ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠵᠠᠰᠠᠭ ᠤᠨ ᠢᠯᠡᠳᠭᠡᠯ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠣᠶᠣᠯ ᠡᠷᠳᠡᠨᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠬᠠᠪᠤᠳᠣ ᠬᠠᠰᠠᠷ ᠤᠨ ᠨᠠᠮᠳᠠᠷ ︵ᠨᠢᠭᠡ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2017-05-26
       ︽ᠨᠢᠭᠡᠨ ᠦᠶ᠎ᠡ ᠶᠢᠨ ᠲᠡᠭᠷᠢᠯᠢᠭ ᠬᠦᠪᠡᠭᠦᠨ︾ ᠬᠡᠮᠡᠭᠳᠡᠭᠰᠡᠨ ᠴᠢᠩᠭᠢᠰ ᠬᠠᠭᠠᠨ ᠲᠡᠮᠦᠵᠢᠨ ᠠᠤᠭ᠎ᠠ ᠪᠤᠳᠣᠯᠭ᠎ᠠ ᠠᠷᠭ᠎ᠠ ᠡᠷᠳᠡᠮ ᠢᠶᠠᠷ ᠢᠶᠠᠨ ᠾᠦᠩᠨᠤ᠂ ᠲᠦᠷᠦᠭ᠂ ᠳ᠋ᠦᠩᠬᠤ ᠤᠭᠰᠠᠭ᠎ᠠ ᠲᠠᠢ ᠮᠤᠩᠭᠤᠯ ᠤᠨ ᠦᠨᠳᠦᠷᠯᠢᠭ ᠲᠡᠭᠡᠷᠡᠬᠢ ᠲᠠᠷᠠᠬᠠᠢ ᠪᠤᠳᠠᠷᠬᠠᠢ ᠡᠯ᠎ᠡ ᠠᠶᠢᠮᠠᠭ ᠤᠳ ᠢ ᠨᠢᠭᠡᠳᠭᠡᠵᠦ ᠮᠤᠩᠭᠤᠯ ᠦᠨᠳᠣᠰᠣᠳᠡᠨ ᠢ ᠪᠦᠷᠢᠯᠳᠦᠭᠦᠯᠥᠨ᠂ ᠠᠽᠢᠶ᠎ᠠ ᠡᠸᠦ᠋ᠷᠦᠫᠡ ᠶᠢ ᠰᠤᠨᠳᠠᠯᠠᠭᠰᠠᠨ ᠮᠤᠨᠳᠠᠭ ᠲᠤᠮᠤ ᠶᠡᠭᠡ ᠮᠤᠩᠭᠤᠯ ᠤᠯᠣᠰ ᠢ ᠪᠠᠶᠢᠭᠤᠯᠤᠭᠠᠳ᠂ ᠲᠡᠯᠡᠭᠡᠢ ᠶᠢᠨ ᠲᠡᠣᠭᠡᠨ ᠲᠡᠭᠡᠷᠡᠬᠢ ᠶᠢᠰᠦᠨ ᠶᠡᠭᠡ ᠬᠠᠭᠠᠨᠳᠣ ᠤᠯᠤᠰ ᠤᠨ ᠨᠢᠭᠡ ᠨᠢ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠴᠢᠩᠭᠢᠰ ᠬᠠᠭᠠᠨ ᠤ ᠡᠨᠡ ᠮᠡᠳᠦ ᠠᠭᠤᠤ ᠦᠢᠯᠡᠰ ᠤᠨ ᠠᠮᠵᠢᠯᠳᠠ ᠤᠯᠤᠭᠰᠠᠨ ᠨᠢ ᠲᠡᠭᠦᠨ ᠳᠤ ︽ᠣᠷᠣᠪᠠᠯ ᠬᠠᠮᠠᠭᠠᠯᠠᠭᠴᠢ ᠭᠠᠷᠪᠠᠯ ᠭᠠᠪᠰᠢᠭᠠᠶᠢᠯᠠᠭᠴᠢ︾ ᠪᠤᠯᠵᠦ ᠪᠠᠶᠢᠭᠰᠠᠨ ᠣᠤᠭᠠᠨ ᠲᠡᠭᠦᠦ ᠬᠠᠪᠤᠳᠣ ᠬᠠᠰᠠᠷ ᠤᠨ ᠬᠢᠨᠢ ᠴᠢᠳᠠᠪᠤᠷᠢᠳᠠᠢ ᠬᠠᠪᠰᠣᠷᠣᠭᠴᠢ᠂ ᠢᠳᠡᠪᠬᠢᠳᠡᠢ ᠲᠡᠮᠵᠢᠭᠴᠢ᠂ ᠰᠦᠯᠳᠡ ᠲᠤᠭ ᠤᠨ ᠲᠤᠤᠷᠠᠬᠢ ᠭᠤᠤᠯ ᠬᠦᠴᠦᠨ ᠤ ᠵᠠᠩᠵᠤᠨ᠂ ᠬᠠᠮᠤᠭ ᠤᠨ ᠢᠳᠡᠭᠡᠮᠵᠢ ᠨᠡᠶᠢᠳᠠᠪᠤᠷᠢᠳᠠᠢ ︽ᠬᠤᠯᠪᠤᠭᠠᠳᠠᠨ︾ ᠪᠤᠯᠤᠭᠰᠠᠨ ᠠᠴᠠ ᠰᠢᠯᠳᠠᠭᠠᠯᠠᠭᠳᠠᠭᠰᠠᠨ ᠶᠤᠮ᠃ ︽ᠶᠤᠸᠠᠨ ᠤ ᠲᠡᠤᠭᠡ︾ ᠳᠤ ᠴᠢᠩᠭᠢᠰ ᠬᠠᠭᠠᠨ᠄ ︽ᠪᠡᠯᠭᠦᠳᠡᠢ ᠶᠢᠨ ᠪᠦᠭᠡ᠂ ᠬᠠᠰᠠᠷ ᠤᠨ ᠬᠠᠪᠤ ᠪᠠᠷ ᠮᠡᠭᠦᠰ ᠪᠢ ᠲᠡᠯᠡᠭᠡᠢ ᠳ᠋ᠡᠬᠢᠨ ᠢ ᠤᠯᠣᠭᠰᠠᠨ ᠪᠤᠯᠠᠢ︾ ᠭᠡᠵᠤ ᠬᠡᠯᠡᠳᠡᠭ ᠪᠢᠯᠡ᠃ ᠫᠧᠷᠰ ᠤᠨ ᠲᠡᠤᠭᠡᠴᠢᠨ ᠷᠠᠰᠢᠳ᠋ ᠠᠳ᠋ ᠳ᠋ᠢᠨ ᠤ ︽ᠰᠣᠳᠣᠷ ᠤᠨ ᠴᠢᠭᠤᠯᠭᠠᠨ︾ ᠳᠤ ᠬᠡᠯᠡᠬᠦ ᠳᠤ ᠪᠠᠨ᠄ ︽ᠴᠢᠩᠭᠢᠰ ᠬᠠᠭᠠᠨ ᠤ ᠲᠡᠭᠦᠦ ᠨᠠᠷ ᠪᠠ ᠠᠴᠢ ᠭᠡᠦᠭᠡᠳ ᠤᠨ ᠲᠤᠳᠣᠷ᠎ᠠ᠂ ᠭᠠᠭᠴᠠ ᠭᠦ ᠬᠠᠰᠠᠷ ᠪᠠ ᠲᠡᠭᠦᠨ ᠤ ᠬᠦᠪᠡᠭᠦᠳ ᠨᠢ ᠤᠯᠠᠨ ᠸᠠᠩ ᠨᠠᠷ ᠤᠨ ᠲᠡᠷᠢᠭᠦᠨ ᠳᠤ ᠤᠷᠣᠳᠠᠭ︾ ᠭᠡᠵᠡᠢ᠃ ᠬᠠᠰᠠᠷ ᠤᠨ ᠭᠠᠪᠢᠶ᠎ᠠ ᠵᠢᠳᠭᠦᠯ ᠨᠢ ᠦᠯᠡᠮᠵᠢ ᠪᠤᠯᠬᠤᠷ ᠲᠡᠤᠭᠡᠨ ᠨᠤᠮ ᠪᠢᠴᠢᠭ ᠲᠤ ᠮᠠᠰᠢ ᠤᠯᠠᠨ ᠲᠡᠮᠳᠡᠭᠯᠡᠭᠳᠡᠭᠰᠡᠨ ᠪᠠᠶᠢᠳᠠᠭ᠃ ︽ᠮᠤᠩᠭᠤᠯ ᠤᠨ ᠨᠢᠭᠤᠴᠠ ᠲᠤᠪᠴᠢᠶᠠᠨ︾ ᠨᠢ ᠨᠡᠶᠢᠳᠡ 282 ᠭᠡᠰᠡᠭ ᠢᠶᠠᠷ ᠪᠦᠷᠢᠯᠳᠦᠵᠦ᠂ ᠲᠡᠭᠦᠨ ᠤ ᠲᠤᠳᠣᠷᠠᠬᠢ 29 ᠭᠡᠰᠡᠭ ᠲᠤ ᠬᠠᠰᠠᠷ ᠤᠨ ᠨᠡᠷ᠎ᠡ ᠶᠢ 65 ᠤᠳᠠᠭ᠎ᠠ ᠠᠳᠠᠯᠢ ᠪᠤᠰᠣ ᠲᠠᠯ᠎ᠠ ᠠᠴᠠ ᠨᠢ ᠲᠦᠷᠰᠦᠯᠡᠭᠰᠡᠨ ᠪᠠ ᠲᠤᠷᠠᠳᠣᠭᠰᠠᠨ ᠪᠠᠶᠢᠳᠠᠭ᠃ ᠮᠢᠩ ᠤᠯᠤᠰ ᠤᠨ ᠲᠤᠮᠳᠠᠴᠢ ᠪᠠᠷ ᠪᠢᠴᠢᠭᠳᠡᠭᠰᠡᠨ ︽ᠮᠤᠩᠭᠤᠯ ᠤᠨ ᠬᠤᠷᠢᠶᠠᠩᠭᠤᠢ ᠠᠯᠳᠠᠨ ᠲᠤᠪᠴᠢ︾ ᠳᠤ ᠬᠠᠰᠠᠷ ᠪᠠ ᠬᠤᠷᠴᠢᠨ ᠠᠶᠢᠮᠠᠭ ᠢ 83 ᠤᠳᠠᠭ᠎ᠠ ᠲᠤᠷᠠᠳᠣᠭᠰᠠᠨ ᠪᠠᠶᠢᠳᠠᠭ᠃ ᠡᠭᠦᠨ ᠠᠴᠠ ᠪᠢᠳᠡ ᠬᠠᠰᠠᠷ ᠤᠨ ᠮᠤᠩᠭᠤᠯ ᠤᠨ ᠲᠡᠤᠭᠡᠨ ᠲᠡᠭᠡᠷᠡᠬᠢ ᠴᠢᠬᠤᠯᠠ ᠪᠠᠶᠢᠷᠢ ᠰᠠᠭᠤᠷᠢ ᠶᠢ ᠮᠡᠳᠡᠵᠦ ᠪᠤᠯᠤᠨ᠎ᠠ᠃
       ᠨᠢᠭᠡ᠂ ᠬᠠᠰᠠᠷ ᠤᠨ ᠨᠡᠷᠡᠶᠢᠳᠦᠯ        ᠬᠠᠰᠠᠷ ᠪᠣᠯ ᠶᠢᠰᠦᠭᠡᠢ ᠪᠠᠭᠠᠳᠣᠷ ᠤᠨ ᠵᠢᠷᠭᠤᠭᠠᠨ ᠬᠦᠪᠡᠭᠦᠳ ᠤᠨ ᠲᠤᠳᠣᠷᠠᠬᠢ ᠬᠤᠶᠠᠳᠣᠭᠠᠷ ᠬᠦᠦ ᠮᠥᠨ᠃ ᠴᠢᠩᠭᠢᠰ ᠬᠠᠭᠠᠨ ᠤ ᠲᠦᠷᠦᠭᠰᠡᠨ ᠲᠡᠭᠦᠦ ᠪᠤᠯᠤᠨ᠎ᠠ᠃ ︽ᠮᠤᠩᠭᠤᠯ ᠤᠨ ᠨᠢᠭᠤᠴᠠ ᠲᠤᠪᠴᠢᠶᠠᠨ︾ ᠤ 60 ᠳ᠋ᠣᠭᠠᠷ ᠬᠡᠰᠡᠭ ᠪᠠ ᠷᠠᠰᠢᠳ᠋ ᠠᠳ᠋ ᠳ᠋ᠢᠨ ᠤ ︽ᠰᠣᠳᠣᠷ ᠤᠨ ᠴᠢᠭᠤᠯᠭᠠᠨ︾ ᠳᠤ ︽ᠵᠦᠴᠢ ᠬᠠᠰᠠᠷ︾ ᠭᠡᠵᠡᠢ᠃ ᠵᠦᠴᠢ ᠭᠡᠳᠡᠭ ᠨᠢ ᠦᠨᠳᠣᠷ ᠰᠦᠷᠯᠢᠭ ᠭᠡᠬᠦ ᠣᠳᠬ᠎ᠠ ᠲᠠᠢ ᠦᠭᠡ ᠮᠦᠨ᠃ ︽ᠰᠣᠳᠣᠷ ᠤᠨ ᠴᠢᠭᠤᠯᠭᠠᠨ︾ ᠢ ᠦᠨᠳᠣᠰᠣᠯᠡᠪᠡᠯ᠂ ︽ᠬᠠᠰᠠᠷ︾ ᠭᠡᠳᠡᠭ ᠨᠢ ᠲᠤᠭᠰᠢᠨ ᠠᠷᠢᠶᠠᠳᠠᠨ ᠪᠤᠶᠤ ᠠᠷᠰᠯᠠᠨ ᠬᠡᠰᠡᠨ ᠤᠳᠬ᠎ᠠ ᠲᠠᠢ ᠦᠭᠡ ᠮᠦᠨ᠃ ︽ᠰᠣᠳᠣᠷ ᠤᠨ ᠴᠢᠭᠤᠯᠭᠠᠨ︾ ᠳᠤ ᠬᠠᠰᠠᠷ ᠤᠨ ᠪᠠᠶ᠎ᠠ ᠪᠠᠶᠢᠳᠠᠯ ᠢ ᠲᠦᠷᠰᠦᠯᠡᠬᠦ ᠳᠤ ᠪᠠᠨ ︽ᠲᠡᠭᠦᠨ ᠤ ᠮᠦᠷᠦ ᠦᠷᠭᠡᠨ᠂ ᠴᠡᠭᠡᠵᠢ ᠠᠭᠤᠳᠠᠮ ᠪᠤᠯᠪᠠᠴᠤ ᠨᠢᠷᠣᠭᠤ ᠨᠢ ᠮᠠᠰᠢ ᠨᠠᠷᠢᠨ ᠪᠤᠯᠬᠤᠷ ᠬᠠᠵᠠᠭᠤᠯᠠᠵᠤ ᠬᠡᠪᠳᠡᠬᠦ ᠳᠤ ᠬᠠᠪᠢᠷᠭᠠᠨ ᠲᠤᠭᠤᠤᠷ ᠨᠢ ᠨᠤᠬᠠᠢ ᠰᠢᠷᠭᠤᠵᠤ ᠪᠠᠭᠳᠠᠳᠠᠭ︾ ᠭᠡᠵᠠᠢ᠃ ︽ᠰᠣᠳᠣᠷ ᠤᠨ ᠴᠢᠭᠤᠯᠭᠠᠨ︾ ᠳᠤ ᠬᠠᠰᠠᠷ ᠤᠨ ᠬᠦᠴᠦ ᠴᠢᠳᠠᠯ ᠢ ᠲᠦᠷᠰᠦᠯᠡᠬᠦ ᠳᠤ ᠪᠠᠨ ︽ᠪᠢᠷ᠎ᠡ ᠴᠢᠳᠠᠯ ᠶᠡᠭᠡᠳᠡᠢ᠂ ᠬᠤᠶᠡᠷ ᠭᠠᠷ ᠢᠶᠠᠷ ᠢᠶᠠᠨ ᠠᠮᠢᠳᠣ ᠬᠦᠮᠦᠨ ᠢ ᠮᠤᠳᠣᠨ ᠰᠠᠯᠠᠭ᠎ᠠ ᠰᠢᠭ᠋ ᠬᠤᠶᠡᠷ ᠠᠩᠭᠢ ᠪᠤᠯᠭᠠᠨ᠂ ᠲᠡᠬᠦᠨ ᠤ ᠨᠢᠷᠣᠭᠤ ᠶᠢ ᠨᠢ ᠬᠤᠭᠤᠯᠵᠤ ᠬᠠᠶᠠᠳᠠᠭ︾ ᠬᠡᠵᠡᠢ᠃ ᠵᠢᠮᠪᠠᠳᠣᠷᠵᠢ ᠶᠢᠨ ︽ᠪᠤᠯᠤᠷ ᠲᠤᠯᠢ︾ ᠳᠤ ︽ᠬᠠᠰᠠᠷ ᠤᠨ ᠨᠢᠭᠤᠷ ᠴᠢᠷᠠᠢ ᠠᠨᠤ ᠤᠯᠠᠭᠠᠨ᠂ ᠪᠠᠭᠠᠳᠣᠷ ᠤᠨ ᠰᠢᠨᠵᠢ ᠲᠡᠭᠦᠰ᠂ ᠦᠨᠳᠣᠷ ᠢᠨᠦ ᠨᠠᠢᠮᠠᠨ ᠴᠢᠽᠢ ︵ᠴᠢ — ᠲᠤᠬᠤᠢ︶᠂ ᠰᠠᠬᠠᠯ ᠠᠨᠤ ᠤᠷᠳᠣ ᠠᠮᠤᠢ᠃ ᠵᠢᠳᠠ ᠪᠠᠷ ᠠᠯᠠᠯᠳᠣᠬᠤᠢ ᠪᠠᠰᠢᠷ ᠲᠤᠷ ᠮᠡᠷᠭᠡᠨ︾ ᠭᠡᠵᠤ ᠲᠡᠮᠳᠡᠭᠯᠡᠵᠡᠢ᠃ ᠬᠠᠰᠠᠷ ︽ᠨᠤᠮᠤ ᠪᠠᠨ ᠬᠦᠴᠦᠳᠡᠢ ᠲᠠᠳᠠᠪᠠᠯ ᠶᠢᠰᠤᠨ ᠵᠠᠭᠤᠨ ᠠᠯᠬᠤᠮ ᠤᠨ ᠴᠠᠭᠠᠨ᠎ᠠ᠂ ᠬᠦᠩᠭᠡᠨ ᠲᠠᠳᠠᠪᠠᠯ ᠲᠠᠪᠤᠨ ᠵᠠᠭᠤᠨ ᠠᠯᠬᠤᠮ ᠤᠨ ᠴᠠᠭᠠᠨ᠎ᠠ ᠠᠴᠠ ᠤᠨᠤᠭᠠᠳᠠᠭ︾ ᠭᠡᠵᠡᠢ᠃ ᠡᠨᠡ ᠪᠣᠯ 833.3 — 1500 ᠮᠧᠲᠷ ᠪᠤᠯᠬᠤ ᠶᠤᠮ᠃ ᠡᠨᠡ ᠨᠢ ᠠᠳᠠᠭ ᠲᠠᠭᠠᠨ 450 — 810 ᠵᠢᠩ ᠤᠨ ᠬᠦᠴᠦ ᠪᠠᠶᠢᠬᠤ ᠭᠡᠷᠡᠭᠳᠡᠢ ᠶᠤᠮ᠃ ᠡᠨᠡ ᠪᠣᠯ ᠵᠦᠪᠬᠡᠨ ᠬᠤᠶᠡᠷ ᠭᠠᠷ ᠤᠨ ᠬᠦᠴᠦ ᠯᠠ ᠲᠡᠳᠦᠢ ᠪᠤᠯᠬᠤ ᠶᠤᠮ᠃ ᠬᠠᠰᠠᠷ ᠬᠦᠳᠡᠷ ᠲᠤᠮᠤ ᠪᠦᠭᠡᠳ ᠬᠦᠴᠦ ᠴᠢᠳᠠᠯ ᠶᠡᠭᠡᠳᠢ᠂ ᠬᠠᠷᠪᠤᠵᠤ ᠨᠠᠮᠨᠠᠬᠤ ᠳᠤ ᠪᠠᠨ ᠮᠡᠷᠭᠡᠨ ᠪᠦᠭᠡᠳ ᠤᠨᠤᠴᠠ ᠬᠠᠪᠤ ᠰᠠᠶᠢᠳᠠᠢ ᠪᠤᠯᠬᠤᠷ ᠬᠤᠵᠢᠮ ᠤᠨ ᠬᠦᠮᠦᠰ ︽ᠬᠠᠪᠤᠳᠣ ᠬᠠᠰᠠᠷ︾ ᠭᠡᠵᠤ ᠲᠠᠭᠤᠳᠠᠬᠤ ᠪᠤᠯᠵᠤ ᠤᠣᠯ ᠤᠨ ᠨᠡᠷ᠎ᠡ ︽ᠵᠦᠴᠢ︾ ᠭᠡᠭᠴᠢ ᠨᠢ ᠠᠶᠠᠨᠳᠠᠭᠠᠨ ᠬᠠᠶᠠᠭᠳᠠᠭᠰᠠᠨ ᠪᠤᠶᠤ ᠮᠠᠷᠳᠠᠭᠳᠠᠭᠰᠠᠨ ᠪᠠᠶᠢᠨ᠎ᠠ᠃ ᠴᠢᠩ ᠤᠯᠤᠰ ᠤᠨ ᠦᠶ᠎ᠡ ᠠᠴᠠ ᠡᠬᠢᠯᠡᠨ ᠬᠠᠪᠤᠳᠣ ᠬᠠᠰᠠᠷ ᠭᠡᠵᠤ ᠪᠢᠴᠢᠭᠳᠡᠬᠦ ᠪᠤᠯᠪᠠ᠃
       ᠬᠤᠶᠡᠷ᠂ ᠬᠠᠰᠠᠷ ᠤᠨ ᠪᠠᠭ᠎ᠠ ᠨᠠᠰᠤ        ᠬᠠᠪᠤᠳᠣ ᠬᠠᠰᠠᠷ 1164 ᠤᠨ ︵ᠬᠦᠭᠡ ᠪᠠᠴᠢᠨ ᠵᠢᠯ︶ ᠳᠤ ᠤᠳᠣᠬᠢ ᠮᠤᠩᠭᠤᠯ ᠤᠯᠤᠰ ᠤᠨ ᠬᠢᠯᠢ ᠳᠠᠬᠢ ᠤᠨᠤᠨ ᠮᠦᠷᠡᠨ ᠤ ᠡᠬᠢ ᠪᠤᠷᠬᠠᠨ ᠬᠠᠯᠳᠣᠨ ᠠᠭᠤᠯᠠᠨ ᠤ ᠲᠡᠯᠢᠭᠦᠨ ᠪᠤᠯᠳᠠᠭ ᠲᠤ ᠲᠦᠷᠦᠵᠦ᠂ ᠲᠤᠯᠤᠭᠠᠨ ᠨᠠᠰᠣᠳᠠᠢ ᠵᠢᠯ ᠳᠤ ᠲᠠᠷᠣᠢ 1170 ᠤᠨ ᠳᠤ ᠬᠠᠮᠤᠭ ᠮᠤᠩᠭᠤᠯ ᠤᠨ ᠠᠬᠠᠯᠠᠭᠴᠢ ᠪᠠᠶᠢᠭᠰᠠᠨ ᠶᠢᠰᠦᠭᠡᠢ ᠪᠠᠭᠠᠳᠣᠷ ᠲᠠᠲ᠋ᠠᠷ ᠠᠶᠢᠮᠠᠭ ᠲᠤ ᠬᠤᠤᠷᠯᠠᠭᠳᠠᠭᠰᠠᠨ ᠠᠴᠠ ᠪᠤᠯᠵᠦ᠂ ᠬᠠᠮᠤᠭ ᠮᠤᠩᠭᠤᠯ ᠤᠯᠤᠰ ᠤᠨ ︽ᠬᠤᠯᠪᠤᠭ᠎ᠠ︾ ᠵᠠᠳᠠᠷᠠᠭᠠᠳ᠂ ︽ᠬᠠᠨ︾ ᠤ ᠣᠷᠣ ᠬᠤᠭᠤᠰᠣᠨ ᠪᠤᠯᠵᠠᠢ᠃ ᠡᠨᠡ ᠦᠶ᠎ᠡ ᠳᠤ ᠶᠢᠰᠦᠭᠡᠢ ᠪᠠᠭᠠᠳᠣᠷ ᠤᠨ ᠤᠣᠯ ᠤᠨ ᠲᠠᠭᠠᠯᠳᠠ ᠨᠤᠭᠤᠳ ᠨᠢ ᠡᠬᠦᠨ ᠢ ᠵᠠᠪᠰᠢᠵᠦ ᠬᠠᠮᠤᠭ ᠮᠤᠩᠭᠤᠯ ᠤᠯᠤᠰ ᠤᠨ ᠠᠷᠠᠳ ᠢᠷᠭᠡᠳ ᠪᠠ ᠠᠳᠣᠭᠤ ᠮᠠᠯ ᠢ ᠨᠢ ᠲᠤᠰ ᠲᠤᠰ ᠲᠠᠭᠠᠨ ᠬᠤᠪᠢᠶᠠᠯᠴᠠᠵᠦ ᠵᠠᠶᠢᠯᠠᠨ ᠤᠳᠣᠭᠰᠠᠨ ᠪᠠᠶᠢᠨ᠎ᠠ᠃ ᠲᠤᠬᠠᠶᠢᠯᠠᠪᠠᠯ᠂ ᠲᠠᠶᠢᠴᠢᠭᠤᠳ ᠠᠶᠢᠮᠠᠭ ᠤᠨ ᠠᠬᠠᠯᠠᠭᠴᠢ ᠲᠠᠷᠭᠤᠳᠠᠢ ᠬᠢᠷᠢᠯᠳᠤᠭ ᠰᠠᠯᠵᠦ ᠶᠠᠪᠤᠭᠰᠠᠨ ᠪᠠ ᠪᠤᠷᠵᠢᠬᠢᠨ ᠤᠪᠤᠭᠳᠠᠨ ᠤ ᠶᠢᠰᠦᠭᠡᠢ ᠪᠠᠭᠠᠳᠣᠷ ᠤᠨ ᠲᠡᠬᠦᠦ ᠲᠠᠷᠢᠳᠠᠢ ᠤᠳᠴᠢᠬᠢᠨ᠂ ᠶᠢᠰᠦᠭᠡᠢ ᠪᠠᠭᠠᠳᠣᠷ ᠤᠨ ᠠᠬ᠎ᠠ ᠨᠡᠬᠦᠨ ᠲᠠᠶᠢᠵᠢ ᠶᠢᠨ ᠬᠦᠦ ᠬᠤᠴᠠᠷ᠂ ᠬᠤᠳᠠᠯᠠ ᠬᠠᠭᠠᠨ ᠤ ᠬᠦᠦ ᠠᠯᠳᠠᠨ᠂ ᠬᠠᠪᠤᠯ ᠬᠠᠭᠠᠨ ᠤ ᠦᠷᠡᠰ ᠵᠦᠷᠬᠢᠨ ᠤᠪᠤᠭ ᠤᠨ ᠰᠡᠴᠡ ᠪᠠᠬᠢ᠂ ᠲᠠᠶᠢᠴᠦ ᠠᠬ᠎ᠠ ᠲᠡᠬᠦᠦ ᠬᠤᠶᠠᠭᠤᠯᠠ ᠦᠪᠡᠷ ᠦᠪᠡᠷ ᠤᠨ ᠬᠤᠪᠢ ᠢᠷᠭᠡᠳ ᠢᠶᠠᠨ ᠲᠠᠭᠠᠭᠤᠯᠵᠦ ᠵᠠᠳᠠᠷᠠᠨ ᠠᠶᠢᠮᠠᠭ ᠤᠨ ᠵᠠᠮᠤᠬ᠎ᠠ ᠶᠢ ᠲᠦᠰᠢᠬᠦ ᠪᠠᠷ ᠤᠴᠢᠵᠠᠭᠠᠵᠡᠢ᠃ ᠨᠡᠩ ᠢᠯᠠᠩᠭᠤᠶ᠎ᠡ ᠲᠠᠶᠢᠴᠢᠭᠤᠳ ᠢᠷᠭᠡᠳ ︽ᠴᠡᠭᠡᠯ ᠤᠨ ᠤᠰᠣ ᠰᠢᠷᠬᠢᠵᠦ᠂ ᠴᠡᠭᠡᠨ ᠴᠢᠯᠠᠭᠤ ᠬᠠᠭᠠᠷᠠᠪᠠ︾ ᠭᠡᠵᠤ ᠬᠠᠰᠠᠷ ᠤᠨ ᠨᠢᠭᠡ ᠭᠡᠷ ᠢ ᠪᠤᠷᠬᠠᠨ ᠬᠠᠯᠳᠣᠨ ᠠᠭᠤᠯᠠ ᠶᠢᠨ ᠡᠩᠭᠡᠷ ᠲᠠᠬᠢ ᠦᠨᠦᠴᠢᠨ ᠪᠠᠭᠤᠴᠠᠨ ᠳᠤᠨᠢ ᠤᠷᠬᠢᠵᠦ ᠨᠡᠬᠦᠵᠦ ᠶᠠᠪᠤᠭᠰᠠᠨ ᠨᠢ ᠲᠤᠩ ᠬᠠᠷᠠᠰᠠᠯᠳᠠᠢ ᠭᠡᠷᠡᠭ ᠪᠤᠯᠤᠨ᠎ᠠ᠃        ᠠᠶᠢᠮᠠᠭ ᠤᠨ ᠤᠯᠠᠨ ᠨᠢ ᠰᠠᠷᠨᠢᠨ ᠪᠤᠳᠠᠷᠠᠭᠰᠠᠨ ᠠᠴᠠ ᠲᠡᠭᠵᠢᠷᠡᠨ ᠮᠠᠨᠳᠣᠵᠦ ᠪᠠᠶᠢᠭᠰᠠᠨ ᠪᠤᠷᠵᠢᠬᠢᠨ ᠤᠪᠤᠭᠳᠠᠨ ᠨᠡᠢᠮᠠᠨ ᠰᠢᠷᠭ᠎ᠠ ᠪᠠ ᠨᠢᠭᠡ ᠣᠭᠤᠳᠣᠷ ᠲᠠᠷᠭᠢ ᠬᠤᠩᠭᠤᠷ ᠨᠡᠶᠢᠳᠡ ᠶᠢᠰᠦᠨ ᠮᠤᠷᠢ᠂ ᠨᠢᠭᠡ ᠮᠤᠩᠭᠤᠯ ᠭᠡᠷ ᠂ ᠦᠪᠡᠷ ᠢᠶᠠᠨ ᠵᠤᠬᠢᠶᠡᠵᠦ ᠦᠢᠯᠡᠳᠦᠭᠰᠡᠨ ᠨᠤᠮᠤ ᠰᠣᠮᠤ ᠦᠯᠡᠳᠡᠭᠡᠳ ᠠᠮᠢᠳᠣᠷᠠᠯ ᠨᠢ ᠲᠦᠢᠯ ᠤᠨ ᠬᠦᠴᠢᠷᠳᠡᠢ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠰᠡᠭᠦᠯᠡᠷ ᠨᠢ ᠪᠤᠷᠬᠠᠨ ᠬᠠᠯᠳᠣᠨ ᠤ ᠦᠪᠤᠷ ᠬᠦᠷᠡᠯᠬᠦ ᠲᠤᠳᠣᠷ᠎ᠡ ᠣᠷᠣᠰᠬᠤ ᠰᠡᠩᠭᠦᠷ ᠭᠤᠷᠣᠬᠠᠨ ᠤ ᠬᠠᠷ᠎ᠠ ᠵᠢᠷᠦᠭᠡᠨ ᠤ ᠬᠦᠭᠡ ᠨᠠᠭᠤᠷ ᠲᠤ ᠤᠴᠢᠵᠦ ᠨᠤᠳᠣᠭᠯᠠᠨ᠂ ᠠᠯᠠᠭᠳᠠᠭ᠎ᠠ ᠲᠠᠷᠪᠠᠭ᠎ᠠ ᠠᠯᠠᠵᠤ᠂ ᠶᠢᠰᠦᠨ ᠮᠤᠷᠢ ᠪᠠᠨ ᠠᠷᠠᠴᠢᠯᠠᠨ᠂ ᠠᠶᠢᠯ ᠢᠶᠠᠷ ᠮᠠᠯᠵᠢᠵᠦ ᠪᠠᠶᠢᠪᠠ᠃ ᠡᠶᠢᠮᠦᠷᠬᠦ ᠪᠠᠶᠢᠳᠠᠯ ᠲᠤᠤᠷ᠎ᠠ᠂ ᠦᠭᠡᠯᠥᠨ ᠦᠵᠢᠨ ᠡᠭᠡ ᠭᠡᠣᠭᠡᠳ ᠢᠶᠠᠨ ᠦᠰᠭᠡᠵᠦ ᠬᠦᠮᠦᠵᠢᠭᠦᠯᠬᠦ ᠶᠢᠨ ᠲᠦᠯᠥᠭᠡ ᠠᠭᠤᠯᠠᠨ ᠠᠴᠠ ᠵᠢᠮᠢᠰ ᠲᠡᠭᠦᠵᠦ ᠵᠡᠷᠯᠢᠭ ᠨᠤᠭᠤᠭ᠎ᠠ ᠤᠬᠤᠵᠦ ᠪᠠᠶᠢᠭᠰᠠᠨ ᠨᠢ ᠭᠡᠣᠭᠡᠳ ᠲᠡᠭᠡᠨ ᠲᠤᠩ ᠶᠡᠭᠡ ᠵᠤᠷᠢᠭᠵᠢᠭᠤᠯᠤᠯ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠬᠠᠰᠠᠷ ᠠᠬ᠎ᠠ ᠲᠡᠮᠦᠵᠢᠨ ᠢᠶᠠᠨ ᠲᠠᠭᠠᠵᠤ ᠲᠡᠭᠦᠦ ᠨᠡᠷ ᠢᠶᠠᠨ ᠲᠠᠭᠠᠭᠤᠯᠤᠨ ᠤᠨᠤᠨ ᠮᠦᠷᠡᠨ ᠤ ᠬᠦᠪᠡᠭᠡᠨ ᠳᠤ ᠵᠢᠭᠠᠰᠣ ᠬᠦᠭᠢᠳᠡᠬᠦ ᠪᠠ ᠠᠭᠤᠯᠠᠨ ᠤ ᠤᠢ ᠠᠴᠠ ᠠᠩ ᠠᠩᠨᠠᠵᠤ ᠡᠨᠡᠷᠢᠯᠳᠣ ᠡᠭᠡ ᠪᠠᠨ ᠠᠰᠠᠷᠠᠨ ᠲᠡᠵᠢᠭᠡᠵᠦ ᠪᠠᠶᠢᠪᠠ᠃        ᠨᠢᠭᠡᠨ ᠡᠳᠣᠷ ᠳᠡᠮᠥᠵᠢᠨ᠂ ᠬᠠᠰᠠᠷ᠂ ᠪᠡᠭᠳᠡᠷ᠂ ᠪᠡᠯᠭᠦᠳᠠᠢ ᠲᠦᠷᠪᠡᠭᠦᠯᠡ ᠪᠠᠨ ᠭᠦᠳᠡᠭᠡ ᠶᠠᠪᠤᠵᠤ ᠪᠠᠶᠢᠭᠠᠳ ᠳᠡᠭᠡᠭᠦᠷ ᠨᠢ ᠨᠢᠰᠴᠤ ᠭᠠᠷᠬᠤ ᠨᠢᠭᠡᠨ ᠰᠢᠪᠠᠭᠤ ᠶᠢ ᠦᠪᠡᠷ ᠦᠪᠡᠷ ᠤᠨ ᠨᠤᠮᠤ ᠰᠣᠮᠤ ᠪᠠᠷ ᠢᠶᠠᠨ ᠲᠦᠷᠪᠡᠭᠦᠯᠡ ᠬᠠᠷᠪᠤᠵᠠᠭᠠᠵᠠᠢ᠃ ᠬᠠᠰᠠᠷ ᠤᠨ ᠰᠣᠮᠤ ᠬᠠᠮᠤᠭ ᠤᠨ ᠤᠨᠤᠪᠴᠢᠳᠠᠢ ᠪᠠᠶᠢᠵᠤ ᠰᠢᠪᠠᠭᠤᠨ ᠤ ᠬᠦᠵᠤᠬᠦᠨ ᠳᠤ ᠤᠨᠤᠵᠤ ᠳᠠᠯᠠᠪᠴᠢ ᠪᠠᠨ ᠰᠠᠪᠠᠯᠠᠭᠰᠠᠭᠠᠷ ᠪᠠᠭᠤᠵᠤ ᠢᠷᠡᠬᠦ ᠳᠤ᠂ ᠪᠡᠭᠳᠡᠷ ᠨᠢ᠄ ︽ᠮᠢᠨᠦ ᠰᠤᠮᠤ ᠤᠨᠤᠵᠠᠢ᠂ ᠬᠠᠰᠠᠷ ᠤᠨ ᠰᠤᠮᠤ ᠤᠨᠤᠵᠠᠢ︾ ᠬᠡᠵᠦ ᠬᠠᠰᠬᠢᠷᠤᠭᠰᠠᠭᠠᠷ ᠤᠷᠢᠳᠠᠪᠡᠷ ᠬᠦᠶᠦᠵᠦ ᠬᠦᠷᠦᠭᠡᠳ ᠠᠪᠴᠢᠬᠠᠪᠠ᠃ ᠳᠡᠮᠦᠵᠢᠨ᠂ ᠪᠡᠭᠳᠡᠷ ᠳᠡᠭᠦᠦ ᠳᠡᠭᠡᠨ᠄ ︽ᠴᠢᠨᠦ ᠰᠤᠮᠤ ᠪᠢᠰᠢ᠂ ᠬᠠᠰᠠᠷ ᠤᠨ ᠰᠤᠮᠤ ᠤᠨᠤᠵᠠᠢ︾ ᠬᠡᠵᠦ ᠬᠡᠯᠡᠬᠦ ᠳᠤ ᠪᠡᠭᠳᠡᠷ᠄ ︽ᠴᠢ ᠨᠢᠭᠡ ᠡᠬᠡ ᠠᠴᠠ ᠳᠦᠷᠦᠭᠰᠡᠨ ᠳᠡᠭᠦᠦ ᠪᠠᠨ ᠬᠡᠵᠦ ᠬᠠᠰᠠᠷ ᠢ ᠦᠮᠦᠭᠯᠡᠵᠦ ᠪᠠᠶᠢᠨ᠎ᠠ ᠤᠤ︖︾ ᠬᠡᠳ ᠦᠨᠦᠬᠢ ᠰᠢᠪᠠᠭᠤ ᠶᠢ ᠠᠪᠤᠭᠠᠳ ᠶᠠᠪᠤᠴᠢᠬᠠᠪᠠ᠃        ᠳᠠᠷᠠᠭ᠎ᠠ ᠡᠳᠦᠷ ᠨᠢ ᠳᠡᠳᠡ ᠳᠦᠷᠪᠡᠭᠦᠯᠡ ᠤᠨᠤᠨ ᠮᠦᠷᠡᠨ ᠤ ᠬᠦᠪᠡᠭᠡᠨ ᠳᠤ ᠤᠴᠢᠵᠦ ᠵᠢᠭᠠᠰᠤ ᠬᠦᠬᠢᠳᠡᠪᠡ ᠃ ᠰᠠᠯᠬᠢ ᠶᠡᠭᠡ ᠲᠠᠢ ᠪᠤᠯᠬᠤᠷ ᠬᠡᠨ ᠤ ᠬᠢᠨᠢ ᠬᠦᠬᠢᠨ ᠳᠤ ᠴᠦ ᠳᠡᠮᠡᠢ ᠵᠢᠭᠠᠰᠤ ᠤᠷᠤᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠳᠡᠮᠦᠵᠢᠨ ᠤ ᠬᠦᠬᠢᠨ ᠳᠤ ᠤᠯᠠᠨ ᠠᠴᠠ ᠤᠨᠴᠠᠭᠠᠢ ᠨᠢᠬᠡᠨ ᠪᠦᠳᠦᠭᠦᠨ ᠠᠯᠳᠠᠨ ᠵᠢᠭᠠᠰᠤ ᠮᠡᠳᠦ ᠭᠤᠶᠤ ᠰᠢᠷᠭᠠᠯ ᠵᠢᠭᠠᠰᠤ ᠤᠷᠤᠵᠠᠢ᠃ ᠪᠡᠭᠳᠡᠷ ᠦᠵᠡᠮᠡᠭᠴᠡ ᠪᠠᠷᠢᠵᠦ ᠠᠪᠤᠭᠠᠳ ᠦᠪᠡᠷᠤᠨ ᠰᠠᠭᠰᠤᠨ ᠳᠠᠭᠠᠨ ᠬᠢᠴᠢᠭᠡᠪᠡ᠃ ᠳᠡᠮᠦᠵᠢᠨ᠄ ︽ᠡᠨᠡ ᠪᠤᠯ ᠮᠢᠨᠦ ᠪᠠᠷᠢᠭᠰᠠᠨ ᠵᠢᠭᠠᠰᠤ︾ ᠬᠡᠰᠡᠨ ᠳᠤ ᠪᠡᠭᠳᠡᠷ ᠶᠠᠭᠠᠬᠢᠪᠡᠴᠦ ᠦᠭᠬᠦ ᠦᠬᠡᠢ ᠬᠡᠷ ᠵᠦᠭ ᠢᠶᠠᠨ ᠬᠦᠶᠦᠯ᠎ᠡ᠃ ᠲᠡᠮᠦᠵᠢᠨ ᠳᠦᠢᠯ ᠢᠶᠠᠷ ᠠᠭᠤᠷᠯᠠᠵᠦ ᠬᠠᠰᠠᠷ ᠢ ᠳᠠᠭᠠᠭᠤᠯᠤᠨ ᠬᠤᠶᠢᠨ᠎ᠠ ᠠᠴᠠ ᠨᠢ ᠨᠡᠬᠡᠬᠦ ᠳᠤ ᠪᠡᠭᠳᠡᠷ ᠬᠦᠯ ᠬᠤᠷᠳᠤᠨ ᠲᠤᠯᠠ ᠬᠦᠢᠴᠡᠭᠰᠡᠨ ᠦᠬᠡᠢ᠃        ᠲᠡᠮᠦᠵᠢᠨ ᠬᠠᠰᠠᠷ ᠬᠤᠶᠠᠷ ᠭᠡᠷ ᠲᠡᠭᠡᠨ ᠬᠠᠷᠢᠭᠠᠳ ︽ᠮᠠᠨ ᠤ ᠬᠦᠬᠢ ᠳᠤ ᠤᠷᠤᠭᠰᠠᠨ ᠨᠢᠭᠡᠨ ᠰᠢᠷᠭᠠᠯ ᠭᠤᠶᠤ ᠵᠢᠭᠠᠰᠤ ᠶᠢ ᠪᠡᠭᠳᠡᠷ ᠪᠤᠯᠢᠶᠠᠵᠠᠢ︾ ᠬᠡᠵᠦ ᠦᠭᠡᠯᠦᠨ ᠦᠵᠢᠨ ᠡᠬᠡ ᠳᠤ ᠵᠠᠭᠠᠯᠳᠤᠪᠠ᠃ ᠦᠭᠡᠯᠦᠨ ᠦᠵᠢᠨ ᠤᠶᠤᠵᠦ ᠪᠠᠶᠢᠭᠰᠠᠨ ᠢᠮᠠᠭᠠᠨ ᠠᠷᠠᠰᠤᠨ ᠴᠠᠭᠠᠮᠠᠯ ᠳᠠᠬᠤ ᠪᠠᠨ ᠲᠠᠯᠪᠢᠵᠦ᠄ ︽ᠲᠠᠨᠠᠷ ᠨᠢᠭᠡ ᠡᠴᠢᠬᠡ ᠶᠢᠨ ᠬᠦᠪᠡᠭᠦᠳ ᠠᠳᠠᠯ᠎ᠠ ᠶᠠᠭᠤᠨ ᠳᠤ ᠢᠩᠬᠢᠵᠦ ᠮᠠᠷᠭᠤᠯᠳᠤᠬᠤ ᠪᠤᠢ᠂ ᠡᠶᠢᠮᠦ ᠪᠤᠯ ᠪᠢᠳᠡ ᠲᠠᠲ᠋ᠠᠷ ᠪᠤᠯᠤᠨ ᠲᠠᠶᠢᠴᠢᠭᠤᠳ ᠠᠴᠠ ᠬᠡᠷᠬᠢᠨ ᠦᠰᠢᠶ᠎ᠡ ᠪᠠᠨ ᠠᠪᠬᠤ ᠪᠤᠢ︖ ᠲᠠᠬᠢᠵᠦ ᠪᠢᠳᠡᠭᠡᠢ ᠬᠡᠷᠡᠯᠳᠦ︾ ᠬᠡᠵᠦ ᠰᠤᠷᠭᠠᠪᠠ᠃ ᠲᠡᠮᠦᠵᠢᠨ ᠬᠠᠰᠠᠷ ᠬᠤᠶᠠᠭᠤᠯᠠ ᠡᠬᠡ ᠶᠢᠨ ᠢᠶᠠᠨ ᠦᠬᠡ ᠶᠢ ᠦᠯᠦ ᠤᠶᠢᠰᠢᠶᠠᠨ᠄ ︽ᠦᠴᠦᠬᠡᠳᠦᠷ ᠮᠠᠨ ᠤ ᠬᠠᠷᠪᠤᠵᠦ ᠤᠨᠠᠭᠠᠭᠰᠠᠨ ᠰᠢᠪᠠᠭᠤ ᠶᠢ ᠮᠦᠨ ᠲᠡᠷᠡ ᠪᠤᠯᠢᠶᠠᠵᠦ ᠠᠪᠤᠪᠠ᠂ ᠡᠨᠡ ᠡᠳᠦᠷ ᠪᠠᠰᠠ ᠵᠢᠭᠠᠰᠤ ᠶᠢ ᠪᠤᠯᠢᠶᠠᠯ᠎ᠠ᠂ ᠡᠶᠢᠮᠦ ᠪᠤᠯ ᠲᠡᠬᠦᠨ ᠲᠠᠢ ᠶᠠᠭᠠᠬᠢᠵᠦ ᠬᠠᠮᠳᠤ ᠠᠮᠢᠳᠤᠷᠠᠬᠤ ᠪᠤᠢ︖︾ ᠬᠡᠳ ᠬᠠᠭᠠᠯᠭ᠎ᠠ ᠰᠠᠪᠠᠨ ᠭᠠᠷᠪᠠ᠃
       ᠳᠡᠮᠥᠵᠢᠨ ᠬᠠᠰᠠᠷ ᠬᠤᠶᠠᠭᠤᠯᠠ᠄ ︽ᠪᠡᠭᠳᠡᠷ ᠲᠤ ᠪᠢᠳᠡ ᠭᠠᠶᠢᠭᠤᠢ ᠰᠠᠶᠢᠨ ᠠᠮᠳᠠ ᠦᠵᠡᠭᠦᠯᠦᠶ᠎ᠡ︾ ᠬᠡᠵᠦ ᠵᠦᠪᠳᠡᠭᠡᠳ ᠮᠠᠷᠭᠠᠰᠢ ᠨᠢ ᠡᠷᠢᠵᠦ ᠤᠴᠢᠯ᠎ᠠ᠃ ᠪᠡᠭᠳᠡᠷ ᠨᠢᠭᠡᠨ ᠳᠤᠪᠤᠴᠠᠭ ᠳᠡᠭᠡᠷ᠎ᠡ ᠠᠳᠤᠭᠤ ᠬᠠᠷᠢᠭᠤᠯᠤᠨ ᠵᠤᠭᠰᠤᠵᠦ ᠪᠠᠶᠢᠯ᠎ᠠ᠃ ᠲᠡᠮᠦᠵᠢᠨ ᠬᠠᠰᠠᠷ ᠬᠤᠶᠠᠭᠤᠯᠠ ᠨᠤᠮᠤ ᠰᠤᠮᠤ ᠪᠠᠨ ᠤᠨᠢᠯᠠᠨ ᠢᠷᠡᠬᠦ ᠶᠢ ᠦᠵᠡᠮᠡᠭᠴᠡ ᠪᠡᠭᠳᠡᠷ᠄ ︽ᠲᠠᠲ᠋ᠠᠷ ᠪᠤᠯᠤᠨ ᠲᠠᠶᠢᠴᠢᠭᠤᠳ ᠠᠴᠠ ᠦᠰᠢᠶ᠎ᠡ ᠪᠠᠨ ᠠᠪᠴᠦ ᠴᠢᠳᠠᠭᠠᠳᠤᠢ ᠪᠠᠶᠢᠳᠠᠯ᠎ᠠ ᠲᠠᠨᠠᠷ ᠶᠠᠭᠤᠨ ᠳᠤ ᠨᠠᠮ᠎ᠠ ᠶᠢ ᠠᠳᠡ ᠦᠵᠡᠵᠦ ᠪᠠᠶᠢᠨ᠎ᠠ ᠪᠤᠢ᠂ ᠭᠤᠯᠤᠮᠳᠠ ᠶᠢ ᠮᠢᠨᠢ ᠪᠤᠤ ᠬᠠᠷᠠᠯᠠᠭᠤᠯ᠂ ᠪᠡᠯᠬᠦᠳᠠᠢ ᠶᠢ ᠮᠢᠨᠢ ᠪᠤᠤ ᠬᠦᠨᠦᠭᠡᠭᠳᠦᠨ︾ ᠬᠡᠵᠦ ᠬᠡᠯᠡᠭᠡᠳ ᠵᠠᠪᠢᠯᠠᠨ ᠰᠠᠭᠤᠵᠦ ᠬᠦᠯᠢᠶᠡᠪᠡ᠃ ᠲᠡᠮᠦᠵᠢᠨ ᠬᠠᠰᠠᠷ ᠬᠤᠶᠠᠭᠤᠯᠠ ᠲᠡᠬᠦᠨ ᠤ ᠦᠬᠡ ᠶᠢ ᠰᠤᠨᠤᠰᠤᠭᠰᠠᠨ ᠦᠭᠡᠢ ᠬᠤᠶᠢᠨ᠎ᠠ ᠡᠮᠦᠨ᠎ᠡ ᠠᠴᠠ ᠨᠢ ᠬᠠᠷᠪᠤᠨ ᠤᠨᠠᠭᠠᠪᠠ᠃ ᠦᠭᠡᠯᠥᠨ ᠦᠵᠢᠨ ᠬᠤᠶᠠᠷ ᠬᠡᠣᠬᠡᠳ ᠤᠨ ᠢᠶᠠᠨ ᠭᠡᠷ ᠲᠡᠭᠡᠨ ᠢᠷᠡᠬᠦ ᠶᠢᠨ ᠵᠡᠷᠭᠡ ᠴᠢᠷᠠᠢ ᠠᠴᠠ ᠨᠢ ᠤᠴᠢᠷ ᠢ ᠮᠡᠳᠡᠵᠤ ᠶᠡᠭᠡᠳᠡ ᠬᠢᠯᠢᠩᠯᠡᠨ᠄ ︽ᠳᠠᠶᠢᠴᠢᠭᠤᠳ ᠤᠨ ᠬᠦᠨᠦᠭᠡᠯ ᠮᠥᠨ ᠳᠠᠭᠤᠰᠣᠭᠠᠳᠣᠢ᠂ ᠦᠰᠢᠶ᠎ᠡ ᠪᠠᠨ ᠬᠡᠷᠬᠢᠨ ᠠᠪᠬᠤ ᠭᠡᠵᠤ ᠪᠠᠶᠢᠬᠤ ᠳᠤ᠂ ᠲᠠ ᠨᠡᠷ ᠶᠠᠭᠤ ᠭᠡᠵᠤ ᠡᠶᠢᠮᠤ ᠬᠡᠷᠡᠭ ᠬᠢᠬᠦ ᠪᠤᠢ︖︾ ᠭᠡᠵᠤ ᠪᠤᠷᠣᠭᠤᠰᠢᠶᠠᠨ ᠵᠢᠮᠡᠯᠡᠪᠡ᠃        ︽ᠪᠡᠭᠳᠡᠷ ᠢ ᠠᠯᠠᠵᠦ᠂ ᠪᠡᠯᠭᠦᠳᠡᠢ ᠶᠢ ᠨᠤᠮᠤᠬᠠᠳᠬᠠᠭᠰᠠᠨ︾ ᠲᠡᠣᠭᠡᠳᠦ ᠶᠠᠪᠤᠳᠠᠯ ᠪᠣᠯ ᠬᠠᠰᠠᠷ ᠬᠢᠭᠡᠳ ᠲᠡᠮᠦᠵᠢᠨ ᠤ ︽ᠬᠤᠯᠪᠤᠭ᠎ᠠ︾ ᠡᠬᠦᠰᠴᠦ ᠪᠦᠷᠢᠯᠳᠦᠬᠦ ᠳᠤ ᠡᠬᠢᠯᠡᠯᠳᠡ ᠪᠤᠯᠤᠭᠰᠠᠨ ᠶᠤᠮ᠃ ᠮᠦᠨ ᠴᠦ ᠲᠡᠳᠡ ᠬᠤᠶᠠᠭᠤᠯᠠ ᠶᠢᠨ ᠬᠠᠮᠳᠣ ᠶᠢᠨ ᠦᠢᠯᠡᠰ ᠤᠨ ᠪᠤᠰᠬᠠᠯᠳᠠ ᠶᠢᠨ ᠠᠩᠬᠠᠨ ᠤ ᠬᠦᠰᠢᠭᠡ ᠶᠢ ᠨᠢ ᠢᠷᠠᠭᠰᠠᠨ ᠶᠠᠪᠤᠳᠠᠯ ᠤᠴᠢᠷ ᠪᠤᠯᠤᠨ᠎ᠠ᠃ ᠡᠨᠡ ᠨᠢ ᠭᠡᠳᠦ᠋ᠢᠪᠡᠷ ᠠᠬ᠎ᠠ ᠲᠡᠭᠦᠦ ᠨᠡᠷ ᠦᠪᠡᠷ ᠵᠠᠭᠤᠷ᠎ᠠ ᠪᠠᠨ ᠠᠯᠠᠯᠳᠣᠵᠦ ᠬᠢᠳᠣᠯᠴᠠᠭᠰᠠᠨ ᠶᠠᠪᠤᠳᠠᠯ ᠪᠤᠯᠬᠤ ᠪᠤᠯᠪᠠᠴᠤ᠂ ᠭᠡᠷᠡᠭ ᠤᠨ ᠰᠡᠭᠦᠯᠡᠷᠬᠢ ᠦᠭᠡᠯᠥᠨ ᠡᠭᠡ ᠶᠢᠨ ᠴᠢᠩᠭ᠎ᠠ ᠬᠠᠳᠠᠭᠤ ᠰᠣᠷᠭᠠᠯ ᠠᠴᠠ ᠲᠡᠳᠡ ᠨᠦᠬᠦᠷ ᠠᠨᠳᠠ ᠴᠤᠭᠯᠠᠭᠤᠯᠵᠦ ᠬᠦᠴᠦᠨ ᠢᠶᠠᠨ ᠪᠦᠷᠢᠯᠳᠦᠬᠦᠯᠬᠦ ᠪᠠ ᠬᠤᠯᠪᠤᠭᠠᠯᠠᠯ ᠪᠦᠯᠬᠦᠮᠳᠡᠯ ᠤᠨ ᠴᠢᠬᠤᠯᠠ ᠴᠢᠨᠡᠷ ᠢ ᠲᠤᠳᠣ ᠲᠠᠨᠢᠵᠦ ᠤᠯᠤᠭᠰᠠᠨ ᠨᠢ ᠲᠤᠰ ᠶᠠᠪᠤᠳᠠᠯ ᠠᠴᠠ ᠠᠪᠴᠢᠷᠠᠭᠰᠠᠨ ᠪᠤᠰᠣᠳᠴᠢ ᠲᠠᠯ᠎ᠠ ᠶᠢᠨ ᠢᠳᠡᠪᠬᠢ ᠦᠷ᠎ᠡ ᠳ᠋ᠦᠩ ᠪᠤᠯᠬᠤ ᠶᠤᠮ᠃ ᠪᠡᠭᠳᠡᠷ ᠠᠯᠠᠭᠳᠠᠭᠰᠠᠨ ᠤ ᠲᠠᠷᠠᠭ᠎ᠠ ᠪᠡᠯᠬᠦᠳᠡᠢ ᠴᠦ ᠨᠤᠮᠤᠬᠠᠷᠠᠵᠦ᠂ ᠬᠠᠰᠠᠷ ᠲᠡᠮᠦᠵᠢᠨ ᠨᠡᠷ ᠢ ᠲᠦᠰᠢᠨ᠂ ᠲᠡᠳᠡᠨ ᠲᠠᠢ ᠠᠮᠢᠳᠣᠷᠠᠯ ᠦᠢᠯᠡᠰ ᠢᠶᠠᠨ ᠨᠢᠭᠡᠳᠭᠡᠵᠦ᠂ ᠤᠯᠠᠨ ᠤᠳᠠᠭ᠎ᠠ ᠴᠢᠬᠤᠯᠠ ᠭᠠᠪᠢᠶ᠎ᠡ ᠪᠠᠶᠢᠭᠤᠯᠵᠠᠢ᠃ ᠬᠤᠵᠢᠮ ᠨᠢ ᠲᠠᠶᠢᠴᠢᠭᠤᠳ ᠠᠶᠢᠮᠠᠭ ᠤᠨ ᠠᠬ᠎ᠠ ᠲᠡᠭᠦᠦ ᠨᠠᠷ ᠤᠨ ᠬᠠᠯᠳᠠᠯᠭ᠎ᠠ ᠲᠤᠪᠳᠣᠯᠭ᠎ᠠ ᠳᠤ ᠤᠴᠠᠷᠠᠭᠰᠠᠨ ᠳᠤ᠂ ᠬᠠᠰᠠᠷ ᠠᠬ᠎ᠠ ᠪᠠᠨ ᠬᠠᠪᠰᠣᠷᠣᠨ ᠬᠠᠯᠳᠠᠬᠤ ᠪᠠᠷ ᠢᠷᠡᠭᠰᠡᠨ ᠲᠠᠶᠢᠰᠣᠨ ᠢ ᠬᠠᠷᠪᠤᠨ ᠤᠬᠤᠷᠢᠭᠤᠯᠤᠭᠠᠳ ᠭᠡᠷ ᠨᠤᠳᠤᠭ ᠢᠶᠠᠨ ᠬᠠᠮᠠᠭᠠᠯᠠᠬᠤ ᠪᠤᠯᠤᠭᠰᠠᠨ ᠶᠤᠮ᠃ ᠬᠠᠰᠠᠷ ᠲᠤᠯᠤᠭᠠᠨ ᠨᠠᠰᠣᠨ ᠠᠴᠠ ᠪᠠᠨ ᠡᠭᠢᠯᠡᠵᠦ ᠡᠭᠡ ᠪᠠᠨ ᠲᠦᠰᠢᠵᠦ ᠠᠬ᠎ᠠ ᠪᠠᠨ ᠲᠠᠭᠠᠭᠠᠳ ᠮᠤᠩᠭᠤᠯ ᠤᠨ ᠦᠨᠳᠦᠷᠯᠢᠭ ᠤᠨ ᠤᠯᠤᠰ ᠲᠦᠷᠦ ᠶᠢᠨ ᠲᠠᠪᠴᠠᠩ ᠳᠤ ᠠᠯᠬᠤᠨ ᠭᠠᠷᠣᠭᠰᠠᠨ ᠨᠢ ᠦᠨᠡᠨᠳᠡᠭᠡᠨ ᠶᠢᠰᠦᠬᠡᠢ ᠪᠠᠭᠠᠳᠣᠷ ᠤᠨ ᠦᠯᠡᠳᠡᠭᠡᠭᠰᠡᠨ ᠤᠯᠤᠰ ᠲᠦᠷᠦ ᠶᠢᠨ ᠦᠪ ᠭᠦᠷᠦᠩᠭᠡ ᠶᠢ ᠵᠠᠯᠭᠠᠮᠵᠢᠯᠠᠭᠰᠠᠨ ᠶᠠᠪᠤᠳᠠᠯ ᠪᠤᠯᠬᠤ ᠶᠤᠮ᠃
