ᠴᠤᠯᠠ ᠤᠯᠪᠠ᠃ ᠲᠡᠭᠡᠭᠡᠳ ᠪᠤᠭᠳᠠ ᠶᠢᠨ ᠪᠦᠬᠡ ᠶᠢᠨ ᠱᠠᠩ ᠮᠦᠩᠭᠦᠨ ᠡᠮᠡᠭᠡᠯ ᠬᠠᠵᠠᠭᠠᠷᠳᠦ ᠠᠭᠳᠠ ᠮᠤᠷᠢᠨ ᠳᠠᠭᠠᠨ ᠠᠷᠠᠰᠦᠨ ᠵᠤᠳᠤᠭ ᠢᠶᠠᠨ ᠭᠠᠨᠵᠤᠭᠠᠯᠠᠨ ᠨᠤᠳᠤᠭ ᠵᠦᠭ ᠢᠶᠠᠨ ᠮᠤᠷᠳᠠᠪᠠ᠃ ᠬᠡᠳᠦᠨ ᠡᠳᠦᠷ ᠠᠶᠠᠯᠠᠵᠦ ᠬᠡᠰᠢᠭᠳᠡᠨ ᠨᠤᠳᠤᠭ ᠤᠨ ᠢᠶᠠᠨ ᠬᠢᠯᠢ ᠬᠢᠵᠠᠭᠠᠷ ᠲᠤ ᠤᠷᠤᠵᠦ ᠢᠷᠡᠭᠡᠳ ᠰᠠᠨᠠᠭ᠎ᠠ ᠠᠮᠠᠷ ᠪᠤᠯᠵᠦ᠂ ᠨᠢᠭᠡᠨ ᠲᠤᠪᠤᠴᠠᠭ ᠲᠡᠭᠡᠷ᠎ᠡ ᠰᠠᠭᠤᠨ ᠪᠠᠭ᠋ᠠᠨ ᠠᠮᠤᠰᠬᠢᠵᠦ ᠠᠪᠤᠭᠠᠳ ᠮᠤᠷᠢᠨ ᠳᠠᠭᠠᠨ ᠮᠤᠷᠳᠠᠭᠰᠠᠨ ᠴᠢᠨᠢ ᠲᠡᠮᠡᠢ ᠶᠠᠪᠤᠭᠰᠠᠨ ᠦᠭᠡᠢ ᠨᠢᠭᠡᠨ ᠬᠠᠳᠠᠭᠰᠠᠨ ᠬᠤᠪᠠᠭ᠋ᠠᠢ ᠮᠤᠳᠤ ᠲᠠᠭᠠᠷᠠᠯᠳᠤᠵᠠᠢ᠃ ᠡᠨᠡ ᠶᠠᠭᠤᠨ ᠤ ᠬᠤᠪᠠᠭ᠋ᠠᠢ ᠮᠤᠳᠤ ᠪᠤᠯᠴᠢᠬᠠᠪᠠ ᠭᠡᠵᠦ ᠰᠢᠷᠦᠭᠦᠨ ᠱᠤᠭᠰᠢᠵᠦ ᠮᠤᠷᠢ ᠪᠠᠷ ᠢᠶᠠᠨ ᠲᠠᠭᠠᠷᠢᠭᠤᠯᠵᠦ᠂ ᠪᠠᠷᠠᠭᠤᠨ ᠭᠠᠷ ᠢᠶᠠᠷ ᠢᠶᠠᠨ ᠮᠤᠳᠤᠨ ᠤ ᠦᠵᠦᠭᠦᠷ ᠠᠴᠠ ᠪᠠᠷᠢᠵᠦ ᠲᠠᠳᠠᠭᠰᠠᠨ ᠴᠢᠨᠢ ᠪᠠᠶᠢᠨ᠎ᠠ ᠤᠤ᠂ ᠲᠠᠳᠠᠭᠰᠠᠨ ᠬᠦᠴᠦ ᠨᠢ ᠬᠡᠳᠦᠷᠡᠭᠰᠡᠨ ᠠᠴᠠ ᠪᠤᠯᠵᠦ ᠮᠤᠷᠢ ᠨᠢ ᠪᠦᠳᠦᠷᠢᠬᠦ ᠲᠠᠢ ᠵᠡᠷᠭᠡ ᠮᠤᠳᠤᠨ ᠤ ᠬᠤᠭᠤᠷᠠᠬᠠᠢ ᠱᠤᠤᠵᠢᠯ ᠰᠦᠪᠡᠭᠡ ᠪᠠᠷ ᠨᠢ ᠬᠠᠳᠬᠤᠨ ᠮᠤᠷᠢᠨ ᠠᠴᠠ ᠪᠠᠨ ᠦᠩᠭᠦᠷᠢᠳᠦᠨ ᠤᠨᠠᠬᠤ ᠦᠶ᠎ᠡ ᠳᠤ ᠵᠢᠷᠦᠬᠡᠡ ᠳᠤᠨᠢ ᠬᠠᠳᠬᠤᠨ ᠤᠷᠤᠭᠠᠳ ᠲᠡᠷᠡ ᠲᠤᠤᠷ᠎ᠠ ᠪᠠᠨ ᠨᠠᠰᠦ ᠨᠦᠭᠴᠢᠭᠰᠡᠨ ᠬᠡᠨ᠎ᠡ᠃        ᠤᠤᠯ ᠨᠢ ᠠᠳᠠᠭ᠎ᠠ ᠵᠢᠳᠦᠬᠡ ᠶᠡᠭᠡ ᠬᠠᠷ᠎ᠠ ᠰᠠᠨᠠᠭ᠎ᠠ ᠲᠠᠢ ᠠᠷᠦ ᠪᠤᠭᠳᠠ ᠶᠢᠨ ᠲᠦᠰᠢᠮᠡᠳ ᠬᠤᠶᠢᠨ᠎ᠠ ᠠᠴᠠ ᠨᠢ ᠬᠠᠷᠢᠶᠠᠯ ᠵᠦᠬᠡᠯ ᠬᠢᠯᠭᠡᠭᠰᠡᠨ ᠪᠠᠶᠢᠵᠠᠢ᠃ ᠬᠤᠶᠠᠷ ᠵᠢᠯ ᠤᠨ ᠲᠠᠷᠠᠭ᠎ᠠ ᠲᠡᠭᠦᠨ ᠤ ᠬᠡᠭᠦᠷ ᠶᠠᠰᠦ ᠶᠢ ᠨᠢ ᠡᠷᠬᠢᠵᠦ ᠦᠵᠡᠭᠦᠯᠡᠷ ᠴᠡᠬᠡᠵᠢᠨ ᠶᠠᠰᠦᠨ ᠤ ᠬᠢᠨᠢ ᠬᠦᠨᠳᠡᠢ ᠳᠤ ᠴᠢᠨ᠋ᠸ᠎ᠠ ᠡᠬᠦᠷᠯᠡᠵᠦ ᠦᠷ᠎ᠡ ᠵᠤᠯᠵᠠᠭ᠎ᠠ ᠨᠢ ᠦᠶᠦᠭ ᠲᠠᠪᠠᠳᠠᠢ ᠨᠢᠭᠤᠭᠳᠠᠬᠤ ᠦᠯᠦᠭᠡᠢ ᠪᠤᠯᠵᠦ ᠬᠡᠨ᠎ᠡ᠃ ᠨᠠᠷᠢᠨ ᠠᠵᠢᠭᠯᠠᠵᠦ ᠦᠵᠡᠭᠰᠡᠨ ᠴᠢᠨᠢ ᠬᠠᠷᠢᠨ ᠲᠡᠭᠦᠨ ᠤ ᠬᠠᠪᠢᠷᠭ᠎ᠠ ᠶᠠᠰᠦ ᠨᠢ ᠪᠢᠳᠡᠭᠦᠦ ᠪᠠᠶᠢᠵᠦ ᠬᠡᠨ᠎ᠡ᠃
 
ᠢᠷᠡᠯᠲᠡ᠄ ︽ᠬᠡᠰᠢᠭᠳᠡᠨ ᠤ ᠨᠠᠶᠢᠷ ᠨᠠᠭᠠᠳᠤᠮ︾ ᠬᠡᠬᠦ ᠨᠤᠮ ᠠᠴᠠ ᠠᠪᠤᠪᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠭᠠᠳᠠ ᠮᠠᠶᠢᠷᠡᠨ ᠤ ᠪᠣᠰᠣᠯᠭ᠎ᠠ
ᠶᠡᠭᠡ ᠵᠣᠣ ᠶᠢᠨ ᠴᠢᠭᠤᠯᠭᠠᠠ ᠤ ᠬᠡᠷᠡᠭ ᠬᠤᠪᠢᠰᠣᠯ
ᠲᠡᠤᠬᠡᠨ ᠨᠡᠷᠡᠳᠤ ᠬᠦᠮᠦᠨ — ᠵᠤᠩᠳᠣᠯᠠᠢ
ᠲᠡᠤᠬᠡᠨ ᠨᠡᠷᠡᠳᠤ ᠬᠦᠮᠦᠨ — ᠮᠠᠨᠳᠤᠯᠢ ᠠᠬᠠᠯᠠᠬᠤ
ᠲᠡᠤᠬᠡᠨ ᠨᠡᠷᠡᠳᠤ ᠬᠦᠮᠦᠨ — ᠨᠤᠶᠠᠨ ᠳ᠋ᠠᠷ᠎ᠠ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05002246号