       ᠭᠤᠷᠪᠠ᠂ ᠬᠠᠰᠠᠷ ᠤᠨ ᠭᠠᠪᠢᠶ᠎ᠠ ᠵᠢᠳᠭᠦᠯ        ᠬᠠᠰᠠᠷ ᠨᠢᠭᠡ ᠨᠠᠰᠤᠨ ᠳᠤ ᠪᠠᠨ ᠲᠤᠭᠠᠯᠠᠰᠢ ᠦᠭᠡᠢ ᠤᠯᠠᠨ ᠲᠠᠶᠢᠨ ᠳᠤ ᠤᠷᠣᠯᠴᠠᠵᠤ ᠭᠠᠶᠢᠬᠠᠯᠳᠠᠢ ᠭᠠᠪᠢᠶ᠎ᠠ ᠪᠠᠶᠢᠭᠤᠯᠵᠤ ᠦᠩᠭᠡᠷᠡᠭᠰᠡᠨ ᠶᠤᠮ᠃ ᠮᠤᠩᠭᠤᠯ ᠲᠡᠤᠭᠡᠨ ᠨᠤᠮ ᠳᠤ ᠲᠡᠮᠦᠵᠢᠨ ᠬᠢᠭᠡᠳ ᠬᠠᠰᠠᠷ ᠢ ᠮᠤᠩᠭᠤᠯ ᠤᠨ ᠲᠠᠯ᠎ᠠ ᠨᠤᠳᠤᠭ ᠢ ᠬᠡᠷᠡᠯᠳᠦᠬᠦᠯᠥᠭᠰᠡᠨ ︽ᠬᠤᠶᠠᠷ ᠨᠠᠷᠠ︾ ᠭᠡᠰᠡᠨ ᠪᠦᠭᠡᠳ ᠮᠤᠩᠭᠤᠯ ᠤᠨ ᠨᠡᠶᠢᠭᠡᠮ ᠢ ᠲᠦᠯᠬᠢᠨ ᠤᠷᠣᠭᠰᠢᠯᠠᠭᠤᠯᠤᠭᠰᠠᠨ ︽ᠬᠤᠶᠠᠷ ᠬᠦᠷᠳᠦ︾ ᠭᠡᠰᠡᠨ ᠶᠤᠮ᠃ ᠬᠠᠰᠠᠷ ᠪᠣᠯ ᠮᠤᠩᠭᠤᠯ ᠤᠨ ᠲᠡᠣᠭᠡᠨ ᠲᠡᠭᠡᠷᠡᠬᠢ ᠨᠢᠭᠡᠨ ᠠᠯᠳᠠᠷᠳᠣ ᠤᠯᠤᠰ ᠲᠦᠷᠦᠴᠢᠨ᠂ ᠴᠡᠷᠢᠭ ᠤᠨ ᠡᠷᠳᠡᠮᠳᠡᠨ᠂ ᠪᠠᠶᠢᠯᠳᠣᠬᠤ ᠪᠤᠳᠣᠯᠭᠠᠳᠠᠨ᠂ ︽ᠬᠤᠪᠢᠯᠭᠠᠨ︾ ᠬᠠᠷᠪᠤᠭᠠᠴᠢ ᠭᠡᠮᠡᠨ ᠨᠡᠷᠡᠯᠡᠭᠳᠡᠭᠰᠡᠨ ᠪᠠᠶᠢᠨ᠎ᠠ᠃        ᠬᠠᠰᠠᠷ ᠬᠢᠭᠡᠳ ᠲᠡᠮᠦᠵᠢᠨ ᠠᠩᠬ᠎ᠠ ᠤᠳᠠᠭ᠎ᠠ ᠮᠡᠷᠭᠢᠳ ᠠᠶᠢᠮᠠᠭ ᠢ ᠲᠤᠪᠳᠣᠯᠤᠭᠰᠠᠨ ᠪᠤᠭᠤᠷ᠎ᠠ ᠭᠡᠭᠡᠷ᠎ᠡ ᠶᠢᠨ ᠪᠠᠶᠢᠯᠳᠣᠭᠠᠨ ᠢ ᠬᠢᠭᠰᠡᠨ ᠨᠢ        ᠮᠡᠷᠬᠢᠳ ᠠᠶᠢᠮᠠᠭ ᠰᠡᠯᠡᠩᠭᠡ ᠮᠦᠷᠡᠨ ᠤ ᠣᠷᠣᠰᠬᠠᠯ ᠲᠠᠭᠠᠤ ᠤᠷᠣᠨ ᠢᠶᠠᠷ ᠠᠮᠢᠳᠣᠷᠠᠵᠦ ᠪᠠᠶᠢᠵᠠᠢ᠃ ᠲᠡᠤᠭᠡᠨ ᠳᠤ ᠭᠤᠷᠪᠡᠨ ᠮᠡᠷᠭᠢᠳ ᠭᠡᠵᠤ ᠠᠯᠳᠠᠷᠰᠢᠨ᠂ ᠤᠳᠦ᠋ᠢᠳ᠂ ᠤᠸᠠᠰ᠂ ᠬᠠᠭᠠᠳ ᠭᠡᠬᠦ ᠭᠤᠷᠪᠠᠨ ᠤᠪᠤᠭᠳᠠᠨ ᠢᠶᠠᠷ ᠪᠦᠷᠢᠯᠳᠦᠵᠡᠢ᠃ ᠡᠳᠡᠨ ᠢ ᠲᠤᠭᠳᠤᠭ᠎ᠠ ᠪᠠᠬᠢ᠂ ᠲᠠᠶᠢᠷ ᠤᠰᠣᠨ᠂ ᠬᠠᠭᠠᠳᠠᠢ ᠲᠠᠷᠠᠮᠠᠯᠠ ᠨᠡᠷ ᠲᠤᠰ ᠲᠤᠰ ᠤᠳᠣᠷᠢᠳᠴᠦ ᠪᠠᠶᠢᠵᠡᠢ᠃ ᠣᠷᠬᠤᠨ ᠭᠤᠤᠯ ᠤᠨ ᠠᠳᠠᠭ ᠪᠤᠭᠤᠷ᠎ᠠ ᠭᠡᠭᠡᠷ᠎ᠡ ᠳᠤ ᠤᠳᠦ᠋ᠢᠳ ᠮᠡᠷᠬᠢᠳ︔ ᠣᠷᠬᠤᠨ᠂ ᠰᠡᠯᠡᠩᠭᠡ ᠶᠢᠨ ᠪᠢᠯᠴᠢᠷ ᠲᠠᠯᠬᠤᠨ ᠠᠷᠠᠯ ᠢᠶᠠᠷ ᠣᠸᠠᠰ ᠮᠡᠷᠬᠢᠳ︔ ᠰᠡᠯᠡᠩᠭᠡ ᠶᠢᠨ ᠰᠡᠷᠡᠵᠢ ᠭᠡᠭᠡᠷ᠎ᠡ ᠳᠤ ᠬᠠᠭᠠᠳ ᠮᠡᠷᠬᠢᠳ ᠨᠤᠳᠣᠭᠯᠠᠵᠦ ᠪᠠᠶᠢᠵᠠᠢ᠃ ᠮᠠᠷᠬᠢᠳ ᠠᠶᠢᠮᠠᠭ ᠮᠠᠯᠵᠢᠬᠤ ᠪᠠᠷ ᠭᠤᠤᠯ ᠪᠤᠯᠭᠠᠵᠦ᠂ ᠪᠠᠰᠠ ᠨᠡᠯᠢᠶᠡᠳ ᠡᠷᠳᠡ ᠠᠴᠠ ᠲᠠᠷᠢᠶᠠᠯᠠᠩ ᠡᠷᠬᠢᠯᠡᠭᠡᠳ᠂ ᠬᠤᠳᠠᠯᠳᠤᠭ᠎ᠠ ᠰᠣᠯᠢᠯᠴᠠᠭᠠᠨ ᠤ ᠭᠡᠷ ᠪᠠᠶᠢᠭᠤᠯᠵᠦ ᠪᠠᠷᠠᠭ᠎ᠠ ᠶᠢ ᠪᠠᠷᠠᠭ᠎ᠠ ᠪᠠᠷ ᠰᠣᠯᠢᠯᠴᠠᠬᠤ ᠬᠤᠳᠠᠯᠳᠤᠭ᠎ᠠ ᠬᠢᠵᠦ ᠪᠠᠶᠢᠯ᠎ᠠ᠃ ᠬᠤᠷᠢᠨ ᠵᠢᠯ ᠤᠨ ᠡᠮᠦᠨ᠎ᠡ ᠲᠤᠭᠳᠤᠭ᠎ᠠ ᠪᠠᠬᠢ ᠶᠢᠨ ᠲᠡᠭᠦᠦ ᠶᠡᠭᠡ ᠴᠢᠯᠡᠳᠦ ᠣᠯᠬᠤᠨᠤᠳ ᠠᠶᠢᠮᠠᠭ ᠠᠴᠠ ᠦᠭᠡᠯᠥᠨ ᠭᠡᠣᠭᠡᠨ ᠢ ᠭᠤᠶᠤᠵᠦ ᠬᠤᠷᠢᠮᠯᠠᠬᠤ ᠪᠠᠷ ᠠᠪᠴᠦ ᠶᠠᠪᠤᠳᠠᠯ᠎ᠠ ᠶᠢᠰᠦᠭᠡᠢ ᠪᠠᠭᠠᠳᠣᠷ ᠵᠠᠮ ᠲᠤᠮᠳᠠ ᠠᠴᠠ ᠨᠢ ᠪᠤᠯᠢᠶᠠᠵᠦ ᠡᠭᠡᠨᠡᠷ ᠢᠶᠠᠨ ᠪᠤᠯᠭᠠᠭᠰᠠᠨ ᠦᠰᠢᠶ᠎ᠡ ᠶᠢ ᠠᠪᠬᠤ ᠶᠢᠨ ᠲᠦᠯᠥᠭᠡ᠂ ᠲᠡᠮᠦᠵᠢᠨ ᠨᠡᠷ ᠰᠡᠩᠭᠦᠷ ᠭᠤᠷᠣᠬᠠᠨ ᠠᠴᠠ ᠨᠡᠬᠦᠵᠦ ᠭᠡᠷᠦᠯᠥᠨ ᠮᠦᠷᠡᠨ ᠤ ᠡᠬᠢ ᠪᠦᠷᠬᠢ ᠡᠷᠬᠢ ᠳᠤ ᠨᠤᠳᠣᠭᠯᠠᠵᠦ ᠪᠠᠶᠢᠬᠤ ᠦᠶ᠎ᠡ ᠳᠤ᠂ 1179 ᠤᠨ ᠳᠤ ᠭᠤᠷᠪᠠᠨ ᠮᠡᠷᠬᠢᠳ ᠬᠤᠯᠪᠤᠭᠠᠯᠠᠨ ᠭᠤᠷᠪᠠᠨ ᠵᠠᠭᠤᠨ ᠴᠡᠷᠢᠭ ᠠᠪᠴᠥ ᠲᠡᠮᠦᠵᠢᠨ ᠨᠡᠷ ᠢ ᠲᠤᠪᠳᠣᠯᠤᠭᠠᠳ᠂ ᠴᠢᠩᠭᠢᠰ ᠬᠠᠭᠠᠨ ᠤ ᠰᠢᠨ᠎ᠡ ᠪᠠᠭᠤᠯᠭᠠᠵᠦ ᠠᠪᠤᠭᠰᠠᠨ ᠪᠦᠷᠳᠡ ᠦᠵᠢᠨ ᠬᠠᠳᠣᠨ ᠢ ᠨᠢ ᠪᠤᠯᠢᠶᠡᠵᠦ ᠠᠪᠠᠴᠢᠭᠠᠳ ᠶᠡᠭᠡ ᠴᠢᠯᠡᠳᠦ ᠶᠢᠨ ᠲᠡᠬᠦᠦ ᠴᠢᠯᠭᠡᠷ ᠪᠦᠭᠡ ᠳᠤ ᠦᠭᠪᠡ᠃ ᠡᠶᠢᠨᠬᠦ ᠬᠠᠰᠠᠷ ᠠᠬ᠎ᠠ ᠪᠠᠨ ᠲᠠᠭᠠᠵᠤ ᠬᠡᠷᠡᠶᠢᠳ ᠠᠶᠢᠮᠠᠭ ᠲᠤ ᠬᠤᠶᠡᠷ ᠤᠳᠠᠭ᠎ᠠ ᠬᠦᠷᠴᠦ ᠲᠤᠭᠤᠷᠢᠯ ᠬᠠᠨ ᠳᠤ ᠪᠤᠯᠠᠭᠠᠨ ᠠᠷᠠᠰᠤᠨ ᠲᠠᠬᠤ ᠶᠢᠨ ᠬᠦᠨᠳᠦ ᠪᠡᠯᠡᠭ ᠬᠦᠷᠭᠡᠭᠰᠡᠨ ᠳᠤ ᠬᠡᠷᠡᠶᠢᠳ ᠠᠶᠢᠮᠠᠭ ᠬᠤᠶᠡᠷ ᠲᠦᠮᠡᠨ ᠮᠤᠷᠢᠳᠣ ᠴᠡᠷᠢᠭ ᠮᠤᠷᠳᠠᠨ ᠪᠠᠷᠠᠭᠤᠨ ᠭᠠᠷ ᠪᠤᠯᠬᠤ ᠶᠢᠨ ᠬᠠᠮᠳᠣ ᠵᠠᠮᠤᠬ᠎ᠠ ᠲᠠᠢ ᠬᠤᠯᠪᠤᠭᠠᠯᠠᠬᠤ ᠶᠢ ᠰᠠᠨᠠᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠬᠠᠰᠠᠷ ᠠᠬ᠎ᠠ ᠶᠢᠨ ᠢᠶᠠᠨ ᠲᠤᠮᠢᠯᠠᠯᠳᠠ ᠪᠠᠷ ᠲᠡᠭᠦᠦ ᠪᠡᠯᠭᠦᠳᠡᠢ ᠲᠠᠢ ᠪᠠᠨ ᠬᠤᠶᠠᠭᠤᠯᠠ ᠬᠤᠷᠬᠤᠴᠠᠭ ᠪᠤᠯᠳᠤᠭ ᠲᠤ ᠤᠴᠢᠵᠦ᠂ ᠠᠬ᠎ᠠ ᠲᠡᠮᠦᠵᠢᠨ ᠪᠠ ᠵᠠᠮᠤᠬ᠎ᠠ ᠶᠢᠨ ᠪᠠᠭ᠎ᠠ ᠶᠢᠨ ᠦᠶ᠎ᠡ ᠶᠢᠨ ᠠᠨᠳᠠ ᠪᠤᠯᠤᠯᠴᠠᠭᠰᠠᠨ ᠦᠭᠡᠰ ᠬᠢᠭᠡᠳ ᠸᠠᠩ ᠬᠠᠨ ᠤ ᠪᠤᠯᠵᠤᠭ᠎ᠠ ᠶᠢ ᠲᠠᠮᠵᠢᠭᠤᠯᠤᠭᠰᠠᠨ ᠳᠤ ᠵᠠᠮᠤᠬ᠎ᠠ ᠨᠠᠶᠢᠵᠠ ᠶᠢᠨ ᠨᠦᠭᠦᠷᠯᠡᠯ ᠢ ᠪᠤᠳᠣᠵᠤ᠂ ᠮᠡᠷᠭᠢᠳ ᠲᠤ ᠪᠠᠷᠢᠪᠴᠢᠯᠠᠭᠳᠠᠭᠰᠠᠨ ᠪᠦᠷᠳᠡ ᠦᠵᠢᠨ ᠤ ᠦᠰᠢᠶ᠎ᠡ ᠶᠢ ᠨᠢ ᠠᠪᠴᠦ ᠦᠭᠬᠦ ᠪᠠᠷ ᠬᠤᠶᠡᠷ ᠲᠦᠮᠡᠨ ᠮᠤᠷᠢᠳᠦ ᠴᠡᠷᠢᠭ ᠭᠠᠷᠭᠠᠵᠤ ᠵᠡᠭᠦᠨ ᠭᠠᠷ ᠪᠤᠯᠵᠤ ᠮᠤᠷᠳᠠᠪᠠ᠃ ᠢᠩᠭᠢᠭᠡᠳ ᠭᠤᠷᠪᠠᠨ ᠲᠠᠯ᠎ᠠ ᠶᠢᠨ ᠬᠤᠯᠪᠤᠭ᠎ᠠ ᠶᠢ ᠪᠠᠶᠢᠭᠤᠯᠬᠤ ᠳᠤ ᠬᠠᠰᠠᠷ ᠬᠡᠯᠡᠮᠦᠷᠴᠢ ᠶᠢᠨ ᠬᠦᠴᠦ ᠪᠠᠨ ᠨᠡᠯᠢᠶᠡᠳ ᠭᠠᠷᠭᠠᠭᠰᠠᠨ ᠪᠠᠶᠢᠨ᠎ᠠ᠃ 1185 ᠤᠨ ᠤ ᠪᠤᠭᠤᠷ᠎ᠠ ᠭᠡᠭᠡᠷ᠎ᠡ ᠶᠢᠨ ᠲᠠᠶᠢᠨ ᠳᠤ ᠴᠢᠩᠭᠢᠰ ᠬᠠᠭᠠᠨ ᠭᠤᠷᠪᠠᠨ ᠵᠠᠭᠤᠨ ᠮᠡᠷᠬᠢᠳ ᠢ ᠨᠢᠭᠡᠳᠭᠡᠵᠦ᠂ ᠪᠤᠯᠢᠶᠠᠭᠳᠠᠭᠰᠠᠨ ᠡᠭᠡᠨᠡᠷ ᠢᠶᠠᠨ ᠠᠪᠤᠷᠠᠭᠠᠳ᠂ ᠮᠠᠰᠢ ᠤᠯᠠᠨ ᠠᠳᠣᠭᠤ ᠮᠠᠯ᠂ ᠡᠳ᠋ ᠪᠤᠳᠠᠰ ᠵᠡᠷᠭᠡ ᠲᠠᠶᠢᠨ ᠤ ᠠᠰᠢᠭ ᠤᠯᠪᠠ᠃ ᠨᠡᠩ ᠴᠢᠬᠤᠯᠠ ᠨᠢ ᠦᠪᠡᠷ ᠤᠨ ᠬᠦᠴᠦᠨ ᠢᠶᠠᠨ ᠪᠤᠵᠠᠭᠠᠶᠢᠷᠠᠭᠤᠯᠵᠤ ᠮᠤᠩᠭᠤᠯ ᠠᠶᠢᠮᠠᠭ ᠤᠨ ᠨᠡᠷ᠎ᠡ ᠲᠦᠷᠦ ᠪᠠᠨ ᠮᠠᠨᠳᠣᠭᠤᠯᠤᠭᠰᠠᠨ ᠠᠴᠠ ᠪᠤᠰᠣᠳ ᠠᠶᠢᠮᠠᠭ ᠤᠨ ᠭᠦᠮᠦᠰ ᠠᠷᠤ ᠠᠷᠣ ᠠᠴᠠ ᠪᠠᠨ ᠬᠦᠷᠦᠯᠴᠡᠨ ᠢᠷᠡᠵᠡᠭᠡᠵᠦ ᠪᠤᠳᠠᠷᠠᠭᠰᠠᠨ ᠠᠶᠢᠮᠠᠭ ᠤᠳ ᠲᠠᠬᠢᠨ ᠨᠡᠶᠢᠯᠡᠭᠡᠳ ᠬᠢᠶᠡᠳ ᠶᠠᠰᠣᠳᠠᠨ ᠤ ᠬᠤᠯᠪᠤᠭ᠎ᠠ ᠪᠠᠶᠢᠭᠤᠯᠬᠤ ᠳᠤ ᠰᠠᠭᠤᠷᠢ ᠲᠠᠯᠪᠢᠭᠰᠠᠨ ᠪᠠᠶᠢᠨ᠎ᠠ᠃
       ᠬᠠᠰᠠᠷ ᠬᠠᠭᠤᠷᠮᠠᠭ ᠢᠶᠠᠷ ᠪᠠᠭᠤᠨ ᠦᠭᠴᠦ ᠬᠡᠷᠡᠶᠢᠳ ᠠᠶᠢᠮᠠᠭ ᠢ ᠮᠦᠬᠦᠭᠡᠭᠰᠡᠨ ᠨᠢ        ᠲᠦᠷᠦᠭ ᠤᠭᠰᠠᠭᠠᠳᠠᠨ ᠬᠡᠷᠡᠶᠢᠳ ᠠᠶᠢᠮᠠᠭ ᠨᠢ ᠬᠠᠩᠭᠠᠢ᠂ ᠭᠡᠨᠳᠡᠢ ᠬᠤᠶᠡᠷ ᠠᠭᠤᠯᠠ ᠶᠢᠨ ᠬᠤᠭᠤᠷᠣᠨᠳᠣ ᠣᠷᠬᠤᠨ᠂ ᠲᠤᠤᠯᠠ ᠭᠤᠤᠯ ᠤᠨ ᠬᠦᠨᠳᠡᠢ ᠪᠠᠷ ᠨᠤᠳᠣᠭᠯᠠᠳᠠᠭ ᠪᠠᠶᠢᠯ᠎ᠠ᠃ ︽ᠭᠡᠷᠡᠶᠢᠳ︾ ᠭᠡᠳᠡᠭ ᠨᠢ ︽ᠭᠡᠷᠢᠶᠡ᠊ + ᠤᠨ︾ ᠭᠡᠵᠤ ᠪᠦᠳᠦᠭᠰᠡᠨ ᠪᠦᠭᠡᠳ ᠤᠯᠠᠨ ᠭᠡᠷᠢᠶ᠎ᠡ ᠭᠡᠰᠡᠨ ᠤᠳᠬ᠎ᠠ ᠲᠠᠢ᠃ ᠤᠴᠢᠷ ᠨᠢ ᠭᠡᠷᠡᠶᠢᠳ ᠪᠣᠯ ᠤᠣᠯ ᠠᠴᠠ ᠪᠠᠨ ᠬᠡᠷᠢᠶ᠎ᠡ ᠰᠢᠳᠦᠳᠡᠭ ᠪᠦᠭᠡᠳ ᠬᠡᠷᠢᠶ᠎ᠡ ᠪᠠᠷ ᠲᠡᠳᠡᠨ ᠤ ᠲᠤᠲ᠋ᠧᠮ ᠰᠢᠳᠦᠯᠭᠡ ᠪᠠᠨ ᠪᠤᠯᠭᠠᠳᠠᠭ ᠵᠠᠩᠰᠢᠯ ᠲᠠᠢ ᠪᠠᠶᠢᠵᠠᠢ᠃ ᠡᠷᠳᠡ ᠦᠶ᠎ᠡ ᠶᠢᠨ ᠭᠡᠷᠡᠶᠢᠳ ᠤᠨ ᠨᠢᠭᠡ ᠨᠤᠶᠠᠨ ᠨᠢ ᠲᠤᠯᠤᠭᠠᠨ ᠬᠦᠦ ᠲᠠᠢ ᠪᠠᠶᠢᠭᠰᠠᠨ ᠪᠦᠭᠡᠳ ᠮᠢᠬ᠎ᠠ ᠠᠷᠠᠰᠤ ᠲᠤᠩ ᠬᠠᠷ᠎ᠠ ᠤᠴᠢᠷ ᠭᠡᠷᠡᠶᠢᠳ ᠭᠡᠮᠡᠭᠳᠡᠭᠰᠡᠨ ᠭᠡᠳᠡᠭ᠃ ᠬᠠᠨ ᠤ ᠤᠷᠳᠣᠨ ᠨᠢ ᠲᠤᠤᠯᠠ ᠭᠤᠤᠯ ᠤᠨ ᠬᠠᠷ᠎ᠠ ᠲᠦᠩ ︵ᠰᠢᠭᠤᠢ︶ ᠪᠤᠯᠤᠨ᠎ᠠ᠃ ᠤᠩ ᠬᠠᠨ ᠤ ᠵᠤᠰᠠᠯᠠᠩ ᠨᠢ ᠲᠠᠯᠠᠨ ᠬᠤᠰᠠᠭᠤᠷ᠂ ᠳ᠋ᠠᠪᠠᠨ ᠨᠠᠭᠤᠷ ᠲᠤ᠂ ᠡᠪᠤᠯᠵᠢᠶ᠎ᠡ ᠨᠢ ᠦᠲ᠋ᠧᠬᠢᠨ ᠮᠦᠷᠡᠨ᠂ ᠦᠷᠦᠩᠭᠦᠷᠺᠢᠨ ᠵᠡᠷᠭᠡ ᠭᠠᠵᠠᠷ ᠲᠤ ᠪᠠᠶᠢᠵᠦ᠂ ᠪᠠᠰᠠ ᠵᠡᠬᠦᠨ ᠪᠠᠷᠠᠭᠤᠨ ᠵᠢᠭᠦᠷ ᠤᠨ ᠴᠡᠷᠢᠭ ᠤᠨ ᠲᠤᠰᠬᠠᠢ ᠰᠠᠭᠤᠳᠠᠭ ᠭᠠᠵᠠᠷ ᠲᠠᠢ ᠪᠠᠶᠢᠪᠠ᠃ ᠭᠡᠷᠡᠶᠢᠳ ᠨᠡᠷ ᠨᠡᠯᠢᠶᠡᠳ ᠡᠷᠳᠡ ᠤᠯᠤᠰ ᠪᠠᠶᠢᠭᠤᠯᠵᠠᠢ᠃ ᠭᠡᠷᠡᠶᠢᠳ ᠠᠶᠢᠮᠠᠭ ᠲᠤᠤᠷ᠎ᠠ ᠪᠠᠨ ᠬᠡᠷᠡᠶᠢᠳ᠂ ᠲᠤᠩᠭᠠᠶᠢᠳ᠂ ᠵᠢᠷᠬᠢᠨ᠂ ᠰᠠᠬᠠᠶᠢᠳ᠂ ᠲᠦᠮᠡᠨ ᠲᠦᠪᠡᠭᠡᠨ᠂ ᠡᠯᠢᠶᠡᠳ ᠵᠡᠷᠭᠡ ᠵᠢᠷᠭᠤᠭᠠᠨ ᠰᠠᠯᠪᠤᠷᠢ ᠤᠪᠤᠭ ᠢ ᠬᠠᠷᠢᠶᠠᠯᠠᠵᠦ ᠨᠢᠭᠡ ᠯᠠ ᠲᠤᠤᠷ᠎ᠠ ᠬᠤᠶᠡᠷ ᠲᠦᠮᠡᠨ ᠴᠡᠷᠢᠭ ᠲᠠᠶᠢᠴᠢᠯᠠᠵᠦ ᠴᠢᠳᠠᠨ᠎ᠠ᠃ ᠸᠠᠩ ᠬᠠᠨ ᠲᠤᠭᠤᠷᠢᠯ ᠪᠣᠯ ᠭᠡᠷᠡᠶᠢᠳ ᠠᠶᠢᠮᠠᠭ ᠤᠨ ᠬᠤᠩᠭᠤᠵᠢᠨ ᠤᠪᠤᠭ ᠤᠨ ᠭᠦᠮᠦᠨ᠃ ᠸᠠᠩ ᠬᠠᠨ ᠲᠤᠭᠤᠷᠢᠯ ᠤᠨ ᠡᠪᠦᠭᠡ ᠮᠠᠷᠭᠦᠰ ᠪᠤᠶᠢᠷᠤᠭ ᠬᠠᠨ ᠲᠠᠲ᠋ᠡᠷ ᠠᠶᠢᠮᠠᠭ ᠤᠨ ᠲᠦᠷᠦᠭᠦᠦ ᠨᠠᠭᠤᠷ ᠲᠠᠢ ᠪᠠᠶᠢᠯᠳᠣᠵᠦ ᠲᠡᠶᠢᠯᠥᠭᠳᠡᠨ ᠠᠯᠳᠠᠨ ᠤᠯᠤᠰ ᠲᠤ ᠬᠦᠷᠭᠡᠭᠳᠡᠭᠰᠡᠨ ᠳᠤ᠂ ᠠᠯᠳᠠᠨ ᠤᠯᠤᠰ ︽ᠮᠤᠳᠣᠨ ᠡᠯᠵᠢᠭᠡ︾ ᠤᠨᠤᠭᠤᠯᠬᠤ ᠬᠤᠤᠷᠳᠠᠢ ᠡᠷᠡᠭᠦᠦ ᠪᠠᠷ ᠬᠤᠤᠷᠯᠠᠵᠠᠢ᠃ ᠡᠬᠦᠨ ᠳᠤ ᠮᠡᠷᠭᠦᠰ ᠬᠠᠨ ᠤ ᠡᠭᠡᠨᠡᠷ ᠬᠤᠳᠣᠭᠳᠠᠢ ᠬᠠᠷᠢᠭᠴᠢ ᠠᠷᠭ᠎ᠠ ᠡᠭᠦᠰᠭᠡᠵᠦ ᠨᠠᠭᠤᠷ ᠬᠠᠨ ᠢ ᠠᠯᠠᠵᠦ ᠡᠷ᠎ᠡ ᠶᠢᠨ ᠢᠶᠠᠨ ᠦᠰᠢᠶ᠎ᠡ ᠶᠢ ᠠᠪᠴᠠᠢ᠃ ᠮᠠᠷᠭᠦᠰ ᠪᠤᠶᠢᠷᠤᠭ ᠬᠠᠨ ᠳᠤ ᠬᠤᠶᠡᠷ ᠬᠦᠦ ᠲᠠᠢ᠃ ᠨᠢᠭᠡ ᠨᠢ ᠬᠤᠷᠴᠠᠬᠤᠰ ᠪᠤᠶᠢᠷᠤᠭ᠂ ᠨᠦᠭᠦᠭᠡ ᠨᠢ ᠬᠦᠷ ᠬᠠᠨ ᠪᠤᠯᠤᠨ᠎ᠠ᠃ ᠲᠤᠭᠤᠷᠢᠯ ᠬᠠᠨ ᠤ ᠡᠴᠢᠭᠡ ᠨᠢ ᠬᠤᠷᠴᠠᠬᠤᠰ ᠪᠤᠶᠢᠷᠤᠭ ᠨᠠᠰᠣ ᠪᠠᠷᠠᠬᠤ ᠳᠤ ᠪᠠᠨ ᠨᠤᠳᠤᠭ ᠢᠶᠠᠨ ᠤᠯᠠᠨ ᠬᠦᠪᠡᠭᠦᠨ ᠳᠤ ᠪᠠᠨ ᠬᠤᠪᠢᠶᠠᠨ ᠦᠭᠭᠦᠭᠰᠡᠨ ᠪᠤᠯᠪᠠᠴᠤ᠂ ᠡᠴᠢᠭᠡ ᠨᠢ ᠠᠮᠢᠰᠬᠤᠯ ᠬᠤᠷᠢᠶᠠᠮᠠᠭᠴᠠ ᠲᠡᠷᠡ ᠲᠦᠷᠦᠭᠰᠡᠨ ᠬᠤᠶᠡᠷ ᠲᠡᠭᠦᠦ ᠪᠠᠨ ᠠᠯᠠᠵᠦ᠂ ᠡᠴᠢᠭᠡ ᠶᠢᠨ ᠢᠶᠠᠨ ᠬᠠᠨ ᠰᠠᠭᠤᠷᠢ ᠶᠢ ᠵᠠᠯᠭᠠᠮᠵᠢᠯᠠᠪᠠ᠃ ᠡᠭᠦᠨ ᠳᠤ ᠠᠪᠠᠭ᠎ᠠ ᠨᠢ ᠬᠦᠷ ᠬᠠᠨ ︵ᠬᠠᠮᠤᠭ ᠤᠨ ᠬᠠᠨ ᠭᠡᠰᠡᠨ ᠤᠳᠬ᠎ᠠ ᠲᠠᠢ ᠲᠦᠷᠦᠭ ᠦᠭᠡ︶ ᠨᠠᠢᠮᠠᠨ ᠠᠶᠢᠮᠠᠭ ᠤᠨ ᠢᠨᠠᠭᠴᠠ ᠪᠢᠯᠭᠡ ᠬᠠᠨ ᠲᠠᠢ ᠬᠤᠯᠪᠤᠭᠠᠯᠠᠨ ᠲᠡᠭᠦᠨ ᠢ ᠲᠠᠷᠣᠬᠤ ᠳᠤ ᠲᠤᠭᠤᠷᠢᠯ ᠵᠠᠭᠤᠭᠠᠳ ᠮᠤᠷᠢᠳᠠᠨ ᠢᠶᠠᠨ ᠲᠠᠭᠠᠭᠤᠯᠤᠨ ᠶᠢᠰᠦᠭᠡᠢ ᠪᠠᠭᠠᠳᠣᠷ ᠠᠴᠠ ᠲᠤᠰᠠᠯᠠᠮᠵᠢ ᠭᠤᠶᠤᠵᠠᠢ᠃ ᠶᠢᠰᠦᠭᠡᠢ ᠪᠠᠭᠠᠳᠣᠷ ᠴᠡᠷᠢᠭ ᠲᠠᠶᠢᠴᠢᠯᠠᠨ ᠬᠦᠷ ᠬᠠᠨ ᠢ ᠬᠦᠭᠡᠭᠡᠵᠦ ᠶᠠᠪᠤᠭᠤᠯᠤᠭᠠᠳ᠂ ᠲᠤᠭᠤᠷᠢᠯ ᠳᠤ ᠤᠯᠤᠰ ᠢᠷᠭᠡᠨ ᠢ ᠨᠢ ᠪᠤᠴᠠᠭᠠᠨ ᠠᠪᠴᠦ ᠦᠭᠴᠡᠢ᠃ ᠲᠡᠭᠡᠭᠡᠳ ᠸᠠᠩ ᠬᠠᠨ ᠶᠢᠰᠦᠭᠡᠢ ᠪᠠᠭᠠᠳᠣᠷ ᠲᠠᠢ ᠦᠬᠦᠵᠦ ᠰᠡᠬᠡᠬᠦ ᠪᠠᠨ ᠬᠠᠮᠳᠣᠳᠬᠠᠭᠰᠠᠨ ᠠᠨᠳᠠ ᠪᠤᠯᠤᠯᠴᠠᠪᠠ᠃ ᠡᠶᠢᠨᠬᠦ ᠭᠡᠷᠡᠶᠢᠳ ᠠᠶᠢᠮᠠᠭ ᠨᠢ ᠮᠤᠩᠭᠤᠯ ᠠᠶᠢᠮᠠᠭ ᠲᠠᠢ ᠡᠷᠳᠡᠨ ᠠᠴᠠ ᠪᠠᠨ ᠠᠪᠤᠭᠠᠳ ᠨᠠᠶᠢᠷᠳᠡᠢ ᠬᠤᠯᠪᠤᠭᠠᠨ ᠤ ᠤᠯᠤᠰ ᠪᠤᠯᠤᠭᠰᠠᠨ ᠶᠤᠮ᠃ ᠲᠤᠭᠤᠷᠢᠯ ᠪᠠᠰᠠ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠬᠠᠮᠳᠣ ᠲᠠᠶᠢᠴᠢᠭᠤᠳ ᠢ ᠲᠠᠶᠢᠯᠠᠵᠦ᠂ ᠠᠯᠳᠠᠨ ᠤᠯᠤᠰ ᠠᠴᠠ ᠤᠷᠪᠠᠭᠰᠠᠨ ᠦᠰᠢᠶᠡᠳᠦ ᠲᠠᠲ᠋ᠡᠷ ᠤᠳ ᠢ ᠲᠤᠪᠳᠣᠯᠤᠨ᠂ ᠮᠡᠬᠦᠵᠢᠨ ᠰᠡᠭᠦᠯᠳᠦ ᠶᠢ ᠪᠠᠷᠢᠵᠦ ᠠᠯᠠᠪᠠ᠃ ᠠᠯᠳᠠᠨ ᠤᠯᠤᠰ ᠤᠨ ᠸᠠᠩᠭᠢᠩ ᠴᠢᠩᠰᠠᠩ ᠡᠨᠡ ᠴᠢᠮᠡᠭᠡ ᠶᠢ ᠰᠤᠨᠤᠰᠣᠭᠠᠳ ᠲᠤᠭᠤᠷᠢᠯ ᠳᠤ ᠸᠠᠩ ︵ᠤᠩ︶ ᠴᠤᠯᠠ ᠦᠭᠭᠦᠭᠰᠡᠨ ᠶᠤᠮ᠃ ᠡᠬᠦᠨ ᠠᠴᠠ ᠡᠬᠢᠯᠡᠨ ᠲᠤᠭᠤᠷᠢᠯ ᠢ ᠸᠠᠩ ᠬᠠᠨ ᠭᠡᠵᠤ ᠲᠠᠭᠤᠳᠠᠬᠤ ᠪᠤᠯᠪᠠ᠃        ᠭᠡᠷᠡᠶᠢᠳ ᠠᠶᠢᠮᠠᠭ ᠤᠨ ᠸᠠᠩ ᠬᠠᠨ ᠲᠤᠭᠤᠷᠢᠯ ᠬᠦᠦ ᠰᠡᠩᠭᠦᠮ ᠲᠠᠢ ᠪᠠᠨ ᠵᠠᠮᠤᠬ᠎ᠠ ᠶᠢᠨ ᠬᠤᠪᠴᠢ ᠦᠭᠡ ᠪᠠᠷ ᠴᠢᠩᠭᠢᠰ ᠬᠠᠭᠠᠨ ᠠᠴᠠ ᠬᠠᠭᠠᠴᠨᠨ ᠰᠠᠯᠤᠭᠠᠳ ᠭᠡᠷᠡᠭ ᠡᠳᠤᠨ ᠬᠤᠤᠷᠯᠠᠬᠤ ᠭᠡᠵᠤ 1203 ᠤᠨ ᠤ ᠬᠠᠪᠤᠷ᠂ ᠸᠠᠩ ᠬᠠᠨ ᠤᠷᠤᠭ ᠤᠨ ᠪᠤᠯᠵᠤᠭ᠎ᠠ ᠬᠦᠢᠴᠡᠳᠭᠡᠬᠦ ᠨᠡᠷ᠎ᠡ ᠪᠠᠷ ᠲᠡᠮᠦᠵᠢᠨ ᠢ ᠬᠤᠤᠷᠯᠠᠬᠤ ᠭᠡᠰᠡᠨ ᠪᠤᠯᠪᠠᠴᠦ ᠴᠢᠩᠭᠢᠰ ᠬᠠᠭᠠᠨ ᠳᠤ ᠰᠡᠷᠡᠭᠳᠡᠪᠡ᠃ ᠲᠡᠭᠡᠭᠡᠳ ᠸᠠᠩ ᠬᠠᠨ ᠶᠡᠭᠡ ᠴᠡᠷᠢᠭ ᠲᠠᠶᠢᠴᠢᠯᠠᠨ ᠴᠢᠩᠭᠢᠰ ᠬᠠᠭᠠᠨ ᠢ ᠲᠠᠶᠢᠯᠠᠭᠰᠠᠨ ᠳᠤ ᠴᠢᠩᠭᠢᠰ ᠬᠠᠭᠠᠨ ᠴᠢᠮᠡᠭᠡ ᠶᠢ ᠤᠯᠤᠭᠰᠠᠨ ᠤ ᠲᠠᠷᠠᠭ᠎ᠠ ᠴᠡᠷᠢᠭ ᠮᠤᠷᠳᠠᠵᠦ᠂ ᠬᠤᠶᠡᠷ ᠡᠳᠡᠭᠡᠳ ᠮᠤᠤ ᠦᠨᠳᠣᠷ ᠤᠨ ᠤᠶᠢᠷᠠᠯᠴᠠᠭᠠᠬᠢ ᠬᠠᠷ᠎ᠠ ᠬᠠᠯᠵᠢᠳ ︵ᠤᠳᠣᠬᠢ ᠰᠢᠯᠢ ᠶᠢᠨ ᠭᠤᠤᠯ ᠠᠶᠢᠮᠠᠭ ᠤᠨ ᠵᠡᠬᠦᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠤ ᠬᠤᠶᠢᠳᠣ ᠭᠡᠰᠡᠭ ᠲᠤ ᠪᠤᠢ︶ ᠭᠡᠬᠦ ᠭᠠᠵᠠᠷ ᠲᠤ ᠪᠠᠶᠢᠯᠳᠣᠪᠠ᠃ ᠲᠤᠰ ᠣᠳᠠᠭᠠᠨ ᠤ ᠲᠠᠶᠢᠨ ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ ᠭᠤᠷᠪᠡᠨ ᠮᠢᠩᠭᠠᠨ ᠴᠡᠷᠢᠭ ᠢᠶᠠᠷ ᠲᠠᠶᠢᠰᠣᠨ ᠤ ᠲᠦᠮᠡᠨ ᠴᠡᠷᠢᠭ ᠲᠠᠢ ᠪᠠᠶᠢᠯᠳᠣᠭᠰᠠᠨ ᠲᠤᠯᠠ ᠬᠤᠶᠡᠷ ᠡᠳᠡᠭᠡᠳ ᠤᠨ ᠬᠦᠴᠦᠨ ᠤ ᠵᠦᠷᠢᠶ᠎ᠡ ᠲᠤᠩ ᠶᠡᠭᠡ ᠪᠠᠶᠢᠭᠰᠠᠨ ᠶᠤᠮ᠃ ᠲᠡᠮᠦᠵᠢᠨ ᠨᠠᠷ ᠢᠯᠠᠭᠳᠠᠵᠦ ᠬᠠᠯᠬ᠎ᠠ ᠭᠤᠤᠯ ᠢ ᠲᠠᠭᠠᠵᠦ ᠤᠬᠤᠷᠢᠬᠤ ᠳᠤ ᠬᠤᠶᠠᠷ ᠮᠢᠩᠭ᠎ᠠ ᠵᠢᠷᠭᠤᠭᠠᠨ ᠵᠠᠭᠤᠨ ᠬᠦᠮᠦᠨ ᠲᠠᠭᠠᠵᠦ ᠪᠠᠶᠢᠭᠰᠠᠨ ᠢᠶᠠᠨ ᠪᠠᠯᠵᠤᠨ᠎ᠠ ᠨᠠᠭᠤᠷ ︵ᠣᠳᠣᠬᠢ ᠬᠦᠯᠥᠨ ᠨᠠᠭᠤᠷ ᠤᠨ ᠪᠠᠷᠠᠭᠤᠨ ᠡᠮᠦᠨᠡᠳᠦ ᠳᠤ ᠪᠤᠢ︶ ᠲᠤ ᠬᠦᠷᠬᠦ ᠦᠶ᠎ᠡ ᠳᠤ ᠲᠡᠮᠦᠵᠢᠨ ᠤ ᠲᠠᠭᠠᠯᠳᠠ ᠴᠡᠷᠢᠭ ᠨᠢ ᠵᠦᠪᠬᠡᠨ ᠠᠷᠪᠠ ᠶᠢᠰᠦᠬᠡᠨ ᠬᠦᠮᠦᠨ ᠯᠠ ᠦᠯᠡᠳᠡᠵᠠᠢ᠃ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠬᠠᠰᠠᠷ ᠤᠨ ᠬᠢᠨ ᠴᠢᠩᠭᠢᠰ ᠬᠠᠭᠠᠨ ᠠᠴᠠ ᠰᠠᠯᠵᠦ ᠬᠠᠷᠠᠭᠤᠨ ᠵᠢᠳᠦᠨ ︵ᠬᠢᠩᠭᠠᠨ ᠲᠠᠪᠠᠭ᠎ᠠ︶ ᠳᠤ ᠲᠤᠰ ᠲᠠᠭᠠᠨ ᠠᠮᠢᠳᠣᠷᠠᠵᠦ ᠪᠠᠶᠢᠳᠠᠯ᠎ᠠ ᠬᠡᠷᠡᠶᠢᠳ ᠴᠡᠷᠢᠭ ᠲᠤ ᠲᠤᠪᠳᠤᠯᠤᠭᠳᠠᠪᠠ᠃ ᠲᠠᠶᠢᠨ ᠳᠤ ᠶᠡᠭᠡ ᠴᠡᠷᠢᠭ ᠠᠴᠠ ᠪᠠᠨ ᠪᠤᠳᠠᠷᠠᠨ ᠰᠠᠯᠤᠭᠰᠠᠨ ᠬᠠᠰᠠᠷ ᠭᠠᠭᠴᠠ ᠤᠳᠬᠤᠨ ᠬᠦᠦ ᠲᠤᠬᠤ ᠭᠡᠭᠴᠢ ᠪᠠᠨ ᠰᠤᠭᠤᠪᠴᠢᠯᠡᠨ ᠬᠡᠳᠦᠨ ᠬᠦᠮᠦᠨ ᠲᠠᠭᠠᠭᠤᠯᠤᠨ ᠠᠬ᠎ᠠ ᠲᠡᠮᠦᠵᠢᠨ ᠢ ᠡᠷᠢᠵᠦ᠂ ᠬᠠᠷᠠᠭᠤᠨ ᠵᠢᠳᠣᠨ ᠤ ᠨᠢᠷᠣᠭᠤ ᠨᠤᠭᠤᠳ ᠢᠶᠠᠷ ᠶᠠᠪᠤᠭᠰᠠᠨ ᠪᠤᠯᠪᠠᠴᠤ ᠤᠯᠤᠭᠰᠠᠨ ᠦᠭᠡᠢ ᠦᠯᠥᠰᠦᠨ ᠶᠠᠳᠠᠩᠭᠤᠶᠢᠷᠠᠭᠠᠳ᠂ ᠰᠢᠷᠢ ᠰᠢᠷᠪᠤᠰᠣ ᠢᠳᠡᠨ ᠪᠠᠶᠢᠵᠦ ᠲᠡᠨᠦᠭᠦᠴᠢᠯᠡᠨ ᠶᠠᠪᠤᠭᠰᠠᠭᠠᠷ ᠪᠠᠯᠵᠤᠨ᠎ᠠ ᠨᠠᠭᠤᠷ ᠲᠤ ᠠᠬ᠎ᠠ ᠲᠠᠢ ᠪᠠᠨ ᠠᠭᠤᠯᠵᠠᠭᠰᠠᠨ ᠳᠤ ᠵᠤᠪᠠᠵᠦ ᠵᠦᠳᠡᠵᠦ ᠪᠠᠶᠢᠭᠰᠠᠨ ᠲᠡᠮᠦᠵᠢᠨ ᠮᠠᠰᠢᠳᠠ ᠪᠠᠶᠠᠰᠴᠦ ᠬᠠᠰᠠᠷ ᠲᠠᠢ ᠬᠠᠮᠳᠤ ᠬᠡᠷᠡᠶᠢᠳ ᠠᠶᠢᠮᠠᠭ ᠢ ᠲᠦᠢᠯᠪᠤᠷᠢᠳᠠᠢ ᠮᠦᠬᠦᠭᠡᠬᠦ ᠴᠡᠷᠢᠭ ᠲᠠᠶᠢᠨ ᠤ ᠠᠷᠭ᠎ᠠ ᠪᠤᠳᠤᠯᠭ᠎ᠠ ᠶᠢ ᠵᠦᠪᠳᠡᠯᠴᠡᠪᠡ᠃ ᠬᠠᠰᠠᠷ ᠨᠢᠬᠡᠨ ᠬᠤᠯᠠᠨ ᠴᠢᠬᠢᠳᠠᠢ ︵ᠭᠡᠭᠡᠷ᠎ᠡ ᠶᠢᠨ ᠵᠡᠷᠯᠢᠭ ᠮᠤᠷᠢ︶ ᠶᠢ ᠬᠠᠷᠪᠤᠨ ᠠᠯᠠᠵᠦ ᠪᠦᠭᠦᠳᠡᠭᠡᠷ ᠬᠤᠭᠤᠯᠠᠯᠠᠵᠦ᠂ ᠪᠠᠯᠵᠤᠨ᠎ᠠ ᠨᠠᠭᠤᠷ ᠤᠨ ᠪᠤᠷᠵᠠᠩᠳᠦ ᠤᠰᠤ ᠶᠢ ᠠᠮᠰᠠᠨ᠄ ︽ᠢᠰᠡᠭᠡᠢ ᠳᠤᠭᠤᠷᠭᠠᠳᠠᠨ ᠢ ᠭᠠᠭᠴᠠ ᠵᠢᠯᠤᠭᠤ ᠳᠤ ᠤᠷᠤᠭᠤᠯᠬᠤ ᠠᠤᠭ᠎ᠠ ᠦᠢᠯᠡᠰ ᠤᠨ ᠲᠦᠯᠦᠭᠡ ᠵᠤᠷᠢᠭ ᠨᠢᠭᠡᠳᠴᠦ ᠬᠠᠮᠳᠦ ᠪᠠᠷ ᠲᠡᠮᠡᠴᠡᠶ᠎ᠡ︾ ᠬᠡᠵᠦ ᠳᠠᠩᠭᠠᠷᠢᠭᠯᠠᠵᠠᠭᠠᠵᠠᠢ᠃ ᠳᠣᠰ ᠵᠢᠯ ᠤᠨ ᠨᠠᠮᠤᠷ ᠳᠡᠮᠣᠵᠢᠨ ᠬᠠᠰᠠᠷ ᠬᠤᠶᠠᠭᠤᠯᠠ ᠵᠥᠪᠳᠡᠯᠴᠡᠭᠡᠳ ᠬᠠᠰᠠᠷ ᠤᠨ ᠭᠡᠷ ᠡᠷᠣᠭᠡ ᠤᠩ ᠬᠠᠨ ᠤ ᠬᠠᠷᠢᠶᠠᠨ ᠳᠤ ︽ᠪᠠᠷᠢᠴᠠ︾ ᠪᠤᠯᠵᠤ ᠪᠠᠶᠢᠭ᠎ᠠ ᠪᠠᠶᠢᠳᠠᠯ ᠢ ᠠᠰᠢᠭᠯᠠᠵᠣ᠂ ᠬᠠᠰᠠᠷ ᠤᠨ ︽ᠡᠯᠴᠢ︾ ᠶᠢ ᠤᠩ ᠬᠠᠨ ᠤ ᠠᠭᠠᠷᠤᠭ ᠪᠠᠭᠤᠴᠠᠨ ᠳᠤ ᠳᠣᠮᠢᠯᠠᠵᠤ ᠪᠠᠶᠢᠳᠠᠯ ᠢ ᠤᠶᠢᠯᠠᠭᠠᠭᠤᠯᠬᠤ ᠶᠢᠨ ᠬᠠᠮᠳᠣ ᠵᠡᠬᠦᠷᠡᠶᠢᠳ ᠤᠨ ᠬᠠᠯᠢᠭᠤᠳᠠᠷ᠂ ᠤᠷᠢᠶᠠᠩᠬᠠᠢ ᠶᠢᠨ ᠴᠠᠭᠤᠷᠬᠠᠨ ᠬᠤᠶᠡᠷ ᠢ ᠲᠤᠮᠢᠯᠡᠨ᠄ ︽ᠮᠢᠨᠤ ᠡᠮᠡᠰ ᠭᠡᠣᠭᠡᠳ ᠴᠦᠮ ᠬᠠᠨ ᠡᠴᠢᠭᠡ ᠶᠢᠨ ᠲᠡᠨᠳᠡ ᠪᠠᠶᠢᠬᠤ ᠲᠤᠯᠠ ᠥᠩ ᠬᠠᠨ ᠢ ᠳᠠᠭᠠᠬᠤ ᠪᠠᠷ ᠬᠠᠰᠠᠷ ᠢᠷᠡᠬᠦ ᠪᠠᠷ ᠪᠠᠶᠢᠨ᠎ᠠ᠂ ᠢᠳᠡᠭᠡᠯ ᠨᠡᠶᠢᠳᠠᠪᠤᠷᠢᠳᠠᠢ ᠬᠦᠮᠦᠨ ᠢ ᠶᠠᠪᠤᠭᠤᠯᠪᠠᠯ ᠪᠢ ᠤᠴᠢᠶ᠎ᠡ᠂ ᠪᠤᠯᠳᠠᠭ ᠪᠣᠯ ᠭᠡᠷᠦᠯᠥᠨ ᠮᠦᠷᠡᠨ ᠤ ᠠᠷᠭᠠᠯ ᠬᠦᠬᠢ ᠳᠤ ᠠᠭᠤᠯᠵᠠᠶ᠎ᠡ︾ ᠭᠡᠵᠤ ᠥᠭᠡ ᠳᠠᠮᠵᠢᠭᠤᠯᠵᠠᠢ᠃ ᠤᠩ ᠬᠠᠨ ᠬᠠᠰᠠᠷ ᠬᠢᠭᠡᠳ ᠳᠡᠮᠥᠵᠢᠨ ᠤ ︽ᠵᠥᠷᠢᠴᠡᠯ︾ ᠤᠨ ᠶᠠᠪᠤᠳᠠᠯ ᠢ ᠮᠡᠳᠡᠳᠡᠭ ᠪᠥᠭᠡᠳ ᠬᠠᠰᠠᠷ ᠢ ᠪᠡᠶ᠎ᠡ ᠳᠡᠭᠡᠨ ᠳᠡᠳᠡᠵᠤ ᠠᠪᠤᠪᠠᠯ ᠨᠢᠭᠡ ᠳᠠᠯ᠎ᠠ ᠪᠠᠷ ᠳᠡᠮᠤᠵᠢᠨ ᠤ ᠰᠥᠷ ᠬᠥᠴᠥᠨ ᠢ ᠪᠠᠭᠤᠷᠠᠭᠤᠯᠵᠤ᠂ ᠨᠥᠭᠦᠭᠡ ᠳᠠᠯ᠎ᠠ ᠪᠠᠷ ᠤᠯᠳᠠᠰᠢ ᠦᠭᠡᠢ ᠨᠢᠭᠡᠨ ᠪᠠᠭᠠᠳᠣᠷ ᠵᠠᠩᠵᠤᠨ ᠲᠠᠢ ᠪᠤᠯᠤᠨ᠎ᠠ ᠭᠡᠵᠤ ᠥᠵᠡᠭᠡᠳ᠂ ᠡᠳᠡᠭᠡᠷ ᠥᠭᠡ ᠶᠢ ᠥᠨᠡᠮᠰᠢᠨ ᠵᠥᠪᠰᠢᠶᠡᠷᠡᠵᠤ ᠦᠪᠡᠷ ᠤᠨ ︽ᠢᠳᠡᠭᠡᠮᠵᠢᠳᠣ ᠬᠥᠮᠥᠨ︾ ᠢᠳᠣᠷᠭᠡᠨ ᠭᠡᠭᠴᠢ ᠪᠠᠷ ᠬᠠᠰᠠᠷ ᠢ ᠳᠣᠰᠣᠭᠤᠯᠬᠤ ᠪᠠᠷ ᠤᠴᠢᠭᠤᠯᠪᠠ᠃ ᠢᠳᠣᠷᠭᠡᠨ ᠳᠡᠮᠤᠵᠢᠨ ᠤ ᠴᠡᠷᠢᠭ ᠤᠨ ᠤᠶᠢᠷ᠎ᠠ ᠢᠷᠡᠮᠡᠭᠴᠡ ᠳᠡᠮᠥᠵᠢᠨ ᠤ ᠴᠡᠷᠢᠭ ᠤᠨ ᠰᠥᠷ ᠬᠥᠴᠤᠨ ᠠᠴᠠ ᠠᠶᠤᠭᠠᠳ ᠪᠤᠷᠣᠭᠤᠯᠠᠨ ᠳᠣᠳᠠᠭᠠᠪᠠ᠃ ᠴᠡᠷᠢᠭ ᠤᠳ ᠳᠡᠭᠦᠨ ᠢ ᠪᠠᠷᠢᠵᠤ ᠳᠡᠮᠥᠵᠢᠨ ᠳᠤ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠳᠤ ᠳᠡᠮᠥᠵᠢᠨ ᠢᠳᠣᠷᠭᠡᠨ ᠢ ᠬᠠᠰᠠᠷ ᠲᠤ ᠳᠣᠰᠢᠶᠠᠨ ᠠᠯᠠᠭᠤᠯᠪᠠ᠃ ᠬᠠᠰᠠᠷ ᠤᠨ ᠡᠯᠴᠢ ᠠᠴᠠ ᠳᠣᠭᠤᠷᠢᠯ ᠤᠩ ᠬᠠᠨ ᠠᠯᠳᠠᠨ ᠳᠠᠷᠠᠮ᠎ᠠ ︵ᠠᠯᠳᠠᠨ ᠬᠠᠨ᠎ᠠ ᠲᠠᠢ ᠭᠡᠷ︶ ᠪᠤᠰᠬᠠᠵᠤ ᠨᠠᠶᠢᠷᠯᠠᠵᠤ ᠪᠠᠶᠢᠨ᠎ᠠ ᠭᠡᠳᠡᠭ ᠢ ᠰᠣᠨᠤᠰᠴᠣ ᠳᠡᠮᠥᠵᠢᠨ᠂ ᠬᠠᠰᠠᠷ ᠨᠡᠷ ᠳᠣᠬᠢᠶᠠᠯ ᠢ ᠠᠰᠢᠭᠯᠠᠨ ᠵᠡᠵᠢᠭᠢᠷ ᠥᠨᠳᠣᠷ ︵ᠭᠡᠷᠦᠯᠥᠨ ᠮᠦᠷᠡᠨ ᠤ ᠲᠡᠭᠡᠳᠦ ᠣᠷᠣᠰᠬᠠᠯ ᠳᠤ ᠪᠤᠢ︶ ᠲᠤ ᠪᠠᠶᠢᠭᠰᠠᠨ ᠤᠩ ᠬᠠᠨ ᠤ ᠪᠠᠭᠤᠴᠠ ᠶᠢ ᠲᠦᠮᠡ ᠰᠢᠬᠠᠮ ᠴᠡᠷᠢᠭ ᠢᠶᠠᠷ ᠰᠡᠮᠡᠭᠡᠷ ᠪᠥᠰᠡᠯᠡᠪᠠ᠃ ᠭᠤᠷᠪᠡᠨ ᠰᠥᠨᠢ ᠭᠤᠷᠪᠡᠨ ᠡᠳᠣᠷ ᠤᠨ ᠰᠢᠷᠣᠬᠦᠨ ᠳᠡᠶᠢᠨ ᠢᠶᠠᠷ ᠳᠠᠮᠵᠢᠨ ᠮᠢᠩᠭ᠎ᠠ ᠭᠠᠷᠣᠢ ᠴᠡᠷᠢᠭ ᠲᠠᠢ ᠪᠠᠶᠢᠭᠰᠠᠨ ᠮᠦᠷᠳᠡᠭᠡᠨ ᠲᠤᠭᠤᠷᠢᠭᠠᠳ ᠭᠡᠷᠡᠮ ᠬᠠᠰᠢᠶᠠᠨ ᠤ ᠪᠠᠬᠢᠯᠡᠯᠳᠡ ᠰᠠᠶᠢᠳᠠᠢ ᠬᠡᠷᠡᠶᠢᠳ ᠤᠨ ᠴᠡᠷᠢᠭ ᠢ ᠳᠣᠣᠱᠳᠠᠢ ᠢᠯᠠᠵᠠᠢ᠃ ᠤᠩ ᠬᠠᠨ ᠬᠥᠥ ᠨᠢᠯᠬ᠎ᠠ ᠰᠡᠩᠭᠦᠮ ᠲᠠᠢ ᠪᠠᠨ ᠳᠣᠳᠠᠭᠠᠵᠤ ᠭᠠᠷᠣᠭᠠᠳ᠂ ᠣᠩ ᠬᠠᠨ ᠨᠠᠢᠮᠠᠨ ᠤ ᠴᠡᠷᠢᠭ ᠲᠤ ᠠᠯᠠᠭᠳᠠᠵᠦ᠂ ᠰᠡᠩᠭᠦᠮ ᠺᠥᠴᠧ ᠤᠯᠤᠰ ︵ᠤᠳᠣᠬᠢ ᠰᠢᠨᠵᠢᠶᠠᠩ ᠤᠨ ᠺᠥᠴᠧ︶ ᠲᠤ ᠬᠦᠷᠦᠭᠡᠳ ᠠᠯᠠᠭᠳᠠᠪᠠ᠃        ᠳᠡᠮᠥᠵᠢᠨ ᠬᠡᠷᠡᠶᠢᠳ ᠠᠶᠢᠮᠠᠭ ᠢ ᠮᠥᠬᠦᠭᠡᠭᠰᠡᠨ ᠤ ᠰᠡᠬᠦᠯᠡᠷ᠂ ᠬᠡᠷᠡᠶᠢᠳ ᠠᠶᠢᠮᠠᠭ ᠤᠨ ᠠᠷᠠᠳ ᠤᠨ ᠤᠯᠠᠩᠭᠢ ᠶᠢ ᠨᠢ ᠬᠠᠰᠠᠷ ᠤᠨ ᠥᠮᠴᠢ ᠪᠤᠯᠭᠠᠵᠤ ᠥᠭᠴᠠᠢ᠃ ᠡᠶᠢᠮᠤ ᠠᠴᠠ ᠤᠳᠣ ᠶᠢᠨ ᠬᠤᠷᠴᠢᠨ ᠤ ᠰᠠᠭᠤᠭᠠᠯᠢ ᠠᠷᠠᠳ ᠤᠨ ᠳᠣᠳᠣᠷᠠᠬᠢ 何᠂ 和᠂ 郝᠂ 贺᠂ 洪᠂ 齐᠂ 奇᠂ 旗᠂ 网᠂ 瑶 ᠤᠪᠤᠭᠳᠣ ᠬᠥᠮᠥᠰ ᠤᠨ ᠤᠯᠠᠩᠭᠢ ᠨᠢ ᠪᠥᠷ ᠤᠣᠯ ᠤᠨ ᠬᠡᠷᠡᠶᠢᠳ ᠠᠶᠢᠮᠠᠭ ᠤᠨ ᠤᠯᠤᠰ ᠪᠤᠯᠤᠨ᠎ᠠ᠃ ᠬᠠᠰᠠᠷ ᠴᠡᠷᠢᠭ ᠵᠠᠬᠢᠷᠴᠦ ᠨᠠᠢᠮᠠᠨ ᠢ ᠲᠦᠪᠰᠢᠳᠭᠡᠨ ᠳᠠᠳᠠᠲᠤᠩᠭ᠎ᠠ ᠶᠢ ᠤᠯᠵᠠᠯᠠᠭᠰᠠᠨ ᠨᠢ        ᠨᠠᠢᠮᠠᠨ ᠪᠣᠯ ᠲᠦᠷᠦᠭ ᠤᠭᠰᠠᠭᠠᠳᠠᠨ᠂ ᠨᠡᠯᠢᠶᠡᠳ ᠲᠠᠪᠰᠢᠭᠰᠠᠨ ᠠᠶᠢᠮᠠᠭ ᠮᠦᠨ᠃ ᠨᠠᠢᠮᠠᠨ ᠭᠡᠳᠡᠭ ᠨᠢ ᠲᠤᠭᠠᠨ ᠤ 8 ᠲᠠᠢ ᠠᠳᠠᠯᠢ ᠤᠳᠬ᠎ᠠ ᠲᠠᠢ ᠪᠦᠭᠡᠳ ᠲᠡᠬᠦᠨ ᠠᠴᠠ ᠡᠭᠦᠰᠴᠠᠢ᠃ 11 ᠳ᠋ᠣᠭᠡᠷ ᠵᠠᠭᠤᠨ ᠠᠴᠠ ᠡᠬᠢᠯᠡᠨ ︽ᠨᠠᠢᠮᠠᠨ︾ ᠭᠡᠳᠡᠭ ᠨᠡᠷᠡᠶᠢᠳᠦᠯ ᠢᠶᠠᠷ ᠲᠡᠮᠳᠡᠭᠯᠡᠭᠳᠡᠵᠦ ᠡᠬᠢᠯᠡᠵᠡᠢ᠃ 8 ᠳ᠋ᠣᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠪᠠᠷ ᠬᠠᠩᠭᠠᠢ ᠠᠭᠤᠯᠠ ᠶᠢᠨ ᠪᠠᠷᠠᠭᠤᠨᠳᠠᠢ ᠠᠴᠠ ᠠᠯᠳᠠᠢ ᠠᠭᠤᠯᠠ ᠬᠦᠷᠳᠡᠯᠡᠬᠢ ᠦᠷᠭᠡᠨ ᠠᠭᠤᠳᠠᠮ ᠭᠠᠵᠠᠷ ᠤᠷᠣᠨ ᠳᠤ ᠨᠤᠳᠣᠭᠰᠢᠵᠦ ᠪᠠᠶᠢᠵᠠᠢ᠃ 12 ᠳ᠋ᠣᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠪᠠᠷ ᠠᠯᠳᠠᠢ᠂ ᠬᠠᠷᠠᠬᠤᠷᠣᠮ᠂ ᠠᠯᠤᠢ ᠰᠢᠷᠢᠰ᠂ ᠬᠦᠭᠡ ᠡᠷᠴᠢᠰ᠂ ᠡᠷᠴᠢᠰ ᠮᠦᠷᠡᠨ ᠬᠠᠪᠢ ᠪᠠᠷ ᠨᠤᠳᠣᠭᠯᠠᠵᠦ ᠪᠠᠶᠢᠵᠠᠢ᠃ ᠲᠡᠳᠡ ᠤᠶᠢᠭᠤᠷ ᠦᠰᠦᠭ ᠭᠡᠷᠡᠭᠯᠡᠵᠦ᠂ ᠬᠠᠴᠢ ᠤᠰᠣᠨ ᠳᠤ ᠰᠠᠭᠤᠵᠤ ᠪᠠᠶᠢᠪᠠ᠃ ᠲᠠᠯᠠᠭ ᠭᠡᠳᠡᠭ ᠭᠠᠵᠠᠷ ᠡᠵᠡᠨ ᠤ ᠵᠤᠨ ᠤ ᠤᠷᠳᠣ ᠪᠠᠶᠢᠭᠰᠠᠨ ᠪᠦᠭᠡᠳ ᠵᠠᠵᠸᠠᠨ ᠨᠠᠭᠤᠷ ᠭᠡᠳᠡᠭ ᠭᠠᠵᠠᠷ ᠲᠤ ᠦᠷᠭᠦᠭᠡ ᠮᠠᠶᠢᠬᠠᠨ ᠲᠠᠢ ᠪᠠᠶᠢᠵᠦ᠂ ᠠᠳᠠᠷᠢ ᠡᠪᠺᠧ ᠠᠭᠤᠯᠠ᠂ ᠪᠠᠺᠠᠷᠠᠰ ᠤᠯᠤᠮ ᠵᠡᠷᠭᠡ ᠭᠠᠵᠠᠷ ᠡᠪᠦᠯᠵᠢᠵᠦ ᠪᠠᠶᠢᠭᠰᠠᠨ ᠭᠡᠳᠡᠭ᠃ ᠨᠠᠢᠮᠠᠨ ᠤ ᠢᠨᠠᠭᠴᠠ ᠪᠢᠯᠭᠡ ᠬᠠᠨ ᠨᠢᠭᠡᠨᠳᠡ ᠦᠬᠦᠵᠦ ᠲᠡᠬᠦᠨ ᠤ ᠠᠬᠠᠮᠠᠳ ᠭᠦᠦ ᠲᠠᠶᠢᠪᠤᠭ᠎ᠠ ᠨᠠᠢᠮᠠᠨ ᠤ ᠬᠠᠨ ᠤᠷᠣ ᠳᠤ ᠰᠠᠭᠤᠭᠰᠠᠨ ᠤ ᠲᠠᠷᠠᠭ᠎ᠠ ᠠᠯᠳᠠᠨ ᠤᠯᠤᠰ ᠤᠨ ᠬᠠᠭᠠᠨ ᠲᠡᠬᠦᠨ ᠳᠤ ᠶᠡᠭᠡ ᠸᠠᠩ ᠤᠨ ᠴᠤᠯᠠ ᠰᠣᠶᠤᠷᠬᠠᠪᠠ᠃ ᠡᠨᠡᠬᠦ ᠬᠢᠳᠡᠳ ᠭᠡᠯᠡᠨ ᠤ ︽ᠳ᠋ᠠ ᠸᠠᠩ︾ ᠭᠡᠬᠦ ᠴᠤᠯᠠ ᠨᠢ ᠮᠤᠩᠭᠤᠯᠴᠤᠳ ᠤᠨ ᠠᠶᠠᠯᠭᠤ ᠶᠢ ᠲᠠᠭᠠᠯᠳᠣᠨ ︽ᠲᠠᠶᠠᠨ ᠬᠠᠨ︾ ᠪᠤᠯᠵᠦ ᠤᠯᠠᠷᠢᠵᠠᠢ᠃ ᠲᠠᠶᠠᠨ ᠬᠠᠨ ᠪᠣᠯ ᠰᠢᠨᠤᠬᠠᠢ᠂ ᠶᠡᠭᠡ ᠰᠠᠨᠠᠭ᠎ᠠ ᠲᠠᠢ ᠪᠦᠭᠡᠳ ᠠᠶᠤᠮᠠᠳᠠᠭᠠᠢ᠂ ᠲᠤᠷᠣᠢ ᠪᠠᠭᠤᠷᠠᠢ ᠬᠦᠮᠦᠨ ᠶᠤᠮ᠃ ᠲᠡᠷᠡ ᠦᠪᠡᠷ ᠢᠶᠠᠨ ᠨᠡᠢᠮᠠᠨ ᠠᠶᠢᠮᠠᠭ ᠤᠨ ᠬᠠᠨ ᠪᠤᠯᠴᠢᠬᠠᠭᠠᠳ ᠲᠡᠭᠷᠢ ᠲᠡᠭᠡᠷ᠎ᠡ ᠨᠢᠭᠡ ᠨᠠᠷᠠ ᠪᠠᠶᠢᠨ᠎ᠡ᠂ ᠭᠠᠵᠠᠷ ᠲᠡᠭᠡᠷ᠎ᠡ ᠭᠡᠷᠬᠢᠨ ᠬᠤᠶᠡᠷ ᠬᠠᠭᠠᠨ ᠪᠠᠶᠢᠵᠦ ᠪᠤᠯᠬᠤ ᠪᠤᠢ᠂ ᠪᠢᠳᠡ ᠤᠴᠢᠵᠦ ᠲᠤᠷᠣᠨ᠎ᠠ ᠵᠦᠭ ᠤᠨ ᠮᠤᠩᠭᠤᠯᠴᠣᠳ ᠢ ᠡᠵᠡᠯᠡᠨ ᠠᠪᠤᠶ᠎ᠡ ᠭᠡᠳ 1204 ᠤᠨ ᠳᠤ ᠬᠦᠷᠰᠢ ᠵᠡᠷᠭᠡᠯᠡᠳᠡᠭᠡ ᠤᠩᠭᠤ ᠠᠶᠢᠮᠠᠭ ᠲᠠᠢ ᠬᠤᠯᠪᠤᠭᠠᠯᠠᠨ ᠲᠡᠮᠦᠵᠢᠨ ᠲᠠᠢ ᠪᠠᠶᠢᠯᠳᠣᠬᠤ ᠪᠠᠷ ᠪᠤᠯᠵᠤᠪᠠ᠃ ᠡᠭᠦᠨ ᠳᠤ ᠤᠩᠭᠤ ᠠᠶᠢᠮᠠᠭ ᠴᠡᠷᠢᠭ ᠭᠠᠷᠭᠠᠭᠰᠠᠨ ᠦᠭᠡᠢ ᠮᠦᠷᠳᠡᠭᠡᠨ ᠬᠠᠷᠢᠨ ᠡᠨᠡᠬᠦ ᠴᠢᠮᠡᠭᠡ ᠶᠢ ᠲᠡᠮᠦᠵᠢᠨ ᠳᠤ ᠮᠡᠳᠡᠭᠳᠡᠬᠦ ᠶᠢᠨ ᠬᠠᠮᠳᠣ ᠲᠡᠮᠦᠵᠢᠨ ᠢ ᠬᠠᠪᠰᠣᠷᠣᠨ ᠨᠠᠢᠮᠠᠨ ᠢ ᠲᠠᠶᠢᠯᠠᠬᠤ ᠪᠠᠷ ᠪᠤᠯᠪᠠ᠃ ᠲᠡᠮᠦᠵᠢᠨ ᠴᠢᠮᠡᠭᠡ ᠶᠢ ᠤᠯᠤᠮᠠᠭᠴᠠ ᠤᠷᠢᠳᠠᠪᠠᠷ ᠴᠡᠷᠢᠭ ᠬᠦᠳᠡᠯᠭᠡᠵᠦ ᠰᠠᠭᠠᠷᠢ ᠭᠡᠭᠡᠷ᠎ᠡ ᠬᠦᠷᠴᠦ ᠪᠠᠭᠤᠳᠠᠯᠯᠠᠭᠠᠳ ᠰᠦᠨᠢᠵᠢᠨ ᠤᠯᠠᠨ ᠲᠦᠳᠡᠭ ᠭᠠᠯ ᠨᠤᠴᠤᠭᠠᠵᠤ ᠭᠡᠷᠡᠯᠳᠦᠭᠦᠯᠥᠭᠰᠡᠨ ᠳᠤ ᠲᠠᠶᠢᠰᠣᠨ ᠤ ᠴᠡᠷᠢᠭ ᠶᠡᠭᠡᠳᠡ ᠰᠡᠵᠢᠭᠯᠡᠪᠡ᠃ ᠨᠠᠢᠮᠠᠨ ᠤ ᠲᠠᠶᠠᠨ ᠬᠠᠨ ᠰᠠᠷᠢ ᠠᠭᠤᠯᠠ ᠶᠢᠨ ᠨᠠᠬᠤ ᠬᠤᠨ ᠳᠤ ᠴᠡᠴᠡᠷ ᠮᠠᠶᠢᠬᠠᠨ ᠵᠠᠰᠠᠵᠤ᠂ ᠭᠤᠤᠯ ᠬᠦᠴᠦᠨ ᠢᠶᠠᠨ ᠠᠭᠤᠯᠠᠨ ᠦᠪᠤᠷ᠂ ᠬᠤᠶᠡᠷ ᠵᠢᠭᠦᠷ ᠢᠶᠠᠨ ᠵᠡᠭᠦᠨ ᠪᠠᠷᠠᠭᠤᠨ ᠳᠤ ᠪᠠᠭᠤᠯᠭᠠᠪᠠ᠃ ᠮᠤᠩᠭᠤᠯ ᠠᠶᠢᠮᠠᠭ ᠤᠨ ᠬᠠᠰᠠᠷ ᠴᠡᠷᠢᠭ ᠲᠠᠶᠢᠴᠢᠯᠠᠵᠤ ᠭᠡᠰᠡᠭᠯᠡᠨ ᠪᠦᠰᠡᠯᠡᠭᠡᠳ ᠴᠢᠬᠤᠯᠠ ᠭᠠᠵᠠᠷ ᠪᠦᠭᠭᠦᠯᠳᠡ ᠬᠢᠪᠡ᠃ ᠪᠠᠶᠢᠯᠳᠣᠭᠠᠨ ᠡᠬᠢᠯᠡᠮᠡᠭᠴᠡ ᠴᠢᠩᠭᠢᠰ ᠬᠠᠭᠠᠨ ᠦᠪᠡᠷ ᠤᠨ ᠪᠡᠶ᠎ᠡ ᠪᠠᠷ ᠬᠤᠰᠢᠭᠤᠴᠢᠯᠠᠵᠤ ᠭᠤᠷᠪᠠᠨ ᠲᠠᠯ᠎ᠠ ᠠᠴᠠ ᠬᠠᠪᠴᠢᠨ ᠰᠢᠷᠦᠭᠦᠨ ᠲᠠᠭᠠᠷᠢᠭᠰᠠᠨ ᠳᠤ ᠨᠠᠢᠮᠠᠨ ᠤ ᠴᠡᠷᠢᠭ ᠲᠤᠯᠤᠭᠠᠢ ᠰᠡᠭᠦᠯ ᠢᠶᠠᠨ ᠬᠠᠮᠠᠭᠠᠯᠠᠨ ᠴᠢᠳᠠᠬᠤ ᠦᠭᠡᠢ ᠪᠤᠯᠤᠭᠠᠳ ᠠᠭᠤᠯᠠᠨ ᠲᠡᠭᠡᠷ᠎ᠡ ᠰᠢᠬᠠᠭᠳᠠᠨ ᠭᠠᠷᠣᠭᠰᠠᠨ ᠳᠤ ᠤᠯᠠᠨ ᠴᠡᠷᠢᠭ ᠠᠭᠤᠯᠠᠨ ᠵᠢᠯᠠᠭ᠎ᠠ ᠳᠤ ᠰᠢᠬᠠᠯᠳᠣᠨ ᠤᠨᠠᠭᠠᠳ ᠲᠤᠭᠠᠯᠠᠰᠢ ᠦᠭᠡᠢ ᠣᠯᠠᠨ ᠦᠬᠦᠵᠦ᠂ ᠬᠤᠷᠢᠨ ᠲᠦᠮᠡᠨ ᠨᠠᠢᠮᠠᠨ ᠤ ᠴᠡᠷᠢᠭ ᠪᠤᠳᠠ ᠨᠢᠷᠭᠡᠭᠳᠡᠨ᠂ ᠡᠯ᠎ᠡ ᠠᠶᠢᠮᠠᠭ ᠤᠨ ᠵᠠᠩᠵᠤᠨ ᠨᠠᠷ ᠪᠠᠭᠤᠵᠤ ᠦᠭᠭᠦᠭᠡᠳ ᠮᠤᠩᠭᠤᠯ ᠤᠨ ᠴᠡᠷᠢᠭ ᠢᠯᠠᠯᠳᠠ ᠤᠯᠪᠠ᠃ ᠮᠤᠩᠭᠤᠯ ᠤᠨ ᠴᠡᠷᠢᠭ ᠨᠠᠢᠮᠡᠨ ᠠᠶᠢᠮᠠᠭ ᠢ ᠢᠯᠠᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠲᠠᠶᠠᠨ ᠬᠠᠭᠠᠨ ᠤ ᠠᠶᠢᠮᠠᠭ ᠤᠨ ᠨᠢᠭᠡ ᠬᠦᠮᠦᠨ ᠲᠤᠳᠠᠭᠠᠪᠠ᠃ ᠬᠠᠰᠠᠷ ᠲᠡᠭᠦᠨ ᠢ ᠠᠮᠢᠳᠤ ᠪᠠᠷ ᠪᠠᠷᠢ ᠭᠡᠰᠡᠨ ᠳᠤ ᠪᠠᠳᠦ ᠲᠡᠷᠡ ᠬᠦᠮᠦᠨ ᠢ ᠬᠦᠭᠡᠭᠡᠵᠦ ᠭᠦᠢᠴᠡᠭᠡᠳ ᠠᠮᠢᠳᠦ ᠪᠠᠷ ᠪᠠᠷᠢᠵᠦ ᠢᠷᠡᠪᠡ᠂ ᠦᠵᠡᠭᠰᠡᠨ ᠴᠢᠨᠢ ᠡᠪᠦᠷ ᠲᠤᠨᠢ ᠨᠢᠭᠡ ᠲᠠᠮᠠᠭ᠎ᠠ ᠪᠠᠶᠢᠵᠠᠢ᠃ ᠬᠠᠰᠠᠷ᠄ ︽ᠲᠠᠨ ᠤ ᠤᠯᠠᠨ ᠠᠶᠢᠮᠠᠭ ᠴᠡᠷᠢᠭ ᠴᠦᠮ ᠮᠠᠨ ᠢ ᠲᠠᠭᠠᠵᠦ ᠪᠠᠶᠢᠬᠤ ᠳᠤ᠂ ᠴᠢ ᠡᠨᠡ ᠶᠠᠭᠤᠮ᠎ᠠ ᠶᠢ ᠡᠪᠦᠷᠯᠡᠵᠦ ᠬᠠᠮᠢᠭ᠎ᠠ ᠤᠴᠢᠬᠤ ᠪᠤᠢ︖︾ ᠬᠡᠰᠡᠨ ᠳᠤ᠂ ᠲᠡᠷᠡ ᠬᠦᠮᠦᠨ᠄ ︽ᠮᠢᠨᠦ ᠪᠡᠶ᠎ᠡ ᠲᠤᠰᠢᠶᠠᠯ ᠤᠨ ᠭᠠᠵᠠᠷ ᠢᠶᠠᠨ ᠦᠬᠦᠳᠡᠯ᠎ᠡ ᠰᠠᠬᠢᠨ᠎ᠠ᠃ ᠡᠨᠡ ᠲᠠᠮᠠᠭ᠎ᠠ ᠶᠢ ᠬᠠᠭᠤᠴᠢᠨ ᠡᠵᠡᠨ ᠳᠡᠭᠡᠨ ᠬᠦᠷᠭᠡᠵᠦ ᠦᠭᠬᠦᠶ᠎ᠡ ᠬᠡᠰᠡᠨ ᠶᠤᠮ᠃ ᠠᠵᠠ ᠲᠤᠳᠠᠵᠤ ᠲᠠᠨ ᠳᠤ ᠪᠠᠷᠢᠭᠳᠠᠪᠠ︾ ᠬᠡᠪᠡ᠃ ᠬᠠᠰᠠᠷ᠄ ︽ᠴᠢ ᠠᠯᠢ ᠤᠪᠤᠭ ᠤᠨ ᠬᠦᠮᠦᠨ᠂ ᠶᠠᠮᠠᠷ ᠲᠤᠰᠢᠶᠠᠯ ᠲᠠᠢ ᠪᠠᠶᠢᠭᠰᠠᠨ ᠪᠤᠢ︖︾ ᠭᠡᠰᠡᠨ ᠳᠤ ᠲᠡᠷᠡ ᠬᠦᠮᠦᠨ᠄ ︽ᠪᠢ ᠪᠤᠯ ᠤᠶᠢᠭᠤᠷ ᠬᠦᠮᠦᠨ᠂ ᠮᠢᠨᠦ ᠨᠠᠷ᠎ᠡ ᠲᠠᠲᠠᠳᠤᠩᠭ᠎ᠠ ᠭᠡᠳᠡᠭ᠃ ᠮᠢᠨᠦ ᠡᠵᠡᠨ ᠡᠨᠡ ᠲᠠᠮᠠᠭ᠎ᠠ ᠶᠢ ᠨᠠᠳᠠ ᠳᠤᠰᠢᠶᠠᠵᠦ᠂ ᠢᠲᠡᠰᠢ ᠶᠢ ᠭᠠᠷᠭᠠᠬᠤ ᠪᠠ ᠤᠷᠤᠭᠤᠯᠬᠤ ᠶᠠᠪᠤᠳᠠᠯ ᠢ ᠨᠠᠳᠠᠳᠦ ᠳᠤᠰᠢᠶᠠᠭᠰᠠᠨ ᠪᠢᠯᠡ︾ ᠭᠡᠪᠡ᠃ ᠬᠠᠰᠠᠷ᠄ ︽ᠡᠨᠡ ᠲᠠᠮᠠᠭ᠎ᠠ ᠶᠢ ᠶᠠᠭᠤᠨ ᠳᠤ ᠬᠡᠷᠡᠭᠯᠡᠬᠦ ᠪᠤᠢ︖︾ ᠭᠡᠰᠡᠨ ᠳᠤ ᠲᠠᠲᠠᠳᠤᠩᠭ᠎ᠠ᠄ ︽ᠰᠠᠶᠢᠨ ᠬᠦᠮᠦᠨ ᠢ ᠰᠤᠩᠭᠤᠵᠦ ᠵᠠᠷᠯᠢᠭ ᠪᠢᠴᠢᠭ ᠶᠠᠪᠤᠭᠤᠯᠬᠤ ᠠᠯᠢᠪᠠ ᠥᠢᠯᠡᠰ ᠲᠤ ᠬᠡᠷᠡᠭᠯᠡᠳᠡᠭ︾ ᠭᠡᠪᠡ᠃ ᠬᠠᠰᠠᠷ ᠮᠠᠭᠳᠠᠨ ᠰᠠᠶᠢᠰᠢᠶᠠᠵᠤ᠂ ᠰᠢᠳᠣᠷᠭᠤ ᠡᠯᠪᠡᠷᠢᠯᠳᠣ ᠬᠥᠮᠥᠨ ᠭᠡᠮᠡᠨ ᠳᠡᠮᠤᠵᠢᠨ ᠳᠤ ᠮᠡᠳᠡᠬᠦᠯᠵᠤ᠂ ᠠᠯᠢᠪᠠ ᠪᠢᠴᠢᠭ ᠶᠠᠪᠤᠭᠤᠯᠬᠤ ᠳᠤ ᠬᠡᠷᠡᠭᠯᠡᠬᠦ ᠪᠠᠷ ᠳᠡᠷᠡ ᠳᠡᠮᠠᠭ᠎ᠠ ᠶᠢ ᠮᠥᠨ ᠬᠦ ᠳᠠᠳᠠᠳᠣᠩᠭ᠎ᠠ ᠳᠤ ᠳᠣᠰᠢᠶᠠᠪᠠ᠃ ᠬᠠᠰᠠᠷ ᠳᠠᠳᠠᠳᠣᠩᠭ᠎ᠠ ᠶᠢ ᠪᠠᠭᠰᠢ ᠪᠠᠷᠢᠵᠤ ᠪᠢᠴᠢᠭ ᠬᠠᠤᠯᠢ᠂ ᠴᠡᠷᠢᠭ ᠤᠨ ᠪᠤᠳᠣᠯᠭ᠎ᠠ ᠵᠡᠷᠭᠡ ᠪᠢᠴᠢᠭ ᠤᠨ ᠡᠷᠳᠡᠮ ᠵᠢᠭᠠᠯᠭᠠᠪᠠ᠃ ᠪᠠᠰᠠ ᠳᠠᠶᠢᠽᠢ᠂ ᠸᠠᠩ ᠨᠡᠷ ᠲᠤ ᠪᠢᠴᠢᠭ ᠡᠷᠳᠡᠮ ᠵᠢᠭᠠᠯᠭᠠᠪᠠ᠃        ᠮᠤᠩᠭᠤᠯ ᠠᠶᠢᠮᠠᠭ ᠤᠨ ᠬᠢᠨ 1204 ᠤᠨ ᠠᠴᠠ ᠡᠬᠢᠯᠡᠵᠤ ᠳᠠᠮᠠᠭ᠎ᠠ ᠶᠢ ᠬᠡᠷᠡᠭᠯᠡᠵᠤ ᠰᠣᠷᠴᠠᠢ᠃ ᠡᠨᠡ ᠪᠣᠯ ᠮᠤᠩᠭᠤᠯ ᠤᠨ ᠨᠡᠶᠢᠭᠡᠮ ᠪᠤᠯᠪᠠᠰᠣᠨ ᠱᠠᠳᠣᠨ ᠵᠥᠭ ᠲᠤ ᠳᠡᠮᠡᠤᠯᠥᠭᠰᠡᠨ ᠤ ᠨᠢᠭᠡᠨ ᠴᠢᠬᠤᠯᠠ ᠢᠯᠡᠳᠭᠡᠮᠵᠢ ᠪᠤᠶᠤ ᠠᠯᠬᠤᠮ ᠪᠤᠯᠤᠨ᠎ᠠ᠃ ᠳᠠᠳᠠᠳᠣᠩᠭ᠎ᠠ ᠶᠢᠨ ᠳᠠᠮᠠᠭ᠎ᠠ ᠳᠡᠭᠡᠷᠡᠬᠢ ᠥᠰᠥᠭ ᠤᠨ ᠤᠳᠬ᠎ᠠ ᠨᠢ ︽ᠳᠡᠭᠷᠢ ᠳᠡᠭᠡᠷ᠎ᠡ ᠰᠠᠬᠢᠭᠤᠯᠰᠣᠨ ᠪᠤᠢ᠂ ᠳᠡᠯᠡᠭᠡᠢ ᠳᠡᠭᠡᠷ᠎ᠡ ᠬᠠᠭᠠᠨ ᠪᠤᠢ᠂ ᠰᠠᠬᠢᠭᠤᠯᠰᠣᠨ ᠢᠪᠡᠭᠡᠳᠣᠭᠡᠢ᠃ ᠪᠥᠭᠦ ᠬᠥᠮᠥᠨ ᠲᠥᠷᠥᠯᠬᠢᠳᠠᠨ ᠤ ᠡᠵᠡᠨ ᠤ ᠳᠠᠮᠠᠭ᠎ᠠ︾ ᠭᠡᠳᠡᠭ ᠶᠤᠮ᠃ ᠴᠢᠩᠭᠢᠰ ᠬᠠᠭᠠᠨ ᠤ ᠳᠥᠷᠤ ᠶᠢᠨ ᠬᠠᠰ ᠳᠠᠮᠠᠭᠠᠨ ᠳᠡᠭᠡᠷᠡᠬᠢ ᠥᠰᠦᠭ ᠨᠢ ︽ᠮᠥᠩᠭᠡ ᠲᠡᠭᠷᠢ ᠶᠢᠨ ᠬᠥᠴᠤᠨ ᠢᠶᠠᠷ ᠶᠡᠭᠡ ᠮᠤᠩᠭᠤᠯ ᠤᠯᠤᠰ ᠤᠨ ᠳᠠᠯᠠᠢ ᠬᠠᠭᠠᠨ ᠤ ᠵᠠᠷᠯᠢᠭ ᠵᠢᠯ ᠪᠤᠯᠭᠠᠨ ᠢᠷᠭᠡᠨ ᠳᠤ ᠬᠥᠷᠪᠡᠰᠣ ᠪᠢᠰᠢᠷᠡᠳᠣᠭᠡᠢ᠂ ᠠᠶᠣᠳᠣᠭᠠᠢ︾ ᠭᠡᠵᠤ ᠤᠶᠢᠭᠤᠷᠵᠢᠨ ᠮᠤᠩᠭᠤᠯ ᠦᠰᠥᠭ ᠢᠶᠠᠷ ᠪᠢᠴᠢᠭᠰᠡᠨ ᠶᠤᠮ᠃        ᠬᠠᠰᠠᠷ ᠠᠯᠳᠠᠨ ᠤᠯᠤᠰ ᠢ ᠲᠠᠶᠢᠯᠠᠨ ᠲᠠᠭᠠᠭᠤᠯᠬᠤ ᠲᠠᠶᠢᠨ ᠳᠤ ᠤᠷᠣᠯᠴᠠᠭᠰᠠᠨ ᠨᠢ        ᠵᠦᠷᠴᠢᠨ ᠦᠨᠳᠦᠰᠦᠳᠡᠨ ᠢ ᠴᠢᠨ ᠤᠯᠤᠰ ᠠᠴᠠ ᠡᠮᠦᠨ᠎ᠡ ᠰᠤ᠋ ᠱᠧᠨ ︵肃慎︶᠂ ᠪᠠᠷᠠᠭᠤᠨ ᠬᠠᠨ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠢ ᠯᠸᠤ ︵挹娄︶᠂ ᠰᠦᠢ ᠲᠠᠩ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠮᠦᠸᠧ ᠾᠧ ︵靺鞨︶᠂ ᠲᠠᠪᠤᠨ ᠲᠦᠷᠦ ᠶᠢᠨ ᠦᠶ᠎ᠡ ᠳᠤ ᠵᠦᠷᠴᠢᠨ ᠭᠡᠵᠤ ᠨᠡᠷᠡᠯᠡᠳᠡᠭ ᠪᠤᠯᠪᠠ᠃ 1115 ᠤᠨ ᠳᠤ ᠵᠦᠷᠴᠢᠨ ᠦᠨᠳᠣᠰᠣᠳᠡᠨ ᠤ ᠸᠠᠨᠶᠠᠨ ᠠᠭᠤᠳᠠ ᠠᠯᠳᠠᠨ ᠤᠯᠤᠰ ᠢ ᠪᠠᠶᠢᠭᠤᠯᠵᠦ᠂ ᠨᠡᠶᠢᠰᠯᠡᠯ ᠢᠶᠠᠨ ᠾᠦᠢ ᠨᠢᠩ ︵ᠣᠳᠣᠬᠢ ᠬᠠᠷᠠᠮᠦ᠋ᠷᠡᠨ ᠤ ᠠ ᠴᠧᠩ ᠤᠨ ᠡᠮᠦᠨ᠎ᠡ︶ ᠠᠴᠠ ᠵᠦᠩᠳᠦ ᠳᠤ᠂ ᠲᠠᠭᠢᠭᠠᠳ ᠪᠢᠶᠠᠨᠵᠢᠩ ︵ᠣᠳᠣᠬᠢ ᠾᠧᠨᠠᠨ ᠤ ᠺᠠᠶᠢᠹᠧᠩ︶ ᠳᠤ ᠰᠢᠯᠵᠢᠬᠦᠯᠵᠡᠢ᠃ 1211 ᠤᠨ ᠳᠤ ᠴᠢᠩᠭᠢᠰ ᠬᠠᠭᠠᠨ ᠬᠠᠰᠠᠷ ᠢᠶᠠᠷ ᠵᠡᠭᠦᠨ ᠭᠠᠷ ᠤᠨ ᠴᠡᠷᠢᠭ ᠢ ᠵᠠᠬᠢᠷᠣᠭᠤᠯᠵᠤ ᠠᠯᠳᠠᠨ ᠤᠯᠤᠰ ᠢ ᠪᠠᠶᠢᠯᠳᠣᠭᠤᠯᠪᠠ᠃ ᠬᠠᠰᠠᠷ ᠬᠤᠩᠭᠢᠷᠠᠳ ᠠᠶᠢᠮᠠᠭ ᠤᠨ ᠠᠯᠠᠴᠢ᠂ ᠪᠦᠴᠡ᠂ ᠵᠦᠷᠴᠢᠳᠡᠢ ᠲᠠᠢ ᠬᠠᠮᠳᠣ ᠲᠠᠯᠠᠢ ᠲᠠᠭᠠᠤ ᠵᠡᠭᠦᠨᠰᠢᠯᠡᠭᠡᠳ ᠠᠯᠳᠠᠨ ᠤᠯᠤᠰ ᠤᠨ ᠵᠢᠢ ᠵᠸᠤ᠂ ᠢᠵᠸᠤ ᠶᠢ ᠪᠠᠶᠢᠯᠳᠣᠵᠤ ᠡᠪᠳᠡᠵᠡᠢ᠃ 1213 ᠤᠨ ᠤ ᠨᠠᠮᠤᠷ ᠤᠳᠴᠢᠬᠢᠨ ᠨᠤᠶᠠᠨ ᠪᠠ ᠵᠦᠷᠴᠢᠳᠡᠢ ᠲᠠᠢ ᠬᠠᠮᠳᠣ ᠠᠯᠳᠠᠨ ᠤᠯᠤᠰ ᠤᠨ ᠵᠢᠢ ᠵᠸᠤ ︵ᠾᠧᠪᠸᠢ ᠶᠢᠨ ᠵᠢᠢ ᠰᠢᠶᠠᠨ︶᠂ ᠫᠢᠩ ᠵᠸᠤ ︵ᠾᠧᠪᠸᠢ ᠶᠢᠨ ᠯᠤ᠋ ᠯᠥᠩ︶᠂ ᠯᠤᠸᠠᠨ ᠵᠸᠤ ︵ᠾᠧᠪᠸᠢ ᠶᠢᠨ ᠯᠤᠸᠠᠨ ᠰᠢᠶᠠᠨ︶᠂ ᠯᠢᠶᠤᠤ ᠰᠢ ᠶᠢᠨ ᠤᠯᠠᠨ ᠵᠸᠤ ᠶᠢᠨ ᠭᠠᠵᠠᠷ ᠢ ᠲᠠᠶᠢᠯᠠᠬᠤ ᠪᠦᠷᠢ ᠲᠡᠶᠢᠯᠵᠦ ᠪᠠᠶᠢᠯᠳᠣᠬᠤ ᠪᠦᠷᠢ ᠢᠯᠠᠭᠠᠳ ᠬᠠᠨᠳᠣᠭᠰᠠᠨ ᠵᠦᠭ ᠲᠤ ᠲᠠᠶᠢᠰᠣᠨ ᠦᠭᠡᠢ ᠬᠠᠷᠪᠤᠭᠰᠠᠨ ᠰᠤᠮᠤ ᠬᠤᠭᠤᠰᠣᠨ ᠦᠭᠡᠢ ᠲᠤᠯᠠ ᠠᠯᠳᠠᠨ ᠤᠯᠤᠰ ᠤᠨ ᠴᠡᠷᠢᠭ ᠪᠠᠷ᠎ᠠ ᠶᠢ ᠨᠢ ᠬᠠᠷᠠᠮᠠᠭᠴᠠ ᠪᠤᠳᠠᠷᠠᠨ ᠰᠠᠷᠨᠢᠵᠦ ᠪᠠᠭᠤᠨ ᠦᠭᠭᠦᠭᠡᠳ ᠱᠠᠨᠳᠦ᠋ᠩ ᠾᠧᠪᠸᠢ ᠶᠢᠨ ᠡᠯ᠎ᠡ ᠵᠢᠶᠦ᠋ᠨ ᠢ ᠪᠠᠶᠢᠯᠳᠣᠨ ᠲᠠᠭᠠᠭᠤᠯᠵᠤ ᠪᠤᠴᠠᠪᠠ᠃ 1214 ᠤᠨ ᠳᠤ ᠠᠯᠠᠴᠢ᠂ ᠵᠦᠷᠴᠢᠳᠡᠢ᠂ ᠲᠤᠯᠤᠨ ᠴᠠᠷᠪᠢ ᠲᠠᠢ ᠬᠠᠮᠳᠣ ᠬᠠᠰᠠᠷ ᠵᠡᠭᠦᠨ ᠭᠠᠷ ᠤᠨ ᠴᠡᠷᠢᠭ ᠢ ᠵᠠᠬᠢᠷᠴᠦ ᠠᠯᠳᠠᠨ ᠤᠯᠤᠰ ᠤᠨ ᠤᠮᠠᠷᠠᠳᠣ ᠨᠡᠶᠢᠰᠯᠡᠯ ᠳ᠋ᠠ ᠨᠢᠩ ᠹᠥ᠋ ︵ᠤᠳᠣᠬᠢ ᠦᠪᠤᠷ ᠮᠤᠩᠭᠤᠯ ᠤᠨ ᠨᠢᠩ ᠴᠧᠩ ᠬᠤᠳᠠ ᠶᠢᠨ ᠳ᠋ᠠ ᠮᠢᠩ ᠴᠧᠩ ᠬᠤᠳᠠ︶ ᠶᠢ ᠪᠠᠶᠢᠯᠳᠣᠨ ᠡᠵᠡᠯᠡᠭᠡᠳ᠂ ᠵᠦᠷᠴᠢᠨ ᠤ ᠲᠦᠷᠦᠭᠦᠦ ᠹᠦᠬᠠᠨᠤ ︵ᠹᠦ᠋ ᠰᠢᠶᠡᠨ ᠸᠠᠨ ᠨᠤ᠋︶ ᠶᠢ ᠪᠠᠭᠤᠯᠭᠠᠨ ᠠᠪᠴᠤ᠂ ᠨᠠᠭᠤ ᠮᠦᠷᠡᠨ ︵ᠤᠳᠣᠬᠢ ᠨᠤᠨ ᠮᠦᠷᠡᠨ︶᠂ ᠤᠯᠠ ᠮᠦᠷᠡᠨ ︵ᠰᠤᠩᠭᠠᠷᠢ ᠮᠦᠷᠡᠨ︶ ᠲᠠᠭᠠᠤ ᠤᠷᠣᠭᠰᠢᠯᠠᠵᠤ᠂ ᠠᠯᠳᠠᠨ ᠤᠯᠤᠰ ᠤᠨ ᠵᠡᠭᠦᠨ ᠬᠤᠶᠢᠳᠣ ᠤᠷᠣᠨ ᠤ ᠤᠯᠠᠨ ᠬᠤᠳᠠᠳ ᠢ ᠪᠠᠭᠤᠯᠭᠠᠨ ᠠᠪᠤᠭᠠᠳ᠂ ᠲᠤᠭᠤᠷ ᠤᠨ ᠭᠤᠤᠯ ᠢ ᠦᠭᠰᠣᠨ ᠮᠤᠩᠭᠤᠯ ᠨᠤᠳᠤᠭ ᠲᠤ ᠪᠠᠨ ᠪᠤᠴᠠᠭᠰᠠᠨ ᠪᠠᠶᠢᠨ᠎ᠠ᠃ ︵ᠦᠷᠭᠦᠯᠵᠢᠯᠡᠯ ᠪᠣᠢ︶
 
ᠢᠷᠡᠯᠲᠡ᠄ ᠲᠤᠮᠳᠠᠳᠤ ᠤᠯᠤᠰ ᠤᠨ ᠮᠤᠩᠭᠤᠯ ᠬᠡᠯᠡᠡ ᠤ ᠰᠤᠨᠢᠠ ᠮᠠᠳᠡᠭᠡ ᠶᠢᠨ ᠰᠦᠯᠵᠢᠶ᠎ᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠭᠠᠳᠠ ᠮᠠᠶᠢᠷᠡᠨ ᠤ ᠪᠣᠰᠣᠯᠭ᠎ᠠ
ᠶᠡᠭᠡ ᠵᠣᠣ ᠶᠢᠨ ᠴᠢᠭᠤᠯᠭᠠᠠ ᠤ ᠬᠡᠷᠡᠭ ᠬᠤᠪᠢᠰᠣᠯ
ᠲᠡᠤᠬᠡᠨ ᠨᠡᠷᠡᠳᠤ ᠬᠦᠮᠦᠨ — ᠵᠤᠩᠳᠣᠯᠠᠢ
ᠲᠡᠤᠬᠡᠨ ᠨᠡᠷᠡᠳᠤ ᠬᠦᠮᠦᠨ — ᠮᠠᠨᠳᠤᠯᠢ ᠠᠬᠠᠯᠠᠬᠤ
ᠲᠡᠤᠬᠡᠨ ᠨᠡᠷᠡᠳᠤ ᠬᠦᠮᠦᠨ — ᠨᠤᠶᠠᠨ ᠳ᠋ᠠᠷ᠎ᠠ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05002246号